Wetin Fɔ Du if Mared-Os Want fɔ Skata?

1, 2. If prɔblɛm de na yu mared-os, us kwɛstyɔn yu fɔ aks yusɛf?

INSAY 1988, wan Italian uman we nem Lusia in at bin rili pwɛl.a Afta lɛk tɛn ia so, in mared-os bin de skata. Bɔku tɛm, i dɔn tray fɔ mek pis wit in man, bɔt i nɔ kin ebul. So in ɛn in man pat bikɔs dɛn nɔ bin de gri pan ɔltin. So na in wan bin gɛt fɔ mɛn in tu gyal pikin dɛn. We Lusia tink bɔt da tɛm de, i tɔk se: “A bin shɔ fɔ se natin nɔ de we go mek wi nɔ skata.”

² If yusɛf de gɛt prɔblɛm dɛn na yu mared-os, yu go mɔs de ɔndastand di we aw Lusia bin de fil. Yu go de wɔri bɔt yu mared-os ɛn yu go de wɔnda if ɛnitin de we go mek una mared nɔ skata. If na so i bi, i go fayn fɔ mek yu tink bɔt dis kwɛstyɔn: A dɔn fala ɔl di gud advays dɛn we Gɔd dɔn gi na di Baybul we go ɛp fɔ mek mi mared-os nɔ skata?—Sam 119:​105.

3. Pan ɔl we dayvɔs dɔn bɔku, aw bɔku pan di wan dɛn we dɔn dayvɔs ɛn dɛn fambul dɛn kin fil?

³ We maredman ɛn in wɛf de gɛt bɔku prɔblɛm, di fɔs tin we dɛn kin mɛmba na fɔ dayvɔs. Bɔt pan ɔl we insay bɔku kɔntri dɛn, bɔku bɔku famili dɛn de skata, rɛkɔd dɔn sho se bɔku pan di man ɛn uman dɛn we dɔn dayvɔs rigrɛt we dɛn du am. Bɔku pan dɛn man ɛn uman dɛn ya we dɔn dayvɔs kin gɛt mɔ wɛlbɔdi prɔblɛm dɛn pas di wan dɛn we nɔ kin dayvɔs. Dɛn kin gɛt prɔblɛm dɛn wit aw dɛn de fil, di we aw dɛn kin tink, ɛn dɛn kin de sik sik bɔku. We mama ɛn papa dɛn dayvɔs, dis kin mek di pikin dɛn kɔnfyus ɛn dɛn nɔ kin gladi fɔ lɔng tɛm. Di wan dɛn we dayvɔs, dɛn mama ɛn papa ɛn dɛn padi dɛn sɛf kin fil am. Aw Gɔd we mek mared, de fil bɔt dis?

4. Aw fɔ sɔlv prɔblɛm dɛn we kin apin insay mared-os?

⁴ As wi bin dɔn lan na di ɔda chapta dɛn, Gɔd we mek mared bin want am fɔ de sote go. (Jɛnɛsis 2:​24) Wetin mek bɔku mared-os dɛn de skata? Nɔto wantɛm wantɛm i kin apin. Sɔm tin dɛn kin dɔn bigin apin. Di prɔblɛm dɛn kin bigin smɔl smɔl te i tɔn big tin we kin tan lɛk se i nɔ izi fɔ sɔlv. Bɔt if pipul dɛn yuz di Baybul fɔ sɔlv dɛn prɔblɛm dɛn ya wantɛm wantɛm, bɔku mared-os dɛn nɔ go skata.

TINK DI RAYT WE BƆT MARED

5. Wetin nɔ go bi di rayt we fɔ tink bɔt mared?

⁵ Wan pan di tin dɛn we kin mek prɔblɛm de insay mared-os, na we di man ɔ di uman ɔ dɛn ɔl tu tink se we dɛn mared, ɔltin go fayn fɔ dɛn. Stori buk dɛn we de tɔk bɔt lɔv, magazin dɛn, tɛlivishɔn program dɛn, ɛn fim dɛn, kin mek pipul dɛn bigin tink ɛn drim bɔt tin dɛn we nɔ kin rili bi. We dɛn tin dɛn we dɛn kin dɔn tink ɛn drim bɔt nɔ apin lɛk aw dɛn want, dɛn kin fil lɛk se di ɔda pɔsin nɔ trit dɛn fayn, dɛn nɔ kin satisfay wit wetin de apin insay di mared-os, ɛn dɛn kin vɛks pasmak. Wetin go ɛp tu pipul dɛn we nɔ pafɛkt fɔ rili gɛt gladi at na dɛn mared-os? Na we dɛn ɔl tu wok tranga wan fɔ mek di mared-os kɔmɔt fayn.

