Du Wetin Rayt Ɔltɛm

1, 2. Wetin mek Jiova de gladi we i de si se wi de tray fɔ du wetin rayt ɔltɛm? Gi ɛgzampul.

LƐ WI se wan mama ɛn in smɔl bɔy pikin kɔmɔt na wan shɔp. As dɛn kɔmɔt insay di shɔp so, di pikin tinap, i luk in an ɛn sɔprayz. I ol wan smɔl tɔys na in an we i tek na di shɔp. I fɔgɛt fɔ put am bak ɔ fɔ aks in mama if i go bay am fɔ am. Di pikin fil bad, so i tɛl in mama bɔt di tɔys. In mama kɔrej am ɛn kɛr am go bak insay di shɔp fɔ mek i put di tɔys bak ɛn fɔ mek i beg di pɔsin we de sɛl na di shɔp. We di pikin de du dis, in mama de gladi ɛn i de fil fayn. Wetin mek?

² Mama ɛn papa dɛn kin gladi we dɛn pikin dɛn de lan fɔ du wetin rayt. Ɛn wi Papa sɛf we de na ɛvin kin gladi, bikɔs in na Gɔd we “nɔ de lay.” (Ditarɔnɔmi 32:4) As wi de tray fɔ gɛt tayt padi biznɛs wit Gɔd, i de gladi we wi de tray fɔ du wetin rayt ɔltɛm. Bikɔs wi want fɔ du wetin de mek Gɔd gladi ɛn fɔ mek i kɔntinyu fɔ lɛk wi, wi want fɔ tan lɛk di apɔsul Pɔl we se wi “want du wetin rayt ɔltɛm.” (Di Ibru Pipul Dɛn 13:18) Lɛ wi tɔk naw bɔt 4 men eria dɛn we kin mek i nɔ izi fɔ du wetin rayt ɔltɛm. Afta dat, wi go tɔk bɔt di blɛsin dɛn we wi go gɛt if wi de tray fɔ du wetin rayt ɔltɛm.

TRAY FƆ TƐL YUSƐF DI TRU

3-5. (a) Aw Gɔd in Wɔd sho se i bad fɔ ful wisɛf? (b) Wetin go ɛp wi fɔ tɛl wisɛf di tru?

³ Wan tin we nɔ kin izi fɔ du na fɔ lɛ pɔsin tɛl insɛf di tru. Bikɔs wi nɔ pafɛkt, i kin izi fɔ mek wi ful wisɛf. Fɔ ɛgzampul, Jizɔs bin tɛl di Kristian dɛn we de na Laodisya se dɛn de ful dɛnsɛf fɔ tink se dɛn jɛntri, we i bi se dɛn ‘po, nekɛd ɛn blaynd’ na Gɔd in yay. Dis na sɔntin we rili sɔri. (Rɛvɛleshɔn 3:17) Dɛn bin de du mɔ bad to dɛnsɛf bay we dɛn bin de ful dɛnsɛf.

⁴ Mɛmba bak se Jems bin tɔk se: “If ɛnibɔdi tink se in de fala Gɔd ɛn i nɔ de tek tɛm wɛn i de tɔk, i de mek insɛf ful. Na fɔ natin di pɔsin de fala Gɔd.” (Jems 1:26) If wi fil se wi go de yuz wi mɔt fɔ tɔk bad tin dɛn ɛn tink se Jiova go stil gladi fɔ wi wɔship, na wisɛf nɔmɔ wi go de ful, ɛn wi wɔship go bi fɔ natin. Wetin go ɛp wi fɔ mek dis kayn bad tin nɔ apin to wi?

