“Gɛda Ɔl di Pipul Dɛn”

1. Aw wi kɔnvɛnshɔn dɛn fiba di program we di Izrɛlayt dɛn bin gɛt we dɛn jɔs kɔmɔt Ijipt.

¹ Jɔs afta di Izrɛlayt dɛn kɔmɔt na Ijipt, Jiova bin tɛl Mozis fɔ “gɛda ɔl di pipul dɛn” na Mawnt Saynay fɔ go lisin to in wɔd so dat dɛn go fred am ɛn dɛn go tich dɛn pikin dɛn bɔt wetin in want. (Dit. 4:10-13) I go mɔs bi se dɛn bin kɔntinyu fɔ mɛmba dis program ɛn i bin mek dɛn fet trɔng! Insay di mɔnt dɛn we de kam, Jiova in pipul dɛn bak go gɛda fɔ lan bɔt am na kɔnvɛnshɔn dɛn. Wetin wi fɔ du fɔ mek wi rili bɛnifit?

2. Wetin yu fɔ du fɔ ‘rɛdi yusɛf’ fɔ wi kɔnvɛnshɔn?

² ‘Rɛdi Yusɛf’: Jiova bin tɛl di Izrɛlayt dɛn se dɛn fɔ “rɛdi dɛnsɛf” fɔ di impɔtant program na Mawnt Saynay. (Ɛks. 19:10, 11) Semweso, i go fayn fɔ mek wi ɔl rɛdi fɔ go di kɔnvɛnshɔn, nɔto di wan dɛn nɔmɔ we gɛt pat. Fɔ ɛgzampul, bɔku pipul dɛn nid fɔ tek ɛkskyuz na dɛn wokples. Sɔntɛm wetin de apin to yu fiba wetin bin apin to Nɛimaya. Na in bin de gi Kiŋ Atazaksis tin fɔ drink. Bɔt i bin want fɔ lɛf da wok de fɔ go ɛp fɔ bil di wɔl dɛn na Jerusɛlɛm ɛn i bin no se di kiŋ nɔ go gri. Nɛimaya bin pre ɛn i nɔ bin fred fɔ go to di kiŋ fɔ tɛl am wetin i bin want fɔ mek i du fɔ am. Di kiŋ bin alaw am fɔ go ɛn i ivin sɔpɔt am fɔ bil di wɔl. (Nɛi. 2:1-9) Apat frɔm di ɛkskyuz we yu go tek frɔm yu bɔsman na wokples, yu dɔn arenj aw yu go travul ɛn usay yu go lɔj? Di ɛlda dɛn go gladi fɔ ɛp ɛnibɔdi. Plan fɔ de rich kwik ɔl tri di de dɛn ɛn rɛdi fɔ ‘put ɔl yu at pan’ wetin yu go yɛri.—Ibru 2:1.

3. Wetin go ɛp wi fɔ rɛdi wi at fɔ di kɔnvɛnshɔn?

³ Ɔda impɔtant we aw wi go rɛdi wisɛf, na fɔ rɛdi wi at fɔ mek wi go lisin ɛn lan. (Ɛzra 7:10) Di kɔnvɛnshɔn program go de na jw.org wɛbsayt bifo tɛm ɛn i go gɛt ɔl di tɔk dɛn taytul ɛn di men skripchɔ pan ɔl di tɔk dɛn. Dis na fayn tɔpik dɛn fɔ tɔk bɔt we una de du una Famili Wɔship insay di wik dɛn bifo di tɛm fɔ di kɔnvɛnshɔn. Sɔm pɔblisha dɛn kin print di program ɛn yuz am fɔ rayt sɔm pan di tin dɛn we di spika de tɔk.

4. Aw mama ɛn papa dɛn go yuz di kɔnvɛnshɔn fɔ lan dɛn pikin dɛn?

⁴ ‘Lan yu pikin dɛn’: Wan rizin we mek di Izrɛlayt dɛn bin gɛt di kɔnvɛnshɔn na Mawnt Saynay na bin fɔ mek dɛn “lan dɛn pikin” dɛn. (Dit. 4:10) Di kɔnvɛnshɔn go gi chans to mama ɛn papa dɛn fɔ ebul du dat. Mama ɛn papa dɛn fɔ mek dɛn pikin dɛn sidɔm nia dɛn na di kɔnvɛnshɔn ɛn ɛp dɛn fɔ lisin gud wan. Ɛni de we di kɔnvɛnshɔn dɔn ɛn ɛni ɔda tɛm we di famili de du dɛn famili wɔship, i go fayn mek dɛn tɔk bɔt wetin dɛn lan na di kɔnvɛnshɔn.

5. Aw wi go bɛnifit we wi go di kɔnvɛnshɔn we de kam?

⁵ Di impɔtant kɔnvɛnshɔn na Mawnt Saynay bin ɛp di Izrɛlayt dɛn fɔ gladi fɔ di ɔnɔ we dɛn gɛt fɔ bi Gɔd in pipul dɛn. (Dit. 4:7, 8) Na di sem we dis kɔnvɛnshɔn go bɛnifit wi. Fɔ tri dez, wi go fɔgɛt bɔt wetin de apin na Setan in wɔl ɛn ɛnjɔy fɔ lan bɔt Jiova ɛn kip kɔmpin wit wi brɔda ɛn sista dɛn. (Ayz. 35:7-9) As Jiova in de dɔn de kam nia, wi nɔ want fɔ mis di chans fɔ kip kɔmpin wit wi brɔda ɛn sista dɛn ɛn fɔ ɛnkɔrej wisɛf!—Ibru 10:24, 25.