Usay Wi De Go We Wi Day?

1-3. Us kwɛstyɔn dɛn we pipul dɛn kin aks bɔt day? Aw sɔm rilijɔn dɛn dɔn ansa dɛn?

DI Baybul prɔmis wi se tɛm go kam we mɔtalman “nɔ go day igen.” (Rɛvɛleshɔn 21:​4) Insay Chapta 5, wi bin lan se na Jizɔs in sakrifays mek am pɔsibul fɔ mek wi go gɛt layf we go de sote go. Bɔt pipul dɛn stil de day. (Ɛkliziastis 9:​5) So wan pan di big kwɛstyɔn dɛn we wi kin aks na, Wetin de apin to wi we wi day?

² Di ansa we wi go gɛt fɔ da kwɛstyɔn de rili impɔtant we pɔsin we wi lɛk day. Wi kin wɔnda: ‘Usay i dɔn go? I de wach wi? I go ebul ɛp wi? Wi go ɛva si am igen?’

³ Rilijɔn dɛn dɔn ansa dɛn kwɛstyɔn dɛn ya difrɛn we dɛn. Sɔm rilijɔn dɛn de tich se if yu na gud pɔsin, yu de go na ɛvin ɛn if yu na bad pɔsin, yu go bɔn na ɛlfaya. Sɔm rilijɔn dɛn se we yu day yu go tɔn to spirit ɛn liv wit yu fambul dɛn we bin dɔn day. Ɛn ɔda rilijɔn dɛn se afta we yu dɔn day ɛn dɛn dɔn jɔj yu, dɛn go bɔn yu bak, ɔ yu go gɛt layf bak wit difrɛn bɔdi, sɔntɛm as ɔda pɔsin ɔ ivin as animal.

4. Wetin na di men tin we bɔku rilijɔn dɛn de tich bɔt day?

⁴ I tan lɛk se di rilijɔn dɛn de tich difrɛn tin dɛn. Bɔt na wan men tin bɔku pan dɛn de tich. Dɛn de tich se we mɔtalman day, i gɛt pat pan am we go kɔntinyu fɔ liv. Yu tink se dat na tru?

USAY WI DE GO WE WI DAY?

5, 6. Wetin kin apin to pɔsin we i day?

⁵ Jiova no wetin kin apin to wi we wi day, ɛn i dɔn tɛl wi se we pɔsin day, in layf dɔn dɔn. Day na we pɔsin nɔ gɛt layf. So we pɔsin day, i nɔ de fil ɛn mɛmba ɛnitin igen, ɛn i nɔ go kɔntinyu fɔ liv ɛni ɔdasay.a We pɔsin day, i nɔ de si, i nɔ de yɛri, ɛn i nɔ de tink igen.

⁶ Kiŋ Sɔlɔmɔn bin rayt se “dayman nɔ . . . no natin.” Di wan dɛn we dɔn day nɔ go ebul lɛk ɔ et pɔsin ɔ sɔntin, ɛn i se di pɔsin ‘nɔ gɛt fɔ wok, tink, ɔ sabi ɛnitin, ɛn sɛns biznɛs nɔ de’ na di Grev. (Rid Ɛkliziastis 9:​5, 6, 10.) Ɛn na Sam 146:​4, di Baybul tɛl wi se we pɔsin day, ɔl in “plan na fɔ natin.”

WETIN JIZƆS BIN TƆK BƆT DAY?

7. Wetin Jizɔs bin se bɔt day?

⁷ We Jizɔs in padi Lazarɔs bin day, i bin tɛl in disaypul dɛn se: “Wi padi, Lazarɔs, ledɔm de slip.” Bɔt Jizɔs nɔ bin min se Lazarɔs de rɛst. Jizɔs bin kɔntinyu fɔ se: “Lazarɔs dɔn day.” (Jɔn 11:​11-14) Jizɔs bin de se day tan lɛk slip. I nɔ bin se Lazarɔs dɔn go na ɛvin ɔ i de wit in fambul dɛn we bin dɔn day. Ɛn i nɔ bin se Lazarɔs de sɔfa na ɛlfaya ɔ dɛn dɔn bɔn am as ɔda pɔsin ɔ as animal. I bin tan lɛk se Lazarɔs bin de pan dip slip. Ɔda skripchɔ dɛn bak tɔk se day tan lɛk dip slip. Fɔ ɛgzampul, wan ɔda tɛm, Jizɔs bin tɔk bɔt pɔsin we dɔn day se, na slip i de slip. Dis bin apin we i bin gi layf bak to wan man in gyal pikin. I tɛl di pipul dɛn se: “Di pikin nɔ day, i jɛs de slip.”—Lyuk 8:​52, 53.

