Lɛ di Gift we Gɔd “Dɔn Gi Wi fɔ Natin, we Wɔndaful Pas Ɔl” Mek Wi Du Sɔntin

1, 2. (a) Di gift we Gɔd “dɔn gi wi fɔ natin, we wɔndaful pas ɔl,” wetin i min? (b) Us kwɛstyɔn dɛn wi go tɔk bɔt insay dis atikul?

JIOVA gi wi di gift we pas ɔl ɔda gift dɛn we i sɛn in Pikin, Jizɔs, we i rili lɛk fɔ kam na dis wɔl! Dis gift we Jiova gi wi sho se i rili lɛk wi. (Jɔn 3:​16; Jɔn In Fɔs Lɛta 4:​9, 10) Di apɔsul Pɔl bin kɔl dis gift, di gift we Gɔd “gi wi fɔ natin, we wɔndaful pas ɔl.” (Sɛkɛn Lɛta Fɔ Kɔrint 9:​15) Wetin mek Pɔl kɔl am so?

² Pɔl no se Jizɔs in sakrifays dɔn mek am pɔsibul fɔ lɛ ɔl di wɔndaful prɔmis dɛn we Gɔd dɔn mek kam fɔ bi tru. (Rid Sɛkɛn Lɛta Fɔ Kɔrint 1:​20.) Dis min se dis gift we Gɔd “gi wi fɔ natin, we wɔndaful pas ɔl” min Jizɔs in sakrifays ɛn ɔl di gud tin dɛn we Jiova de du fɔ wi. I nɔ pɔsibul fɔ ɛksplen dis kayn gift di we aw wi go rili ebul fɔ ɔndastand am. Aw dis spɛshal gift fɔ mek wi fil? Ɛn aw dis gift fɔ ɛp wi as wi de rɛdi fɔ mɛmba Krays in day wan, we go bi Wɛnsde, Mach 23, 2016?

GƆD IN SPƐSHAL GIFT

3, 4. (a) Aw yu kin fil we sɔmbɔdi gi yu gift? (b) We pɔsin du spɛshal tin fɔ yu, aw dat kin chenj yu layf?

³ Wi kin gladi we sɔmbɔdi gi wi gift. Bɔt sɔm gift dɛn so spɛshal dat dɛn kin chenj wi layf. Fɔ ɛgzampul, imajin se yu dɔn du bad tin. Ɛn di pɔnishmɛnt fɔ wetin yu dɔn du na day. Bɔt wantɛm wantɛm, sɔmbɔdi we yu nɔ no kam ɛn tɔk se i go tek di pɔnishmɛnt fɔ yu. I rɛdi fɔ day fɔ yu! Aw dis tin we dis pɔsin du go mek yu fil?

⁴ Dis tin we di pɔsin du go mek yu chenj di we aw yu de liv yu layf. Sɔntɛm, dis tin we dis pɔsin du fɔ yu go mek bak yu lɛk ɔda pipul dɛn, i go mek yu du gud to dɛn ɛn sɔri fɔ di wan dɛn we bin dɔn du yu bad. Te yu day, yu go want fɔ sho se yu gladi fɔ wetin dis pɔsin du fɔ yu.

5. Aw Jizɔs in sakrifays pas ɛni ɔda gift we Gɔd dɔn gi wi?

⁵ Di gift we Gɔd dɔn gi wi we na di day we Jizɔs day fɔ wi, pas di ɛgzampul we wi jɔs dɔn tɔk bɔt. (Pita In Fɔs Lɛta 3:​18) Lɛ wi mɛmba se wi ɔl dɔn gɛt sin frɔm Adam, ɛn di pɔnishmɛnt fɔ sin na day. (Lɛta Fɔ Rom 5:​12) Bikɔs Jiova lɛk wi na in mek i sɛn Jizɔs kam na di wɔl fɔ “sɔfa ɛn day” fɔ wi. (Di Ibru Pipul Dɛn 2:​9) Bɔt Jizɔs in sakrifays go du mɔ fɔ wi pas dis! I go mek day nɔ de igen. (Ayzaya 25:​7, 8; Fɔs Lɛta Fɔ Kɔrint 15:​22, 26) Ɔl di wan dɛn we sho se dɛn biliv Jizɔs go gɛt kolat ɛn gladi sote go, ilɛksɛf dɛn bi kiŋ wit Krays na ɛvin ɔ liv na dis wɔl ɔnda Gɔd in Kiŋdɔm. (Lɛta Fɔ Rom 6:​23; Rɛvɛleshɔn 5:​9, 10) Us ɔda blɛsin dɛn we Jizɔs in day go briŋ kam?

