LƐSIN 06
Aw Layf Bin Bigin?
“Na [Gɔd] de gi layf.” (Sam 36:9) Yu biliv dat? Sɔm pipul dɛn tink se nɔto Gɔd mek layf. If dat na tru i min se wi jɔs kam bay chans. Bɔt if na Jiova Gɔd mek layf, yu nɔ tink se i gɛt gud rizin we mek i mek wi?a Lɛ wi tɔk bɔt wetin di Baybul se bɔt aw layf bigin ɛn wetin mek i mek sɛns fɔ biliv se wetin di Baybul tɔk na tru.
1. Usay di wɔl ɛn di sta dɛn kɔmɔt?
Di Baybul se: “Na di biginin Gɔd mek di ɛvin ɛn di wɔl.” (Jɛnɛsis 1:1, NWT) Bɔku sayɛnsman dɛn gri se di wɔl bin gɛt biginin. Bɔt aw Gɔd bin mek am? I bin yuz in oli spirit we na di “pawa we i kin yuz fɔ du wetin i want,” fɔ mek ɔltin na di wɔl; ivin di bɔku bɔku sta dɛn we de na di skay ɛn di planɛt dɛn.—Jɛnɛsis 1:2, NWT.
2. Wetin mek Gɔd mek di wɔl?
Jiova “nɔ mek [di wɔl] fɔ natin, bɔt i mek am fɔ lɛ pipul dɛn de de.” (Ayzaya 45:18, NWT) I mek di wɔl fɔ bi fayn ples usay mɔtalman go de ɛn gɛt ɔl wetin i nid fɔ liv sote go. (Rid Ayzaya 40:28; 42:5.) Sayɛnsman dɛn se di wɔl rili spɛshal ɛn i difrɛn frɔm ɔl ɔda planɛt dɛn. Dɛn nɔ si ɛni ɔda planɛt we gɛt ɔl wetin mɔtalman nid fɔ ebul liv.
3. Wetin mek mɔtalman dɛn difrɛn frɔm animal dɛn?
Afta we Jiova mek di wɔl, i mek tin dɛn we gɛt layf fɔ de de. Fɔs i mek plant ɛn animal dɛn. Afta dat, “Gɔd mek di man lɛk aw insɛf tan.” (Rid Jɛnɛsis 1:27, NWT.) Wetin mek mɔtalman dɛn difrɛn? Bikɔs Gɔd mek wi lɛk aw i tan, na dat mek wi ebul fɔ falamakata in fayn kwaliti dɛn, lɛk fɔ sho lɔv ɛn du tin tret. I mek wi di kayn we bak we wi ebul fɔ lan langwej dɛn, kɔle fayn fayn tin dɛn, ɛn ɛnjɔy myuzik. Ɛn wi nɔ tan lɛk di animal dɛn bikɔs wi ebul fɔ wɔship di Wan we mek wi.
LAN MƆ
Lan mɔ bɔt wetin sho se na Gɔd mek layf ɛn aw di tin dɛn we di Baybul tɔk mek sɛns. Lan wetin di kwaliti dɛn we mɔtalman gɛt de tich wi bɔt Gɔd.
4. Na Gɔd mek layf
Dɛn kin prez mɔtalman we de stɔdi di tin dɛn na di wɔl fɔ mek dɛn yon tin dɛn, so udat fɔ gɛt di prez fɔ di tin dɛn we dɛn de kɔpi frɔm? Ple di VIDIO, dɔn una tɔk bɔt di kwɛstyɔn we de dɔŋ.
Wetin na sɔm tin dɛn we mɔtalman dɔn stɔdi na di wɔl fɔ mek dɛn yon tin dɛn?
Ɛni os we de na pɔsin bil am. Bɔt udat mek ɔl di tin dɛn we de na di wɔl? Rid Ibruz 3:4, dɔn una tɔk bɔt di kwɛstyɔn dɛn we de dɔŋ:
Wetin na sɔm tin dɛn we Gɔd mek we yu rili lɛk?
Yu tink se i mek sɛns fɔ biliv se na pɔsin mek di wan ol wɔl ɛn ɔltin we de insay de? Wetin mek?
Yu bin no?
