“Kɔntinyu fɔ Sho Lɔv”

1-3. Wetin go apin we wi falamakata di we aw Jiova de sho lɔv?

“WE PƆSIN gi, i de gladi mɔ pas we dɛn gi am.” (Akt 20:​35) Dɛn wɔd dɛn de we Jizɔs tɔk impɔtant, ɛn dɛn de ɛp wi fɔ no sɔntin we na tru. Dɛn ɛp wi fɔ no se wi go gɛt blɛsin we wi sho se wi lɛk pipul dɛn ɛn nɔ jɔs bisin bɔt wisɛf. Pan ɔl we wi go rili gladi we pipul dɛn de sho se dɛn lɛk wi, wi go gladi mɔ we wi sho se wi lɛk pipul dɛn.

² Na wi Papa we de na ɛvin no dis pas ɛni ɔda pɔsin. Frɔm wetin wi dɔn lan na di ɔda chapta dɛn na dis sɛkshɔn, na Jiova dɔn sɛt di bɛst ɛgzampul we i kam to aw fɔ sho lɔv. Jiova dɔn sho se i gɛt lɔv pas ɔlman, ɛn i dɔn de sho lɔv fɔ lɔng tɛm pas ɛni ɔda pɔsin. Na dat mek wi nɔ sɔprayz we di Baybul kɔl Jiova “di Gɔd we gladi.”—1 Timoti 1:​11.

³ Wi Gɔd we lɛk wi want fɔ mek wi tray fɔ falamakata am, mɔ we i kam to aw fɔ sho lɔv. Ɛfishians 5:​1, 2 se: “Una falamakata Gɔd, lɛk in pikin dɛn we i rili lɛk, una kɔntinyu fɔ sho lɔv.” We wi falamakata di we aw Jiova de sho lɔv, wisɛf go gɛt di tru tru gladi-at we pɔsin kin gɛt we i de gi. Wi de gladi bak fɔ no se wi de du wetin Jiova want, bikɔs di Baybul de ɛnkɔrej wi fɔ gɛt “lɔv” fɔ wi kɔmpin mɔtalman. (Romans 13:​8) Bɔt ɔda rizin dɛn de we mek wi fɔ “kɔntinyu fɔ sho lɔv.”

Wetin Mek Lɔv Impɔtant?

4, 5. Wetin mek i impɔtant fɔ lɛ wi sho se wi lɛk wi kɔmpin Kristian dɛn ɛn wi nɔ jɔs bisin bɔt wisɛf?

⁴ Wetin mek i impɔtant fɔ lɛ wi sho lɔv to wi kɔmpin Kristian dɛn? Di simpul rizin na bikɔs lɔv na di men kwaliti we de sho se wi na tru Kristian. If wi nɔ lɛk wi kɔmpin Kristian dɛn, i nɔ go izi fɔ mek dɛn padi, ɛn di tin we impɔtant mɔ na dat i go tan lɛk se wi na natin to Jiova. Lɛ wi tɔk bɔt aw Gɔd in Wɔd sho se dis na tru.

⁵ Di las nɛt bifo Jizɔs day, i bin tɛl in disaypul dɛn se: “A de gi una wan nyu lɔ, ɛn di lɔ na dat una fɔ lɛk una kɔmpin dɛn; una fɔ lɛk una kɔmpin dɛn jɔs lɛk aw a lɛk una. If una lɛk una kɔmpin dɛn, ɔlman go no se una na mi disaypul dɛn.” (Jɔn 13:​34, 35) We Jizɔs se “jɔs lɛk aw a lɛk una,” i de sho se i want fɔ mek wi gɛt di kayn lɔv we i gɛt. Insay Chapta 29, wi bin lan se Jizɔs sɛt fayn ɛgzampul fɔ wi bay we i bin put wetin ɔda pipul dɛn want bifo wetin in want bikɔs i bin lɛk dɛn ɛn i nɔ jɔs bisin bɔt insɛf. Wisɛf fɔ sho se wi lɛk pipul dɛn ɛn wi nɔ jɔs bisin bɔt wisɛf, ɛn wi fɔ sho di kayn lɔv we go mek ɔda pipul dɛn no se wi na tru Kristian dɛn. Fɔ tru, we wi sho se wi lɛk pipul dɛn ɛn wi nɔ jɔs bisin bɔt wisɛf, wi de sho se na wi de fala Krays.

