7, 8. Aw di tin dɛn we wi de tɔk go ambɔg wi padi biznɛs wit Jiova?

⁷ Di tɔd rizin we mek wi fɔ tek tɛm tɔk na dat wi gɛt fɔ ansa to Jiova fɔ di tin dɛn we wi de tɔk. Di tin dɛn we wi de tɔk nɔ jɔs de ambɔg wi padi biznɛs wit wi brɔda dɛn, bɔt i ivin de ambɔg wi padi biznɛs wit Jiova. Jems 1:26 tɔk se: “If ɛnibɔdi tink se in de fala Gɔd ɛn i nɔ de tek tɛm wɛn i de tɔk, i de mek insɛf ful. Na fɔ natin di pɔsin de fala Gɔd.”a As wi bin dɔn lan na Chapta 11, di tin dɛn we wi de tɔk gɛt fɔ du wit wi wɔship. If wi nɔ de kɔntrol di tin dɛn we de kɔmɔt na wi mɔt, ɔl di fayn wok we wi de du fɔ Gɔd, go bi fɔ natin. Dis na siriɔs tin fɔ tink bɔt, nɔto so?​—Jems 3:8-10.