6. (a) Us tru tin dɛn di Baybul tɔk bɔt mared? (b) Wetin na sɔm rizin dɛn we kin mek cham-mɔt de na di mared-os?

⁶ Di Baybul na buk we de bɛnifit wi. I tɔk bɔt gladi at na mared-os, bɔt i wɔn bak se di wan dɛn we de mared go gɛt “trɔbul” na dɛn mared-os. (Fɔs Lɛta Fɔ Kɔrint 7:​28) As wi bin dɔn lan, di maredman ɛn di mareduman nɔ pafɛkt ɛn dɛn kin sin. Dɛn ɔl tu nɔ mɛn di sem we, dɛn nɔ de tink di sem we, ɛn nɔto di sem we dɛn de fil. Sɔntɛnde, di man ɛn in wɛf kin gɛt cham-mɔt we i kam pan mɔni biznɛs, pikin dɛn, ɛn dɛn fambul dɛn. Mami ɛn dadi biznɛs ɛn bikɔs dɛn nɔ gɛt bɛtɛ tɛm fɔ du tin togɛda, kin mek bak dɛn gɛt prɔblɛm na di mared-os.b I kin tek sɔm tɛm fɔ sɔlv dɛn prɔblɛm dɛn ya bɔt yu at nɔ fɔ pwɛl fɔ dat! Bɔku maredman ɛn mareduman dɛn kin ebul fɔ bia dɛn prɔblɛm dɛn ya ɛn tray fɔ fɛn we fɔ sɔlv dɛn.

UNA TƆK BƆT UNA PRƆBLƐM DƐN

7, 8. If maredman ɛn in wɛf gɛt prɔblɛm ɔ dɛn fil bad bɔt wetin di ɔda pɔsin du, us advays na di Baybul go ɛp dɛn?

⁷ I nɔ kin izi fɔ bɔku pipul dɛn fɔ lɛ dɛn at nɔ wam we dɛn de tɔk bɔt aw dɛn de fil we pɔsin du dɛn bad, we dɛn gɛt prɔblɛm wit pɔsin, ɔ we dɛnsɛf mek mistek. Bifo di man ɔ di uman tɔk klia wan se: “A fil lɛk se yu nɔ ɔndastand mi,” i go bigin fil bad ɛn mek di prɔblɛm luk big. Bɔku go tɔk se: “Na yusɛf nɔmɔ yu bisin bɔt,” ɔ “Yu nɔ lɛk mi.” Bikɔs di ɔda pɔsin nɔ go want fɔ agyu, i go disayd nɔ fɔ tɔk natin.

⁸ Di bɛst tin fɔ du na fɔ fala di Baybul in advays we se: “If una vɛks, una nɔ fɔ gri mek dat mek una du bad, ɛn una nɔ fɔ vɛks ol de.” (Lɛta Fɔ Ɛfisɔs 4:​26) Dɛn bin aks wan man ɛn in wɛf we dɔn mared fɔ 60 ia bɔt wetin bin ɛp dɛn fɔ gɛt gladi at insay dɛn mared-os. Di man bin tɔk se: “Wi mek am abit nɔ fɔ go slip if wi nɔ sɔlv ɛni prɔblɛm we wi gɛt ilɛksɛf na smɔl wan.”

9. (a) Us advays di Baybul gi we i kam pan aw fɔ tɔk ɛn aw fɔ lisin? (b) Wetin maredman ɛn in wɛf nid fɔ du pan ɔl we dɛn go nid fɔ ɔmbul ɛn gɛt kɔrej fɔ du am?

