Aw Jiova De Sho Lɔv ɛn Du Tin Tret Insay di Kristian Kɔngrigeshɔn? (Di Sɛkɔn Pat Pan 4 Atikul Dɛn)

1. Us tu tin wi shɔ bɔt?

JIOVA GƆD lɛk di wan dɛn we de wɔship am. Na dat i bin dɔn de du, ɛn i go kɔntinyu fɔ du dat sote go. I lɛk bak fɔ du tin tret. (Sam 33:​5) So tu tin dɛn de we wi shɔ bɔt: (1) Jiova kin fil am we ɔda pipul dɛn de trit in pipul dɛn bad. (2) I go mek shɔ se i pɔnish di wan dɛn we de trit in pipul dɛn bad. Insay di fɔs atikul we tɔk bɔt dis tɔpik,b wi bin lan se lɔv na bin di men tin pan di Lɔ we Gɔd bin gi Mozis. Di Lɔ bin de ɛnkɔrej di pipul dɛn fɔ trit ɔlman fayn, ivin di wan dɛn we i izi fɔ tek advantej pan. (Dit. 10:​18) Da Lɔ de bin sho aw Jiova rili bisin bɔt di wan dɛn we de wɔship am.

2. Us kwɛstyɔn dɛn wi go ansa?

² Dɛn bin stɔp fɔ yuz di Lɔ we Gɔd bin gi Mozis insay di ia 33, we di kɔngrigeshɔn bin stat. Fɔ se di Kristian dɛn go liv dɛn layf di kayn we we dɛn nɔ go gɛt lɔ we de ɛp dɛn fɔ lɛk ɔda pipul dɛn ɛn fɔ du tin tret? Nɔ, dat nɔ go apin. Kristian dɛn gɛt nyu lɔ. Insay dis atikul, wi go tɔk fɔs bɔt wetin na di lɔ. Dɔn wi go ansa dɛn kwɛstyɔn dɛn ya: Wetin mek wi go se lɔv na di men tin pan di lɔ? Wetin mek wi go se di lɔ de ɛp pɔsin fɔ du tin tret? Frɔm wetin di lɔ se, aw di wan dɛn we de tek di lid fɔ trit ɔda pipul dɛn?

WETIN NA “KRAYS IN LƆ”?

3. Frɔm wetin de na Lɛta fɔ Galeshya 6:​2 (NW), wetin “Krays in lɔ” min?

³ Rid Lɛta fɔ Galeshya 6:​2, NW. Kristian dɛn de ɔnda “Krays in lɔ.” Jizɔs nɔ bin rayt lɔ dɛn we in disaypul dɛn fɔ fala, bɔt i bin tɛl dɛn wetin dɛn fɔ du, ɛn gi dɛn prinsipul dɛn we go gayd dɛn. “Krays in lɔ” min ɔl di tin dɛn we Jizɔs bin tich. Wi go tɔk mɔ bɔt dis lɔ ya insay di ɔda paregraf dɛn.

4-5. Aw Jizɔs bin de tich? Ustɛm Jizɔs bin tich?

⁴ Aw Jizɔs bin de tich? Fɔs, i bin de tich pipul dɛn bay wetin i bin de tɔk. Jizɔs bin tɔk pawaful wɔd dɛn bikɔs i bin de tich di tru tin bɔt Gɔd, wetin layf rili min, ɛn i bin sho klia wan se na Gɔd in Kiŋdɔm nɔmɔ go mek mɔtalman lɛf fɔ sɔfa. (Lyuk 24:​19) Jizɔs bin de yuz in ɛgzampul bak fɔ tich. I bin sho in disaypul dɛn aw dɛn fɔ liv dɛn layf bay di we aw in bin de liv in layf.—Jɔn 13:​15.