6, 7. (a) Aw Jiova in Wɔd sho se lɔv na sɔntin we rili impɔtant? (b) Wetin na di men pɔynt pan wetin Pɔl bin tɔk na 1 Kɔrintians 13:​4-8 bɔt lɔv?

⁶ Wetin wi go se bɔt pɔsin we nɔ gɛt lɔv? Apɔsul Pɔl bin se: “If a . . . nɔ gɛt lɔv, a dɔn tan lɛk we dɛn wap kɔpa instrumɛnt ɔ we dɛn nak simbal.” (1 Kɔrintians 13:​1) Simbal kin pul lawd nɔys. Bɔt wetin wi go se bɔt kɔpa instrumɛnt? Ɔda Baybul transleshɔn kɔmpia kɔpa instrumɛnt to “wɛn pɔsin de bit pan.” Dɛn ɛgzampul dɛn ya rili fayn. Dɛn de ɛp wi fɔ no se pɔsin we nɔ gɛt lɔv tan lɛk myuzik instrumɛnt we de mek lawd nɔys we pipul dɛn nɔ want fɔ yɛri. Da kayn pɔsin de nɔ go ebul gɛt tayt padi biznɛs wit ɔda pipul dɛn. Pɔl bin tɔk bak se: “If a gɛt fet we so strɔng dat a ebul fɔ muv mawntin dɛn, bɔt a nɔ gɛt lɔv, mi na natin.” (1 Kɔrintians 13:​2) Jɔs imajin dat, di Baybul se ilɛk wetin pɔsin du, if i nɔ gɛt lɔv, in “na natin.” Jiova in Wɔd mek wi no klia wan se lɔv na sɔntin we rili impɔtant.

⁷ Bɔt aw wi go sho se wi gɛt dis kwaliti bay di we aw wi de trit wi brɔda ɛn sista dɛn? Fɔ ansa da kwɛstyɔn de, lɛ wi tɔk bɔt wetin Pɔl bin se na 1 Kɔrintians 13:​4-8. Di men pɔynt insay dɛn vas dɛn ya nɔto aw Gɔd de sho se i lɛk wi ɔ aw wi de sho se wi lɛk Gɔd. Bɔt Pɔl bin de tɔk bɔt aw wi fɔ sho se wi lɛk ɔda pipul dɛn. I bin tɔk bɔt sɔm tin dɛn we lɔv de mek pɔsin du ɛn tin dɛn we i nɔ de mek pɔsin du.

Wetin Lɔv De Mek Pɔsin Du?

8. We wi peshɛnt, aw dat go mek wi trit wi brɔda ɛn sista dɛn?

⁸ “Lɔv de mek pɔsin peshɛnt.” Pɔsin we peshɛnt de bia ɔda pipul dɛn. (Koloshians 3:​13) Yu nɔ tink se na so wisɛf fɔ de peshɛnt? Bikɔs wi we de sav Gɔd nɔ pafɛkt, i go mɔs bi se tɛm go kam we wi brɔda ɔ sista dɛn go du sɔntin we go mek wi fil bad, ɔ sɔntɛm wisɛf go du di sem tin to dɛn. Bɔt we wi peshɛnt, dat de ɛp wi fɔ bia di af-af cham-mɔt we wi kin gɛt wit wi brɔda ɛn sista dɛn, so dat wi go kɔntinyu fɔ gɛt wanwɔd na di kɔngrigeshɔn.

