“Naw, A Lɛk di Prichin Wok!”

A NƆ KƆNTINYU FƆ GLADI

I sɔri fɔ no se we a bin de arawnd 13 ia, mi padi biznɛs wit Jiova nɔ bin tayt igen. I bin tan lɛk se mi skulmet dɛn bin gɛt fridɔm fɔ du ɛnitin we dɛn want, ɛn misɛf bin want fɔ gɛt da kayn fridɔm de. A bin de fil lɛk mi mama ɛn mi papa dɛn bin tu strikt, ɛn i bin at fɔ liv lɛk Kristian. Dɔn, i bin tan lɛk fɔ wɔship Jiova nɔto bin izi tin fɔ du. Pan ɔl we a bin biliv se Jiova de, a nɔ bin gɛt tayt padi biznɛs wit am.

A nɔ bin lɛf fɔ prich wantɛm wantɛm, bɔt a nɔ bin de prich bɛtɛ igen. Ɛn a nɔ bin de pripia fɔ go prich igen, so i bin at fɔ mek a tɔk to pɔsin. Ɛn we a kin stat fɔ tɔk to pɔsin, a nɔ kin ebul fɔ kɔntinyu di tɔk. Bikɔs ɔf dat, a nɔ bin de du wɛl na di prichin wok, ɛn a nɔ bin gladi fɔ du am, ɛn dis bin ad pan di rizin we mek a nɔ bin lɛk fɔ prich. A kin aks misɛf se, ‘Aw pɔsin go de ebul fɔ prich lɛk dis ɛni wik ɛn ɛni mɔnt?’

We a bin rich 17 ia, a bin jɔs want fɔ de fɔ misɛf. So a pak mi tin dɛn, kɔmɔt na os, dɔn a muf go de na Ɔstrelia. Mi mama ɛn mi papa dɛn at bin pwɛl we a muf kɔmɔt na os. Dɛn bin de wɔri bɔt mi, bɔt dɛn bin tink se a go kɔntinyu fɔ sav Jiova.

We a bin de na Ɔstrelia, mi padi biznɛs wit Jiova nɔ bin de go bifo. A bigin fɔ mis mitin dɛn. A mek padi wit yɔŋ wan dɛn we tan lɛk mi; wi go go na mitin wan nɛt, dɔn di ɔda nɛt wi go drink ɛn dans na klɔb. We a tink bɔt mi layf da tɛm de, a kam fɔ si se a bin de na di trut ɛn a de na di wɔl di sem tɛm, bɔt rili, a bin de fil lɛk a nɔ de nɔsay.

A LAN WAN IMPƆTANT LƐSIN USAY A NƆ BIN DE ƐKSPƐKT FƆ LAN AM

Afta i dɔn pas tu ia, a bin mit wan sista we nɔ bin ivin no se i mek a tink bɔt di we aw a de liv mi layf. A bin de na os wit 4 sista dɛn we nɔ mared, ɛn wi bin invayt di sakit ovasia ɛn in wɛf we nem Tamara, fɔ kam de wit wi fɔ wan wik. We Tamara in man bin de du kɔngrigeshɔn wok dɛn, Tamara bin de spɛn tɛm wit wi. I bin gladi ɛn laf wit wi. A bin lɛk dat. Tamara na bin pɔsin we rili gɛt sɛns, ɛn i bin izi fɔ tɔk to. A bin sɔprayz fɔ si se pan ɔl we i bin de yuz ɔl in tɛm fɔ sav Jiova, na bin pɔsin we yu de ɛnjɔy fɔ spɛn tɛm wit.

Tamara bin rili gɛt zil. Di kayn we aw Tamara lɛk di trut ɛn di prichin wok, dat bin de mek ɔda pipul dɛn falamakata am. Tamara bin gladi bikɔs i bin de gi Jiova in bɛst, ɛn mi nɔ bin gladi bikɔs a nɔ bin de gi Jiova mi bɛst. I bin de biev fayn ɛn gɛt tru tru gladi-at, ɛn dat bin afɛkt mi layf. Tamara in ɛgzampul bin mek a tink bɔt wan impɔtant lɛsin na Gɔd in Wɔd: Jiova want wi ɔl fɔ “gladi” we wi de sav am, ɛn fɔ sav am “wit bɔku siŋ.”—Sam 100:​2.