⁵ Ustɛm Jizɔs bin tich? I bin tich di tɛm we i bin de du in prichin wok na dis wɔl. (Mat. 4:​23) I bin tich bak in disaypul dɛn jɔs afta we i bin gɛt layf bak. Fɔ ɛgzampul, Jizɔs bin apia to wan grup we na in disaypul dɛn we pas 500 pipul dɛn, ɛn i bin tɛl dɛn fɔ mek disaypul dɛn. (Mat. 28:​19, 20; 1 Kɔr. 15:​6) Bikɔs na Jizɔs de oba di kɔngrigeshɔn, i bin kɔntinyu fɔ tich in disaypul dɛn afta we i go bak na ɛvin. Fɔ ɛgzampul, insay di ia 96, Krays bin dayrɛkt di apɔsul Jɔn fɔ ɛnkɔrej ɛn gi advays to di anɔyntɛd Kristian dɛn.—Kɔl. 1:​18, NW; Rɛv. 1:​1.

6-7. (a) Usay dɛn rayt di tin dɛn we Jizɔs bin de tich? (b) Aw wi go obe Krays in lɔ?

⁶ Usay dɛn rayt di tin dɛn we Jizɔs bin de tich? Dɛn rayt bɔku pan di tin dɛn we Jizɔs bin tɔk ɛn du na dis wɔl insay di 4 buk dɛn we nem Matyu, Mak, Lyuk, ɛn Jɔn. Di ɔda buk dɛn na di Kristian Grik Skripchɔ de ɛp wi fɔ ɔndastand di we aw Jizɔs de tink bɔt sɔntin, bikɔs na Gɔd in oli spirit bin ɛp di wan dɛn we bin rayt dɛn Skripchɔ dɛn de ɛn dɛn bin de “tink lɛkɛ aw Krays de tink.”—1 Kɔr. 2:​16.

⁷ Lɛsin dɛn: Di tin we Jizɔs bin de tich go ɛp wi pan ɛnitin we wi de du na layf. So Krays in lɔ de afɛkt wi pan ɛnitin we wi de du na os, na wokples ɔ skul, ɛn insay di kɔngrigeshɔn. Wi go lan bɔt dɛn lɔ dɛn ya bay we wi de rid di Kristian Grik Skripchɔ ɛn tink gud gud wan bɔt wetin wi dɔn rid. Wi go obe dis lɔ bay we wi de fala di tin dɛn we i de tɛl wi fɔ du, ɛn di prinsipul dɛn we de insay di Baybul. We wi de obe Krays in lɔ, wi de sho se wi de obe wi Gɔd we lɛk wi, Jiova, bikɔs ɔl di tin dɛn we Jizɔs bin de tich kɔmɔt frɔm am.—Jɔn 8:​28.

WAN LƆ WE GƐT FƆ DU WIT LƆV

8. Us fawndeshɔn Krays in lɔ gɛt?

⁸ Os we dɛn tek tɛm bil pan strɔng fawndeshɔn kin mek di wan dɛn we de de fil sef ɛn nɔ fred. Semweso, gud lɔ we gɛt strɔng fawndeshɔn de mek di wan dɛn we de fala am fil sef ɛn nɔ fred. Krays in lɔ gɛt di bɛst fawndeshɔn we na lɔv. Wetin mek wi se so?

9-10. Us ɛgzampul dɛn sho se Jizɔs bin de prich bikɔs i lɛk pipul dɛn? Aw wi go falamakata am?

⁹ Fɔs, na lɔv bin de mek Jizɔs bin de du ɔl wetin i du. Fɔ fil sɔri, ɔ fɔ gɛt sɔri-at, de sho se pɔsin gɛt lɔv. Na da kayn sɔri-at de Jizɔs gɛt we mek i bin tich bɔku bɔku pipul dɛn, mɛn di wan dɛn we sik, gi it to di wan dɛn we bin angri, ɛn gi layf bak to di wan dɛn we bin dɔn day. (Mat. 14:​14; 15:​32-38; Mak 6:​34; Lyuk 7:​11-15) Pan ɔl we dɛn tin dɛn de bin de tek bɔku pan Jizɔs in tɛm ɛn ɛnaji, i bin rɛdi fɔ put wetin ɔda pipul dɛn want bifo wetin in want. Di we we impɔtant pas ɔl we Jizɔs bin sho se i gɛt lɔv na bay we i gi in layf fɔ ɔda pipul dɛn.—Jɔn 15:​13.