9. Us we dɛn wi go du gud to wi brɔda ɛn sista dɛn?

⁹ “Lɔv de mek pɔsin . . . du gud.” Wi kin du gud we wi du sɔntin fɔ ɛp ɔda pipul dɛn ɛn tɔk fayn to dɛn. Lɔv de mek wi fɛn we fɔ du gud to pipul dɛn, mɔ di wan dɛn we nid pɔsin fɔ ɛp dɛn. Fɔ ɛgzampul, wan ol brɔda ɔ sista go de fil lɛk se na in wan de, ɛn i go nid pɔsin fɔ go fɛn am ɛn ɛnkɔrej am. Wan mama we na in wan de mɛn in pikin dɛn ɔ wan sista we na in wan na Jiova Witnɛs na in famili, go nid pɔsin fɔ ɛp am. Pɔsin we sik ɔ we gɛt sɔm prɔblɛm dɛn go nid fɔ yɛri fayn wɔd dɛn we de ɛnkɔrej am frɔm in padi we nɔ de kɔmɔt biɛn am. (Prɔvabs 12:​25; 17:​17, NWT) We wi du gud to wi brɔda ɛn sista dɛn ilɛk dɛn nɔ aks wi, wi de sho se wi gɛt tru tru lɔv.—2 Kɔrintians 8:​8.

10. Aw lɔv de ɛp wi fɔ tɔk tru ɛn sɔpɔt wetin tru pan ɔl we dat nɔ kin izi?

¹⁰ “Lɔv . . . de mek pɔsin gladi fɔ tin we na tru.” Wan ɔda Baybul transleshɔn se lɔv de mek pɔsin “gladi fɔ sɔpɔt ɛnitin we na tru.” Lɔv de mek wi sɔpɔt di tru ɛn “tɔk tru” to wi kɔmpin dɛn. (Zɛkaraya 8:​16) Fɔ ɛgzampul, if wi padi ɔ fambul dɔn kɔmit siriɔs sin, wi lɔv fɔ Jiova ɛn wi fambul ɔ padi go mek wi sɔpɔt wetin Gɔd want ɛn nɔ tray fɔ ayd wetin wi fambul ɔ padi dɔn du, ɔ tray fɔ mek ɛkskyuz, ɔ ivin lay fɔ am. Di tru na dat dis kayn tin nɔ kin izi fɔ du. Bɔt bikɔs wi lɛk wi padi ɔ fambul ɛn wi want di bɛst fɔ am, wi go want fɔ mek i bɛnifit frɔm Jiova in lɔv bay we I go kɔrɛkt am. (Prɔvabs 3:​11, 12) As Kristian dɛn we lɛk wi kɔmpin dɛn, “wi want fɔ ɔnɛs pan ɔltin.”—Ibruz 13:​18.

11. Bikɔs lɔv de mek “pɔsin nɔ giv-ɔp ilɛk wetin apin,” wetin wi fɔ tray fɔ du we wi kɔmpin Kristian dɛn mek mistek?

¹¹ “Lɔv de mek . . . pɔsin nɔ giv-ɔp ilɛk wetin apin.” Dɛn wɔd dɛn ya min se lɔv “de kɔba ɔltin.” (Kingdom Interlinear) Fɔs Pita 4:​8 se: “Lɔv de kɔba bɔku bɔku sin dɛn.” Fɔ tru, Kristian we de du tin wit lɔv nɔ go want fɔ tɔk bɔt ɔl di bad tin dɛn we in Kristian brɔda ɛn sista dɛn dɔn du am. Bɔku tɛm, nɔto siriɔs mistek wi kɔmpin Kristian dɛn kin mek, ɛn na lɔv go mek wi fɔgiv dɛn.—Prɔvabs 10:​12; 17:​9.