6. (a) Uswan pan Jiova in blɛsin dɛn yu go want fɔ si? (b) Us tri tin dɛn Gɔd in gift go mek wi du?

⁶ Di day we Jizɔs day fɔ wi go mek di wan ol wɔl bi Paradays. I go mek ɔl di wan dɛn we sik, wɛl ɛn ɔl di wan dɛn we dɔn day gɛt layf bak. (Ayzaya 33:​24; 35:​5, 6; Jɔn 5:​28, 29) Wi lɛk Jiova ɛn in Pikin we gi wi dis gift “fɔ natin, we wɔndaful pas ɔl.” Wetin dis gift go mek wi du? (1) I go mek wi falamakata Krays Jizɔs gud gud wan, (2) i go mek wi lɛk wi brɔda dɛn, ɛn (3) i go mek wi fɔgiv ɔda pipul dɛn wit ɔl wi at.

“NA DI LƐK WE KRAYS LƐK WI DE RUL WI”

7, 8. Aw di lɛk we Krays lɛk wi fɔ mek wi fil? Wetin dis fɔ mek wi du?

⁷ Fɔs, wi want fɔ yuz wi layf fɔ ɔnɔ Jizɔs. Di apɔsul Pɔl bin se: “Na di lɛk we Krays lɛk wi de rul wi.” (Rid Sɛkɛn Lɛta Fɔ Kɔrint 5:​14, 15.) Pɔl no se if wi gladi fɔ di lɛk we Jizɔs lɛk wi, wi go gri fɔ lɛ i rul wi ɛn dis lɛk we i lɛk wi go mek wi lɛk am ɛn rɛspɛkt am. Fɔ tru, we wi rili ɔndastand wetin Jiova dɔn du fɔ wi, di lɛk we i lɛk wi go mek wi liv wi layf di we we go ɔnɔ Jizɔs. Aw wi go du dat?

⁸ Di lɔv we wi gɛt fɔ Jiova go mek wi falamakata Jizɔs gud gud wan. (Pita In Fɔs Lɛta 2:​21; Jɔn In Fɔs Lɛta 2:​6) We wi obe Gɔd ɛn Krays, wi de sho se wi lɛk dɛn. Jizɔs se: “Ɛnibɔdi we du wetin a tɛl am fɔ du, na pɔsin we lɛk mi bad. Mi Papa go lɛk am ɛn misɛf go lɛk am; ɛn a go mek i no mi gud.”—Jɔn 14:​21; Jɔn In Fɔs Lɛta 5:​3.

9. Wetin di pipul dɛn na di wɔl want wi fɔ du? If wi nɔ tek tɛm, wetin wi go bigin fɔ du?

⁹ Insay dis Mɛmorial tɛm, i go fayn fɔ lɛ wi tink gud gud wan bɔt aw wi de liv wi layf. So aks yusɛf dɛn kwɛstyɔn ya: ‘Us we dɛn a dɔn de falamakata Jizɔs? Usay a fɔ du mɔ?’ I impɔtant fɔ aks wisɛf dɛn kwɛstyɔn ya bikɔs di pipul dɛn na di wɔl want wi fɔ liv wi layf lɛk aw dɛn de liv dɛn layf. (Lɛta Fɔ Rom 12:​2) If wi nɔ tek tɛm, wi go bigin fɔ falamakata di ticha dɛn na di wɔl, pipul dɛn we bɔku pipul dɛn sabi, ɛn di wan dɛn we de du wɛl pan spɔt. (Lɛta Fɔ Kɔlɔse 2:​8; Jɔn In Fɔs Lɛta 2:​15-17) Wetin go ɛp wi nɔ fɔ du dat?