¹⁰ Lɛsin dɛn: Wi kin falamakata Jizɔs bay we wi de si wetin ɔda pipul dɛn nid as tin we impɔtant pas wi yon. Wi kin falamakata am bak bay we wi gɛt sɔri-at fɔ di pipul dɛn we wi de prich to. We sɔri-at ɛp wi fɔ prich ɛn tich di gud nyuz, wi de obe Krays in lɔ.

11-12. (a) Wetin sho se Jiova rili bisin bɔt wi? (b) Aw wi go falamakata di we aw Jiova lɛk wi?

¹¹ Sɛkɔn, Jizɔs bin de sho di kayn lɔv we in Papa gɛt. Jizɔs bin sho di kayn we aw Jiova bisin bɔt di wan dɛn we de wɔship am di tɛm we i bin de prich. Wan pan di tin dɛn we Jizɔs bin de tich na: Wi Papa we de na ɛvin valyu wi ɔl ɛn wi impɔtant to am. (Mat. 10:​31) Jiova rili want fɔ wɛlkɔm pɔsin we dɔn lɛf fɔ sav am bɔt we dɔn ripɛnt ɛn kam bak na di kɔngrigeshɔn. (Lyuk 15:​7, 10) Jiova dɔn pruv se i rili lɛk wi bay we i gi in Pikin fɔ fri wi frɔm sin ɛn day.—Jɔn 3:​16.

¹² Lɛsin dɛn: Aw wi go falamakata di kayn we aw Jiova lɛk wi? (Ɛfi. 5:​1, 2) Wi valyu wi brɔda ɛn sista dɛn ɛn wi kin gladi fɔ wɛlkɔm ship “we dɔn lɔs,” bɔt we dɔn kam bak to Jiova. (Sam 119:​176) Wi de pruv se wi lɛk wi brɔda ɛn sista dɛn bay we wi de yuz wi tɛm ɛn ɛnaji fɔ ɛp dɛn, mɔ we dɛn nid am. (1 Jɔn 3:​17) We wi de sho se wi lɛk ɔda pipul dɛn, wi de obe Krays in lɔ.

13-14. (a) Frɔm wetin de na Jɔn 13:​34, 35, us lɔ Jizɔs bin gi in disaypul dɛn? Wetin mek dis na nyu lɔ? (b) Aw wi go obe di nyu lɔ?

¹³ Tɔd, Jizɔs bin tɛl in disaypul dɛn nɔ fɔ jɔs bisin bɔt dɛnsɛf bɔt dɛn fɔ bisin bɔt ɔda pipul dɛn. (Rid Jɔn 13:​34, 35.) Dis na nyu lɔ bikɔs wi nid fɔ sho lɔv di kayn we aw di Lɔ we Gɔd bin gi di Izrɛlayt dɛn nɔ bin tɔk bɔt, dat na fɔ lɛk wi brɔda ɛn sista dɛn jɔs lɛk aw Jizɔs lɛk wi. Dis min se wi nɔ fɔ jɔs bisin bɔt wisɛf.c Wi fɔ ivin lɛk wi brɔda ɛn sista dɛn pas aw wi lɛk wisɛf. Wi fɔ rɛdi fɔ day fɔ dɛn fɔ sho se wi lɛk dɛn, jɔs lɛk wetin Jizɔs bin du fɔ wi.