12. Aw apɔsul Pɔl bin sho se i biliv gud tin bɔt Faylimɔn? Wetin wi kin lan frɔm Pɔl in ɛgzampul?

¹² “Lɔv . . . de mek pɔsin biliv ɔltin.” We wan Baybul transletɔ we nem Jems Mɔfat bin de translet dis pat na di Baybul, i bin se lɔv de mek wi “rɛdi fɔ biliv gud tin bɔt pipul dɛn ɔltɛm.” Wi nɔ de dawt wi brɔda ɛn sista dɛn pan ɛni smɔl tin we dɛn de du ɔ bigin wɔnda wetin mek dɛn de du sɔntin. Lɔv de mek wi trɔst wi brɔda ɛn sista dɛn ɛn “biliv gud tin” bɔt dɛn.a Fɔ ɛgzampul, lɛ wi tɔk bɔt Pɔl in lɛta we i bin rayt to Faylimɔn. Insay di lɛta, Pɔl bin ɛnkɔrej Faylimɔn fɔ wɛlkɔm Onɛsimɔs we na in slev we bin dɔn rɔnawe, bɔt we dɔn bi Kristian. Pɔl nɔ bin tray fɔ fos Faylimɔn, bɔt i beg am fɔ du am fɔ lɔv sek. I bin se i gɛt kɔnfidɛns se Faylimɔn go du di rayt tin. Na dat mek i se: “A biliv se yu go du am, so a de rayt to yu, bikɔs a no se yu go ivin du pas wetin a se.” (Vas 21) We lɔv mek wisɛf sho se wi gɛt kɔnfidɛns pan wi brɔda ɛn sista dɛn, dat go ɛp dɛn fɔ du di rayt tin.

13. Aw wi go sho se wi de op fɔ gud tin fɔ wi brɔda ɛn sista dɛn?

¹³ “Lɔv . . . de mek pɔsin op fɔ ɔltin.” Jɔs lɛk aw lɔv de mek wi trɔst pipul dɛn, na so i de mek wi op fɔ gud tin. Lɔv de mek wi op se gud tin go apin to wi brɔda ɛn sista dɛn. Fɔ ɛgzampul, if wan brɔda “de go na di rɔng say bifo i no dat,” wi kin op se i go gri fɔ mek dɛn ɛp am. (Galeshians 6:​1) Wi de op bak se di wan dɛn we nɔ gɛt bɛtɛ fet go gɛt strɔng fet. Wi kin peshɛnt wit dɛn ɛn du ɔl wetin wi ebul fɔ ɛp dɛn fɔ gɛt strɔng fet. (Romans 15:​1; 1 Tɛsalonians 5:​14) Ivin if wi padi ɔ fambul lɛf fɔ sav Jiova, wi de kɔntinyu fɔ op se wan de i go kam bak to Jiova lɛk da pikin we west in papa in prɔpati we Jizɔs tɔk bɔt na in parebul.—Lyuk 15:​17, 18.

14. Wetin na sɔm tin dɛn we go apin insay di kɔngrigeshɔn we wi go nid fɔ bia wit? Wetin lɔv go mek wi du?

¹⁴ “Lɔv . . . de mek pɔsin bia ɔltin.” We wi de bia, dat de ɛp wi fɔ tinap tranga wan we dɛn disapɔynt wi ɔ we tin tranga. Nɔto di wan dɛn we nɔto Jiova Witnɛs nɔmɔ kin du sɔntin we wi nid fɔ bia wit. Sɔntɛnde, ivin wi brɔda ɛn sista dɛn insay di kɔngrigeshɔn kin du sɔntin we wi nid fɔ bia wit. Bikɔs wi brɔda ɛn sista dɛn nɔ pafɛkt, sɔntɛnde dɛn kin disapɔynt wi. Dɛn kin tɔk sɔntin we kin mek wi fil bad. (Prɔvabs 12:​18) Sɔntɛm wi nɔ gladi wit di we aw di ɛlda dɛn du sɔntin na di kɔngrigeshɔn. Ɔ sɔntɛm wan brɔda we wi rɛspɛkt de du sɔntin we de mek wi vɛks, ɛn wi kin bigin de wɔnda if na so Kristian fɔ biev. Wi go lɛf di kɔngrigeshɔn ɛn stɔp fɔ sav Jiova if dɛn kayn tin dɛn ya de apin? Wi nɔ go du dat if wi gɛt lɔv. Na lɔv go mek wi nɔ alaw di mistek dɛn we wi brɔda ɛn sista dɛn de mek fɔ stɔp wi fɔ mek wi nɔ si di gud tin dɛn we dɛn de du. Lɔv go mek wi kɔntinyu fɔ sav Gɔd fetful wan ɛn sɔpɔt di kɔngrigeshɔn ilɛk wetin ɔda pɔsin go se ɔ du.—Sam 119:​165.

