Ɔlda Bin Rich In Gol

IF YU bin dɔn go waka na wan smɔl ayland we nem Sangia Bisa na Indonishia sɔm ia bifo dis tɛm, yu fɔ dɔn mit tri pan wi Kristian sista dɛn de wok na di bich. Dɛn sabi dɛn as pipul dɛn we de prich na da ayland de ɛn de ɛp pipul dɛn fɔ ɔndastand di Baybul. Bɔt wan ɔda tɛm, dɛn bin disayd fɔ du difrɛn wok.

Fɔs, dɛn waka go insay di wata, fɛn ebi ston dɛn, ɛn kɛr dɛn go na di bich. Sɔm pan di ston dɛn bin big lɛk futbɔl. Dɔn di uman dɛn sidɔm pan smɔl bɛnch dɛn ɛn yuz ama fɔ brok brok di ston dɛn smɔl smɔl wan, dɛn smɔl smɔl pas fɔl eg. Afta dat, dɛn put di smɔl smɔl ston dɛn insay rɔba bɔkɛt dɛn ɛn go wit dɛn usay dɛn de. Dɔn dɛn put di ston dɛn we dɛn kin yuz fɔ mek rod insay big bag dɛn fɔ lod dɛn pan trɔk dɛn.

Wan pan dɛn sista dɛn de na bin Ɔlda. I bin gɛt mɔ tɛm fɔ du dis wok pas in kɔmpin dɛn. I kin yuz di mɔni we i kin gɛt frɔm dis wok fɔ bay di tin dɛn we in famili nid ɛvride. Bɔt dis tɛm, i want fɔ yuz sɔm pan di mɔni fɔ du ɔda tin. I bin want fɔ bay tablɛt so dat i go ebul gɛt di JW Laybri^® ap. Ɔlda bin no se di vidio dɛn ɛn ɔda tin dɛn we de na di ap go ɛp am fɔ prich to ɔda pipul dɛn ɛn fɔ stɔdi ɛn ɔndastand di Baybul.

Ɔlda bin de wok ɛvri mɔnin fɔ tu awa fɔ lɛk wan mɔnt ɛn af, fɔ brok ston dɛn we go ebul ful-ɔp wan smɔl trɔk. Faynali, i bin gɛt di mɔni fɔ bay di tablɛt.

Ɔlda tɔk se “pan ɔl we a bin taya ɛn a gɛt pen dɛn ɔlsay na mi bɔdi bikɔs a bin de brok ston dɛn, a fɔgɛt kwik kwik wan bɔt dɛn tin dɛn de we a stat fɔ yuz mi nyu tablɛt. I de ɛp mi fɔ du di prichin wok fayn fayn wan ɛn fɔ pripia fɔ Kristian mitin dɛn simpul wan.” I tɔk bak se di tablɛt bin ɛp am we di pandɛmik bin jɔs stat, bikɔs i bin de yuz am fɔ kɔnɛkt fɔ kɔngrigeshɔn mitin dɛn ɛn fɔ du di prichin wok. Wi gladi fɔ Ɔlda bikɔs i bin ebul fɔ rich in gol.