¹⁴ Lɛsin dɛn: Aw wi go obe di nyu lɔ? Na bay we wi de mek sakrifays dɛn fɔ wi brɔda ɛn sista dɛn. Bikɔs wi rili lɛk dɛn, wi go rɛdi fɔ ivin du big tin fɔ dɛn lɛk fɔ day fɔ sev dɛn. Bɔt wi kin du ɔda smɔl smɔl tin dɛn bak fɔ dɛn. Fɔ ɛgzampul, ɛnitɛm we wi mek tɛm fɔ ɛp wan ol brɔda ɔ sista fɔ go na mitin, ɔ wi giv-ɔp wetin wi want fɔ du sɔntin we go mek ɔda pɔsin gladi, ɔ wi tek ɛkskyuz na wi wokin ples fɔ ɛp na say dɛn usay bad bad tin dɛn lɛk atkwek ɔ flɔd dɔn apin, wi de obe Krays in lɔ. We wi du dat, wi de ɛp bak fɔ mek di kɔngrigeshɔn bi ples usay ɔlman de fil sef ɛn nɔ fred.

LƆ WE DE MEK WI DU TIN TRET

15-17. (a) Aw di tin dɛn we Jizɔs bin du sho se i rili want fɔ du tin tret? (b) Aw wi go falamakata Jizɔs?

¹⁵ We di Baybul de tɔk bɔt fɔ “du tin tret,” i min fɔ du wetin Gɔd se rayt ɛn fɔ du am di kayn we we wi nɔ go tek wan pɔsin bɛtɛ pas di ɔda wan. Wetin mek wi go se Krays in lɔ de mek wi du tin tret?

¹⁶ Fɔs, tink bɔt aw wetin Jizɔs bin de du sho se i bin rili want fɔ du tin tret. Di tɛm we i bin de na di wɔl, di Ju bigman dɛn pan Gɔd biznɛs bin et pipul dɛn we nɔto Ju, dɛn bin de tink se dɛn bɛtɛ pas pipul dɛn we nɔ lan bɔt di Ju rilijɔn, ɛn dɛn nɔ bin gɛt wan rɛspɛkt fɔ uman dɛn. Bɔt Jizɔs bin de trit ɔlman fayn ɛn i nɔ bin de tek wan pɔsin bɛtɛ pas di ɔda pɔsin. I bin alaw pipul dɛn we nɔto Ju bɔt we gɛt fet pan am fɔ bi in disaypul. (Mat. 8:​5-10, 13) I nɔ bin de pik-ɛn-chuz udat dɛn i bin de prich to, ilɛk dɛn jɛntri ɔ dɛn po. (Mat. 11:​5; Lyuk 19:​2, 9) I nɔ bin wikɛd to uman dɛn ɔ trit dɛn bad. Bifo dat, i bin de trit uman dɛn fayn ɛn i bin rɛspɛkt dɛn, ivin di wan dɛn we pipul dɛn bin de fil se nɔ impɔtant.—Lyuk 7:​37-39, 44-50.

¹⁷ Lɛsin dɛn: Wi kin falamakata Jizɔs bay we wi nɔ tek wan pɔsin bɛtɛ pas di ɔda wan ɛn we wi prich to ɛnibɔdi we rɛdi fɔ lisin, ilɛk udat i bi ɔ us rilijɔn i de. Man dɛn we na Kristian fɔ falamakata in ɛgzampul bay we dɛn de trit uman dɛn wit rɛspɛkt. We wi du dɛn tin ya, wi de obe Krays in lɔ.

18-19. Wetin Jizɔs bin tich bɔt aw fɔ du tin tret? Us lɛsin dɛn wi lan frɔm wetin i bin de tich?