Wetin Lɔv Nɔ De Mek Pɔsin Du?

15. If wi de jɛlɔs pɔsin, wetin dat go mek wi du? Aw lɔv go ɛp wi fɔ lɛ wi nɔ jɛlɔs ɔda pipul dɛn?

¹⁵ “Lɔv nɔ de mek pɔsin jɛlɔs.” If wi de jɛlɔs pɔsin, dat go mek wi bigin milɛ am fɔ di prɔpati dɛn we i gɛt, di wok dɛn we i de du na di kɔngrigeshɔn, ɔ di tin dɛn we i sabi fɔ du. Ɛn da kayn tin de go mek wi jɔs de tink bɔt wisɛf, ɛn if wi nɔ kɔntrol di we aw wi de tink, i go ambɔg di pis we de na di kɔngrigeshɔn. Wetin go ɛp wi fɔ lɛ wi nɔ de “milɛ” ɔda pipul dɛn? (Jems 4:​5) Na lɔv. Dis fayn kwaliti go mek wi gladi wit pɔsin if i tan lɛk se i gɛt sɔntin we wi nɔ gɛt. (Romans 12:​15) Lɔv go ɛp wi fɔ lɛ wi nɔ fil bad we dɛn prez ɔda pɔsin fɔ sɔntin we i rili sabi du ɔ fɔ sɔntin we i dɔn gɛt.

16. If wi rili lɛk wi brɔda ɛn sista dɛn, wetin mek wi nɔ fɔ bost bɔt di tin dɛn we wi de du na Jiova in ɔganayzeshɔn?

¹⁶ “Lɔv . . . nɔ de mek pɔsin bost, i nɔ de mek pɔsin prawd.” Lɔv go mek wi nɔ bost bɔt wetin wi sabi du ɔ di tin dɛn we wi gɛt. If wi rili lɛk wi brɔda ɛn sista dɛn, wi nɔ go de blɔf bɔt di tin dɛn we wi de du na di prichin wok ɔ di wok dɛn we wi de du na di kɔngrigeshɔn. If wi de du dat, i go mek wi brɔda ɛn sista dɛn at pwɛl ɛn dɛn go fil lɛk se wi bɛtɛ pas dɛn. Lɔv nɔ de mek wi bost bɔt wetin Jiova de alaw wi fɔ du na in ɔganayzeshɔn. (1 Kɔrintians 3:​5-9) Wi dɔn lan se lɔv “nɔ de mek pɔsin bost,” ɔ lɛk aw The New Testament in Modern English se lɔv nɔ de mek “pɔsin fil gud bɔt insɛf jɔs bikɔs i fil se i impɔtant.” Lɔv de mek wi nɔ si wisɛf lɛk se wi impɔtant pas ɔda pipul dɛn.—Romans 12:​3.

17. Aw lɔv go mek wi biev to ɔda pipul dɛn? Aw wi nɔ go biev if wi gɛt lɔv?

¹⁷ “Lɔv . . . nɔ de mek pɔsin biev bad we.” Pɔsin we de biev bad we kin du sɔntin we i nɔ sɔpoz fɔ du ɔ we de mek ɔda pipul dɛn nɔ gladi. Pɔsin we de du dat nɔ gɛt lɔv bikɔs i de sho se i nɔ kia bɔt aw wetin i de du go afɛkt ɔda pipul dɛn ɛn aw dɛn de fil. Bɔt pɔsin we gɛt lɔv kin biev fayn ɛn tink bɔt aw wetin i de du go afɛkt ɔda pipul dɛn. Lɔv de mek wi biev fayn, du tin dɛn di we aw Gɔd want, ɛn rɛspɛkt wi kɔmpin Kristian dɛn. So lɔv nɔ go mek wi du “shemful tin dɛn” we go mek wi brɔda ɛn sista dɛn sɔprayz ɔ fil bad.—Ɛfishians 5:​3, 4.