⁹ We maredman ɛn in wɛf nɔ gri pan sɔntin, dɛn ɔl tu fɔ fala di advays we de na di Baybul we se: “Una fɔ shap una yes fɔ yɛri wetin pipul de tɔk, bɔt una fɔ tek tɛm tɔk ɛn una at nɔ fɔ de wam kwik.” (Jems 1:​19) Afta dɛn dɔn lisin to dɛnsɛf gud wan, dɛn ɔl tu go si se nid de fɔ mek dɛn se sɔri. (Jems 5:​16) Dɛn fɔ ɔmbul ɛn gɛt kɔrej fɔ tɔk wit ɔl dɛn at se, “A sɔri fɔ we a mek yu fil bad.” If dɛn du dat, dat go ɛp dɛn nɔ fɔ jɔs sɔlv dɛn prɔblɛm dɛn, bɔt dɛn go fil fayn ɛn lɛk dɛnsɛf we go mek dɛn rili lɛk fɔ spɛn tɛm togɛda.

WETIN FƆ DU WE I KAM PAN MAMI ƐN DADI BIZNƐS?

10. Aw Kristian dɛn tide go fala di fayn advays we Pɔl bin gi to di Kristian dɛn we bin de na Kɔrint?

¹⁰ We di apɔsul Pɔl bin de rayt to di wan dɛn we bin de na Kɔrint, i bin advays dɛn fɔ mared “bikɔs fri layf plɛnti na [di] wɔl.” (Fɔs Lɛta Fɔ Kɔrint 7:​2) Tide, pipul dɛn rili bad ɔ ivin wɔs pas di pipul dɛn we bin de na Kɔrint trade. Di we aw pipul dɛn nɔ de shem fɔ tɔk bɔt mami ɛn dadi biznɛs, di we aw dɛn de drɛs, di kayn stori dɛn we kin de na dɛn magazin dɛn, buk dɛn, tɛlivishɔn program dɛn, ɛn fim dɛn, ɔl kin mek pipul dɛn want fɔ du mami ɛn dadi biznɛs di we aw Gɔd nɔ want. Na di sem tin bin de apin na Kɔrint, so di apɔsul Pɔl bin rayt dɛn se: “I bɛtɛ fɔ mared pas fɔ sɔfa bikɔs una want man ɔ uman bad bad.”—Fɔs Lɛta Fɔ Kɔrint 7:​9.

11, 12. (a) Wetin maredman ɛn in wɛf fɔ du to dɛnsɛf? Aw dɛn fɔ du dat? (b) Wetin di man ɛn in wɛf fɔ du if nid de fɔ mek dɛn nɔ du mami ɛn dadi biznɛs fɔ sɔm tɛm?

¹¹ Di Baybul advays Kristian dɛn we mared fɔ se: “Man we mared fɔ du ɔl wetin maredman fɔ du to in wɛf, ɛn uman we mared fɔ du ɔl wetin mareduman fɔ du to in man.” (Fɔs Lɛta Fɔ Kɔrint 7:​3) Notis se di skripchɔ tɔk mɔ bɔt fɔ gi nɔto fɔ aks. Mami ɛn dadi biznɛs kin satisfay di wan dɛn we mared if di man ɛn di uman rili bisin bɔt dɛnsɛf. Fɔ ɛgzampul, di Baybul advays maredman dɛn fɔ no se dɛn “wɛf nɔ gɛt trɛnk lɛkɛ man” so dɛn fɔ “de wit dɛn wit da ɔndastandin de.” (Pita In Fɔs Lɛta 3:​7) Dis go ɛp dɛn mɔ we i kam pan mami ɛn dadi biznɛs. If di man nɔ trit in wɛf fayn, dat go mek i nɔ izi fɔ mek di uman gladi fɔ du mami ɛn dadi biznɛs.

¹² Tɛm kin de we di man ɛn in wɛf kin disayd nɔ fɔ du mami ɛn dadi biznɛs. Dis kin apin mɔ to di uman sɔm patikyula tɛm dɛn insay di mɔnt ɔ we i kin rili taya. (Luk Lɛvitikɔs 18:​19.) I kin apin bak to di man we i gɛt prɔblɛm we de rili mɔna am na in wokples we kin mek in at pwɛl. Di bɛst tin we di man ɛn in wɛf go du na fɔ mek dɛn ɔl tu tɔk to dɛnsɛf ɛn “dɛn tu gri” nɔ fɔ du mami ɛn dadi biznɛs fɔ sɔm tɛm. (Fɔs Lɛta Fɔ Kɔrint 7:​5) Dis go mek di man ɔ di uman nɔ tink se in kɔmpin de du bad. Bɔt if na bay wilful di uman nɔ de gri fɔ du mami ɛn dadi biznɛs wit in man ɔ if na bay wilful di man nɔ de trit di uman fayn we i kam pan mami ɛn dadi biznɛs, dat kin tɛmt di ɔda pɔsin fɔ go du bad. Dɛn kayn tin ya kin mek prɔblɛm de na di mared-os.

