Aw Yu Go De na di Nyu Wɔl?

Di atikul dɛn bifo dis wan dɔn sho se i nɔ go te igen Gɔd go dɔnawe wit di pipul dɛn we nɔ de du wetin i want ɛn wit ɔl di prɔblɛm dɛn. Wi biliv se dis go apin. Wetin mek? Na bikɔs Gɔd in Wɔd, di Baybul, dɔn prɔmis se:

“Di wɔl . . . de dɔn.” —1 JƆN 2:17.

Wi shɔ se pipul dɛn go sev bikɔs dis sem vas tɔk se:

“Di pɔsin we du wetin Gɔd want go de sote go.”

So, if wi want fɔ sev, wi nid fɔ du wetin Gɔd want. Fɔ lɛ wi no wetin Gɔd want, wi nid fɔ no am fɔs.

WE YU “NO” GƆD, YU GO SEV

Pikchɔ Dɛn: 1. Wan nɔs sidɔm na grɔn na wan ɔspitul, i taya ɛn in at pwɛl. 2. I de blo smɔl na di rɛstɔrant na di ɔspitul ɛn notis se in wokmet gladi as i de rid wan magazin. 3. In wokmet de rid wan vas na di Baybul to am ɛn gi am wan jw.org kɔntakt kad.

Jizɔs bin se: “Fɔ gɛt layf we go de sote go, dɛn fɔ no yu, we na di wangren tru Gɔd.” (Jɔn 17:3) Fɔ mek wi sev di tɛm we di wɔl de dɔn ɛn liv sote go, wi nid ‘fɔ no’ Gɔd. Dat nɔ min se wi fɔ jɔs biliv se Gɔd de ɔ no tu-tri tin dɛn bɔt am. Wi nid fɔ bi in padi. If wi want mek wi padi biznɛs wit pɔsin tayt, wi nid fɔ spɛn tɛm wit da pɔsin de. Na di sem tin bak we i kam to wi padi biznɛs wit Gɔd. Lɛ wi tɔk bɔt sɔm tru tin dɛn we wi lan na di Baybul we go ɛp wi fɔ gɛt padi biznɛs wit Gɔd.

Tru Tin dɛn we Wi Lan na di Baybul

Wi lan se Gɔd want lɛ wi de na Paradays.

We i mek di fɔs mɔtalman dɛn we na Adam ɛn Iv, i put dɛn na wan fayn gadin we dɛn kɔl Idɛn. Dɛn bin pafɛkt, ɛn Gɔd bin gi dɛn ɔltin we dɛn nid fɔ lɛ dɛn ɛnjɔy layf ɛn gɛt gladi-at. Dɛn bin fɔ dɔn de sote go. If dɛn bin kɔntinyu fɔ bi Gɔd in padi, dɛn nɔ bin fɔ ɛva day. Bɔt dɛn disayd nɔ fɔ obe wan simpul lɔ we Gɔd gi dɛn.

Wi lan wetin mek wi de sɔfa.

We di fɔs man, Adam, nɔ obe Gɔd, i lɔs di chans we i bin gɛt fɔ de sote go. I bin lɔs da chans de fɔ insɛf ɛn fɔ ɔl mɔtalman. Di Baybul se: “Wan man mek sin kam na di wɔl ɛn sin briŋ day, ɛn ɔlman de day.” (Romans 5:12) Jɔs lɛk aw pɔsin kin gɛt sik frɔm in mama ɛn papa, na so Adam in pikin dɛn ɔl nɔ pafɛkt bikɔs ɔf wetin Adam du. Dat de mek wi de ol ɛn day.

Wi lan wetin Gɔd dɔn ɔlrɛdi du fɔ ɛp wi.

Di Baybul se: “Gɔd rili lɛk di wɔl na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am Gɔd nɔ go dɔnawe wit am, bɔt i go gɛt layf we go de sote go.” (Jɔn 3:16) Gɔd bin sɛn Jizɔs na di wɔl fɔ day fɔ wi. Di tin we Gɔd du fɔ sho se i lɛk wi mek wan Indian man we ol 86 ia ɛn we nem Prabaka se: “I sho se Jiovaa rili lɛk mi. Di lɛk we i lɛk mi dɔn mek a gɛt di op fɔ de sote go.”