18. Wetin mek pɔsin we gɛt lɔv nɔ de pin se paopa pipul dɛn fɔ de du tin di we aw i want?

¹⁸ “Lɔv . . . nɔ de mek pɔsin du wetin in want.” Wan ɔda Baybul transleshɔn se: “Lɔv nɔ de mek pɔsin pin pan wetin i want.” Pɔsin we gɛt lɔv nɔ de pin se paopa pipul dɛn fɔ du sɔntin di we aw i want am, lɛk se na in kin kɔrɛkt ɔltɛm. I nɔ de fɛn kɔni kɔni we fɔ mek pipul dɛn du wetin i want, ɔ kɔnvins ɔda pipul dɛn we nɔ gri wit am fɔ du wetin i want. Da kayn we de we pɔsin de sho se i trangayes de sho bak se i prawd, ɛn di Baybul se: “If yu de kak, yu go kapsay.” (Prɔvabs 16:​18) If wi rili lɛk wi brɔda ɛn sista dɛn, wi go rɛspɛkt wetin dɛn de se, ɛn if i pɔsibul, wi go gri fɔ du wetin dɛn want. If wi nɔ de pin pan wetin wi want, wi de sho se wi de fala Pɔl in advays we se: “Lɛ ɔlman tray fɔ du tin we go bɛnifit ɔda pɔsin, nɔto wetin go bɛnifit am.”—1 Kɔrintians 10:​24.

19. Wetin lɔv go mek wi du we ɔda pipul dɛn tɔk ɔ du sɔntin we wi nɔ lɛk?

¹⁹ “Lɔv . . . nɔ de mek pɔsin vɛks kwik. I nɔ de mek pɔsin kip grɔj na in at.” Lɔv nɔ de mek pɔsin vɛks kwik we ɔda pipul dɛn tɔk ɔ du sɔntin we i nɔ lɛk. Na tru se i nɔmal fɔ lɛ wi vɛks we pɔsin tɔk ɔ du sɔntin we wi nɔ lɛk. Bɔt ilɛk wi gɛt gud rizin fɔ vɛks, lɔv go mek wi nɔ kɔntinyu fɔ vɛks. (Ɛfishians 4:​26, 27) Lɔv go mek wi nɔ de kɔnt di bad tin dɛn we ɔda pipul dɛn kin tɔk ɔ du to wi, lɛk se wi de rayt am na buk fɔ lɛ wi nɔ fɔgɛt. Bifo dat, lɔv go mek wi falamakata wi Gɔd we lɛk wi. Frɔm wetin wi lan na Chapta 26, Jiova kin fɔgiv wi we i gɛt gud rizin fɔ du dat. We i fɔgiv wi, i nɔ de mɛmba di bad we wi dɔn du igen, dat min se i nɔ gɛt fɔ pɔnish wi tumara bambay fɔ di bad tin we wi bin dɔn du. Wi nɔ gladi fɔ no se Jiova nɔ de kip grɔj na in at?