10. Us kwɛstyɔn dɛn wi fɔ aks wisɛf insay dis Mɛmorial tɛm? Wetin di ansa dɛn fɔ mek wi du? (Luk di pikchɔ nia dis atikul in taytul.)

¹⁰ Insay di Mɛmorial tɛm, i go rili fayn fɔ chɛk di kayn klos dɛn we wi de wɛr, di fim dɛn we wi de wach, wi myuzik dɛn, di tin dɛn we de insay wi kɔmpyuta, wi fon, ɔ wi tablɛt. Aks yusɛf dɛn kwɛstyɔn ya: ‘If Jizɔs bin de ya ɛn si wetin a wɛr, a go shem?’ (Rid Fɔs Lɛta To Timoti 2:​9, 10.) ‘Di klos we a wɛr go sho se a de fala Krays? Jizɔs go lɛk fɔ wach mi fim dɛn? I go lisin to mi myuzik dɛn? If Jizɔs lɛnt mi fon ɔ tablɛt, di tin dɛn we i go si go mek a shem? I go izi fɔ ɛksplen to Jizɔs wetin mek a de ɛnjɔy di vidio gem dɛn we a de ple?’ Di lɛk we wi lɛk Jiova fɔ mek wi trowe ɛnitin we nɔ fayn fɔ Kristian, ilɛksɛf i dia te i dia. (Di Apɔsul Dɛn Wok [Akt] 19:​19, 20) We wi bin gi wi layf to Jiova, wi prɔmis fɔ yuz wi layf fɔ ɔnɔ Krays. So wi nɔ fɔ kip ɛnitin we go mek i nɔ izi fɔ falamakata Jizɔs.—Matyu 5:​29, 30; Lɛta Fɔ Filipay 4:​8.

11. (a) Aw di lɛk we wi lɛk Jiova ɛn Jizɔs de ɛp wi na di prichin wok? (b) Aw di lɔv we wi gɛt kin mek wi ɛp ɔda pipul dɛn na di kɔngrigeshɔn?

¹¹ Di lɛk we wi lɛk Jizɔs de mek wi prich ɛn tich wit zil. (Matyu 28:​19, 20; Lyuk 4:​43) Insay di Mɛmorial tɛm, yu tink se yu go ebul arenj yu tɛm so dat yu go ɔgzilari payɔnia ɛn spɛn 30 ɔ 50 awa fɔ du di prichin wok? Wan 84 ia ol brɔda we in wɛf dɔn day bin tink se i nɔ go ebul fɔ payɔnia bikɔs i dɔn ol ɛn i nɔ gɛt wɛlbɔdi. Bɔt di payɔnia dɛn na in eria bin want fɔ ɛp am. Dɛn ɛp am wit transpɔt ɛn fɛn ples we go izi fɔ am fɔ prich. Dat bin mek di brɔda ebul fɔ gɛt in 30 awa. Yu go ebul fɔ ɛp sɔmbɔdi na yu kɔngrigeshɔn fɔ ɔgzilari payɔnia insay Mach ɔ Epril? Na tru se nɔto ɔlman go ebul fɔ payɔnia, bɔt wi kin yuz wi tɛm ɛn trɛnk fɔ du mɔ we wi de wɔship Jiova. Jɔs lɛk Pɔl, if wi du dis, wi go sho se na di lɛk we Jizɔs lɛk wi mek wi du dis. Wetin bak di lɛk we Gɔd lɛk wi go mek wi du?