8. Aw wi no se Gɔd nɔ mek mɔtalman fɔ day?

⁸ Yu tink se Gɔd bin mek Adam ɛn Iv so dat dɛn go day as tɛm de go? Nɔ-o! Jiova bin mek dɛn fɔ ɛnjɔy layf sote go wit pafɛkt wɛlbɔdi. We Jiova bin mek mɔtalman, i bin put am insay dɛn at fɔ mek dɛn want fɔ de sote go. (Ɛkliziastis 3:​11, NW) Mama ɛn papa dɛn nɔ want fɔ si dɛn pikin dɛn ol ɛn day, ɛn Jiova sɛf de fil di sem we bɔt wi. Bɔt if Gɔd mek wi fɔ de sote go, wetin mek wi de day?

WETIN MEK WI DE DAY?

9. Wetin mek di lɔ we Jiova bin gi Adam ɛn Iv nɔ bin at fɔ obe?

⁹ Na di gadin we bin de na Idɛn, Jiova bin tɛl Adam se: “Yu kin it di frut dɛn pan ɛni tik na di fam, bɔt yu nɔ fɔ it pan di ‘Sɛns tik,’ bikɔs if yu it pan am da sem de de, yu go day.” (Jɛnɛsis 2:​9, 16, 17) Da lɔ de nɔ bin at fɔ obe, ɛn Jiova bin gɛt di rayt fɔ tɛl Adam ɛn Iv wetin gud ɛn wetin bad. If dɛn bin obe Jiova, dɛn bin fɔ sho am se dɛn rɛspɛkt wetin i tɛl dɛn. Dɛn bin fɔ sho am bak aw dɛn gladi fɔ ɔltin we i bin dɔn gi dɛn.

10, 11. (a) Aw Setan bin ful Adam ɛn Iv? (b) Wetin mek Adam ɛn Iv nɔ bin gɛt ɛni gud rizin fɔ wetin dɛn bin du?

¹⁰ I sɔri fɔ no se Adam ɛn Iv nɔ bin disayd fɔ obe Jiova. Setan bin aks Iv se: “Fɔ tru tru PAPA GƆD tɛl una se, una nɔ fɔ it di frut dɛn pan ɔl di tik dɛn na di fam?” Iv bin ansa se: “Wi kin it frut pan ɛni tik na di fam, pas nɔmɔ pan di wan we de midul di fam. PAPA GƆD bin dɔn tɛl wi se, wi nɔ fɔ it da frut de ɛn nɔ fɔ tɔch am sɛf, if wi du so, wi go day.”—Jɛnɛsis 3:​1-3.

¹¹ Dɔn Setan bin se: “Dat nɔto tru; una nɔ go day. PAPA GƆD bin se so bikɔs i no se if una it am, una yay go opin ɛn una go tan lɛkɛ am; dɔn una go no wetin gud frɔm wetin bad.” (Jɛnɛsis 3:​4-6) Setan bin want Iv fɔ tink se i kin disayd fɔ insɛf wetin gud ɛn wetin bad. Dɔn, i lay bɔt wetin go apin if Iv nɔ obe. Setan bin se Iv nɔ go day, so Iv bin it sɔm pan di frut ɛn gi sɔm to in man. Adam ɛn Iv bin no se Jiova dɔn tɛl dɛn nɔ fɔ it di frut. We dɛn it am, dɛn bin disayd nɔ fɔ obe di klia ɛn simpul lɔ. Ɛn dɛn bin sho se dɛn nɔ rɛspɛkt dɛn Papa we de na ɛvin we lɛk dɛn. Dɛn nɔ gɛt ɛni rizin we mek dɛn nɔ bin obe Gɔd.

12. Wetin mek Jiova bin rili fil bad we Adam and Iv nɔ bin obe am?

¹² Jiova bin rili fil bad we wi fɔs mama ɛn papa dɛn nɔ bin sho wan rɛspɛkt fɔ am! Aw yu go fil if yu wok tranga wan fɔ mɛn yu bɔy pikin ɛn gyal pikin, dɔn dɛn nɔ obe yu ɛn du wetin yu tɛl dɛn nɔ fɔ du? Dat go pwɛl yu at, nɔto so?

13. Wetin Jiova min we i bin se “na dɔti yu go go bak”?

¹³ We Adam ɛn Iv nɔ bin obe, dɛn lɔs di chans fɔ de sote go. Jiova bin tɛl Adam se: “Na dɔti a bin tek mek yu, ɛn na dɔti yu go go bak we yu day.” (Rid Jɛnɛsis 3:​19.) Dat bin min se Adam go tɔn to dɔti bak lɛk se dɛn nɔ wande mek am. (Jɛnɛsis 2:​7) Afta we Adam sin, i bin day ɛn i nɔ kɔntinyu fɔ liv igen.

