Wetin Mek Gɔd De Alaw Bad Tin dɛn fɔ Apin?

1. Ustɛm bad tin dɛn bigin fɔ apin na di wɔl?

Bad tin dɛn bigin fɔ apin we Setan lay di fɔs lay. Setan na bin gud gud enjɛl, bɔt i nɔ kɔntinyu fɔ “lɛk ɛnitin we na tru.” (Jɔn 8:44) I bigin tink se na in pipul dɛn fɔ wɔship we i bi se na Gɔd nɔmɔ fɔ wɔship. Setan lay to Iv ɛn i mek Iv du wetin Gɔd nɔ want. Adam insɛf jɔyn Iv fɔ du wetin Gɔd nɔ want. Na dis tin we Adam du mek wi de sɔfa ɛn day.​—Rid Jɛnɛsis 3:1-6, 19.

We Setan bin de tɛl Iv fɔ du wetin Gɔd nɔ want, i bin de tray fɔ se Gɔd nɔ gɛt rayt fɔ rul di wɔl. Bɔku pipul dɛn dɔn jɔyn Setan fɔ sho se dɛn nɔ want mek Gɔd rul dɛn. Na dat mek di Baybul se na Setan “de rul dis wɔl.”​—Rid Jɔn 14:30; Jɔn In Fɔs Lɛta 5:19.

2. Ɛni bɔt bin de pan di tin dɛn we Gɔd mek?

Ɔl di tin dɛn we Gɔd mek nɔ bin gɛt wan bɔt. Di enjɛl dɛn ɛn di mɔtalman dɛn we Gɔd bin mek, bin fɔ ebul du ɔl di tin dɛn we Gɔd want. (Ditarɔnɔmi 32:4, 5) We Gɔd mek wi, i gi wi di fridɔm fɔ du wetin gud ɔ wetin bad. So dis dɔn gi wi di chans fɔ sho if wi lɛk Gɔd.​—Rid Jems 1:13-15; Jɔn In Fɔs Lɛta 5:3.

3. Wetin mek Gɔd dɔn alaw mɔtalman fɔ sɔfa te naw?

Fɔ sɔm tɛm naw, Jiova dɔn alaw mɔtalman fɔ rul dɛnsɛf. Wetin mek i du so? I du am fɔ sho se mɔtalman nɔ go ɛva ebul rul in kɔmpin mɔtalman. (Ɛkliziastis 7:29; 8:9) Mɔtalman dɔn rul dɛnsɛf fɔ 6,000 ia naw. Bɔt stil dɛn nɔ ebul fɔ pul wɔ ɛn sik, ɛn dɛn nɔ ebul fɔ stɔp pipul dɛn we de du bad tin dɛn. Ɔl dis de sho wi se mɔtalman nɔ ebul fɔ rul dɛnsɛf.​—Rid Jɛrimaya 10:23; Lɛta Fɔ Rom 9:17.

Gɔd in gɔvmɛnt nɔ tan lɛk mɔtalman gɔvmɛnt. Di wan dɛn we de fɔ Gɔd in gɔvmɛnt de gɛt plɛnti bɛnifit. (Ayzaya 48:17, 18) I nɔ go te igen, Jiova go pul ɔl mɔtalman gɔvmɛnt. Na di wan dɛn nɔmɔ we want mek Gɔd rul dɛn, go de na di wɔl.​—Ayzaya 11:9. Rid Daniɛl 2:44.

Wach di fim we gɛt di taytul: Wetin Mek Gɔd De Alaw Wi fɔ Sɔfa?

4. Di bia we Gɔd de bia wi dɔn gi wi chans fɔ du wetin?

Setan se mɔtalman de sav Jiova bikɔs Jiova de du plɛnti gud tin fɔ dɛn. Yu go want sho se wetin Setan bin tɔk na lay? Na tin we yu go ebul du! Di bia we Gɔd de bia wi dɔn gi wi di chans fɔ sho udat wi want mek i rul wi, Gɔd ɔ mɔtalman. Di we aw wi de liv wi layf de sho udat wi want mek i rul wi.​—Rid Job 1:8-12; Prɔvabs 27:11.

5. Aw wi go sho se wi want lɛ Gɔd rul wi?

Wi go sho se wi want lɛ Gɔd rul wi we wi lan bɔt am ɛn wɔship am di rayt we. Di Baybul go sho wi aw fɔ wɔship Gɔd di rayt we. (Jɔn 4:23) Wi go sho se wi nɔ want lɛ Setan rul wi we wi nɔ put wi an pan pɔlitiks ɛn wɔ. If wi du dat, wi de sho se wi de falamakata Jizɔs.​—Rid Jɔn 17:14.

Setan de mek bɔku pipul dɛn de du bad tin dɛn, ɛn i de mek dɛn fil se na di rayt tin dɛn de du. We wi nɔ de du bad tin dɛn, sɔm pan wi padi ɛn fambul dɛn go want mek wi lɛf fɔ du di rayt tin. (Pita In Fɔs Lɛta 4:3, 4) So wi fɔ tink bɔt wetin wi want fɔ du. Wi go want de wit pipul dɛn we lɛk Gɔd? Wi go obe Gɔd in lɔ dɛn? If wi de du dɛn tin ya, wi go sho se na lay Setan bin lay we i se mɔtalman nɔ go du wetin Gɔd want we tin tranga fɔ am.​—Rid Fɔs Lɛta Fɔ Kɔrint 6:9, 10; 15:33.

Gɔd lɛk mɔtalman. Dis mek wi biliv se i go pul bad ɛn di tin dɛn we de mek wi sɔfa. Di wan dɛn we de sho se na Gɔd nɔmɔ fɔ rul dɛn go ɛnjɔy layf na dis wɔl sote go.​—Rid Jɔn 3:16.