Jizɔs Gɛt Pawa Pas Di Dɛbul Dɛn

YU MƐMBA wetin mek wan pan Gɔd in enjɛl dɛn tɔn to Setan?— Na bikɔs i bin want fɔ mek dɛn wɔship am na dat mek i tɔn agens Gɔd. Yu tink se ɔda enjɛl dɛn bin fala am?— Yɛs, ɔda enjɛl dɛn bin fala am. Di Baybul kɔl dɛn ‘Setan in enjɛl dɛn’ ɔ dɛbul dɛn.—Rɛvɛleshɔn 12:​9, NW.

Yu tink se dɛn bad enjɛl dɛn ya biliv se Gɔd de?— Di Baybul se ‘dɛnsɛf biliv se Gɔd de.’ (Jems 2:​19) Bɔt naw dɛn de fred. Wetin mek dɛn de fred? Na bikɔs dɛn no se Gɔd go pɔnish dɛn fɔ ɔl di bad tin dɛn we dɛn dɔn du. Wetin na di bad tin dɛn we dɛn dɔn du?—

Di Baybul se dɛn enjɛl dɛn ya lɛf usay dɛn bin de na ɛvin ɛn kam fɔ liv na dis wɔl lɛk mɔtalman. Dɛn du dis bikɔs dɛn want fɔ du mami ɛn dadi biznɛs wit di fayn fayn uman dɛn we bin de na dis wɔl. (Jɛnɛsis 6:​1, 2; Jud In Lɛta 6, NW) Wetin yu no bɔt mami ɛn dadi biznɛs?—

Mami ɛn dadi biznɛs na we man ɛn uman de kam togɛda wan spɛshal we. Afta dat, pikin kin bigin fɔ gro insay in mama in bɛlɛ. Bɔt i bad fɔ lɛ enjɛl dɛn du mami ɛn dadi biznɛs. Gɔd se na man ɛn uman nɔmɔ we dɔn mared fɔ du mami ɛn dadi biznɛs. So if dɛn bɔn pikin, di man ɛn uman go kia fɔ am.

We di enjɛl dɛn bin tek mɔtalman bɔdi ɛn du mami ɛn dadi biznɛs wit di uman dɛn na di wɔl, dɛn pikin dɛn gro ɔp ɛn tɔn to jayant. Dɛn bin wikɛd ɛn dɛn bin de du bad tin to pipul dɛn. So Gɔd bin mek Ebi Ebi Ren kam fɔ kil dɛn jayant dɛn ya ɛn ɔl dɛn wikɛd pipul dɛn. Bɔt i bin mek Noa bil wan big bot fɔ mek di wan dɛn we bin de du wetin rayt go sev. Di Gret Ticha bin se wetin bin apin na Noa in tɛm impɔtant fɔ mek wi mɛmba.—Jɛnɛsis 6:​3, 4, 13, 14; Lyuk 17:​26, 27.

We di Ebi Ebi Ren bin kam, yu no wetin bin apin to di bad enjɛl dɛn?— Dɛn lɛf fɔ yuz dɛn mɔtalman bɔdi ɛn go bak na ɛvin. Bɔt dɛn nɔ bin bi Gɔd in enjɛl dɛn igen, so dɛn bin bi Setan in enjɛl dɛn. Ɛn wetin apin to dɛn pikin dɛn, we na jayant dɛn?— Dɛn ɔl bin day we di Ebi Ebi Ren kam. Ɛn ɔl di ɔda bad pipul dɛn we nɔ bin de obe Gɔd dɛnsɛf day.

Frɔm di tɛm we da Ebi Ebi Ren kam, Gɔd nɔ alaw dɛn dɛbul dɛn ya fɔ tɔn to mɔtalman igen. Bɔt pan ɔl we wi nɔ de si di dɛbul dɛn, dɛn de stil tray fɔ mek pipul dɛn du bad bad tin dɛn. Dɛn de du bad bad tin dɛn naw pas trade. Wetin mek? Na bikɔs dɛn dɔn trowe dɛn kɔmɔt na ɛvin ɛn ib dɛn na dis wɔl.

Yu no wetin mek wi nɔ de si di dɛbul dɛn?— Na bikɔs dɛn na spirit. Bɔt wi shɔ se dɛn de. Di Baybul se na Setan de ‘ful pipul dɛn na di wɔl’ ɛn in dɛbul dɛn de ɛp am.—Rɛvɛleshɔn 12:​9, 12.

Yu tink se Setan ɛn in dɛbul dɛn ebul fɔ ful wisɛf?— Yɛs, dɛn go ebul ful wi if wi nɔ tek tɛm. Bɔt wi nɔ fɔ fred dɛn. Di Gret Ticha se: ‘Setan nɔ ebul mi.’ If wi kɔntinyu fɔ de nia Gɔd, i go mek Setan ɛn in dɛbul dɛn nɔ du bad tin to wi.—Jɔn 14:​30.