13. Wetin Kristian dɛn go du fɔ mek dɛn tink di rayt we?

¹³ Ɔl Kristian dɛn, ivin di wan dɛn we mared fɔ avɔyd fɔ de wach dɛn rud rud pikchɔ dɛn we go mek dɛn bigin tink bɔt ɛn want fɔ du mami ɛn dadi biznɛs. (Lɛta Fɔ Kɔlɔse 3:​5) Dɛn fɔ tek tɛm wit wetin dɛn de tink bɔt ɛn di we aw dɛn de du tin wit pɔsin we dɛn nɔ mared to. Jizɔs bin wɔn se: “Ɛni man we luk uman, we nɔto in wɛf, sote i want am fɔ insɛf, da man de dɔn tek ɔda man wɛf nain at.” (Matyu 5:​28) We maredman ɛn in wɛf fala di advays dɛn we de na di Baybul we i kam pan mami ɛn dadi biznɛs, dɛn go ebul fɔ avɔyd ɛnitin we go mek dɛn want ɔ ivin du mami ɛn dadi biznɛs di we aw Gɔd nɔ want. Dɛn go kɔntinyu fɔ ɛnjɔy dɛnsɛf togɛda na dɛn mared-os usay mami ɛn dadi biznɛs na fayn gift we di Wan we mek mared we na Jiova, dɔn gi.—Prɔvabs 5:​15-19.

DI RIZIN WE DI BAYBUL GI FƆ MEK PIPUL DƐN DAYVƆS

14. Sɔntɛnde, us bad tin kin apin insay mared-os? Wetin kin mek i apin?

¹⁴ Wi gladi fɔ no se bɔku Kristian dɛn we mared, kin ebul fɔ sɔlv ɛni prɔblɛm we dɛn kin gɛt na dɛn mared-os. Bɔt sɔntɛnde, nɔto so i kin apin. Bikɔs mɔtalman dɛn nɔ pafɛkt ɛn de liv na wɔl we Setan de kɔntrol, dat kin mek sɔm mared-os dɛn kin want fɔ skata. (Jɔn In Fɔs Lɛta 5:​19) Wetin Kristian dɛn fɔ du if tin lɛk dis apin to dɛn?

15. (a) Wetin na di wangren rizin we di Baybul gi we go mek pɔsin dayvɔs ɛn mared to ɔda pɔsin? (b) Wetin mek sɔm pipul dɛn dɔn disayd nɔ fɔ dayvɔs di ɔda pɔsin we dɔn go du mami ɛn dadi biznɛs di we aw Gɔd nɔ want?

¹⁵ As wi bin dɔn lan na Chapta 2 na dis buk, fɔ du mami ɛn dadi biznɛs di we aw Gɔd nɔ want na in nɔmɔ di Baybul se go mek pɔsin dayvɔs ɛn mared to ɔda pɔsin.c (Matyu 19:​9) I nɔ kin izi fɔ mek yu disayd wetin fɔ du if yu gɛt pruf fɔ se di pɔsin we yu mared to, dɔn du mami ɛn dadi biznɛs di we aw Gɔd nɔ want. Yu go kɔntinyu fɔ de wit di pɔsin ɔ yu go dayvɔs am? Lɔ nɔ de bɔt dat. Sɔm Kristian dɛn dɔn fɔgiv di ɔda pɔsin bikɔs i rili rigrɛt wetin i du ɛn dɛn mared dɔn stil kɔmɔt fayn. Ɔda wan dɛn kin disayd nɔ fɔ dayvɔs fɔ di pikin dɛn sek.

16. (a) Wetin na sɔm tin dɛn we kin mek maredman ɔ mareduman dayvɔs in man ɔ wɛf we du mami ɛn dadi biznɛs di we aw Gɔd nɔ want? (b) Wetin mek wi nɔ fɔ fɛn fɔlt pan wetin pɔsin disayd fɔ du if in man ɔ in wɛf go du mami ɛn dadi biznɛs di we aw Gɔd nɔ want?

