Wi Want fɔ Go wit Yu

1, 2. (a) Wetin Jiova bin dɔn se go apin insay wi yon tɛm? (b) Us kwɛstyɔn dɛn wi go ansa insay dis atikul? (Luk di pikchɔ nia dis atikul in taytul.)

JIOVA bin dɔn tɔk se insay wi tɛm, “tɛn man pan ɔl di trayb dɛn na [di] wɔl, go grip wan Ju man in klos de se lɛ dɛn go wit am bikɔs dɛn dɔn yɛri se, PAPA GƆD de wit am.” (Zɛkaraya 8:​23) Di “Ju” man tinap fɔ di wan dɛn we Gɔd dɔn anɔynt wit oli spirit. Dɛn de kɔl dɛn bak di “Izrɛl we na Gɔd in yon.” (Lɛta Fɔ Galeshya 6:​16, NW) Di “tɛn man” dɛn tinap fɔ di wan dɛn we gɛt di op fɔ de na dis wɔl sote go. Dɛn no se Jiova dɔn blɛs di anɔyntɛd dɛn ɛn dɛn si am se na ɔnɔ fɔ wɔship Jiova wit dɛn.

² Jɔs lɛk di prɔfɛt Zɛkaraya, Jizɔs bin tɔk se Gɔd in pipul dɛn go gɛt wanwɔd. Jizɔs se di wan dɛn we gɛt di op fɔ go na ɛvin na ship dɛn we “nɔ plɛnti” ɛn di wan dɛn we gɛt di op fɔ de na dis wɔl na di “ɔda ship dɛn.” Bɔt Jizɔs se dɛn “go miks” togɛda ɛn fala am. Ɛn na in go bi dɛn “shɛpad.” (Lyuk 12:​32; Jɔn 10:​16) Bikɔs na tu grup dɛn de, sɔm pipul dɛn go de wɔnda ɛn aks se: (1) Tide di ɔda ship dɛn nid fɔ sabi ɔl di anɔyntɛd dɛn nem? (2) Aw di anɔyntɛd dɛn fɔ si dɛnsɛf? (3) If sɔmbɔdi na mi kɔngrigeshɔn bigin fɔ it di bred ɛn drink di wayn na di Mɛmorial, aw a fɔ trit am? (4) A nid fɔ wɔri if a si se di wan dɛn we de it di bred ɛn drink di wayn na di Mɛmorial de bɔku? Dis atikul go ansa dɛn kwɛstyɔn dɛn ya.

WI NID FƆ SABI ƆL DI ANƆYNTƐD DƐN NEM TIDE?

3. Wetin mek i nɔ pɔsibul fɔ lɛ wi rili no udat dɛn go de pan di 144,000?

³ Yu tink se di ɔda ship dɛn nid fɔ no ɔl di anɔyntɛd dɛn nem we stil de na dis wɔl? Nɔ. Wetin mek? Na bikɔs i nɔ pɔsibul fɔ lɛ ɛnibɔdi no fɔ tru if dɛn go gɛt wetin Gɔd dɔn prɔmis dɛn.^[1] (Rid di ɛndnot ɔnda di las paregraf.) Pan ɔl we Gɔd dɔn kɔl dɛn fɔ go na ɛvin, di wangren tin we go mek dɛn gɛt wetin Gɔd dɔn prɔmis dɛn na we dɛn kɔntinyu fɔ fetful. Setan no dis, ɛn i de yuz pipul dɛn we de “lay se dɛn na prɔfɛt” fɔ tray fɔ “ful” dɛn. (Matyu 24:​24) Anɔyntɛd Kristian dɛn nɔ kin shɔ se dɛn go gɛt wetin Jiova dɔn prɔmis dɛn pas te Jiova mek dɛn no klia wan se i dɔn jɔj dɛn as pipul dɛn we fetful. Jiova kin mek dɛn no dis ɔ gi dɛn di las stamp bifo dɛn day ɔ jɔs bifo “da big trɔbul” bigin.—Rɛvɛleshɔn 2:​10; 7:​3, 14.

