Yu Bin No?
Fɔ se di Roman dɛn bin de gri fɔ lɛ dɛn mek nɔmal bɛrin fɔ pɔsin lɛk Jizɔs, we dɛn bin kil na tik?
BƆKU pipul dɛn sabi di stori na di Baybul we se dɛn bin ɛng tu kriminal dɛn nia Jizɔs we i bin de day na tik. (Mat. 27:35-38) Bɔt sɔm pipul dɛn biliv se di Baybul nɔ kɔrɛkt we i se dɛn bin leta rɛdi Jizɔs in bɔdi ɛn bɛr am na grev.—Mak 15:42-46.
Sɔm pipul dɛn we de tɔk agens di Gɔspɛl nɔ biliv se dɛn bin de mek nɔmal bɛrin fɔ pipul dɛn we dɛn bin de kil na tik, lɛk fɔ bɛr dɛn na grev. Bɔt dɛn biliv se i go mɔs bi se dɛn bin de trit kriminal dɛn difrɛn we. Wan jɔnalist we nem Eriɛl Saba bin rayt sɔntin na di Smithsonian magazin we ɛksplen wetin mek sɔm pan dɛn de tink da we de. I se: “Di pipul dɛn we dɛn bin de krusifay na di wan dɛn we bin bad-ɔf pas ɔlman na sosayti, ɛn sɔm masta sabi bukman dɛn se i nɔ mek sɛns fɔ tink se di Roman dɛn bin de gi dɛn pipul dɛn de di ɔnɔ fɔ gɛt nɔmal bɛrin.” Di Roman dɛn bin rili want fɔ mɔlɛs kriminal dɛn we dɛn bin dɔn kɔndɛm, so bɔku tɛm dɛn bin de lɛf dɛn dedebɔdi na di tik fɔ lɛ wayl animal dɛn kam it am. Afta dat, dɛn bin de trowe di balans pat pan dɛn bɔdi we lɛf insay grev, usay ɔda dedebɔdi dɛn de.
Bɔt pipul dɛn we de stɔdi bɔt aw pipul dɛn bin de du tin trade trade dɔn sho wi sɔntin we difrɛn, mɔ we i kam to di bon bon dɛn we lɛf pan sɔm Ju pipul dɛn we dɛn bin de kil. Insay 1968, dɛn bin fɛn di bon bon we lɛf pan wan man we dɛn bin kil arawnd Jizɔs in tɛm. Dɛn bin fɛn am insay wan Juish famili grev nia Jerusɛlɛm. Di bon bon dɛn bin de insay wan bon bɔks. Wan pan di tin dɛn we dɛn si na in fut in bon. Dɛn bin yuz wan 11.5 sɛntimita (ɔ 4.5 inch) nel fɔ nel di fut pan bod. Saba se: “Di man we bin gɛt di fut bin nem Yɛochanan, ɛn da in bon de dɔn sho di ɛvidɛns we de ɛksplen wetin mek di Gɔspɛl go mɔs kɔrɛkt we i se dɛn bin bɛr Jizɔs na grev.” I impɔtant fɔ no se “Yɛochanan in fut sho se in na pɔsin we dɛn bin krusifay na tik insay Jizɔs in tɛm, ɛn di Roman dɛn bin alaw dɛn fɔ bɛr am di we aw di Ju pipul dɛn kin bɛr pɔsin.”
Akɔdin to wetin Yɛochanan in bon de sho, pipul dɛn stil gɛt difrɛn tin dɛn we dɛn tink bɔt di we aw dɛn nel Jizɔs na di tik. Bɔt di tin we wi ɔndastand klia wan na dat dɛn bin de bɛr sɔm kriminal dɛn we dɛn bin de kil, dɛn nɔ bin jɔs de trowe dɛn bɔdi na grev usay ɔda dedebɔdi dɛn de. So wi dɔn si klia wan se di tin we di Baybul tɔk fɔ se dɛn bin le Jizɔs in bɔdi na grev bin kɔrɛkt. Di ɛvidɛns we dɛn dɔn si de sɔpɔt wetin di Baybul se.
Bɔt di tin we impɔtant mɔ na dat Jiova bin dɔn se dɛn go bɛr Jizɔs na wan jɛntriman in grev, ɛn nɔbɔdi nɔ ebul stɔp Gɔd in Wɔd fɔ kam tru.—Ayz. 53:9; 55:11.