8, 9. (a) Wetin na di tin dɛn we bin mit wan po mami we in man bin dɔn day? (b) Aw dis mami bin de fil?

⁸ We Jizɔs bin go na di tɛmpul na Jerusɛlɛm, i bin si wan po mami we in man bin dɔn day. Dis mami in ɛgzampul go ɛp wi fɔ tink di rayt we, pan ɔl we wi nɔ kin ebul fɔ du ɔltin we wi want fɔ du. (Rid Lyuk 21:1-4.) Lɛ wi tɔk bɔt di tin dɛn we bin apin to dis mami. I bin de fil am we in man dɔn day, bɔt nɔto dat nɔmɔ, i bin gɛt fɔ bia we di edman dɛn pan Gɔd biznɛs bin de “tek dɛn uman, we dɛn man dɔn day, dɛn prɔpati.” Dɛn edman ya nɔ bin de ɛp dɛn uman dɛn de. (Lyuk 20:47) Dis uman bin so po dat di mɔni we i bin put na di bɔks insay di tɛmpul, na wetin lebra go wok fɔ insay shɔt tɛm.

⁹ Tray fɔ tink bɔt aw dis mami bin fil we i ol in tu smɔl kɔyn dɛn as i de go insay di tɛmpul. Yu tink se i bin de kɔmpia di smɔl mɔni we i de go put, to wetin i bin de put di tɛm we in man nɔ bin day yet? Ɔ yu tink se i bin shem we i bin de si ɔda pipul dɛn de put bɔku mɔni, ɛn fil se in yon mɔni nɔ bɛtɛ? Ilɛksɛf na so i bin de fil, i bin stil gi wetin i gɛt fɔ sɔpɔt Gɔd in wok.

11. Wetin yu kin lan frɔm da mami we in man bin dɔn day?

¹¹ Sɔntɛm di tin dɛn we de mit yu go mek yu nɔ ebul fɔ sav Jiova lɛk aw yu want. Sɔm pipul dɛn we dɔn ol ɔ we nɔ gɛt bɛtɛ wɛlbɔdi, nɔ kin ebul fɔ prich fɔ lɔng tɛm. Yu tink se dɛn nɔ fɔ gi dɛn fil savis ripɔt bikɔs dɛn nɔ de prich bɛtɛ? Ilɛksɛf yu yɔŋ ɛn gɛt wɛlbɔdi, yu go de fil se wetin yu de du smɔl, we yu kɔmpia am to wetin ɔda pipul dɛn de du fɔ wɔship Gɔd. Bɔt di tin we wi dɔn lan bɔt da mami we in man bin dɔn day, de sho wi se Jiova de si ɛn i valyu ɛni smɔl tin we wi de du fɔ am, mɔ we wi de du am di tɛm we wi kin gɛt prɔblɛm. Tink bɔt di we aw yu bin de wɔship Jiova las ia. Ɛnitɛm bin de we yu bin gɛt fɔ sakrifays sɔntin fɔ mek yu ebul fɔ wɔship Jiova fɔ wan awa? If yu ansa na yɛs, na fɔ no se Jiova valyu wetin yu bin du fɔ am insay da wan awa de. We yu du ɔl wetin yu ebul fɔ du fɔ sav Jiova ɛn falamakata da mami we in man bin dɔn day, dat de sho se yu “biliv [Gɔd] gud gud” wan.