4. If i nɔ pɔsibul fɔ no ɔl di anɔyntɛd dɛn nem we de na dis wɔl tide, aw wi go “go wit” dɛn?

⁴ If i nɔ pɔsibul fɔ no ɔl di anɔyntɛd dɛn nem we de na dis wɔl tide, aw di ɔda ship dɛn go “go wit” dɛn? Di Baybul se “tɛn man” dɛn go “grip wan Ju man in klos de se lɛ dɛn go wit am bikɔs dɛn dɔn yɛri se, PAPA GƆD de wit am.” Di vas tɔk bɔt wan Ju. Bɔt i yuz di wɔd “am,” we min se na plɛnti pipul dɛn i de tɔk bɔt. I nɔ jɔs min wan pɔsin, i tinap fɔ ɔl di anɔyntɛd dɛn. Di ɔda ship dɛn no dis, ɛn dɛn de sav Jiova wit di anɔyntɛd dɛn. Dɛn nɔ nid fɔ no di anɔyntɛd dɛn nem ɛn fala dɛn ɔl wan bay wan. Na Jizɔs na wi Lida, ɛn di Baybul tɛl wi se na in nɔmɔ wi fɔ fala.—Matyu 23:​10.

AW DI ANƆYNTƐD DƐN FƆ SI DƐNSƐF?

5. Us siriɔs wɔnin anɔyntɛd Kristian dɛn fɔ tink bɔt? Wetin mek?

⁵ Anɔyntɛd Kristian dɛn fɔ tink siriɔs wan bɔt di wɔnin we de na Fɔs Lɛta Fɔ Kɔrint 11:​27-29. (Rid.) Aw anɔyntɛd Kristian go it di bred ɛn drink di wayn “lɛkɛ se dɛn nɔ min natin” we i go di Mɛmorial? If i nɔ kɔntinyu fɔ bi Jiova in tayt padi ɛn i nɔ fetful to am, dɔn i it di bred ɛn drink di wayn, i de sho se i nɔ gɛt wan rɛspɛkt. (Di Ibru Pipul Dɛn 6:​4-6; 10:​26-29, NW) Dis siriɔs wɔnin de mek di anɔyntɛd dɛn mɛmba se dɛn fɔ kɔntinyu fɔ du wetin Gɔd want if dɛn want fɔ gɛt “di prayz we Gɔd de gi; dat na layf na ɛvin we go de sote go we Gɔd kɔl wi fɔ gɛt wɛn wi gɛt wanwɔd wit Jizɔs Krays.”—Lɛta Fɔ Filipay 3:​13-16.

6. Aw anɔyntɛd Kristian dɛn fɔ si dɛnsɛf?

⁶ Pɔl tɛl anɔyntɛd Kristian dɛn se: “Mi, Pɔl, we dɛn jɛl bikɔs a de wok fɔ di Masta, de beg una fɔ mek una liv ɛn du wetin Gɔd tɛl una fɔ du.” Aw dɛn fɔ du dis? Pɔl tɛl dɛn se: “Una nɔ fɔ lift unasɛf ɔp ɛn una fɔ de bia wit una kɔmpin fɔ sho se una lɛk dɛn. Una fɔ tray ɔltɛm fɔ mek di wanwɔd we Gɔd in Spirit de gi, nɔ dɔn, so dat una nɔ go de mek plaba wit una kɔmpin.” (Lɛta Fɔ Ɛfisɔs 4:​1-3) Jiova in oli spirit de ɛp in savant dɛn fɔ put dɛnsɛf dɔŋ, i nɔ de mek dɛn prawd. (Lɛta Fɔ Kɔlɔse 3:​12) So anɔyntɛd Kristian dɛn nɔ de tink se dɛn bɛtɛ pas ɔda pipul dɛn. Dɛn no se Jiova nɔ de gi mɔ oli spirit to anɔyntɛd dɛn pas in ɔda savant dɛn. Ɛn dɛn nɔ de fil se dɛn ebul fɔ ɔndastand di tru tin dɛn na di Baybul pas ɛni ɔda pɔsin. Dɛn nɔ go ɛva tɛl pɔsin fɔ bigin it di bred ɛn drink di wayn na di Mɛmorial. Bifo dat, dɛn de put dɛnsɛf dɔŋ ɛn dɛn no se na Jiova nɔmɔ de kɔl pɔsin fɔ go liv na ɛvin.

7, 8. Wetin anɔyntɛd Kristian dɛn nɔ de tink se ɔda pipul dɛn fɔ du? Wetin mek?