¹⁶ Apat frɔm dat, dis tin we di pɔsin du go dɔn mek i gɛt ɔ gi bɛlɛ ɔ i gɛt sik dɛn we pɔsin go gɛt frɔm mami ɛn dadi biznɛs. Ɔ sɔntɛm nid de fɔ protɛkt di pikin dɛn frɔm dɛn mama ɔ papa we de du mami ɛn dadi biznɛs wit pikin dɛn. Wi dɔn si klia wan se bɔku tin de fɔ mɛmba bifo yu disayd fɔ du ɛnitin. Bɔt if afta yu dɔn no se di pɔsin we yu mared to dɔn du mami ɛn dadi biznɛs di we aw Gɔd nɔ want ɛn yu kɔntinyu fɔ du mami ɛn dadi biznɛs wit am, yu dɔn sho se yu dɔn fɔgiv am ɛn yu want fɔ kɔntinyu na di mared-os. If yu du dat, di Baybul nɔ gi ɛni rizin fɔ mek yu dayvɔs di pɔsin ɛn mared ɔda pɔsin. Nɔbɔdi nɔ fɔ disayd fɔ yu ɔ tray fɔ chenj wetin yu dɔn disayd fɔ du ɛn nɔbɔdi nɔ fɔ fɛn fɔlt pan wetin yu dɔn disayd fɔ du. Na yu go gɛt fɔ bia wit ɛnitin we yu disayd fɔ du. Di Baybul se: “Ɔlman gɛt fɔ ansa to Gɔd fɔ wetin i du.”—Lɛta Fɔ Galeshya 6:​5.

WETIN FƆ MEK PIPUL DƐN WE MARED, PAT?

17. If wan pɔsin na di mared-os nɔ du mami ɛn dadi biznɛs di we aw Gɔd nɔ want, wetin di Baybul se fɔ apin if dɛn disayd fɔ pat ɔ dayvɔs?

¹⁷ Ɛnitin de we go mek maredman ɛn in wɛf pat ɔ ivin dayvɔs ilɛksɛf di ɔda pɔsin nɔ go du mami ɛn dadi biznɛs di we aw Gɔd nɔ want? Yɛs, bɔt if dat apin pɔsin we na Kristian nɔ gɛt rayt fɔ mared to ɔda pɔsin. (Matyu 5:​32) Pan ɔl we di Baybul alaw mared pipul dɛn fɔ pat, i tɔk bak se dɛn stil nɔ gɛt rayt ‘fɔ mared to ɔda pɔsin.’ (Fɔs Lɛta Fɔ Kɔrint 7:​11) Wetin na sɔm tin dɛn we go apin we go alaw mared pipul dɛn fɔ pat?

18, 19. Wetin na sɔm tin dɛn we kin apin we go mek man ɔ uman tink bɔt fɔ pat ɔ dayvɔs wit di pɔsin we i mared to, pan ɔl we i nɔ gɛt rayt fɔ mared to ɔda pɔsin?

¹⁸ Na tru se, di famili go rili gɛt prɔblɛm dɛn bikɔs di man nɔ want fɔ du natin ɔ bikɔs di man gɛt bad trik dɛn.d I go de ple gambul wit di mɔni we di famili fɔ de yuz ɔ yuz am fɔ sɔpɔt di abit we i gɛt fɔ de tek drɔgs ɔ fɔ de drink. Di Baybul se: “If ɛnibɔdi nɔ kia fɔ di wan dɛn we na in yon, mɔ di wan dɛn we de na in famili, i dɔn lɛf fɔ biliv di tin dɛn we i dɔn lan ɛn i wɔs pas pɔsin we nɔ gɛt fet.” (Fɔs Lɛta To Timoti 5:​8, NW) If da kayn man de nɔ gri fɔ chenj, ɔ ivin de yuz di uman in mɔni fɔ kɔntinyu fɔ du bad tin dɛn, di uman kin disayd fɔ protɛkt in ɛn in pikin dɛn bay we dɛn pat.