⁵ We Jems bin de tɔk insay dis sem chapta, i bin se di tru we de na Gɔd in wɔd tan lɛk lukin-glas. Jems bin advays wi fɔ put ɔl wi at pan Gɔd in Wɔd ɛn du wetin de insay de. (Rid Jems 1:23-25.) Di Baybul go ɛp wi fɔ tɛl wisɛf di tru, ɛn i go ɛp wi fɔ si eria dɛn we wi fɔ chenj na wi layf. (Lamɛnteshɔn 3:40; Egay 1:5) Wi fɔ pre to Jiova ɛn beg am mek i luk wi bɛtɛ bɛtɛ wan, so dat i go no wetin de na wi at. Ɛn aks am mek i ɛp wi fɔ si if wi de tink bɔt ɛni bad tin so dat i go ɛp wi fɔ chenj. (Sam 139:23, 24) Fɔ du wetin nɔ rayt, na tin we bad, ɛn wi fɔ si am lɛk aw Jiova de si am. Na dat mek Prɔvabs 3:32 se: “PAPA GƆD et udat de du bad bɔt i lɛk pɔsin we de waka tret na . . . in yay ɛn de mek am in padi.” Jiova de ɛp wi fɔ fil lɛk aw i de fil ɛn fɔ si wisɛf lɛk aw i de si wi. Mɛmba se, Pɔl bin tɔk se wi “want du wetin rayt ɔltɛm.” Wi nɔ pafɛkt rayt naw, bɔt wi rili want ɛn de tray fɔ du wetin rayt ɔltɛm.

DU WETIN RAYT NA DI FAMILI

6. Wetin mek maredman ɛn mareduman fɔ tɔk tru to dɛnsɛf? If dɛn de tɔk di tru to dɛnsɛf, us prɔblɛm dɛn, dɛn go avɔyd?

⁶ We ɔlman na di famili de du wetin rayt ɔltɛm, ɔda pipul dɛn go no se dɛn na tru Kristian dɛn. So maredman ɛn mareduman fɔ de tɔk tru to dɛnsɛf ɔltɛm. Maredman ɔ mareduman we na Kristian nɔ fɔ mek lɛk se i want ɔda pɔsin, i nɔ fɔ ayd fɔ mek padi wit ɔda pɔsin na di Intanɛt, ɔ wach dɛn nekɛd pikchɔ dɛn. Sɔm Kristian dɛn we mared dɔn put an pan dɛn kayn layf ya, ɛn dɛn dɔn ayd pan dɛn man ɔ dɛn wɛf. Dis na tin we nɔ rayt atɔl. Kiŋ Devid bin tɔk se: “A nɔ de kip kɔmpin wit udat de pan rikishi ɛn a nɔ de jɔyn gɛŋ wit udat ipokrit.” (Sam 26:4) If yu dɔn mared, nɔ ɛva du sɔntin we yu nɔ go want mek yu man ɔ yu wɛf no bɔt!

7, 8. Us ɛgzampul dɛn de na di Baybul we go ɛp pikin dɛn fɔ lan fɔ du wetin rayt ɔltɛm?

⁷ We mama ɛn papa dɛn de lan dɛn pikin dɛn se dɛn fɔ de du wetin rayt ɔltɛm, dɛn fɔ yuz di ɛgzampul dɛn we de na di Baybul. We dɛn want tɛl dɛn pikin dɛn bɔt ɛgzampul dɛn we nɔ fayn, dɛn fɔ tɛl dɛn bɔt Ekan, we bin tif ɛn tray fɔ ayd am; ɛn bɔt Geazi we bin lay fɔ mek dɛn gi am sɔntin; ɛn bɔt Judas we bin de tif ɛn we bin lay so dat dɛn go du bad tin to Jizɔs.​—Jɔshwa 6:17-19; 7:11-25; Sɛkɛn Kiŋ 5:14-16, 20-27; Matyu 26:14, 15; Jɔn 12:6.

⁸ We mama ɛn papa dɛn want tɛl dɛn pikin dɛn bɔt ɛgzampul dɛn we fayn, dɛn fɔ tɛl dɛn bɔt Jekɔb we bin tɛl in pikin dɛn fɔ kɛr di mɔni we dɛn bin si na dɛn bag dɛn bikɔs i bin fil se na mistek di pipul dɛn mistek put am de. Ɛn dɛn fɔ tɛl dɛn bak bɔt Jɛfta ɛn in gyal pikin. Jɛfta in pikin bin gri fɔ du wetin in papa bin dɔn prɔmis Gɔd pan ɔl we i nɔ bin izi fɔ du am; ɛn dɛn fɔ tɛl dɛn bak bɔt Jizɔs we nɔ bin fred fɔ sho insɛf to di pipul dɛn we bin kam fɔ ol am. Jizɔs bin du dis fɔ mek wetin di Baybul bin dɔn tɔk, bi, ɛn fɔ protɛkt in padi dɛn. (Jɛnɛsis 43:12; Di Jɔj Dɛm 11:30-40; Jɔn 18:3-11) Dɛn ɛgzampul ya go ɛp mama ɛn papa dɛn fɔ no di fayn fayn tin dɛn we de na Gɔd in Wɔd we dɛn go yuz fɔ tich dɛn pikin dɛn so dat dɛn go lɛk fɔ du wetin rayt ɔltɛm.

