LƐSIN 28
Sho se Yu Gladi fɔ Wetin Jiova ɛn Jizɔs Du fɔ Yu
Aw yu kin fil we yu padi gi yu wan fayn gift? I go mɔs bi se dat kin mek yu rili gladi, ɛn yu go want fɔ sho yu padi se yu gladi fɔ di gift. Na Jiova ɛn Jizɔs dɔn gi wi di bɛst gift we wi dɔn ɛva gɛt. Wetin na dis gift, ɛn aw wi go sho se wi rili gladi fɔ am?
1. Wetin na wan we fɔ sho se wi rili gladi fɔ wetin Gɔd ɛn Krays du fɔ wi?
Di Baybul prɔmis se “ɛnibɔdi we sho se i gɛt fet pan [Jizɔs]” go de sote go. (Jɔn 3:16) Wetin i min fɔ sho se wi gɛt fet? I nɔ jɔs min fɔ biliv Jizɔs. Wi nid bak fɔ sho se wi gɛt fet bay wetin wi de disayd ɛn di tin dɛn we wi de du. (Jems 2:17) We wi sho se wi gɛt fet bay wetin wi de du ɛn wetin wi de se, dat de mek wi padi biznɛs wit Jizɔs ɛn in Papa, Jiova, tayt mɔ ɛn mɔ.—Rid Jɔn 14:21.
2. Us spɛshal mitin kin ɛp wi fɔ sho se wi gladi fɔ wetin Jiova ɛn Jizɔs du?
Di nɛt bifo Jizɔs day, i bin tɛl in disaypul dɛn bɔt wan ɔda we we dɛn go sho se dɛn gladi fɔ di sakrifays we i mek fɔ mɔtalman. I bin tɛl in disaypul dɛn fɔ kam togɛda fɔ wan spɛshal mitin we di Baybul kɔl “di Masta in Ivintɛm It,” ɛn we wi kin kɔl bak di Mɛmorial fɔ Krays in day. (1 Kɔrintians 11:20) Jizɔs bin du dat so dat in apɔsul dɛn ɛn ɔl tru Kristian dɛn we go kam afta dɛn go mɛmba se i gi in layf fɔ wi. Jizɔs bin se: “Una go de du dis fɔ mɛmba mi.” (Lyuk 22:19) We yu atɛnd di Mɛmorial, yu de sho se yu gladi fɔ di lɔv we Jiova ɛn Jizɔs gɛt fɔ wi.
LAN MƆ
Lan bɔt mɔ we dɛn fɔ sho se wi gladi fɔ di lɔv we Jiova ɛn Jizɔs dɔn sho to wi. Lan bɔt wetin mek di Mɛmorial fɔ Krays in day impɔtant.
3. Wetin wi go du fɔ sho se wi gladi
Imajin se sɔmbɔdi sev yu fɔ mek yu nɔ drawn. Yu go jɔs fɔgɛt bɔt wetin da pɔsin du fɔ yu? Ɔ yu go luk fɔ we dɛn fɔ sho am se yu rili gladi fɔ wetin i du?
Na Jiova mek wi de alayv. Rid 1 Jɔn 4:8-10, dɔn una tɔk bɔt dɛn kwɛstyɔn dɛn ya:
Wetin mek Jizɔs in sakrifays na spɛshal gift?
Aw yu fil bɔt wetin Jiova ɛn Jizɔs du fɔ yu?
Aw wi go sho se wi gladi fɔ wetin Jiova ɛn Jizɔs du fɔ wi? Rid 2 Kɔrintians 5:15 ɛn 1 Jɔn 4:11; 5:3. Afta una rid ɛni wan pan dɛn skripchɔ dɛn de, una tɔk bɔt dis kwɛstyɔn:
Frɔm wetin de na da skripchɔ de, wetin wi go du fɔ sho se wi gladi fɔ wetin Jiova ɛn Jizɔs du fɔ wi?
4. Falamakata Jizɔs
Wan ɔda we fɔ sho se wi gladi na we wi falamakata Jizɔs. Rid 1 Pita 2:21, dɔn una tɔk bɔt dis kwɛstyɔn:
Us we dɛn yu go fala Jizɔs in futmak gud gud wan?
Jizɔs bin lɛk Gɔd in Wɔd, i bin de prich di gud nyuz, ɛn i bin de ɛp ɔda pipul dɛn
5. Atɛnd di Mɛmorial fɔ Krays in day
Fɔ lan wetin bin apin di fɔstɛm we dɛn du di Masta in Ivintɛm It, rid Lyuk 22:14, 19, 20. Dɔn una tɔk bɔt dɛn kwɛstyɔn dɛn ya:
Wetin bin apin na di Masta in Ivintɛm It?
Wetin di bred ɛn di wayn tinap fɔ?—Rid vas 19 ɛn 20.
Jizɔs bin want in disaypul dɛn fɔ mek di Masta in Ivintɛm It wantɛm pan ia di det we i day. So Jiova Witnɛs dɛn de mit togɛda wantɛm pan ia fɔ mɛmba Krays in day di we aw i bin tɛl dɛn fɔ du am. Fɔ lan bɔt dis impɔtant mitin, ple di VIDIO. Dɔn una tɔk bɔt di kwɛstyɔn we de dɔŋ.
Wetin kin apin na di Mɛmorial?
Di bred ɛn di wayn tinap fɔ sɔntin. Di bred tinap fɔ Jizɔs in pafɛkt mɔtalman bɔdi we i sakrifays fɔ wi. Di wayn tinap fɔ in blɔd
SƆM PIPUL DƐN KIN SE: “If yu want fɔ sev, yu jɔs nid fɔ biliv Jizɔs.”
Aw yu go yuz Jɔn 3:16 ɛn Jems 2:17 fɔ sho se nɔto dat nɔmɔ yu nid fɔ du?
WETIN YU DƆN LAN?
Wi de sho se wi gladi fɔ wetin Jizɔs du fɔ wi bay we wi sho se wi gɛt fet pan am ɛn bay we wi atɛnd di Mɛmorial fɔ mɛmba in day.
Rivyu
Wetin i min fɔ sho se wi gɛt fet pan Jizɔs?
Aw yu go lɛk fɔ sho se yu gladi fɔ wetin Jiova ɛn Jizɔs du fɔ yu?
Wetin mek i rili impɔtant fɔ atɛnd di Mɛmorial fɔ Krays in day?
DU MƆ RISACH
Wetin Krays in day de mek wi du?
Lan mɔ bɔt fet ɛn aw wi go sho se wi gɛt fet.
“Sho se Yu Gɛt Fet pan di Tin dɛn we Jiova Dɔn Prɔmis” (Di Wachtawa, Ɔktoba 2016)
Insay di stori we gɛt di taytul “I Feel Clean, Alive, and Whole,” lan bɔt aw wan uman in layf bin bɛtɛ we i ɔndastand wetin Jizɔs in sakrifays min fɔ am.
Lan bɔt wetin mek di wan dɛn we de it di bred ɛn drink di wayn na di Mɛmorial nɔ bɔku.