¹⁹ Pɔsin kin disayd fɔ pat wit in man ɔ wɛf if in man ɔ wɛf kin bit am ɔltɛm ɔ du ɔda kayn bad bad tin to am we go mek in wɛlbɔdi ɔ ivin in layf de pan denja. Dɔn, if di man ɔ wɛf de tray ɔltɛm fɔ mek di ɔda pɔsin pwɛl Gɔd in lɔ, di man ɔ wɛf we i de du dat to kin tink bɔt fɔ pat wit am, mɔ if na tin we go mek di pɔsin in padi biznɛs wit Gɔd pwɛl. Di man ɔ wɛf we dɛn kin trit bad kin disayd se di tin we go mek i “du wetin Gɔd tɛl wi fɔ du”, ɛn “nɔ du wetin mɔtalman tɛl wi fɔ du” na fɔ pat wit di pɔsin we de tray fɔ stɔp am nɔ fɔ wɔship Gɔd.—Di Apɔsul Dɛn Wok [Akt] 5:​29.

20. (a) If sɔntin apin we mek man ɔ in wɛf disayd fɔ pat, wetin padi dɛn ɛn di ɛlda dɛn na di kɔngrigeshɔn go ebul du fɔ ɛp? Bɔt wetin dɛn nɔ fɔ du? (b) Wetin di wan dɛn we mared nɔ fɔ yuz di Baybul fɔ du we i kam pan fɔ pat ɛn fɔ dayvɔs?

²⁰ Pan ɔl we maredman ɔ in wɛf go de trit di wan we i mared to, bad, nɔbɔdi nɔ fɔ fos di pɔsin we dɛn de trit bad fɔ pat ɔ fɔ de wit di ɔda pɔsin. We padi dɛn ɔ ɛlda dɛn na di kɔngrigeshɔn de tray fɔ yuz di advays dɛn na di Baybul fɔ ɛp di pɔsin, dɛn nɔ go no ɔl wetin de rili apin bitwin di man ɛn in wɛf. Na Jiova nɔmɔ go no dat. Bɔt wɛf we na Kristian nɔ go sho se i rɛspɛkt aw Gɔd arenj mared if i de yuz smɔl smɔl ɛkskyuz dɛn fɔ mek i pat wit in man. Bɔt if sɔntin we rili siriɔs kɔntinyu fɔ de apin, nɔbɔdi nɔ fɔ fɛn fɔlt if di uman disayd fɔ pat wit in man. Na di sem tin bak go apin if man we na Kristian want fɔ pat wit in wɛf. Di Baybul se: “Wi ɔl gɛt fɔ tinap bifo Gɔd we go jɔj wi.”—Lɛta Fɔ Rom 14:​10.

AW DI BAYBUL SEV WAN MARED-OS?

21. Us ɛkspiriɛns sho se di advays dɛn na di Baybul de ɛp mared-os?

²¹ Tri mɔnt afta Lusia we wi bin dɔn tɔk bɔt fɔs, pat wit in man, i mit Jiova Witnɛs dɛn ɛn bigin fɔ stɔdi di Baybul wit dɛn. I tɔk se: “A bin rili sɔprayz we di Baybul gi advays dɛn we sɔlv mi prɔblɛm. Afta a dɔn stɔdi di Baybul fɔ wan wik, a bin rili want fɔ mek pis wit mi man. Tide, a go ebul tɔk se na Jiova no aw fɔ sev mared-os we gɛt prɔblɛm bikɔs i de tich pipul dɛn we mared fɔ no aw fɔ rɛspɛkt dɛnsɛf. Nɔto tru tin pipul dɛn kin tɔk we dɛn kin se Jiova Witnɛs dɛn de skata famili. Fɔ mi, dɛn ɛp fɔ mek mi famili gɛt wanwɔd.” Lusia bin lan fɔ fala di advays dɛn we de na di Baybul.

22. Wetin pipul dɛn we mared fɔ biliv gud wan?

²² Nɔto Lusia nɔmɔ dis dɔn apin to. Mared na blɛsin, nɔto ebi lod. Na dat mek Jiova dɔn gi di bɛst tin we go ɛp mared-os dɛn ɛn dat na in Wɔd, di Baybul. Di Baybul kin mek “ɔdɔyɔ sɛf . . . gɛt sɛns.” (Sam 19:​7-11) I dɔn ɛp bɔku mared-os dɛn we bin want fɔ skata ɛn i dɔn ɛp bɔku ɔda wan dɛn fɔ sɔlv dɛn prɔblɛm dɛn. I go fayn fɔ mek ɔl di wan dɛn we mared biliv gud gud wan pan di advays dɛn we Jiova Gɔd de gi bɔt mared. I rili de ɛp!