AW A BIGIN FƆ LƐK DI PRICHIN WOK BAK?

A bin want fɔ gɛt di kayn gladi-at we Tamara bin gɛt, bɔt fɔ mek a gɛt da kayn gladi-at de, a bin nid fɔ mek sɔm big chenj dɛn na mi layf. I bin tek lɛk tri ia fɔ mek a mek dɛn chenj dɛn de. Bɔt smɔl smɔl, a bin ebul fɔ chenj. A bigin fɔ pripia fɔ de go prich, ɛn a bin de ɔgzilari payɔnia wan wan tɛm. Dis bin ɛp mi fɔ mek a lɛf fɔ de fred, ɛn i mek a gɛt maynd we a de prich. As a bin de yuz di Baybul fast fast we a de prich, i bin mek a rili ɛnjɔy di prichin wok. I nɔ te, a stat fɔ ɔgzilari payɔnia ɛvri mɔnt.

A bigin fɛn padi dɛn frɔm difrɛn difrɛn ej grup dɛn we bin de du wɛl na di trut ɛn we bin de ɛnjɔy fɔ sav Jiova. Dɛn gud ɛgzampul dɛn bin ɛp mi fɔ tink bɔt wetin rili impɔtant na mi layf, ɛn a bin stat fɔ du mi Baybul ridin ɛvride. A bigin fɔ ɛnjɔy di prichin wok mɔ ɛn mɔ, ɛn i nɔ te, a stat fɔ rɛgyula payɔnia. Afta lɔŋ tɛm, a bin gladi fɔ de bak na di kɔngrigeshɔn.

A FƐN PAYƆNIA PATNA WE GO DE WIT MI SOTE GO

Afta wan ia, a bin mit Alɛks. In na gud ɛn ɔnɛs pɔsin we bin lɛk Jiova ɛn di prichin wok. In na bin ministerial savant, ɛn i bin dɔn de payɔnia fɔ siks ia. Alɛks bin dɔn prich bak na Malawi fɔ sɔm tɛm usay dɛn bin nid mɔ pipul dɛn fɔ prich. We i bin de na Malawi, i bin mit sɔm mishɔnari dɛn de we na bin gud ɛgzampul dɛn fɔ am, ɛn dɛn bin ɛnkɔrej am fɔ kɔntinyu fɔ put Gɔd in Kiŋdɔm fɔs na in layf.

Insay 2003, mi ɛn Alɛks bin mared. Ɛn frɔm da tɛm de, wi dɔn kɔntinyu fɔ sav na ful-taym savis. Wi dɔn lan plɛnti wɔndaful lɛsin dɛn, ɛn Jiova dɔn blɛs wi difrɛn we dɛn.

JIOVA BIN GI WI MƆ BLƐSIN DƐN

Insay 2009, dɛn bin kɔl wi fɔ go sav as mishɔnari dɛn na Timo-Lɛst, we na wan smɔl kɔntri na wan pan di ayland dɛn na Indonishia. Da sem tɛm de, wi bin gladi, wi bin sɔprayz, ɛn wi bin de fred. Afta fayv mɔnt, wi rich na di kapital siti we nem Dili.

Layf na wi nyu ples bin rili difrɛn frɔm di say usay wi bin de. Wi bin gɛt fɔ yus to nyu kɔlchɔ, nyu langwej, tin dɛn fɔ it, ɛn nyu we fɔ liv. Plɛnti tɛm we wi bin de du di prichin wok, wi bin de mit pipul dɛn we po, we nɔ lan bɛtɛ buk, ɛn we bin de sɔfa. Ɛn wi bin de mit bɔku pipul dɛn we bin gɛt prɔblɛm dɛn ɛn pwɛlat bikɔs ɔf di wɔ ɛn di bɔku fɛt-fɛt.a