Wi lan aw wi kin sho se wi gladi fɔ wetin Gɔd dɔn du fɔ wi.

Di Baybul se wi kin sho se wi gladi fɔ wetin Gɔd dɔn du fɔ wi bay we wi de “obe in lɔ dɛn.” (1 Jɔn 2:3) Jiova Gɔd de sho se i lɛk wi bay we i de sho wi wetin wi kin du fɔ ɛnjɔy wi layf rayt naw. (Ayzaya 48:17, 18) Gɔd nɔ want lɛ wi sɔfa. I prɔmis wi se if wi du wetin i de tɛl wi, wi nɔ go jɔs ɛnjɔy wi layf ɛn gɛt gladi-at naw, bɔt wi go gɛt di chans fɔ de sote go.

RID DI BAYBUL ƐVRIDE

Di nɔs sidɔm na do de luk ɔp na ɛvin afta i dɔn rid di Baybul di tɛm we dɛn gɛt lɔnch brek. — Yu go sev we dis wɔl go dɔn bay we yu de pre to Gɔd fɔ lɛ i ɛp yu ɛn bay we yu de du wetin i want

Wi kin it fud ɔltɛm fɔ lɛ wi kɔntinyu fɔ liv. Bɔt Jizɔs bin se: “Nɔto it nɔmɔ go mek mɔtalman kɔntinyu fɔ liv, bɔt na we i du ɔl wetin Jiova se.”—Matyu 4:4.

Tide, wetin Jiova se de insay in Wɔd, di Baybul. As yu de stɔdi da oli buk de, yu go lan wetin Gɔd dɔn du trade, wetin i de du naw, ɛn wetin i go du tumara bambay.

PRE TO GƆD FƆ LƐ I ƐP YU

Wetin yu go du if yu want fɔ obe Gɔd bɔt i nɔ izi fɔ yu fɔ lɛf fɔ du tin dɛn we i nɔ want? Wan tin we go rili ɛp yu na if yu no Gɔd gud gud wan.

Lɛ wi tɔk bɔt wan uman we wi go kɔl Sakura, we bin de du mami ɛn dadi biznɛs di we aw Gɔd nɔ want. We i bigin fɔ stɔdi di Baybul, i lan bɔt Gɔd in lɔ we se “rɔnawe pan mami ɛn dadi biznɛs di we aw Gɔd nɔ want.” (1 Kɔrintians 6:18) Sakura pre to Gɔd fɔ lɛ i ɛp am, ɛn i bin ebul fɔ lɛf dis bad abit. Bɔt i stil nid fɔ tray tranga wan nɔ fɔ put an pan am igen. I se: “If mami ɛn dadi biznɛs kam na mi maynd, a kin pre to Jiova ɛn tɛl am aw a de fil, bikɔs a no se a nɔ go ebul fɔ kɔntrol misɛf bay mi yon pawa. Prea dɔn ɛp mi fɔ kam nia Jiova mɔ.” Jɔs lɛk Sakura, bɔku bɔku pipul dɛn de lan bɔt Gɔd gud gud wan. I de ɛp dɛn fɔ chenj di we aw dɛn de liv dɛn layf ɛn bigin liv dɛn layf di we aw i want.—Filipians 4:13.

Di mɔ we yu no Gɔd gud gud wan, na di mɔ ‘Gɔd go no yu’ as in padi we i lɛk. (Galeshians 4:9; Di Sam Dɛm 25:14) Dɔn yu go sev we dis wɔl go dɔn ɛn de na Gɔd in nyu wɔl. Bɔt aw da nyu wɔl de go tan lɛk? Di nɛks atikul go tɔk bɔt dat.

a Di Baybul sho se Gɔd in nem na Jiova.