Wetin Mek Tru Kristian dɛn Nɔ De Yuz di Krɔs we Dɛn De Wɔship Gɔd?

BƆKU pipul dɛn lɛk di krɔs, ɛn na so dɛn rɛspɛkt am. Wan buk we dɛn kɔl The Encyclopædia Britannica, bin tɔk se di krɔs na “impɔtant tin na Kristian rilijɔn.” Bɔt tru Kristian dɛn nɔ de yuz di krɔs we dɛn de wɔship. Wetin mek?

Wan impɔtant rizin na bikɔs Jizɔs Krays nɔ day pan krɔs. Di Grik wɔd we pipul dɛn de translet as “krɔs” na starɔs. I min “stret stik ɔ pol.” The Companion Bible tɔk se: “[Starɔs] nɔ ɛva min tu pol we krɔs pan dɛnsɛf . . . No Grik wɔd nɔ de insay di [Nyu Tɛstamɛnt] we min tu pol dɛn.”

Insay bɔku skripchɔ dɛn, di wan dɛn we rayt di Baybul, yuz ɔda wɔd fɔ tɔk bɔt di tin we Jizɔs day pan. Dɛn yuz wan Grik wɔd we dɛn kɔl zaylɔn. Dis wɔd min “bod” ɔ “stik ɔ wud.”

Wan buk we dɛn kɔl The Cross and the Crucifixion, bin tɔk se: “Tik dɛn nɔ bin de na ɔl di ples dɛn we dɛn bin de kil di wan dɛn we brok lɔ. So dɛn kin jɔs dig di grɔn ɛn put wan stik insay de. Na pan dis stik ya dɛn bin de ɛng di pipul dɛn. Dɛn bin de es dɛn an dɛn ɔp ɛn nel ɔ tay dɛn. Ɛn dɛn bin de nel ɔ tay dɛn fut dɛn.” (Das Kreuz und die Kreuzigung)

Na Gɔd in Wɔd gi di bɛst rizin we mek tru Kristian dɛn nɔ de yuz di krɔs fɔ wɔship. Di apɔsul Pɔl bin se: “Krays pul wi pan di swɛ we di lɔ bin dɔn swɛ wi we i tek di swɛ fɔ wi, bikɔs dɛn bin dɔn rayt se: ‘Ɛnibɔdi we dɛn ɛng pan stik gɛt swɛ.’” (Lɛta Fɔ Galeshya 3:​13, NW) Insay dis vas, Pɔl tɔk wetin dɛn bin rayt na Dyutɔrɔnɔmi 21:​22, 23. Na stik dɛn tɔk bɔt insay da skripchɔ de, nɔto krɔs dɛn tɔk bɔt. So if na stik dɛn bin de yuz fɔ kil pipul dɛn we “gɛt swɛ,” yu tink se i fayn fɔ mek Kristian dɛn put di wan we dɛn kil Jizɔs pan, na dɛn os?

Fɔ di fɔs 300 ia afta Jizɔs day, natin nɔ de fɔ sho se di wan dɛn we na bin Kristian bin de yuz di krɔs we dɛn bin de wɔship. Bɔt afta we Jizɔs dɔn day fɔ lɛk 400 ia so, wan Kiŋ we na pegan, bin tɔn Kristian. Dis kiŋ ya bin nem Kɔnstantayn. Na Kɔnstantayn mek Kristian dɛn bigin yuz di krɔs. Wi nɔ no wetin mek Kɔnstantayn bin du dis, bɔt di krɔs nɔ gɛt natin fɔ du wit Jizɔs Krays. Infakt, di krɔs na sɔntin we kɔmɔt insay lay lay rilijɔn. Wan buk we dɛn kɔl di New Catholic Encyclopedia bin tɔk se: “Pipul dɛn we bin de bifo di tɛm we Kristian rilijɔn bigin, bin de yuz di krɔs ɛn di wan dɛnsɛf we nɔto Kristian bin de yuz am.” Ɔda pipul dɛn tɔk se di wan dɛn we bin de yuz di krɔs na pipul dɛn we bin de wɔship tin dɛn we nɔ gɛt layf ɛn we bin de du mami ɛn dadi biznɛs we dɛn de wɔship lay lay gɔd dɛn.

So, wetin mek Kristian dɛn bigin yuz di krɔs? Na fɔ mek i nɔ at fɔ lɛ pipul dɛn we na pegan, tɔn “Kristian.” Bɔt di Baybul tɔk klia wan se i nɔ fayn fɔ wɔship ɛnitin we dɛn de yuz na lay lay rilijɔn. (Sɛkɛn Lɛta Fɔ Kɔrint 6:​14-18) Di Baybul tɔk bak se wi nɔ fɔ put an pan ɛnitin we na aydɔl. (Ɛksodɔs 20:​4, 5; Fɔs Lɛta Fɔ Kɔrint 10:​14) So, na ɔl dis mek tru Kristian dɛn nɔ de yuz krɔs fɔ wɔship Gɔd.a