14. Wetin mek wi de day?

¹⁴ If Adam ɛn Iv bin fɔ obe Gɔd, dɛn fɔ stil de te tide. Bɔt we dɛn nɔ obe am, dɛn bin sin, ɛn as tɛm de go, dɛn bin day. Sin tan lɛk bad bad sik we wi gɛt frɔm wi fɔs mama ɛn papa. Dɛn bɔn wi ɔl as pipul dɛn we gɛt sin, ɛn na dat mek wi de day. (Lɛta Fɔ Rom 5:​12) Bɔt nɔto dat Gɔd bin want fɔ mɔtalman. Gɔd nɔ bin ɛva want mɔtalman fɔ day, ɛn di Baybul kɔl day “ɛnimi.”—Fɔs Lɛta Fɔ Kɔrint 15:​26, NW.

DI TRU GO MEK WI FRI

15. Aw di tru tin bɔt day go mek wi fri?

¹⁵ Di tru tin bɔt day go mek wi fri frɔm bɔku lay lay tichin. Di Baybul se di wan dɛn we dɔn day nɔ de fil pen ɔ fil sɔri. Wi nɔ go ebul fɔ tɔk to dɛn, ɛn dɛnsɛf nɔ go ebul fɔ tɔk to wi. Wi nɔ go ebul ɛp di wan dɛn we dɔn day ɛn dɛnsɛf nɔ go ebul fɔ ɛp wi. Dɛn nɔ ebul fɔ du bad tin to wi, so wi nɔ nid fɔ fred dɛn. Bɔku rilijɔn dɛn de tɛl wi se di wan dɛn we dɔn day de liv ɔdasay, ɛn wi kin ebul fɔ ɛp dɛn if wi pe mɔni to prist dɛn ɔ pipul dɛn we dɛn tink se na oli pipul dɛn. Bɔt we wi no di tru tin bɔt day, dɛn nɔ go ful wi wit dɛn tin ya.

16. Us lay lay tichin we bɔku rilijɔn dɛn de tich bɔt day?

¹⁶ Setan de yuz lay lay rilijɔn dɛn fɔ lay to wi ɛn mek wi tink se di wan dɛn we dɔn day stil de alayf. Fɔ ɛgzampul, sɔm rilijɔn dɛn de tich se we pɔsin day, sɔntin de insay di pɔsin we de kɔntinyu fɔ liv ɔdasay. Na dat yu rilijɔn de tich yu, ɔ na wetin di Baybul se bɔt day i de tich yu? Setan de yuz lay lay tichin dɛn fɔ mek pipul dɛn tɔn dɛn bak pan Jiova.

17. Wetin mek na fityay to Jiova fɔ tink se i go bɔn pipul dɛn na faya?

¹⁷ Bɔku tin dɛn we rilijɔn dɛn de tich kin mek wi sɔprayz. Fɔ ɛgzampul, sɔm rilijɔn dɛn de tich se bad pipul dɛn go bɔn sote go na ɛlfaya. Da kayn lay de na fityay to Jiova. I nɔ go ɛva alaw pipul dɛn fɔ sɔfa da kayn we de! (Rid Jɔn In Fɔs Lɛta 4:​8.) Aw yu go fil bɔt pɔsin we de pɔnish pikin bay we i de bɔn di pikin in an dɛn na faya? Yu go mɔs tink se na pɔsin we rili wikɛd. Yu nɔ go want fɔ ivin no mɔ bɔt am. Na so Setan want wi fɔ fil bɔt Jiova!

18. Wetin mek wi nɔ fɔ fred pɔsin we dɔn day?

¹⁸ Sɔm rilijɔn dɛn se we pipul dɛn day, dɛn de tɔn to spirit dɛn. Dɛn kayn rilijɔn dɛn de, de tich se wi fɔ rɛspɛkt ɛn ivin fred dɛn spirit dɛn de, bikɔs dɛn go bi wi padi ɔ wi ɛnimi dɛn. Bɔku pipul dɛn biliv da lay de. Dɛn de fred pɔsin we dɔn day, so dɛn de wɔship dɛn ɛn lɛf fɔ wɔship Jiova. Mɛmba se di wan dɛn we dɔn day nɔ de fil ɔ no bɔt ɛnitin, so wi nɔ fɔ fred dɛn. Na Jiova mek wi. Na in na di tru Gɔd, ɛn na in nɔmɔ wi fɔ wɔship.—Rɛvɛleshɔn 4:​11.

19. We wi no di tru tin bɔt day, aw dat go ɛp wi?

¹⁹ We wi no di tru tin bɔt day, wi go fri frɔm di lay lay tichin dɛn we bɔku rilijɔn dɛn de tich. Ɛn dis go ɛp wi fɔ ɔndastand di wɔndaful prɔmis dɛn we Jiova dɔn mek bɔt wi layf ɛn tumara bambay.

20. Wetin wi go lan na di nɛks chapta?

²⁰ Trade trade, Gɔd in savant we nem Job bin aks se: “If pɔsin day, i go gɛt layf bak?” (Job 14:​14, NW) Yu tink se i pɔsibul fɔ mek pɔsin we dɔn day gɛt layf bak? Di ansa we Gɔd gi wi na di Baybul de mek wi rili gladi. Wi go lan bɔt dis na di nɛks chapta.