LƐSIN 59
Yu Go Ebul Bia We Pipul dɛn Mek Yu Sɔfa
Pipul dɛn go tray fɔ mek wi stɔp fɔ sav Jiova ɛnitɛm. Dɛn go ivin mek wi sɔfa if wi nɔ stɔp fɔ du dat. Wi fɔ wɔri bikɔs ɔf dat?
1. Wetin mek wi de ɛkspɛkt se pipul dɛn go mek wi sɔfa?
Di Baybul tɔk klia wan se: “Ɔl di wan dɛn we want fɔ fetful to Gɔd ɛn we gɛt wanwɔd wit Krays Jizɔs, pipul dɛn go mek dɛnsɛf sɔfa.” (2 Timoti 3:12) Pipul dɛn bin de mek Jizɔs sɔfa bikɔs i nɔ bin tan lɛk pipul dɛn na Setan in wɔl. Wisɛf nɔ tan lɛk pipul dɛn na di wɔl, na dat mek wi nɔ sɔprayz we gɔvmɛnt ɛn rilijɔs ɔganayzeshɔn dɛn de du tin fɔ mek wi sɔfa.—Jɔn 15:18, 19.
2. Aw wi go pripia fɔ di tɛm we pipul dɛn go mek wi sɔfa?
Wi nid fɔ du tin dɛn we go mek wi abop pan Jiova naw. Ɛvride, wi fɔ mek tɛm fɔ pre to am ɛn rid in Wɔd, di Baybul. Atɛnd di mitin dɛn ɔltɛm. Dɛn tin dɛn ya go gi yu di trɛnk we yu nid fɔ gɛt maynd fɔ bia ɛnitɛm we pipul dɛn mek yu sɔfa, ilɛksɛf na yu fambul dɛn du dat to yu. Di apɔsul Pɔl we pipul dɛn bin mek i sɔfa bɔku tɛm, bin rayt se: “Na Jiova de ɛp mi; a nɔ go fred.”—Ibruz 13:6.
Wi go gɛt maynd bak bay we wi de prich ɔltɛm. Di prichin wok de ɛp wi fɔ abop pan Jiova ɛn mek wi nɔ fred mɔtalman. (Prɔvabs 29:25) If yu lan fɔ gɛt maynd fɔ prich naw, dat go mek yu pripia fɔ kɔntinyu fɔ prich ilɛksɛf di gɔvmɛnt tray fɔ stɔp wi wok.—1 Tɛsalonians 2:2.
3. Aw wi go bɛnifit bay we wi bia we pipul dɛn de mek wi sɔfa?
Na tru se wi nɔ lɛk we pipul dɛn de mek wi sɔfa, bɔt ɛnitɛm we wi bia we dɛn mek wi sɔfa, wi fet de strɔng mɔ ɛn mɔ. Wi de go nia Jiova mɔ ɛn mɔ bikɔs wi dɔn si aw i dɔn ɛp wi di tɛm we wi fil se wi nɔ ebul kɔntinyu. (Rid Jems 1:2-4.) Jiova kin fil bad we i si wi de sɔfa, bɔt i kin gladi we i si se wi de bia. Di Baybul se: “If una bia we una de sɔfa bikɔs una de du gud, dat na fayn tin na Gɔd in yay.” (1 Pita 2:20) If wi kɔntinyu fɔ fetful, Jiova go mek wi gɛt layf we go de sote go insay di nyu wɔl usay nɔbɔdi nɔ go de stɔp wi fɔ mek wi nɔ wɔship am di rayt we.—Matyu 24:13.
LAN MƆ
Lan wetin mek i pɔsibul fɔ mek wi kɔntinyu fɔ fetful to Jiova ilɛksɛf pipul dɛn mek wi sɔfa, ɛn aw i go blɛs wi.
4. Yu go ebul bia we yu famili mek yu sɔfa
Jizɔs bin no se sɔm pipul dɛn na wi famili nɔ go want wi fɔ sav Jiova. Rid Matyu 10:34-36, dɔn una tɔk bɔt dis kwɛstyɔn:
Wetin kin apin we pɔsin na di famili disayd fɔ sav Jiova?
Fɔ si wan ɛgzampul bɔt dis, ple di VIDIO, dɔn una tɔk bɔt di kwɛstyɔn we de dɔŋ.
