Yu De Si Ɔda Pipul dɛn Prɔblɛm ɛn Mistek di We Aw Jiova De Si Am?

1, 2. Wetin mek Pɔl bin de sɔri fɔ di wan dɛn we gɛt prɔblɛm we de mɔna dɛn?

SƆNTƐNDE wi ɔl kin fil wik. We wi kin sik, wi kin so wik dat wi nɔ kin gɛt bɛtɛ trɛnk fɔ du di tin dɛn we wi kin want fɔ du. Lɛ wi se yu de fil wik fɔ wan wik, tu wik, ɔ fɔ lɔng tɛm. If dɛn kayn tin ya de apin to yu, yu go gladi if ɔda pipul dɛn kam fɔ ɛp yu, nɔto so?

² Di apɔsul Pɔl bin no aw pɔsin kin fil we i gɛt tin dɛn we de mɔna am insay di kɔngrigeshɔn ɛn ɔdasay dɛn. Sɔm tɛm dɛn de, i bin de fil se in yon dɔn dɔn; i nɔ go ebul du ɛnitin igen. (2 Kɔr. 1:8; 7:5) We Pɔl bin de mɛmba di bad bad tin dɛn we bin dɔn mit am, i bin tɔk se: “Wɛn dɛn du pɔsin bad, i kin tan lɛk se na mi dɛn du bad.” (2 Kɔr. 11:29) We Pɔl bin de kɔmpia di difrɛn pipul dɛn na di kɔngrigeshɔn to di difrɛn pat dɛn we de na di bɔdi, i bin se “wi nɔ go ebul du ɛnitin if dɛn pat we wi tink se nɔ gɛt bɛtɛ trɛnk nɔ de na wi bɔdi.” (1 Kɔr. 12:22) Wetin i bin min? Wetin mek wi fɔ si ɔda pipul dɛn prɔblɛm ɛn mistek di we aw Jiova de si am? Ɛn aw dis go bɛnifit wi?

AW JIOVA DE SI DI WAN DƐN WE GƐT PRƆBLƐM WE DE MƆNA DƐN?

3. Wetin kin mek wi nɔ tink di rayt we bɔt wi brɔda dɛn we nid pɔsin fɔ ɛp dɛn ɔltɛm?

³ Plɛnti pipul dɛn biliv se fɔ go bifo na dis wɔl, pɔsin fɔ yɔŋ ɛn gɛt trɛnk. Dis kin mek dɛn tek advantej pan di wan dɛn we wik so dat dɛn go gɛt wetin dɛn want. Bɔt wi difrɛn, wi nɔ de sɔpɔt dis bad tin we pipul dɛn de du, bɔt if wi nɔ tek tɛm wi go bigin de tink bad bɔt wi brɔda dɛn we nid pɔsin fɔ ɛp dɛn ɔltɛm. Bɔt wi go ebul tink di rayt we bɔt wi brɔda dɛn if wi tray fɔ si dɛn di we aw Gɔd de si dɛn.

4, 5. (a) Aw di ɛgzampul we de na Fɔs Lɛta Fɔ Kɔrint 12:21-23 ɛp wi fɔ ɔndastand aw Jiova de si wi prɔblɛm ɛn mistek dɛn? (b) Us bɛnifit wi go gɛt we wi ɛp di wan dɛn we nid pɔsin fɔ ɛp dɛn?

⁴ Insay di fɔs lɛta we Pɔl bin rayt to di Kristian dɛn na Kɔrint, i bin gi dɛn wan ɛgzampul we sho wi aw Jiova de si di wan dɛn we gɛt prɔblɛm ɛn we dɔn mek siriɔs mistek. Insay chapta 12, Pɔl tɛl wi se ivin di pat we wik pas ɔl na wi bɔdi gɛt wok we i de du. (Rid Fɔs Lɛta Fɔ Kɔrint 12:12, 18, 21-23.) Bɔt sɔm pipul dɛn we biliv se nɔbɔdi nɔ mek wi, wi jɔs kam bay chans, dɔn tɔk se dat nɔto tru. Bɔt pan ɔl dat, di wan dɛn we de stɔdi mɔtalman bɔdi dɔn kam fɔ no se di pat dɛn na wi bɔdi we pipul dɛn bin de tink se nɔ gɛt no yus, de du impɔtant wok dɛn na di bɔdi.a Fɔ ɛgzampul, sɔm pipul dɛn bin fil se wi smɔl to nɔ gɛt ɛni yus na wi bɔdi; bɔt naw sayɛnsman dɛn dɔn kam fɔ no se wi smɔl to de ɛp wi fɔ tinap stɛdi wan.