⁷ Pan ɔl we anɔyntɛd Kristian dɛn fil se na big big ɔnɔ dɛn gɛt fɔ lɛ Gɔd kɔl dɛn fɔ go na ɛvin, dɛn nɔ de tink se pipul dɛn fɔ trit dɛn spɛshal we. (Lɛta Fɔ Ɛfisɔs 1:​18, 19; rid Lɛta Fɔ Filipay 2:​2, 3.) Dɛn no bak se we Jiova anɔynt dɛn, i nɔ mek ɛni ɔda pɔsin no bɔt dis. So anɔyntɛd Kristian nɔ de sɔprayz if sɔm pipul dɛn nɔ biliv wantɛm wantɛm se Gɔd dɔn anɔynt am. I no se di Baybul dɔn tɛl wi se wi nɔ fɔ kwik fɔ biliv sɔmbɔdi we se Gɔd dɔn gi am spɛshal wok. (Rɛvɛleshɔn 2:​2) Bikɔs anɔyntɛd Kristian nɔ de tink se pipul dɛn fɔ pe atɛnshɔn to am tumɔs, i nɔ go tɛl pipul dɛn we i mit fɔ di fɔstɛm se in na anɔyntɛd. Sɔntɛm i nɔ go ivin tɛl ɛnibɔdi. I nɔ go bost bak bɔt di wɔndaful tin dɛn we i go du na ɛvin.—Fɔs Lɛta Fɔ Kɔrint 1:​28, 29; rid Fɔs Lɛta Fɔ Kɔrint 4:​6-8.

⁸ Anɔyntɛd Kristian dɛn nɔ de fil se dɛn fɔ spɛn tɛm nɔmɔ wit dɛn kɔmpin anɔyntɛd dɛn, lɛk se dɛn ɔl de na wan klɔb. Dɛn nɔ de tray fɔ fɛn ɔda anɔyntɛd dɛn so dat dɛn go tɔk bɔt wetin i min fɔ bi anɔyntɛd ɔ kam togɛda bay grup fɔ stɔdi di Baybul. (Lɛta Fɔ Galeshya 1:​15-17) Wanwɔd nɔ go de na di kɔngrigeshɔn if anɔyntɛd Kristian dɛn du dis. Dɛn go de du wetin di oli spirit nɔ want, ɛn na di oli spirit de ɛp Gɔd in pipul dɛn fɔ gɛt kolat ɛn wanwɔd.—Rid Lɛta Fɔ Rom 16:​17, 18.

AW YU FƆ TRIT DƐN?

9. Wetin mek wi nid fɔ tek tɛm we wi de trit di wan dɛn we de it di bred ɛn drink di wayn na di Mɛmorial? (Luk di bɔks we se “Lɔv Nɔ Go Mek Wi Du Tin we Go Mek Pipul dɛn Nɔ Rɛspɛkt Wi.”)

⁹ Aw yu fɔ trit anɔyntɛd brɔda ɛn sista dɛn? Jizɔs bin tɛl in disaypul dɛn se:“Una ɔl na brɔda ɛn sista.” I kɔntinyu fɔ tɔk se: “Ɛnibɔdi we put insɛf ɔp, Gɔd go put am dɔŋ, bɔt ɛnibɔdi we put insɛf dɔŋ, Gɔd go es am ɔp.” (Matyu 23:​8-12) So i nɔ go fayn fɔ kɔle pɔsin tumɔs, ilɛksɛf di pɔsin na Krays in anɔyntɛd brɔda. We di Baybul tɔk bɔt di ɛlda dɛn, i ɛnkɔrej wi fɔ falamakata dɛn fet, bɔt i nɔ tɛl wi se wi fɔ mek ɛni mɔtalman wi lida. (Di Ibru Pipul Dɛn 13:​7, NW) Na tru di Baybul tɔk we i se wi fɔ “rɛspɛkt” di ɛlda dɛn. Dis na bikɔs dɛn de du “gud” wok na di kɔngrigeshɔn ɛn dɛn de “wok traŋa wan fɔ tɛl pipul bɔt Gɔd ɛn tich” dɛn, nɔto bikɔs dɛn na anɔyntɛd. (Fɔs Lɛta To Timoti 5:​17) If wi de prez anɔyntɛd Kristian dɛn tumɔs ɛn gi dɛn tumɔs atɛnshɔn, wi go mek dɛn shem. Ɔ di wɔs tin we wi go du, wi go mek dɛn fil prawd. (Lɛta Fɔ Rom 12:​3) Wi nɔn nɔ go want fɔ du ɛnitin we go mek Krays in anɔyntɛd brɔda dɛn mek siriɔs mistek!—Lyuk 17:​2.