9. Wetin mama ɛn papa dɛn nɔ fɔ du if dɛn want mek dɛn pikin dɛn du wetin rayt? Wetin mek i fayn fɔ mek mama ɛn papa dɛn sɛt gud ɛgzampul fɔ dɛn pikin dɛn?

⁹ We mama ɛn papa dɛn de tich dɛn pikin dɛn, dɛnsɛf fɔ du wetin dɛn de tich dɛn. Di apɔsul Pɔl bin se: “Una de lan ɔda pipul, wetin mek una nɔ de lan unasɛf? Una de tɛl ɔda pipul se, dɛn nɔ fɔ tif, bɔt unasɛf de tif.” (Lɛta Fɔ Rom 2:21) Sɔm mama ɛn papa dɛn de kɔnfyus dɛn pikin dɛn bay we dɛn de tɛl dɛn fɔ du wetin rayt bɔt dɛnsɛf nɔ de du wetin rayt. Dɛn kin mek lɛk se i nɔ bad fɔ tif smɔl smɔl tin dɛn ɔ fɔ lay dɛn smɔl smɔl lay dɛn. Dɛn kin tɔk se, “Dɛn no se pipul dɛn gɛt fɔ tek dɛn tin ya” ɔ “Dis na smɔl lay nɔmɔ. I nɔ bad.” Bɔt tif na tif, ilɛksɛf di tin na smɔl tin ɔ na big tin, ɛn lay na lay, ilɛk wetin di pɔsin lay bɔt.a (Rid Lyuk 16:10.) Pikin dɛn kwik fɔ no we dɛn mama ɛn papa dɛn nɔ de du wetin rayt, ɛn dis kin mek dɛn nɔ du wetin rayt we dɛn big. (Lɛta Fɔ Ɛfisɔs 6:4) Bɔt if dɛn mama ɛn papa dɛn de du wetin rayt, dɛnsɛf go du wetin rayt we dɛn big, ɛn briŋ prez to Jiova pan ɔl we ɔda pipul dɛn nɔ de du wetin rayt.​—Prɔvabs 22:6.

DU WETIN RAYT NA DI KƆNGRIGESHƆN

10. We wi de tɔk to wi kɔmpin Kristian dɛn, wetin-ɛn-wetin wi fɔ mɛmba?

¹⁰ We wi de kip kɔmpin wit wi kɔmpin Kristian dɛn go ɛp wi fɔ du wetin rayt ɔltɛm. Wi bin lan na Chapta 12 se, wi nid fɔ tek tɛm aw wi de tɔk, mɔ we wi de wit wi Kristian brɔda ɛn sista dɛn. If wi nɔ tek tɛm we wi de tɔk, wi go lay pan ɔda pɔsin ɛn ivin pwɛl in nem. If wi tɔk bɔt sɔntin we wi nɔ shɔ, wi go de ɛp fɔ mek lay lay tɔk skata, so i go bɛtɛ mek wi pik di tin dɛn we wi de tɔk. (Prɔvabs 10:19) Bɔt ilɛksɛf wi no se sɔntin na tru, dat nɔ stil min se wi fɔ tɔk am. Fɔ ɛgzampul, sɔntɛm di tin we apin nɔto wi biznɛs, ɔ i nɔ fayn fɔ mek wi tɔk bɔt am. (Fɔs Lɛta Fɔ Tɛsalonayka 4:11) Sɔm pipul dɛn kin tɔk ɛnikayn we to pɔsin, ɛn dɛn kin fil se dɛn jɔs de tɛl di pɔsin di tru. Bɔt wi fɔ tɔk fayn to pipul dɛn, ɛn di tin dɛn we wi de tɔk fɔ mek ɔda pipul dɛn gladi.​—Rid Lɛta Fɔ Kɔlɔse 4:6.