¹⁸ Sɛkɔn, tink bɔt wetin Jizɔs bin de tich bɔt aw fɔ du tin tret. I bin de tich prinsipul dɛn we go ɛp in disaypul dɛn fɔ trit ɔda pipul dɛn fia wan. Fɔ ɛgzampul, tink bɔt di lɔ we se wi fɔ trit ɔda pipul dɛn di we aw wi want dɛn fɔ trit wi [Goldɛn Rul]. (Mat. 7:​12) Wi ɔl want fɔ mek dɛn trit wi fia wan. So wisɛf fɔ trit ɔda pipul dɛn fia wan. If wi du dat, dɛnsɛf go want fɔ trit wi fia wan. Bɔt wetin wi go du if dɛn dɔn trit wi we we nɔ rayt? Jizɔs bin tich in disaypul dɛn fɔ biliv bak se Jiova go tek di wan dɛn we de “kray to am de ɛn nɛt” fɔ mek i ɛp dɛn wit “dɛn kes.” (Lyuk 18:​6, 7) Dɛn wɔd dɛn de we Jizɔs bin tɔk, na bin prɔmis. I min se wi Gɔd we de du tin tret no di prɔblɛm dɛn we wi de gɛt insay dis las dez, ɛn i go trit wi fia wan we in tɛm rich.—2 Tɛs. 1:​6.

¹⁹ Lɛsin dɛn: We wi de fala di prinsipul dɛn we Jizɔs bin tich, wi go trit ɔda pipul dɛn fia wan. Ɛn if pipul dɛn bin dɔn trit wi bad na Setan in wɔl, wi go gladi fɔ no se Jiova go mek dɛn stɔp fɔ trit wi bad.

AW DI WAN DƐN WE DE TEK DI LID FƆ TRIT ƆDA PIPUL DƐN?

20-21. (a) Aw di wan dɛn we de tek di lid fɔ trit ɔda pipul dɛn? (b) Aw maredman go sho se i nɔ jɔs bisin bɔt insɛf? Aw papa fɔ trit in pikin dɛn?

²⁰ Frɔm wetin Krays in lɔ se, aw di wan dɛn we de tek di lid fɔ trit ɔda pipul dɛn? Bikɔs lɔv na di fawndeshɔn fɔ dis lɔ, di wan dɛn we de tek di lid fɔ trit ɔda pipul dɛn wit rɛspɛkt ɛn lɔv. Dɛn fɔ mɛmba se Krays want wi fɔ sho lɔv pan ɛnitin we wi de du.

²¹ Insay di famili. Maredman fɔ lɛk in wɛf “jɔs lɛk aw Krays lɛk di kɔngrigeshɔn.” (Ɛfi. 5:​25, 28, 29, NW) Maredman fɔ falamakata di we aw Jizɔs nɔ bin jɔs bisin bɔt insɛf bay we i de put wetin in wɛf nid ɛn want fɔs. I nɔ kin izi fɔ sɔm man dɛn fɔ sho da kayn lɔv de, bikɔs dɛn nɔ mɛn na say usay dɛn de trit ɔda pipul dɛn fia wan ɛn wit lɔv. I nɔ kin izi fɔ dɛn fɔ lɛf dɛn bad abit dɛn, bɔt dɛn fɔ chenj so dat dɛn go obe Krays in lɔ. Maredman we nɔ jɔs bisin bɔt insɛf de mek in wɛf rɛspɛkt am mɔ ɛn mɔ. Papa we rili lɛk in pikin dɛn nɔ de ɛva du bad to dɛn bay wetin i de tɔk ɔ du. (Ɛfi. 4:​31) Bifo dat, i de sho se i lɛk in pikin dɛn ɛn i gladi fɔ dɛn so dat dɛn go fil sef ɛn nɔ fred. Da kayn Papa de de mek in pikin lɛk am ɛn abop pan am.

22. Frɔm wetin de na Pita in Fɔs Lɛta 5:​1-3 (NW), udat gɛt di ship dɛn? Aw dɛn fɔ trit dɛn?

²² Insay di kɔngrigeshɔn. Di ɛlda dɛn fɔ mɛmba se nɔto dɛn gɛt di “ship dɛn.” (Jɔn 10:​16; rid Pita in Fɔs Lɛta 5:​1-3, NW.) Di wɔd dɛn we di Baybul yuz lɛk ‘Gɔd in ship dɛn,’ ‘bifo Gɔd,’ ɛn ‘Gɔd in prɔpati’ de mɛmba di ɛlda dɛn se na Jiova gɛt di ship dɛn. I want mek dɛn rili lɛk ɛn kia fɔ in ship dɛn. (1 Tɛs. 2:​7, 8) Ɛlda dɛn we de sho se dɛn lɛk dɛn ship dɛn we dɛn de du dɛn wok de mek Jiova gladi. Dɔn, di brɔda ɛn sista dɛn kin lɛk ɛn rɛspɛkt dɛn kayn ɛlda dɛn de.