10. Aw yu go sho se yu rɛspɛkt anɔyntɛd Kristian dɛn?

¹⁰ Aw wi go sho se wi rɛspɛkt di wan dɛn we Jiova dɔn anɔynt? Wi nɔ go aks dɛn aw dɛn kam fɔ bi anɔyntɛd. Dis na dɛn yon biznɛs, so wi nɔ gɛt di rayt fɔ no. (Fɔs Lɛta Fɔ Tɛsalonayka 4:​11; Sɛkɛn Lɛta Fɔ Tɛsalonayka 3:​11) Ɛn wi nɔ fɔ tink se dɛn man ɔ dɛn wɛf, dɛn mama ɔ papa, ɔ dɛn ɔda fambul dɛnsɛf na anɔyntɛd. Pɔsin nɔ de gɛt in op frɔm in famili. (Fɔs Lɛta Fɔ Tɛsalonayka 2:​12) Wi fɔ avɔyd bak fɔ aks kwɛstyɔn dɛn we go mek ɔda pipul dɛn fil bad. Fɔ ɛgzampul, wi nɔ go aks anɔyntɛd Kristian in wɛf aw i go fil fɔ liv na dis wɔl sote go we in man nɔ de nia am. Bikɔs wi rili biliv se insay di nyu wɔl, Jiova go “satisfay” ɔltin we gɛt layf.—Sam 145:​16.

11. Aw wi go protɛkt wisɛf if wi avɔyd fɔ kɔle pipul dɛn tumɔs?

¹¹ If wi nɔ trit anɔyntɛd Kristian dɛn impɔtant pas ɔda pipul dɛn, wi go protɛkt wisɛf bak. Aw wi go protɛkt wisɛf? Di Baybul tɛl wi se pipul dɛn go de na di kɔngrigeshɔn we go de “mek lɛkɛ se dɛn biliv” ɔ dɛn go ivin se dɛn na anɔyntɛd. (Lɛta Fɔ Galeshya 2:​4, 5; Jɔn In Fɔs Lɛta 2:​19) Apat frɔm dis, sɔntɛm sɔm anɔyntɛd Kristian dɛn nɔ go kɔntinyu fɔ bi fetful. (Matyu 25:​10-12; Pita In Sɛkɛn Lɛta 2:​20, 21) Bɔt if wi avɔyd fɔ de tɛl pipul “dɛn tin we go mek dɛn ed big” ɔ kɔle dɛn tumɔs, wi nɔ go fala dɛn, ivin di wan dɛn we na anɔyntɛd Kristian ɔ di wan dɛn we bɔku pipul dɛn sabi ɔ di wan dɛn we dɔn sav Jiova fɔ lɔng tɛm. Dɔn, if dɛn nɔ fetful ɔ lɛf di kɔngrigeshɔn, wi go stil gɛt fet pan Jiova ɛn wi nɔ go lɛf fɔ sav am.—Jud 16.

WI NID FƆ WƆRI BƆT DI NƆMBA?

12, 13. Wetin mek wi nɔ fɔ wɔri bɔt ɔmɔs pipul dɛn de it di bred ɛn drink di wayn na di Mɛmorial?

¹² Fɔ lɔng tɛm, di pipul dɛn we bin de it di bred ɛn drink di wayn na di Mɛmorial nɔ bin bɔku; dɛn nɔmba bin de go dɔŋ. Bɔt dɛn biɛn tɛm ya, di nɔmba de go ɔp ɛvri ia. Wi fɔ wɔri bɔt dis? Nɔ. Lɛ wi si wetin mek.

¹³ Jiova “sabi di wan dɛn we nain yon.” (Sɛkɛn Lɛta To Timoti 2:​19) I no di wan dɛn we na anɔyntɛd. Bɔt di brɔda dɛn we de kɔnt di wan dɛn we de it di bred ɛn drink di wayn na di Mɛmorial nɔ no udat rili na anɔyntɛd. So dɛn kin kɔnt di wan dɛn we tink se dɛn na anɔyntɛd bɔt we nɔto anɔyntɛd. Fɔ ɛgzampul, sɔm pipul dɛn we bin de it di bred ɛn drink di wayn bin stɔp leta. Ɔda wan dɛn kin gɛt smɔl ed prɔblɛm, we kin mek dɛn nɔ de tink stret ɔ dɛn at kin pwɛl pasmak, so dɛn kin fil se dɛn gɛt fɔ rul wit Krays na ɛvin. Dis dɔn sho wi klia wan se wi nɔ rili no ɔmɔs anɔyntɛd Kristian dɛn dɔn lɛf na di wɔl.