⁵ Dis ɛgzampul we Pɔl gi sho se ɔlman na di kɔngrigeshɔn gɛt valyu. Setan want lɛ wi biliv se wi nɔ gɛt wan valyu na Jiova in yay. (Job 4:18, 19) Bɔt Jiova valyu ɔl in savant dɛn, ivin di wan dɛn we gɛt prɔblɛm we de mɔna dɛn ɔ we dɔn mek siriɔs mistek. Dis we aw Gɔd de si wi fɔ mek wi fil gud bɔt di tin dɛn we wi de du na di kɔngrigeshɔn ɛn na di ɔganayzeshɔn. Fɔ ɛgzampul, tink bɔt wan tɛm we yu bin ɛp wan ol pɔsin we bin nid sɔmbɔdi fɔ ɛp am. I go bi se yu bin gɛt fɔ du tin di we aw dis ol pɔsin de du am. Di ol pɔsin we yu go ɛp go mɔs dɔn bɛnifit, bɔt yu nɔ tink se yusɛf go dɔn bɛnifit? Fɔ tru, we wi ɛp ɔda pipul dɛn we nid pɔsin fɔ ɛp dɛn, dat go mek wi gladi, ɛn wi go kɔntinyu fɔ bia mɔ wit pipul dɛn, sho lɔv, ɛn biev machɔ wan. (Ɛfi. 4:15, 16) Jiova want mek wi valyu ɔlman na di kɔngrigeshɔn, ilɛksɛf dɛn dɔn mek siriɔs mistek ɔ dɛn gɛt prɔblɛlm we de mɔna dɛn. We wi du dis, i go ɛp wi nɔ fɔ tink se dɛn fɔ du pas wetin dɛn de du ɛn wi go lɛk wisɛf mɔ na di kɔngrigeshɔn.

6. We Pɔl bin se sɔm Kristian dɛn “nɔ gɛt pawa” ɛn sɔm “biliv Gɔd gud gud” wan, wetin i bin min?

⁶ We Pɔl bin de rayt to di Kristian dɛn we de na Kɔrint, i bin se dɛn “nɔ gɛt pawa” bikɔs na so di wan dɛn we nɔ bin biliv Gɔd bin de si di Kristian dɛn we bin de trade. Ɛn we i bin de tɔk bɔt aw i bin de fil, i yuz di wɔd “wik.” (1 Kɔr. 1:26, 27; 2:3) Pɔl bin tɔk bak se sɔm Kristian dɛn de we “biliv Gɔd gud gud” wan. I nɔ bin tɔk dis fɔ mek dɛn fil se dɛn bɛtɛ pas dɛn kɔmpin. (Rom 15:1) Bifo dat, i bin de tɔk se di wan dɛn we biliv Gɔd gud gud wan fɔ bia wit di wan dɛn we nɔ tinap tranga wan yet na di trut.

YU TINK SE WI FƆ CHENJ DI WE AW WI DE TINK?

7. Wetin kin mek wi nɔ want fɔ ɛp di wan dɛn we nid pɔsin fɔ ɛp dɛn?

⁷ We wi ɛp di wan dɛn we nɔ ebul fɔ ɛp dɛnsɛf, wi nɔ jɔs de falamakata Jiova bɔt wi de mek i gladi fɔ wi. (Sam 41:1; Ɛfi. 5:1) Bɔt i nɔ kin izi fɔ ɛp dɛn. Wetin mek? Sɔntɛm na bikɔs wi go de fil se na di pɔsin insɛf fɔ sɔlv in yon prɔblɛm. Ɔ sɔntɛm wi nɔ kin no wetin fɔ tɛl di pɔsin, so wi kin shem ɛn nɔ go nia am. Wan sista we nem Sintia,b bin nid pɔsin fɔ ɛp am di tɛm we in man bin lɛf am. I bin tɔk se: “If brɔda dɛn nɔ kam nia yu ɔ dɛn nɔ du wetin yu fil se tayt padi dɛn fɔ du we yu gɛt prɔblɛm, yu kin fil am bad. We yu gɛt prɔblɛm we de mɔna yu, yu kin want mek pipul dɛn de nia yu.” Kiŋ Devid we bin de trade trade, bin no aw pɔsin kin fil we i nɔ gɛt sɔmbɔdi nia am.—Sam 31:12.