11, 12. (a) Aw sɔm pipul dɛn we kin dɔn du bad bad tin kin mek dɛn prɔblɛm wɔs? (b) Wetin na sɔm lay lay tin dɛn we Setan kin want mek pipul dɛn biliv bɔt siriɔs sin? Wetin wi go du fɔ mek wi nɔ biliv dɛn lay lay tin ya? (c) If Jiova in ɔganayzeshɔn aks wi bɔt ɛnitin, aw wi go sho se wi de tɔk tru?

¹¹ I rili impɔtant fɔ mek wi tɔk di tru to di wan dɛn we Jiova dɔn put oba di kɔngrigeshɔn. Sɔm pipul dɛn we kin dɔn put dɛn an pan siriɔs sin kin mek di prɔblɛm wɔs bay we dɛn kin tray fɔ ayd dɛn sin ɛn lay to di ɛlda dɛn. Dɛn pipul ya kin ivin mek lɛk se dɛn de wɔship Jiova bɔt dɛn de du bad bad tin dɛn we ɔda pipul dɛn nɔ no bɔt. Dis de mek di pɔsin de lay pan ɔltin we i de du. (Sam 12:2) Ɔda wan dɛn kin tɛl di ɛlda dɛn smɔl tru, bɔt dɛn kin ayd di impɔtant pat dɛn. (Di Apɔsul Dɛn Wok [Akt] 5:1-11) Dis kin bi bikɔs dɛn biliv di lay lay tin dɛn we Setan want mek pipul dɛn biliv.​—Rid di bɔks we se “Sɔm Lay Lay Tin dɛn we Setan Kin Tɔk Bɔt Siriɔs Sin”

¹² I impɔtant bak fɔ rayt di tru ansa to kwɛstyɔn dɛn we Jiova in ɔganayzeshɔn kin aks wi. Fɔ ɛgzampul, we wi de rayt wi fil savis ripɔt wi fɔ rayt di tru. Semweso, we wi de fil fɔm fɔ du mɔ na Jiova in ɔganayzeshɔn, wi fɔ rayt di tru bɔt wi wɛlbɔdi biznɛs ɔ ɛni ɔda tin bɔt wi layf.​—Rid Prɔvabs 6:16-19.

13. Aw wi go du wetin rayt to wi Kristian brɔda dɛn we i kam pan biznɛs?

¹³ Wi fɔ du wetin rayt ɛn tɔk tru to wi kɔmpin Kristian dɛn ivin we i kam pan biznɛs. Sɔntɛnde, sɔm Kristian dɛn kin jɔyn fɔ mek biznɛs. Dɛn fɔ tek tɛm mek dɛn nɔ miks dɛn biznɛs wit di wɔship we dɛn de wɔship Jiova na Kiŋdɔm Ɔl ɔ na fil savis. I kin bi se, wan brɔda tek wan ɔda brɔda fɔ wok fɔ am. If yu tek brɔda ɔ sista dɛn fɔ wok fɔ yu, yu fɔ trit dɛn fayn, yu fɔ pe dɛn di tɛm we yu fɔ pe dɛn, yu fɔ pe dɛn di mɔni we una bin tɔk fɔ, ɛn gi dɛn di bɛnifit dɛn we yu bin dɔn gri fɔ gi dɛn ɔ we di lɔ se dɛn fɔ gɛt. (Fɔs Lɛta To Timoti 5:18; Jems 5:1-4) If wi de wok fɔ brɔda ɔ sista, wi fɔ du di wok we i de pe wi fɔ. (Sɛkɛn Lɛta Fɔ Tɛsalonayka 3:10) Wi nɔ fɔ fil se i fɔ trit wi bɛtɛ pas di ɔda wokman dɛn bikɔs wi ɛn in de wɔship Jiova. Wi nɔ fɔ fil se i fɔ gi wi de-ɔf, bɛnifit dɛn, ɔ ɔda tin dɛn we i nɔ de gi ɔda wokman dɛn.​—Lɛta Fɔ Ɛfisɔs 6:5-8.