WI FƆ SHO SE WI LƐK ƆDA PIPUL DƐN

12. Wetin di lɛk we Gɔd lɛk wi fɔ mek wi du?

¹² Sɛkɔn, di lɛk we Gɔd lɛk wi fɔ mek wi lɛk wi brɔda dɛn. Di apɔsul Jɔn bin rayt se: “Mi padi dɛn we a lɛk, if na so Gɔd lɛk wi, wi fɔ lɛk wi kɔmpin.” (Jɔn In Fɔs Lɛta 4:​7-11) So if wi gladi fɔ di lɛk we Gɔd lɛk wi, wi nid fɔ lɛk wi brɔda dɛn. (Jɔn In Fɔs Lɛta 3:​16) Aw wi go sho se wi lɛk dɛn?

13. Aw Jizɔs bin sho se i lɛk ɔda pipul dɛn?

¹³ Jizɔs in ɛgzampul de sho wi aw fɔ lɛk ɔda pipul dɛn. We i bin de na dis wɔl, i bin de ɛp pipul dɛn, mɔ di wan dɛn we put dɛnsɛf dɔŋ. I bin de mɛn pipul dɛn we sik, pipul dɛn we nɔ ebul waka, blayndman dɛn, pipul dɛn we dɛf ɛn we nɔ ebul tɔk. (Matyu 11:​4, 5) Jizɔs nɔ bin tan lɛk di edman dɛn pan Gɔd biznɛs, i bin de ɛnjɔy fɔ tich pipul dɛn we want fɔ lan bɔt Gɔd. (Jɔn 7:​49) I bin lɛk dɛn pipul dɛn we put dɛnsɛf dɔŋ, ɛn i bin de wok tranga wan fɔ ɛp dɛn.—Matyu 20:​28.

14. Wetin yu go du fɔ sho se yu lɛk yu brɔda dɛn?

¹⁴ Di Mɛmorial tɛm na fayn tɛm fɔ tink bɔt aw yu go ɛp di brɔda ɛn sista dɛn na yu kɔngrigeshɔn, mɔ di wan dɛn we dɔn ol. Yu go ebul fɔ go fɛn dɛn? Yu go ebul fɔ kɛr it fɔ dɛn? Yu go ebul fɔ ɛp dɛn fɔ du af-af wok dɛn na dɛn os? Yu go ebul fɔ gi dɛn lift, ɔ tɛl dɛn fɔ prich wit yu? (Rid Lyuk 14:​12-14.) Lɛ di lɛk we Gɔd lɛk yu mek yu lɛk yu brɔda dɛn!

LƐ WI SƆRI FƆ WI BRƆDA ƐN SISTA DƐN

15. Wetin wi fɔ no?

¹⁵ Tɔd, di lɛk we Jiova lɛk wi de mek wi fɔgiv wi brɔda ɛn sista dɛn. Adam dɔn mek wi ɔl de sin ɛn day, so nɔbɔdi nɔ go se “A nɔ nid Jizɔs in sakrifays.” Ivin di pɔsin we fetful to Gɔd pas ɔl, nid Jizɔs in sakrifays. Wi sin dɛn tan lɛk big big dɛt, bɔt Gɔd dɔn fɔgiv wi! Wetin mek i impɔtant fɔ lɛ wi no dis? Di ansa de insay wan parebul we Jizɔs bin pul.

16, 17. (a) Wetin wi lan frɔm Jizɔs in parebul bɔt di kiŋ ɛn di slev dɛn? (b) Afta yu dɔn tink gud wan bɔt Jizɔs in parebul, wetin yu dɔn mekɔp yu maynd fɔ du?

¹⁶ Jizɔs pul wan parebul bɔt wan kiŋ we fɔgiv in slev we bin gɛt fɔ pe am 60,000,000 dinaray. Bɔt leta, dis slev nɔ fɔgiv in kɔmpin slev we bin gɛt fɔ pe am jɔs 100 dinaray. Di fɔgiv we di kiŋ fɔgiv am fɔ dɔn mek i fɔgiv in kɔmpin slev. Di kiŋ bin vɛks we i yɛri se in slev nɔ fɔgiv in kɔmpin we bin gɛt fɔ pe am smɔl dɛt. Di kiŋ tɔk se: “Yu wikɛd [slev]! A nɔ bin mek yu pe di mɔni we yu bin gɛt fɔ pe mi, bikɔs yu beg mi. Yusɛf bin fɔ sɔri fɔ yu kɔmpin we bin gɛt fɔ pe yu, lɛkɛ aw a bin sɔri fɔ yu.” (Matyu 18:​23-35) Jɔs lɛk di kiŋ, Jiova dɔn fɔgiv wi sin dɛn we tan lɛk big big dɛt. Wetin Jiova in lɔv ɛn sɔri-at fɔ mek wi du?