23-24. (a) Us wok di ɛlda dɛn gɛt if sɔmbɔdi na di kɔngrigeshɔn kɔmit siriɔs sin? (b) Wetin di ɛlda dɛn kin mɛmba we pɔsin du bad tin na di kɔngrigeshɔn?

²³ Us wok di ɛlda dɛn gɛt if pɔsin kɔmit siriɔs sin? Di wok we dɛn de du naw difrɛn frɔm di wok we di jɔj ɛn di ɛlda dɛn we bin de ɔnda di Lɔ we Gɔd bin gi di Izrɛlayt dɛn, bin de du. Ɔnda da Lɔ de, di man dɛn we bin de bifo nɔ bin jɔs de sɔlv prɔblɛm dɛn we gɛt fɔ du wit dɛn wɔship to Jiova, bɔt dɛn bin de sɔlv prɔblɛm dɛn bak we nɔ gɛt fɔ du wit dɛn wɔship to Jiova. Bɔt di wok we di ɛlda dɛn gɛt ɔnda Krays in lɔ na fɔ sɔlv prɔblɛm dɛn we gɛt fɔ du wit wi wɔship to Jiova. Dɛn no se na di wan dɛn we de rul di kɔntri na dɛn Gɔd dɔn gi di wok fɔ sɔlv ɔda prɔblɛm dɛn we nɔ gɛt fɔ du wit wi wɔship to Gɔd. Dat gɛt fɔ du wit di pawa we dɛn gɛt fɔ mek pɔsin we du bad pe fayn ɔ go jel.—Rom 13:​1-4.

²⁴ Wetin di ɛlda dɛn kin du if sɔmbɔdi na di kɔngrigeshɔn kɔmit siriɔs sin? Dɛn kin yuz wetin de na di Baybul fɔ tink gud wan bɔt wetin apin ɛn fɔ disayd wetin fɔ du. Dɛn kin mɛmba se na lɔv na di fawndeshɔn fɔ Krays in lɔ. Na lɔv go mek di ɛlda dɛn aks dɛnsɛf dis kwɛstyɔn: Wetin dɛn nid fɔ du fɔ ɛp ɛnibɔdi na di kɔngrigeshɔn we ɔda pipul dɛn bin dɔn du bad tin to? If sɔmbɔdi na di kɔngrigeshɔn du bad, lɔv go mek di ɛlda dɛn tink bɔt dɛn kwɛstyɔn dɛn ya: I dɔn ripɛnt? Wi go ebul ɛp am fɔ gɛt tayt padi biznɛs wit Jiova bak?

25. Wetin wi go tɔk bɔt na di nɛks atikul?

²⁵ Wi rili gladi we wi de ɔnda Krays in lɔ! We wi ɔl tray tranga wan fɔ obe am, wi de ɛp fɔ mek di kɔngrigeshɔn bi ples usay pɔsin go fil lɛk se dɛn lɛk am, i impɔtant, ɛn i sef. Stil, wi de na wɔl usay “wikɛd pipul” dɛn de “wɔs mɔ ɛn mɔ.” (2 Tim. 3:​13) Wi fɔ kɔntinyu fɔ waydawek. Aw di kɔngrigeshɔn go sho se dɛn rɛdi fɔ falamakata Gɔd fɔ du tin tret we pɔsin du mami ɛn dadi biznɛs wit pikin? Di nɛks atikul go ansa da kwɛstyɔn de.