14. Wetin di Baybul se bɔt ɔmɔs anɔyntɛd Kristian dɛn go de na di wɔl we da big trɔbul go bigin?

¹⁴ Anɔyntɛd Kristian dɛn go de na bɔku say dɛn na di wɔl we Jizɔs go kam fɔ kɛr dɛn go na ɛvin. Di Baybul se “trɔmpɛt go blo lawd wan, dɔn [Jizɔs] go sɛn in enjɛl dɛn ɔlɔbɔt na [di] wɔl frɔm wan ɛnd to di ɔda fɔ gɛda dɛn pipul we i dɔn pik fɔ bi in yon, ɛn briŋ dɛn kam to am.” (Matyu 24:​31) Di Baybul tɔk bak se insay di las dez, smɔl pan di anɔyntɛd dɛn go de na di wɔl. (Rɛvɛleshɔn 12:​17) Bɔt i nɔ sho ɔmɔs go de na di wɔl we da big trɔbul go bigin.

15, 16. Wetin wi fɔ ɔndastand bɔt di 144,000 anɔyntɛd Kristian dɛn we Jiova dɔn pik?

¹⁵ Na Jiova de disayd ustɛm i go pik anɔyntɛd Kristian dɛn. (Lɛta Fɔ Rom 8:​28-30) Jiova bigin fɔ pik anɔyntɛd Kristian dɛn afta Jizɔs gɛt layf bak. I tan lɛk se insay di apɔsul dɛn tɛm, ɔlman we na tru Kristian na bin anɔyntɛd. Fɔ lɔng lɔng tɛm afta dat, bɔku pan di wan dɛn we bin de se dɛn na Kristian nɔ bin de rili fala Krays. Bɔt pan ɔl dat, insay dɛn tɛm dɛn de, Jiova bin stil de anɔynt di wan-wan pipul dɛn we na bin tru Kristian dɛn. Dɛn bin tan lɛk di wit we Jizɔs bin se go gro midul di gras. (Matyu 13:​24-30) Insay di las dez, Jiova dɔn kɔntinyu fɔ pik pipul dɛn we go jɔyn di 144,000 dɛn.^[2] (Rid di ɛndnot ɔnda di las paregraf.) So if Gɔd disayd fɔ pik sɔm pipul dɛn jɔs bifo di ɛnd kam, wi nɔ go dawt se i de du di rayt tin. (Ayzaya 45:​9; Daniɛl 4:​35; rid Lɛta Fɔ Rom 9:​11, 16.)^[3] (Rid di ɛndnot ɔnda di las paregraf.) Wi fɔ tek tɛm lɛ wi nɔ biev lɛk di wokman dɛn we bin de kɔmplen bɔt di we aw dɛn masta trit di wan dɛn we bigin fɔ wok insay di las awa.—Rid Matyu 20:​8-15.

¹⁶ Nɔto ɔl di wan dɛn we gɛt di op fɔ de na ɛvin na di “bɔy we tru to in masta ɛn we gɛt sɛns.” (Matyu 24:​45-47) Tide na smɔl pipul dɛn Jiova ɛn Jizɔs de yuz fɔ fid, ɔ tich, bɔku bɔku pipul dɛn, jɔs lɛk aw dɛn bin de du insay di apɔsul dɛn tɛm. Na jɔs smɔl pan di anɔyntɛd Kristian dɛn insay di apɔsul dɛn tɛm Jiova bin yuz fɔ rayt di Kristian Grik Skripchɔ, we na frɔm Matyu to Rɛvɛleshɔn. Ɛn tide, na smɔl pan di anɔyntɛd Kristian dɛn gɛt di wok fɔ gi Gɔd in pipul dɛn, dɛn “it wɛn di rayt tɛm rich.”

17. Wetin yu dɔn lan na dis atikul?

¹⁷ Wetin wi dɔn lan na dis atikul? Jiova dɔn disayd fɔ gi bɔku pan in pipul dɛn layf we go de sote go na dis wɔl ɛn layf we go de sote go na ɛvin to di wan dɛn we go rul wit Jizɔs. Jiova de blɛs ɔl in savant dɛn, di “Ju man” ɛn di “tɛn man” dɛn, ɛn i want lɛ dɛn obe di sem lɔ dɛn ɛn kɔntinyu fɔ du wetin i want. Dɛn ɔl fɔ put dɛnsɛf dɔŋ. Dɛn ɔl fɔ sav am togɛda ɛn dɛn fɔ gɛt wanwɔd. Ɛn dɛn ɔl fɔ tray fɔ mek pis de na di kɔngrigeshɔn. As wi de nia di tɛm we di wɔl fɔ dɔn, lɛ wi ɔl kɔntinyu fɔ sav Jiova ɛn fala Krays togɛda.