¹⁷ As wi de pripia fɔ di Mɛmorial, wi fɔ aks wisɛf dɛn kwɛstyɔn ya: ‘Wan brɔda bin dɔn du mi ɛnitin we mek a vɛks? A si am se i tranga fɔ mek a fɔgiv am?’ If na so i bi, dis na fayn tɛm fɔ lɛ wi falamakata Jiova, we “rɛdi fɔ fɔgiv.” (Nɛimaya 9:​17; Sam 86:​5) If wi gladi fɔ di sɔri we Jiova dɔn rili sɔri fɔ wi, wisɛf go sɔri fɔ ɔda pipul dɛn ɛn fɔgiv dɛn wit ɔl wi at. If wi nɔ lɛk wi brɔda dɛn ɛn nɔ de fɔgiv dɛn, wi nɔ fɔ abop se Jiova go lɛk ɛn fɔgiv wi. (Matyu 6:​14, 15) We wi fɔgiv ɔda pipul dɛn, i nɔ min se dɛn nɔ bin du wi bad, bɔt i go ɛp wi fɔ gɛt gladi at tumara bambay.

18. Aw Gɔd in lɔv ɛp wan sista fɔ bia wit wan ɔda sista?

¹⁸ I nɔ kin izi fɔ lɛ wi bia we wi brɔda ɛn sista dɛn du wi sɔntin we nɔ fayn. (Rid Lɛta Fɔ Ɛfisɔs 4:​32; Lɛta Fɔ Kɔlɔse 3:​13, 14.) Dis kayn tin bin apin to wan sista we nem Lili.^[1] (Rid di ɛndnot we de ɔnda di las paregraf.) I bin ɛp wan sista we nem Karol we in man bin dɔn day. Fɔ ɛgzampul, i bin de gi Karol lift ɛnisay we i want fɔ go, i bin de ɛp am fɔ bay bay, ɛn du bɔku ɔda tin dɛn fɔ am. Pan ɔl wetin Lili bin de du, Karol bin de kɔmplen ɔltɛm, ɛn sɔntɛnde i nɔ bin izi fɔ ɛp am. Bɔt Lili bin pe atɛnshɔn pan di gud kwaliti dɛn we Karol gɛt ɛn ɛp am fɔ lɔng tɛm te Karol sik siriɔs wan ɛn day. Pan ɔl we i nɔ bin izi fɔ Lili fɔ ɛp Karol, Lili tɔk se: “A de wet fɔ si di de we Karol go gɛt layf bak. A want fɔ no am we i dɔn pafɛkt.” Wi dɔn si klia wan se di lɛk we Gɔd lɛk wi go ɛp wi fɔ bia wit wi brɔda ɛn sista dɛn ɛn wet fɔ si di de we ɔlman go pafɛkt.

19. Wetin di gift we Gɔd dɔn gi wi “fɔ natin, we wɔndaful pas ɔl” go mek yu du?

¹⁹ Fɔ tru, Jiova dɔn gi wi gift “fɔ natin, we wɔndaful pas ɔl.” Lɛ wi sho se wi gladi fɔ dis gift ɔltɛm! Di Mɛmorial tɛm na fayn tɛm fɔ tink gud wan bɔt ɔl wetin Jiova ɛn Jizɔs dɔn du fɔ wi. Mek di lɛk we dɛn lɛk wi mek wi falamakata Jizɔs gud wan, sho lɔv to wi brɔda dɛn, ɛn fɔgiv wi brɔda dɛn wit ɔl wi at.