I impɔtant fɔ mek wi no di bad tin dɛn we di dɛbul dɛn de tray fɔ mek wi du. So tink bɔt dis. Us bad tin dɛn di dɛbul dɛn bin de du we dɛn kam na di wɔl?— Bifo di Ebi Ebi Ren kam, dɛn bin de du mami ɛn dadi biznɛs wit uman dɛn ɛn dis na sɔntin we dɛn nɔ fɔ du. Tide di dɛbul dɛn lɛk we pipul dɛn nɔ de obe Gɔd in lɔ bɔt mami ɛn dadi biznɛs. Mek a aks yu, Udat dɛn nɔmɔ fɔ du mami ɛn dadi biznɛs?— Yu rayt, na di wan dɛn nɔmɔ we mared.

Tide sɔm smɔl bɔbɔ ɛn smɔl titi dɛn de du mami ɛn dadi biznɛs, bɔt dɛn nɔ gɛt rayt fɔ du am. Di Baybul sho se na Gɔd mek man ɛn uman dɛn prayvet pat. Jiova bin mek dɛn pat dɛn ya na wi bɔdi fɔ spɛshal rizin we na mared pipul dɛn nɔmɔ fɔ ɛnjɔy am. Di dɛbul dɛn kin gladi we pipul dɛn de du tin we Jiova se dɛn nɔ fɔ du. Fɔ ɛgzampul, di dɛbul dɛn lɛk we smɔl bɔbɔ ɛn smɔl titi de ple wit dɛn kɔmpin dɛn prayvet pat dɛn. Wi nɔ want mek di dɛbul dɛn gladi, nɔto so?—

Ɔda tin de bak we di dɛbul dɛn lɛk, bɔt Jiova et am. Yu no wetin na da tin de?— Na we pɔsin de fɛt ɔ du bad tin to ɔda pɔsin. (Sam 11:​5, NW) Mɛmba se na dat di jayant dɛn, we na di dɛbul dɛn pikin dɛn, bin de du.

Dɛn dɛbul dɛn ya so kin mek pipul dɛn fred bak. Bɔku tɛm, dɛn kin mek lɛk pipul dɛn we dɔn day. Dɛn kin ivin tɔk lɛk di pipul dɛn we dɔn day. Na dis we di dɛbul dɛn de ful bɔku pipul dɛn fɔ biliv se dayman gɛt layf ɛn i kin tɔk wit pipul dɛn we gɛt layf. Di dɛbul dɛn dɔn mek bɔku pipul dɛn biliv se gost de.

So wi fɔ tek tɛm fɔ mek Setan ɛn in dɛbul dɛn nɔ ful wi. Di Baybul wɔn wi se: ‘Setan de tray fɔ mek lɛk se in na gud enjɛl ɛn in savant dɛnsɛf de du di sem tin.’ (Sɛkɛn Lɛta Fɔ Kɔrint 11:​14, 15) Bɔt di dɛbul dɛn rili bad. Lɛ wi si aw dɛn de tray fɔ mek wisɛf bi lɛk dɛn.

Usay pipul dɛn de lan bɔt fɛt-fɛt, mami ɛn dadi biznɛs di we aw Gɔd nɔ want, spirit, ɛn gost?— Nɔto frɔm sɔm tɛlivishɔn program dɛn, fim dɛn, bad padi dɛn na skul, ɛn ɔda say dɛn? Udat wi go go nia we wi de du dɛn tin ya, na Gɔd ɔ Setan ɛn in dɛbul dɛn? Wetin yu tink?—

Udat yu tink se want wi fɔ lisin ɛn wach bad tin dɛn?— Yɛs, na Setan ɛn in dɛbul dɛn. So, wetin yu ɛn mi nid fɔ du?— Wi nid fɔ rid, lisin, ɛn wach tin dɛn we gud bikɔs i go ɛp wi fɔ sav Jiova. Yu go ebul tink bɔt sɔm gud tin dɛn we wi fɔ du?—

If wi de du wetin gud, wi nɔ gɛt ɛni rizin fɔ fred di dɛbul dɛn. Jizɔs gɛt pawa pas dɛn, ɛn dɛn de fred Jizɔs. Wan tɛm di dɛbul dɛn bin kray to Jizɔs se: “Yu kam ya fɔ kil wi?” (Mak 1:​24) Yu nɔ tink se wi go gladi we Jizɔs go kil Setan ɛn in dɛbul dɛn?— Bɔt rayt naw, wi shɔ se Jizɔs go mek di dɛbul dɛn nɔ ebul fɔ du wi bad tin if wi kam nia in ɛn in Papa.