14. We Kristian dɛn de kam togɛda fɔ du biznɛs, wetin dɛn fɔ du? Wetin mek dɛn fɔ du dat?

¹⁴ Aw di Baybul go ɛp wi if wi ɛn ɔda brɔda kam togɛda fɔ du biznɛs? Di Baybul tɛl wi wan impɔtant tin we wi fɔ du: Wi fɔ rayt ɔltin! Fɔ ɛgzampul, we Jɛrimaya bin bay land, i bin rayt tu pepa dɛn we de sho se i dɔn bay di land, i bin mek ɔda pipul dɛn de de as witnɛs we i de bay di land, ɛn i bin kip di pepa fayn fɔ tumara bambay. (Jɛrimaya 32:9-12; rid bak Jɛnɛsis 23:16-20.) We wi de du biznɛs wit wi kɔmpin Kristian dɛn, i fayn fɔ rayt ɔltin, sayn am, ɛn mek ɔda pipul dɛn de as witnɛs. Dis nɔ min se una nɔ biliv unasɛf. Bifo dat, i de ɛp fɔ mek prɔblɛm nɔ kam tumara bambay, i de mek una nɔ rigrɛt, ɛn i de ivin ɛp fɔ mek plaba nɔ kam we go mek una skata bad. We Kristian dɛn de du biznɛs togɛda, dɛn fɔ mɛmba se no biznɛs nɔ de we so valyu dat i fɔ pwɛl di wanwɔd ɛn kol at we de na di kɔngrigeshɔn.b​—Fɔs Lɛta Fɔ Kɔrint 6:1-8.

DU WETIN RAYT TO ƆDA PIPUL DƐN

15. Aw Jiova kin fil bɔt di kruk we pipul dɛn kin du pan biznɛs? Wetin Kristian dɛn fɔ du fɔ mek Gɔd kɔntinyu fɔ lɛk dɛn?

¹⁵ Nɔto insay di kɔngrigeshɔn nɔmɔ Kristian fɔ du wetin rayt. Di apɔsul Pɔl bin tɔk se wi “want fɔ du wetin rayt ɔltɛm.” (Na wi mek am italiks; Di Ibru Pipul Dɛn 13:18) Ivin we wi de du biznɛs wit ɔda pipul dɛn, Jiova want mek wi du wetin rayt. Di Baybul buk we nem Prɔvabs, tɔk bɔku tɛm bɔt wetin mek i fayn fɔ yuz kɔrɛkt skel ɔ kɔrɛkt mɛnshɔmɛnt. (Prɔvabs 11:1; 16:11; 20:10, 23) Trade trade, pipul dɛn bin de yuz skel we dɛn bin de du biznɛs so dat dɛn go ebul we di tin dɛn we dɛn bay ɛn di mɔni we dɛn yuz fɔ bay di tin dɛn. Dɛn kruk biznɛsman dɛn bin de yuz skel we nɔ kɔrɛkt fɔ ful ɛn tif di wan dɛn we de kam bay to dɛn. Jiova et dɛn tin ya bad bad wan! Fɔ mek Gɔd kɔntinyu fɔ lɛk wi, wi fɔ avɔyd ɛnitin pan biznɛs we go mek wi nɔ du wetin rayt.

16, 17. Uskayn tin dɛn we pipul dɛn de du we nɔ rayt? Wetin tru Kristian dɛn dɔn mekɔp dɛn maynd nɔ fɔ du?

¹⁶ Na Setan de rul dis wɔl, so wi nɔ sɔprayz fɔ no se bɔku pipul dɛn nɔ de du wetin rayt. Ɛvride, wi kin mitɔp tin dɛn we kin mek wi want fɔ du tin we nɔ rayt. We pipul dɛn kin de rayt dɛn CV, we na di pepa we dɛn kin yuz fɔ fɛn wok, sɔm kin lay, sɔm kin sho satifiket we nɔto dɛn yon, ɛn tɔk se dɛn sabi du wok we dɛn nɔ sabi, ɔ lay se dɛn dɔn du sɔntin fɔ lɔng tɛm. We pipul dɛn kin de fil fɔm fɔ travul, fɔ pe taks, fɔ inshɔrans, ɛn ɔda tin dɛn, dɛn kin lay so dat dɛn go gɛt wetin dɛn want. Bɔku skulpikin dɛn kin spay we dɛn de sit ɛgzam. We dɛn gi dɛn asaynmɛnt fɔ du, dɛn kin go na di Intanɛt ɛn kɔpi wetin ɔda pɔsin dɔn du ɛn mek lɛk se na dɛn du am. Ɔda pipul dɛn kin gi brayb fɔ gɛt wetin dɛn want. Wi nɔ de sɔprayz we dɛn tin ya de apin bikɔs di wɔl ful-ɔp wit pipul dɛn we “de mɛmba dɛnsɛf nɔmɔ,” we “want ɔltin,” ɛn we nɔ “de du gud.”​—Sɛkɛn Lɛta To Timoti 3:1-5.