Di prichin wok bin rili wɔndaful. Fɔ ɛgzampul, a bin mit wan 13 ia ol titi we nem Mariab; in at bin rilli pwɛl. I nɔ bin dɔn tu te yet we in mama day, ɛn na wan wan tɛm i bin de si in papa. Lɛk bɔku pan di ɔda pikin dɛn we bin de arawnd Maria in ej grup, i nɔ bin no wetin i want fɔ du wit in layf. A mɛmba wan tɛm we i bin de kray we i bin de ɛksplen to mi aw i de fil. Bɔt a nɔ bin ɔndastand wetin i bin de tɔk bikɔs a nɔ bin dɔn sabi in langwej fayn fayn wan yet. So a pre to Jiova; a aks am lɛ i ɛp mi fɔ ɛnkɔrej Maria, dɔn a rid sɔm skripchɔ dɛn to am fɔ kɔrej am. Afta sɔm tɛm, a si we di trut chenj di we aw Maria bin de biev, di we aw i bin de drɛs, ɛn di we aw i bin de liv. Maria bin baptayz, ɛn naw i gɛt in yon Baybul stɔdi dɛn. Naw, Maria de wit Jiova in pipul dɛn we na in big famili, ɛn i no se dɛn lɛk am.

Jiova de blɛs di prichin wok na Timo-Lɛst. Pan ɔl we na insay di las tɛn ia bɔku pan di pɔblisha dɛn baptayz, bɔku pan dɛn na payɔnia, ministerial savant, ɔ ɛlda dɛn. Ɔda wan dɛn de wok na di rimot transleshɔn ɔfis, ɛn dɛn de ɛp fɔ translet wi pɔblikeshɔn dɛn na di lokal langwej dɛn. A bin de rili gladi we a de yɛri dɛn de siŋ na mitin, we dɛn kin smayl, ɛn we a bin si dɛn de go bifo pan Gɔd biznɛs.

WI BIN RILI GLADI

Wi layf na Timo-Lɛst bin rili difrɛn frɔm aw wi bin de na Ɔstrelia, bɔt wi bin rili gladi. Sɔm tɛm dɛn de we wi bin de chok insay smɔl poda poda we ful-ɔp wit pipul dɛn, ɛn dɛn kin ful-ɔp di motoka bak wit dray fish ɛn vɛjitebul dɛn we dɛn kin bay na makit. Sɔm tɛm dɛn de we wi bin de kɔndɔkt Baybul stɔdi dɛn na smɔl os we wam, we di grɔn nɔ simɛnt, ɛn usay fɔl dɛn bin de rɔn rɔn. Bɔt pan ɔl dɛn tin dɛn ya, a bin de tɛl misɛf se, ‘Dis layf wɔndaful!’

We a tink bɔt wetin bin dɔn apin, a gladi we mi mama ɛn papa bin du dɛn bɛst fɔ tich mi bɔt Jiova, ɛn we dɛn bin sɔpɔt mi ivin we mi padi biznɛs wit Jiova nɔ bin tayt di tɛm we a bin yɔŋ. We a luk di we aw a liv mi layf, a si se wetin Prɔvabs 22:​6 tɔk na tru. Mi mama ɛn papa gladi fɔ si se mi ɛn Alɛks de sav Jiova. Frɔm 2016, wi dɔn de du di sakit wok na di Ɔstraleshia branch tɛritri.

I at fɔ biliv se trade a nɔ bin de ɛnjɔy fɔ du di prichin wok. Naw, a lɛk di prichin wok! A dɔn kam fɔ si se ilɛk wetin apin na wi layf, di wangren tin we go mek wi gɛt tru tru gladi-at na we wi sav Gɔd wit ɔl wi at. Fɔ tru, di las 18 ia we a dɔn sav Jiova wit Alɛks, na di tɛm we a dɔn gladi pas ɛni ɔda tɛm na mi layf. Na naw a ɔndastand wetin Devid we na wan pan di man dɛn we rayt di sam buk bin tɛl Jiova we i se: “Lɛ ɔl udat abop pan yu fɔ kɔba dɛn, gladi. Lɛ dɛn de siŋ ɔltɛm bikɔs dɛn gladi. . . . Dɛn go gladi ɔltɛm fɔ wetin yu de du.”—Sam 5:​11.