20. Wetin wi fɔ du if wi kɔmpin Kristian kɔmit sin ɛn sɔfa fɔ dat?

²⁰ “Lɔv . . . nɔ de mek pɔsin gladi fɔ tin we nɔ rayt.” Wan ɔda Baybul transleshɔn se: “Lɔv . . . nɔ de mek pɔsin gladi we ɔda pipul dɛn sin.” Jems Mɔfat in transleshɔn se: “Lɔv nɔ de ɛva mek pɔsin gladi we ɔda pipul dɛn du bad.” Lɔv nɔ de ɛva mek pɔsin gladi fɔ tin we nɔ rayt, na dat mek wi nɔ de sɛt mɔt we pɔsin du ɛnitin we bad. Wetin wi go du if wi kɔmpin Kristian kɔmit sin ɛn sɔfa fɔ dat? Lɔv nɔ go mek wi gladi, lɛk se wi de tɔk se, ‘Yɛs! I mis am!’ (Prɔvabs 17:​5) Bɔt wi kin gladi we wi brɔda ɔ sista we bin dɔn sin du wetin go mek i gɛt tayt padi biznɛs wit Jiova bak.

“Sɔntin we Bɛtɛ Fa Fawe”

21-23. (a) Wetin Pɔl bin min we i se “lɔv nɔ de ɛva fel”? (b) Wetin wi go tɔk bɔt insay di las chapta na dis buk?

²¹ “Lɔv nɔ de ɛva fel.” Wetin Pɔl min we i tɔk dɛn wɔd dɛn ya? Akɔdin to wetin i tɔk na di ɔda vas dɛn we de nia dis, i bin de tɔk bɔt di gift dɛn we di oli spirit bin mek di fɔstɛm Kristian dɛn gɛt. Dɛn gift dɛn de bin de sho se Gɔd in blɛsin bin de pan da nyu kɔngrigeshɔn de. Bɔt nɔto ɔl di Kristian dɛn bin ebul fɔ mɛn pipul dɛn, prɔfɛsay bɔt wetin go apin, ɔ tɔk difrɛn langwej dɛn. Bɔt ɔl dat nɔ bin impɔtant bikɔs tɛm go kam we dɛn nɔ go kɔntinyu fɔ gɛt dɛn gift dɛn de igen. Bifo dat, sɔntin de we go lɛf, ɛn dat na tin we ɔlman we na Kristian go ebul fɔ gɛt. Da gift de pas ɛni ɔda gift we di oli spirit bin mek di fɔstɛm Kristian dɛn gɛt. Infakt, Pɔl kɔl am “sɔntin we bɛtɛ fa fawe.” (1 Kɔrintians 12:​31) Wetin na dis tin “we bɛtɛ fa fawe”? Na lɔv.

²² Fɔ tru, di lɔv we Kristian dɛn gɛt we Pɔl tɔk bɔt “nɔ de ɛva fel,” dat min se i nɔ gɛt fɔ ɛva dɔn. Ɛn te tide, na dis lɔv we de mek wi nɔ jɔs bisin bɔt wisɛf de sho se wi na Jizɔs in tru tru disaypul dɛn. Wi kin si we wi brɔda ɛn sista dɛn we de ɔlsay na di wɔl de sho dis lɔv insay ɔl di kɔngrigeshɔn dɛn, nɔto so? Da lɔv de go de sote go, bikɔs Jiova dɔn prɔmis se i go gi in fetful savant dɛn layf we go de sote go. (Sam 37:​9-11, 29) Lɛ wi du wi bɛst fɔ “kɔntinyu fɔ sho lɔv.” If wi du dat, wi go gɛt di tru tru gladi-at we pipul dɛn kin gɛt we dɛn de gi. Apat frɔm dat, wi go kɔntinyu fɔ liv sote go, ɛn gɛt chans fɔ kɔntinyu fɔ sho lɔv to wi brɔda ɛn sista dɛn lɛk wi Gɔd Jiova, we lɛk wi.

²³ Insay dis las chapta na dis sɛkshɔn we de tɔk bɔt lɔv, wi dɔn lan bɔt aw wi go sho lɔv to wi kɔmpin dɛn. Bɔt we wi de mɛmba di difrɛn we dɛn we wi de bɛnifit frɔm Jiova in lɔv, in pawa, in jɔstis, ɛn sɛns, i go fayn if wi aks wisɛf dis kwɛstyɔn, ‘Aw a go sho Jiova se a rili lɛk am?’ Wi go ansa da kwɛstyɔn de na di las chapta na dis buk.