Kwɛstyɔn Dɛn We Pipul Dɛn Kin Aks
Di Baybul se dɛn nid lɛk tu witnɛs dɛn fɔ sho se sɔntin rili apin. (Nɔm. 35:30; Dit. 17:6; 19:15; Mat. 18:16; 1 Tim. 5:19) Bɔt akɔdin to di Lɔ, if man rep uman na “ples we nɔ de nia di siti” we i bi se di uman ɛngej ɛn di uman ala, di uman nɔ du mami ɛn dadi biznɛs di we aw Gɔd nɔ want, bɔt di man in du am. Wetin mek di uman inosɛnt ɛn di man gilti, we i bi se pipul dɛn nɔ si we i rep am?
Di tin we de na Ditarɔnɔmi 22:25-27 nɔto fɔ jɔs pruv se di man gilti, bikɔs di man ɔlrɛdi gilti. Di men tin we di lɔ bin de fɔ na fɔ pruv se di uman inosɛnt. Luk di vas dɛn we de rawnd dis skripchɔ.
Di vas dɛn we de bifo dis skripchɔ tɔk bɔt wan man we du mami ɛn dadi biznɛs na “di siti” wit wan uman we dɛn dɔn ɛngej. Dis tin we di man du sho se i dɔn du mami ɛn dadi biznɛs wit ɔda pɔsin in wɛf, bikɔs ɔda pipul dɛn de si dis uman we dɛn dɔn ɛngej as mareduman. We di uman, i inosɛnt ɔ i gilti? ‘I nɔ ala we di man bin wan lidɔn wit am na di siti.’ If i bin ala, pipul dɛn go mɔs dɔn yɛri am ɛn fɛt fɔ am. Bɔt i nɔ ala. Dis min se i gri fɔ mek di man du mami ɛn dadi biznɛs wit am, so dɛn ɔl tu gilti.—Dit. 22:23, 24.
Di Lɔ gi difrɛn ɛgzampul bak: “Bɔt if na kes we di man mit uman we dɔn [ɛngej] na dɛn ples we nɔ de nia siti, grip am ɛn rep am, na di man nɔmɔ dɛn fɔ kil. I se dɛn nɔ fɔ du di uman natin bikɔs, i nɔ du natin we fɔ mek dɛn kil am. Na kes we tan lɛk we pɔsin atak in neba ɛn kil am. Mozis ɛksplen to di Izrɛlayt dɛn se, kes lɛk dat, di [uman] we dɔn [ɛngej] nɔ gɛt blem, bikɔs nɔn siti nɔ bin de nia di ples we di man rep am, ɛn nɔbɔdi nɔ bin de fɔ ɛp am [pan] ɔl we i bin de ala.”—Dit. 22:25-27.
Na ya, dɛn gi di uman di bɛnifit ɔf di dawt. Wetin dis min? Dɛn bin tek am se “nɔbɔdi nɔ bin de fɔ ɛp am [pan] ɔl we i bin de ala.” So i nɔ du mami ɛn dadi biznɛs di we aw Gɔd nɔ want. Bɔt di man gilti fɔ we i rep di uman we ɛngej ɛn du mami ɛn dadi biznɛs wit am di we aw Gɔd nɔ want bikɔs i “grip am” ɛn ledɔm wit am.
So, pan ɔl we di men tin we di lɔ bin de fɔ na fɔ pruv se di uman inosɛnt, di Baybul sho se di man gilti bikɔs i rep di uman ɛn du mami ɛn dadi biznɛs wit am di we aw Gɔd nɔ want. Wi biliv se di jɔj dɛn go dɔn “fɛnɔt gud” ɛn disayd akɔdin to di we aw Gɔd bin dɔn de sho dɛn klia wan.—Dit. 13:14; 17:4; Ɛks. 20:14.