Wetin yu go du if yu fambul ɔ padi de tray fɔ stɔp yu fɔ mek yu nɔ sav Jiova?
Rid Sam 27:10 ɛn Mak 10:29, 30. Afta una rid ɛni skripchɔ, una tɔk bɔt dis kwɛstyɔn:
Aw dis prɔmis go ɛp yu if yu famili ɔ padi dɛn de tray fɔ stɔp yu fɔ mek yu nɔ sav Jiova?
5. Kɔntinyu fɔ sav Jiova ilɛksɛf dɛn de mek yu sɔfa
Wi nid fɔ gɛt maynd fɔ sav Jiova we ɔda pipul dɛn de tray fɔ stɔp wi fɔ mek wi nɔ du dat. Ple di VIDIO, dɔn una tɔk bɔt di kwɛstyɔn we de dɔŋ.
Aw di ɛgzampul dɛn na dis vidio de ɛp yu fɔ gɛt maynd?
Rid Akt 5:27-29 ɛn Ibruz 10:24, 25. Afta una rid ɛni skripchɔ, una tɔk bɔt dis kwɛstyɔn:
Wetin mek i rili impɔtant fɔ lɛ wi kɔntinyu fɔ wɔship Jiova ilɛksɛf dɛn tray fɔ stɔp wi prichin wok ɔ wi mitin dɛn?
6. Jiova go ɛp yu fɔ bia
Jiova Witnɛs dɛn we yɔŋ ɛn ol ɛn we kɔmɔt difrɛn say dɛn na di wɔl dɔn kɔntinyu fɔ sav Jiova fetful wan pan ɔl we dɛn de mek dɛn sɔfa. Fɔ si wetin bin ɛp dɛn, ple di VIDIO. Dɔn una tɔk bɔt di kwɛstyɔn we de dɔŋ.
Insay di vidio, wetin bin ɛp dɛn brɔda ɛn sista dɛn de fɔ bia?
Rid Romans 8:35, 37-39 ɛn Filipians 4:13. Afta una rid ɛni skripchɔ, una tɔk bɔt dis kwɛstyɔn:
Aw dis skripchɔ mek yu biliv se yu go ebul fɔ bia ɛni prɔblɛm?
Rid Matyu 5:10-12, dɔn una tɔk bɔt dis kwɛstyɔn:
Wetin mek yu go gladi ilɛksɛf pipul dɛn de mek yu sɔfa?
Bɔku pan Jiova in savant dɛn dɔn kɔntinyu fɔ sav am fetful wan pan ɔl we dɛn tray fɔ stɔp dɛn. Yusɛf go ebul fɔ du dat!
SƆM PIPUL DƐN KIN SE: “A nɔ go ebul bia if dɛn mek a sɔfa.”
Us skripchɔ dɛn go gi dɛn di kɔnfidɛns we dɛn nid?
WETIN YU DƆN LAN?
Jiova valyu ɔl wetin wi de du fɔ sav am ilɛksɛf pipul dɛn de mek wi sɔfa. Jiova go ɛp wi fɔ bia te to di ɛnd!
Rivyu
Wetin mek Kristian dɛn fɔ ɛkspɛkt se pipul dɛn go mek dɛn sɔfa?
Wetin yu kin du naw fɔ rɛdi fɔ di tɛm we pipul dɛn go mek yu sɔfa?
Wetin go ɛp yu fɔ gɛt kɔnfidɛns fɔ se yu go ebul sav Jiova ilɛk uskayn prɔblɛm mit yu?
DU MƆ RISACH
Wach we wan yɔŋ brɔda de ɛksplen aw Jiova bin ɛp am fɔ bia we dɛn bin put am na prizin bikɔs i bin nyutral.
Lan wetin bin ɛp wan brɔda ɛn in wɛf fɔ sav Jiova fetful wan fɔ lɔng tɛm pan ɔl we dɛn bin mek dɛn sɔfa.
Lan aw yu go gɛt maynd we dɛn de mek yu sɔfa.
“Rɛdi Yusɛf Naw fɔ di Tɛm We Dɛn Go Mek Yu Sɔfa” (Di Wachtawa, Julay 2019)
Aw wi fɔ si wi fambul dɛn we de tray fɔ stɔp wi fɔ mek wi nɔ sav Jiova? Ɛn wetin wi go du fɔ mek wi gɛt pis wit dɛn ɛn kɔntinyu fɔ fetful to Jiova?