8. Wetin go ɛp wi fɔ sɔri fɔ wi brɔda ɛn sista dɛn mɔ?

⁸ Wan tin we go ɛp wi fɔ sɔri fɔ wi brɔda ɛn sista dɛn mɔ na we wi mɛmba se sɔm gɛt siriɔs prɔblɛm we de mɔna dɛn. Sɔm nɔ gɛt bɛtɛ wɛlbɔdi, sɔm de na os usay nɔto ɔlman de sav Jiova, ɔ sɔm gɛt sɔntin we de mek dɛn at pwɛl. Sɔntɛm wisɛf go gɛt dɛn sem prɔblɛm ya wan de. Bifo di Izrɛlayt dɛn go na di land we Gɔd bin dɔn prɔmis dɛn, dɛn bin po ɛn dɛn bin dɔn sɔfa bad na Ijipt. So Jiova bin tɛl dɛn se dɛn nɔ fɔ “mek traŋa at” pan dɛn brɔda dɛn we po. Jiova bin want mek dɛn mɛmba se dɛn fɔ ɛp di wan dɛn we po.—Dit. 15:7, 11; Lɛv. 25:35-38.

9. We wi de ɛp wi brɔda dɛn we gɛt prɔblɛm we de mɔna dɛn, wetin na di fɔs tin we wi fɔ du? Gi wan ɛgzampul.

⁹ Wi nɔ fɔ de blem wi brɔda dɛn wantɛm wantɛm fɔ dɛn prɔblɛm dɛn ɔ fil se wi bɛtɛ pas dɛn. Bifo dat, wi fɔ rɛdi fɔ ɛp dɛn we dɛn gɛt prɔblɛm. (Job 33:6, 7; Mat. 7:1) Fɔ ɛgzampul, we okadaman gɛt aksidɛnt ɛn dɛn rɔsh kɛr am go na ɔspitul, yu tink se di dɔktɔ ɛn di nɔs dɛn go tray fɔ no fɔs if na in kɔz di aksidɛnt bifo dɛn trit am? Nɔ, dɛn go tray fɔ trit am wantɛm wantɛm. Semweso, if wi brɔda dɛn gɛt prɔblɛm we de mek dɛn nɔ ebul fɔ sav Gɔd bɛtɛ wan, di fɔs tin we wi fɔ du na fɔ ɛp dɛn fɔ du wetin Gɔd want.—Rid Fɔs Lɛta Fɔ Tɛsalonayka 5:14.

10. Aw di wan dɛn we wi kin fil se wik, kin sho se dɛn “biliv” Gɔd gud gud wan ɛn “dɛn jɛntri na Gɔd in yay”?

¹⁰ If wi sidɔm ɛn tink bɔt di tin dɛn we de apin to wi brɔda ɛn sista dɛn, wi go si se dɛn nɔ wik atɔl. Tink bɔt sista dɛn we dɔn de bia fɔ lɔng tɛm we dɛn man de mɔna dɛn bikɔs dɛn de sav Jiova. Sɔm dɛn kin luk wik, bɔt yu nɔ tink se di tin dɛn we dɛn de du de sho se dɛn rili gɛt fet pan Jiova ɛn dɛn nɔ wik atɔl? We yu si sista we nɔ gɛt man, de kam wit in pikin dɛn ɔltɛm na mitin, yu nɔ kin kɔle am fɔ di kayn fet we i gɛt ɛn di mekɔp we i dɔn mekɔp in maynd fɔ sav Jiova? Yu nɔ kin kɔle pikin dɛn we de tinap tranga wan fɔ di trut na skul pan ɔl we dɛn kin want mek dɛn du bad tin? We wi tink bɔt ɔl wetin wi brɔda ɛn sista dɛn de du fɔ sav Jiova, pan ɔl we i kin tan lɛk se dɛn wik, wi go si se dɛn “biliv” Gɔd gud gud wan ɛn “dɛn jɛntri na Gɔd in yay,” jɔs lɛk di wan dɛn we nɔ gɛt dɛn kayn prɔblɛm ya.—Jems 2:5.

TRAY FƆ TINK DI WE AW JIOVA DE TINK

11, 12. (a) Wetin go ɛp wi fɔ chenj di we aw wi de si di mistek dɛn we ɔda pipul dɛn de mek? (b) Wetin wi lan frɔm di we aw Jiova trit Erɔn we i mek siriɔs mistek dɛn?

¹¹ Wan tin we go ɛp wi fɔ tink di we aw Jiova de tink na we wi lan wetin Jiova kin du we in savant dɛn mek siriɔs mistek. (Rid Sam 130:3.) Fɔ ɛgzampul, if yu bin de wit Mozis di tɛm we Erɔn mek da kaw pikin wit gold, aw yu bin fɔ dɔn fil we Erɔn de blem di pipul dɛn fɔ in mistek? (Ɛks. 32:21-24) Ɔ aw yu fɔ dɔn fil bɔt Erɔn we i bin jɔyn in sista, Miriam, fɔ tɔk bad bɔt Mozis we i mared uman we nɔto Izrɛlayt? (Nɔm. 12:1, 2) Wetin yu bin fɔ du we Erɔn ɛn Mozis nɔ bin ɔnɔ Jiova di tɛm we i bin gi dɛn wata na wan ples we dɛn kɔl Mɛriba?—Nɔm. 20:10-13.