¹⁷ Tru Kristian dɛn dɔn mekɔp dɛn maynd nɔ fɔ put an pan dɛn kayn tin ya. Wan tin we kin mek i nɔ izi fɔ du wetin rayt na bikɔs i kin tan lɛk se di wan dɛn we nɔ de du wetin rayt de bɛtɛ ɛn ivin de go bifo na di wɔl. (Sam 73:1-8) Ɛn sɔntɛm, tin kin tranga fɔ Kristian dɛn bikɔs dɛn want fɔ du wetin rayt “ɔltɛm.” I fayn fɔ du wetin rayt ɔltɛm? Yɛs, i fayn. Wetin mek i fayn? Us blɛsin dɛn yu go gɛt if yu du wetin rayt ɔltɛm?

DI BLƐSIN DƐN WE WI GO GƐT WE WI DU WETIN RAYT

18. Wetin mek i fayn fɔ de du wetin rayt?

¹⁸ Na wan wan tin de we bɛtɛ pas di gudnem we yu go gɛt as pɔsin we de du wetin rayt. (Rid di bɔks we se “A De Du Wetin Rayt pan Ɔltin?”) Mɛmba se, fɔ du wetin rayt na tin we ɔlman ebul du! Nɔto we pɔsin gɛt sɛns, i gɛt mɔni, i fayn, pipul dɛn de rɛspɛkt am, ɔ ɛni ɔda tin, go mek i bi pɔsin we de du wetin rayt. Pan ɔl we pipul dɛn no dis, dɛn nɔ de gri fɔ du wetin rayt. Na wan wan pipul dɛn nɔmɔ de du wetin rayt. (Mayka 7:2) Sɔm pipul dɛn go provok yu bikɔs yu de du wetin rayt, bɔt ɔda wan dɛn go gladi fɔ yu, ɛn dɛn go biliv yu ɛn rɛspɛkt yu fɔ dat. Plɛnti Jiova Witnɛs dɛn dɔn si se we dɛn de du wetin rayt, dɔn mek dɛn gɛt plɛnti bɛnifit. We bɔsman dɛn kin sak ɔda pipul dɛn fɔ tif biznɛs, dɛn nɔ kin sak Jiova Witnɛs dɛn. Ɛn sɔm dɛn dɔn gɛt wok we bɔsman dɛn kin de fɛn pɔsin we de du wetin rayt.

19. Aw wi kɔnshɛns ɛn wi padi biznɛs wit Jiova go tan lɛk we wi du wetin rayt ɔltɛm?

¹⁹ Ilɛksɛf dɛn tin ya dɔn apin to yu ɔ nɔ apin to yu, yu go mɔs dɔn si se we yu de du wetin rayt, yu de gɛt plɛnti bɛnifit. Yu go gɛt klin kɔnshɛns. Di apɔsul Pɔl bin rayt se: “Wi no gud wan se wi dɔn du ɔl wetin wi no se wi fɔ du.” (Di Ibru Pipul Dɛn 13:18) Dɔn, Jiova de si di gudnem we wi gɛt, ɛn i lɛk pipul dɛn we de du wetin rayt ɔltɛm. (Rid Sam 15:1, 2; Prɔvabs 22:1.) We wi de du wetin rayt ɔltɛm go mek Gɔd kɔntinyu fɔ lɛk wi, ɛn na dis blɛsin pas ɛni ɔda blɛsin we wi go gɛt. Lɛ wi tɔk bɔt ɔda tin we go ɛp wi fɔ du wetin rayt. Wetin na da tin de? Wi fɔ si wok lɛk aw Jiova de si am.