Yu go ebul fɔ fɛn atikul dɛn ɛn fim dɛn bɔt dis tɔpik na jw.org ɔnda di say we se, “Was It Designed?” ɛn “Viewpoints on the Origin of Life.”
“Na tru se ɛni os we de na pɔsin bil am, bɔt di wan we mek ɔltin na Gɔd”
5. Wi gɛt gud rizin dɛn fɔ biliv se di Baybul kɔrɛkt we i tɔk se na pɔsin mek ɔltin
Insay Jɛnɛsis chapta 1, di Baybul tɔk bɔt aw di wɔl ɛn layf bigin. Yu go biliv wetin di Baybul se, ɔ yu tink se na jɔs lay lay stori? Ple di VIDIO, dɔn una tɔk bɔt di kwɛstyɔn dɛn we de dɔŋ.
Yu tink se di Baybul tich se na insay siks dez we ɛni wan de na 24 awa, Gɔd mek di wɔl ɛn ɔltin we gɛt layf insay de?
Yu tink se i mek sɛns fɔ biliv wetin di Baybul tɔk bɔt di tin dɛn we Gɔd mek? Wetin mek yu tink so? Ɔ wetin mek yu nɔ tink so?
Rid Jɛnɛsis 1:1, NWT, dɔn una tɔk bɔt dis kwɛstyɔn:
Sayɛnsman dɛn se di wan ol wɔl gɛt bigin. Aw wetin dɛn dɔn tɔk gri wit wetin yu jɔs dɔn rid na di Baybul?
Sɔm pipul dɛn de wɔnda if Gɔd yuz ɛvolushɔn fɔ mek layf. Rid Jɛnɛsis 1:21, 25, 27, NWT, dɔn una tɔk bɔt dɛn kwɛstyɔn dɛn ya:
Yu tink se di Baybul de tich se Gɔd mek simpul simpul tin dɛn we chenj to animal ɛn mɔtalman? Ɔ na mek i mek “ɔltin” we gɛt layf fɔ mek dɛn bɔn pikin we tan lɛk dɛnsɛf?
6. Mɔtalman dɛn difrɛn frɔm ɔl di ɔda tin dɛn we Gɔd mek
Wi difrɛn frɔm di animal dɛn we Gɔd mek. Rid Jɛnɛsis 1:26, dɔn una tɔk bɔt dis kwɛstyɔn:
Bikɔs Gɔd mek wi lɛk aw insɛf tan, na dat mek wi ebul fɔ falamakata in kwaliti fɔ sho lɔv ɛn sɔri-at. Wetin yu tink se dat de tɛl wi bɔt Gɔd?
SƆM PIPUL DƐN KIN SE: “Wetin di Baybul tɔk bɔt di tin dɛn we Gɔd mek na lay lay stori.”
Wetin yu tink? Wetin mek?
WETIN YU DƆN LAN?
Na Jiova mek di wan ol wɔl ɛn ɔltin we gɛt layf.
Rivyu
Wetin di Baybul tich bɔt aw di wan ol wɔl bigin?
Yu tink se Gɔd bin mek simpul simpul tin dɛn ɛn mek dɛn chenj to mɔtalman ɛn animal, ɔ na mek i mek dɛn ɔl?
Wetin spɛshal bɔt mɔtalman?
DU MƆ RISACH
Lan bɔt sɔm ɛgzampul dɛn we de sho se pɔsin de we mek ɔltin.
“Wetin Wi Kin Lan Frɔm di Tin dɛn we Gɔd Mek?” (Awek!, Sɛptɛmba 2006)
Lan aw papa go ebul fɔ ɛksplen to in pikin se na Jiova mek ɔltin.
Lan mɔ fɔ si if ɛvolushɔn gri wit wetin di Baybul de tich.
“Na Ɛvolushɔn Gɔd Bin Yuz fɔ Mek Difrɛn Tin dɛn we Gɛt Layf?” (Atikul na di wɛbsayt)
Lan mɔ fɔ si if di bon dɛn we dɛn bin fɛn trade trade ɛn di tɛst dɛn we sayɛnsman dɛn dɔn du de sho se na mek dɛn mek wi ɔ wi jɔs kam bay chans.