¹² Jiova bin fɔ dɔn pɔnish Erɔn wantɛm wantɛm fɔ dɛn mistek ya. Bɔt i nɔ du dat, bikɔs i no se Erɔn nɔto bad pɔsin. I go bi se Erɔn bin mek dɛn mistek ya bikɔs i bin alaw ɔda pipul dɛn ɛn di tin dɛn we de apin rawnd am, fɔ push am fɔ du wetin nɔ rayt. Bɔt we dɛn bin tɛl am bɔt in mistek dɛn, i bin gri ɛn sɔpɔt di tin we Jiova bin disayd fɔ du. (Ɛks. 32:26; Nɔm. 12:11; 20:23-27) Jiova bin disayd fɔ luk di kayn fet we Erɔn bin gɛt ɛn di we aw i bin fil sɔri fɔ di bad tin we i bin du. Afta lɔng lɔng tɛm dɔn pas, pipul dɛn bin stil de mɛmba Erɔn ɛn in pikin dɛn as pipul dɛn we de fred Jiova.—Sam 115:10-12; 135:19, 20.

13. Aw wi go chenj di we aw wi de tink? Gi wan ɛgzampul.

¹³ Jɔs lɛk Erɔn, wi brɔda dɛnsɛf kin mek siriɔs mistek. Aw wi kin si dɛn we dɛn mek mistek? Yu tink se yu fɔ chenj di we aw yu de tink? (1 Sam. 16:7) Fɔ ɛgzampul, wetin wi go du we yɔŋ pɔsin de biev bad ɔ we i nɔ de tek tɛm pik di kayn we aw i de ɛnjɔy insɛf? Bifo wi vɛks pan am, i go fayn mek wi tray fɔ no aw wi go ɛp am fɔ du di rayt tin. Na wi fɔ go mit di wan dɛn we nid pɔsin fɔ ɛp dɛn, if wi du so, wi go ɔndastand dɛn mɔ ɛn lɛk dɛn.

14, 15. (a) Aw Jiova bin fil bɔt Ilayja we i bin de fred? (b) Us lɛsin wi lan frɔm wetin bin apin to Ilayja?

¹⁴ Wan ɔda tin we go ɛp wi fɔ tink di rayt we bɔt ɔda pipul dɛn na we wi lan bɔt wetin Jiova bin de du fɔ sɔm pan in savant dɛn we dɛn at bin pwɛl. Ilayja na bin wan pan dɛn. Pan ɔl we Ilayja nɔ bin fred fɔ chalenj 450 Beal prɔfɛt dɛn, i bin rɔnawe we i yɛri se Kwin Jezibɛl de plan fɔ kil am. Afta i bin dɔn waka fɔ 95 mayl fɔ go na Biashiba, i bin go na wan ples usay pɔsin nɔ go ebul fɔ liv. Bikɔs Ilayja bin dɔn taya bad bad wan we i de waka ɔnda di san, i go sidɔm ɔnda wan tik ɛn pre to Papa Gɔd se “lɛ in day wantɛm.”—1 Kiŋ 18:19; 19:1-4.

¹⁵ Aw Jiova bin fil we i si in fetful prɔfɛt in at bin pwɛl ɛn nɔ gɛt bɛtɛ kɔrej igen? I bin pul an pan Ilayja fɔ dat? Nɔ, i nɔ bin du dat atɔl! Jiova bin no se nɔto ɔltin Ilayja go ebul fɔ du, so i bin sɛn In enjɛl fɔ ɛp am. Tu tɛm di enjɛl bin ɛnkɔrej Ilayja fɔ it, so dat di rod nɔ “go mɔna am.” (Rid Fɔs Kiŋ 19:5-8.) Ivin bifo Jiova tɛl in prɔfɛt wetin fɔ du, i bin lisin to in prɔfɛt ɛn du ɔda tin dɛn fɔ ɛp am.

16, 17. Aw wi go ɛp wi brɔda dɛn di we aw Jiova kin ɛp in savant dɛn?

