LƐSIN 17

Uskayn Pɔsin Jizɔs Bi?

Printɛd Ɛdishɔn

As wi de lan bɔt di tin dɛn we Jizɔs bin tɔk ɛn du di tɛm we i bin de na di wɔl, wi go lan bɔt kwaliti dɛn we go mek wi want fɔ bi Jizɔs in padi ɛn bi padi bak to in Papa we na Jiova. Wetin na sɔm pan dɛn fayn kwaliti dɛn de? Ɛn aw wi go falamakata Jizɔs na wi yon layf?

1. Aw Jizɔs tan lɛk in Papa?

We Jizɔs bin de na ɛvin, i bin de wach in Papa we gɛt lɔv ɛn lan frɔm am fɔ lɔng tɛm. Na dat mek Jizɔs de tink, fil, ɛn du tin jɔs lɛk in Papa. (Rid Jɔn 5:19.) Infakt, na bikɔs Jizɔs de falamakata in Papa gud gud wan na dat mek i bin tɔk se: “Ɛnibɔdi we dɔn si mi dɔn si di Papa.” (Jɔn 14:9) Di mɔ yu de lan bɔt Jizɔs in kwaliti dɛn, na di mɔ yu go sabi Jiova gud gud wan. Fɔ ɛgzampul, di we aw Jizɔs bin de sho se i bisin bɔt pipul dɛn, de sho di kayn we aw Jiova bisin bɔt yu.

2. Aw Jizɔs dɔn sho se i lɛk Jiova?

Jizɔs bin se: “Fɔ mek di wɔl no se a lɛk di Papa, a de du wetin di Papa dɔn tɛl mi fɔ du lɛk aw i tɛl mi.” (Jɔn 14:31) We Jizɔs bin de na di wɔl, i bin sho se i rili lɛk in Papa bay we i bin de obe am pan ɔl we i nɔ bin izi fɔ du dat. Dɔn bak Jizɔs bin lɛk fɔ tɔk bɔt in Papa ɛn ɛp pipul dɛn fɔ gɛt tayt padi biznɛs wit Am.—Jɔn 14:23.

3. Aw Jizɔs dɔn sho se i lɛk pipul dɛn?

Di Baybul se “na mɔtalman [Jizɔs] bin lɛk mɔ.” (Prɔvabs 8:31, NWT) Jizɔs bin sho dis lɔv bay we i bin de ɛnkɔrej pipul dɛn ɛn du ɔl wetin i ebul fɔ ɛp dɛn. In mirekul dɛn nɔ bin jɔs de sho se i gɛt pawa, bɔt i bin de sho bak se i gɛt sɔri-at. (Mak 1:40-42) I bin de trit pipul dɛn fayn, ɛn i nɔ bin de tek wan pɔsin bɛtɛ pas ɔda pɔsin. Di tin dɛn we Jizɔs bin de tɔk bin de mek di wan dɛn we bin de lisin to am gɛt kɔrej ɛn op. Jizɔs bin gri fɔ sɔfa ɛn day bikɔs i lɛk mɔtalman. Bɔt di wan dɛn we i bin lɛk mɔ na di wan dɛn we bin de du di tin dɛn we i bin de tich.—Rid Jɔn 15:13, 14.

LAN MƆ

Lan mɔ bɔt Jizɔs in kwaliti dɛn. Ɛn lan aw yu go gɛt fri-an ɛn sho lɔv lɛk aw i bin de du.

4. Jizɔs lɛk in Papa

Jizɔs in ɛgzampul de tich wi aw fɔ sho se wi lɛk Gɔd. Rid Lyuk 6:12 ɛn Jɔn 15:10; 17:26. Afta una rid ɛni skripchɔ, una tɔk bɔt dis kwɛstyɔn:

Aw wi go falamakata Jizɔs fɔ sho se wi lɛk Jiova?

Jizɔs de pre. — Jizɔs bin rili lɛk in Papa we de na ɛvin ɛn i bin de pre to am bɔku tɛm

5. Jizɔs bisin bɔt pipul dɛn we nid ɛp

Jizɔs bin bisin mɔ bɔt ɔda pipul dɛn pas aw i bin bisin bɔt insɛf. Pan ɔl we i bin de taya, i bin de yuz in tɛm ɛn trɛnk fɔ ɛp pipul dɛn. Rid Mak 6:30-44, dɔn una tɔk bɔt dɛn kwɛstyɔn dɛn ya:

Insay dis akawnt, wetin na sɔm we dɛn we Jizɔs bin sho se i bisin bɔt ɔda pipul dɛn?—Rid vas 31, 34, 41, ɛn 42.
Wetin bin de muv Jizɔs fɔ ɛp pipul dɛn?—Rid vas 34.
Bikɔs Jizɔs de falamakata Jiova in kwaliti dɛn, wetin ɔl dis de tich yu bɔt Jiova?
Wetin na sɔm we dɛn we wi go falamakata Jizɔs fɔ sho se wi bisin bɔt ɔda pipul dɛn?

Jizɔs pafɔm mirekul bay we i yuz fayv bred ɛn tu fish fɔ fid bɔku bɔku pipul dɛn. In disaypul dɛn sheb di it to di man dɛn, uman dɛn, ɛn pikin dɛn.

6. Jizɔs de du gud to ɔda pipul dɛn

Jizɔs bin de du gud to ɔda pipul dɛn pan ɔl we i nɔ bin gɛt bɔku tin, ɛn i bin ɛnkɔrej wisɛf fɔ du gud to ɔda pipul dɛn. Rid Akt 20:35, dɔn una tɔk bɔt dis kwɛstyɔn:

Akɔdin to Jizɔs, wetin go mek wi gladi?

Ple di VIDIO, dɔn una tɔk bɔt di kwɛstyɔn we de dɔŋ.

VIDIO: “We Pɔsin Gi, I De Gladi Mɔ”—Shɔt Pat (4:00)

Wetin na sɔm we dɛn we wi go ebul fɔ gi to ɔda pipul dɛn pan ɔl we wi nɔ gɛt bɔku tin?

Yu bin no?

Di Baybul tich wi se we wi de pre to Jiova, wi fɔ pre tru Jizɔs. (Rid Jɔn 16:23, 24.) We wi de pre da we de, wi de sho se wi gɛt tɛnki fɔ we Jizɔs ɛp wi fɔ bi Jiova in padi.

SƆM PIPUL DƐN KIN SE: “Gɔd nɔ bisin bɔt di sɔfa we wi de sɔfa.”