Udat Na Maykɛl di Enjɛl dɛn Edman?

Di Baybul in ansa

Maykɛl, we bɔku rilijɔn dɛn de kɔl “Sɛnt Maykɛl,” na Jizɔs in nem we i bin gɛt na di wɔl ɛn ivin we i go bak na ɛvin.a Maykɛl bin agyu wit Setan afta we Mozis day, ɛn i bin ɛp wan enjɛl fɔ kɛr Gɔd in mɛsej go to prɔfɛt Daniɛl. (Daniɛl 10:​13, 21; Jud 9) Maykɛl in nem min, “Udat Tan Lɛk Gɔd?” I de du wetin in nem min bay we i de difɛnd Gɔd in rulaship ɛn fɛt agens Gɔd in ɛnimi dɛn.​—Daniɛl 12:​1; Rɛvɛleshɔn 12:​7.

Lɛ wi tɔk bɔt sɔm rizin dɛn we mek wi go se na Jizɔs na Maykɛl di enjɛl dɛn edman.

• Maykɛl na “di enjɛl dɛn edman.” (Jud 9) Di “enjɛl dɛn edman” na taytul we min chif fɔ di enjɛl dɛn,” ɛn na insay tu Baybul vas dɛn nɔmɔ i de. Di we aw di wɔd de insay dɛn tu vas dɛn de, de sho se na wan enjɛl gɛt di taytul. Wan pan dɛn vas dɛn de se, we Masta Jizɔs go dɔn gɛt layf bak, i “go kɔmɔt na ɛvin ɛn kam wit big vɔys, wit enjɛl dɛn edman vɔys.” (1 Tɛsalonians 4:​16) Jizɔs gɛt “enjɛl dɛn edman vɔys” bikɔs na in na Maykɛl, we na di enjɛl dɛn edman.

• Maykɛl de lid di enjɛl dɛn fɔ fɛt. “Maykɛl ɛn in enjɛl dɛn fɛt di dragɔn,” we na Setan. (Rɛvɛleshɔn 12:​7) Maykɛl gɛt bɔku pawa na ɛvin bikɔs di Baybul kɔl am di “men prins” ɛn “di gret prins.” (Daniɛl 10:​13, 21; 12:​1) Dɛn taytul dɛn ya sho se Maykɛl na “di chif kɔmanda fɔ di enjɛl dɛn” lɛk aw wan masta sabi bukman fɔ di Nyu Tɛstamɛnt we nem David E. Aune bin se.

  Di Baybul yuz wan ɔda nem fɔ pɔsin we gɛt pawa oba di enjɛl dɛn. I se: “Di tɛm we Masta Jizɔs go sho insɛf to pipul dɛn, we i go kɔmɔt na ɛvin wit in pawaful enjɛl dɛn. I go kam insay faya we de kech fɔ kam pɔnish di wan dɛn we nɔ no Gɔd.” (2 Tɛsalonians 1:​7, 8; Matyu 16:​27) Jizɔs “go na ɛvin . . . , ɛn Gɔd mek di enjɛl dɛn, di wan dɛn we de rul, ɛn di wan dɛn we gɛt pawa de ɔnda am.” (1 Pita 3:​21, 22) I nɔ go mek sɛns fɔ lɛ Gɔd mek pɔsin de we nem Jizɔs ɛn Maykɛl ɛn put dɛn as rayval kɔmanda dɛn fɔ di oli enjɛl dɛn. Bɔt i mek sɛns fɔ lɛ wi biliv se na wan pɔsin gɛt ɔltu dɛn nem dɛn de, Jizɔs ɛn Maykɛl.

• Maykɛl “go tinap” di “tɛm . . . we trɔbul go de.” (Daniɛl 12:​1) Insay di Baybul buk we nem Daniɛl, dɛn yuz di wɔd “tinap” bɔku tɛm fɔ tɔk bɔt tɛm we kiŋ kin du sɔntin fɔ tek spɛshal akshɔn. (Daniɛl 11:​2-4, 21) Jizɔs Krays we dɛn de kɔl “Gɔd in Wɔd,” go tek spɛshal akshɔn as di “Kiŋ fɔ di kiŋ dɛn” fɔ dɔnawe wit ɔl Gɔd in ɛnimi dɛn ɛn protɛkt Gɔd in pipul dɛn. (Rɛvɛleshɔn 19:​11-​16) I go du dat di tɛm we “big big trɔbul we nɔ wande apin frɔm we Gɔd mek di wɔl te naw go apin.”​—Matyu 24:​21, 42