¹⁶ Aw wi go ebul fɔ falamakata Papa Gɔd we kia bɔt wi? Wi nɔ fɔ advays pɔsin wantɛm wantɛm we sɔntin apin. (Prɔv. 18:13) I go fayn fɔs mek wi sho se wi de fil sɔri fɔ di wan dɛn we de tink se dɛn nɔ “bɛtɛ” bikɔs dɛn gɛt prɔblɛm dɛn we de mɔna dɛn. (1 Kɔr. 12:23) Dis go mek wi no wetin rili di pɔsin nid ɛn ɛp am di rayt we.

¹⁷ Fɔ ɛgzampul, tink bɔt Sintia, we wi bin dɔn tɔk bɔt. We in man bin lɛf in ɛn in tu gyal pikin dɛn, dɛn bin fil se dɛn nɔ gɛt nɔbɔdi. Wetin in kɔmpin Witnɛs dɛn bin du? Sintia se: “Afta wi kɔl ɛn tɛl dɛn wetin dɔn apin, insay 45 minit dɛn dɔn rich na wi os. Dɛn bin de kray wit wi. Fɔ di fɔs tu ɔ tri dez, dɛn bin de wit wi, dɛn nɔ bin lɛf wi to wisɛf. Bikɔs wi nɔ bin de ebul fɔ it bɛtɛ ɛn wi bin de kray tumɔs, di brɔda ɛn sista dɛn bin mek wi go de wit dɛn na dɛn os fɔ sɔm tɛm.” Dis tin we bin apin to Sintia ɛn in tu gyal pikin dɛn de mek wi mɛmba wetin Jems bin rayt, we i se: “If una kɔmpin Kristiɛn nɔ gɛt tin fɔ it ɛn tin fɔ wɛr, ɛn wan pan una tɛl am se, ‘Go, mek bɛta fala yu ya, a op se yu go fɛn tin fɔ it ɛn klos fɔ wɛr,’ bɔt i nɔ gi am ɔl wetin i want fɔ in bɔdi, dɛn wɔd de nɔ min natin!” Jems kɔntinyu fɔ tɔk se if pɔsin “jɛs tɔk nɔmɔ se in biliv Gɔd, bɔt i nɔ du ɛnitin fɔ sho se in biliv Gɔd, di biliv we da pɔsin de se in biliv Gɔd, nɔ min natin!” (Jems 2:15-17) Di brɔda ɛn sista dɛn bin ɛp Sintia ɛn in tu gyal pikin dɛn di rayt tɛm. Dis bin mek dɛn bin ebul fɔ ɔgzilari payɔnia siks mɔnt afta dɛn gɛt dis prɔblɛm.—2 Kɔr. 12:10.

BƆKU PIPUL DƐN KIN BƐNIFIT

18, 19. (a) Aw wi go ɛp di wan dɛn we gɛt prɔblɛm we de mɔna dɛn ɔ we dɔn mek siriɔs mistek? (b) Udat kin bɛnifit we wi ɛp wi brɔda ɛn sista dɛn?

¹⁸ Yusɛf go dɔn no se we pɔsin kin sik siriɔs wan, i kin tek tɛm fɔ lɛ i wɛl fayn fayn wan. Na di sem tin kin apin to pɔsin we gɛt prɔblɛm we de mɔna am ɔ we dɔn mek siriɔs mistek. I kin tek tɛm fɔ mek da pɔsin de tinap tranga wan bak fɔ sav Jiova. Na tru se, dɛn wi brɔda ɛn sista ya fɔ de stɔdi di Baybul, pre, ɛn go di mitin dɛn so dat dɛn go tinap tranga wan bak fɔ sav Jiova. Bɔt yu nɔ tink se wi fɔ de bia wit dɛn ɛn sho dɛn se wi lɛk dɛn te dɛn tinap tranga wan bak na di trut? Yu nɔ tink se wi fɔ tray fɔ ɛp dɛn fɔ no se wi valyu dɛn na di kɔngrigeshɔn?—2 Kɔr. 8:8.

¹⁹ Wi nɔ fɔ ɛva fɔgɛt se we wi de ɛp wi brɔda ɛn sista dɛn, dat go mek wi gladi. Dɔn, wi go ebul fɔ gɛt sɔri-at mɔ ɛn bia wit pipul dɛn. Bɔt nɔto wi nɔmɔ go bɛnifit, ɔlman na di kɔngrigeshɔn go kɔntinyu fɔ lɛk dɛnsɛf mɔ ɛn mɔ. Pantap dat, wi de sho se wi de falamakata Jiova we valyu ɔlman. Frɔm ɔl wetin wi dɔn lan, wi dɔn si se i go fayn mek wi “ɛp” di wan dɛn we gɛt prɔblɛm we de mɔna dɛn.—Akt 20:35.