Yu Bin No?

Uskayn chariɔt di Itiopian bigman bin de we Filip go mit am?

DI WƆD we dɛn yuz fɔ “chariɔt” na di Nyu Wɔl Transleshɔn kin min difrɛn chariɔt dɛn. (Akt 8:​28, 29, 38) Bɔt i tan lɛk se di chariɔt we di Itiopian bigman bin de big pas di wan dɛn we dɛn bin de yuz fɔ fɛt wɔ ɛn fɔ rɔn res. Lɛ wi tɔk bɔt sɔm rizin dɛn we mek wi tɔk dat.

Di Itiopian bigman bin travul kɔmɔt fa say. I bin “de wok fɔ di Itiopian dɛn kwin we na Kandesi. Na dis man de in chaj ɔf ɔl di kwin in jɛntri.” (Akt 8:27) Sudan ɛn di sawt pat na Ijipt bin de pat pan Itiopia we bin de trade trade. Pan ɔl we sɔntɛm nɔto di sem chariɔt di Itiopian bigman bin yuz fɔ travul te i rich usay i de go, i go mɔs bi se i bin travul wit bɔku tin dɛn we i nid. Sɔm pan di chariɔt dɛn we pipul dɛn bin de yuz insay di fɔstɛm Kristian dɛn tɛm fɔ travul bin gɛt 4 taya dɛn, ɛn i bin kɔba. Wan buk we nem Acts—An Exegetical Commentary tɔk se, “Dɛn kayn chariɔt dɛn de bin gɛt spes fɔ put lod ɛn ɔda tin dɛn, i bin izi fɔ travul pan, ɛn sɔntɛm dɛn kin yuz am fɔ go fa fa say.”

Di Itiopian bigman bin de rid we Filip go mit am. Di Baybul tɔk se “Filip rɔn go nia di chariɔt, ɛn i yɛri di [Itiopian] man de rid di prɔfɛt Ayzaya in buk lawd wan.” (Akt 8:30) Chariɔt dɛn we dɛn bin de mek fɔ travul nɔ bin de rɔn fast. Na dis mek di Itiopian bigman bin ebul fɔ rid as i de go ɛn fɔ mek Filip ebul rɔn go mit am.

Di Itiopian bigman “beg Filip fɔ kam sidɔm wit am na in chariɔt.” (Akt 8:31) Chariɔt dɛn we dɛn bin de mek fɔ rɔn res nɔ bin de gɛt spes, nain mek di wan dɛn we bin de rayd dɛn kin tinap. Bɔt di wan dɛn we dɛn bin de mek fɔ travul gɛt spes insay, na dat mek di Itiopian bigman ɛn Filip bin ebul sidɔm togɛda.

Bikɔs ɔf wetin Akt chapta 8 tɔk ɛn di tru tin dɛn we istri tɔk, wi pɔblikeshɔn dɛn dis biɛn tɛm de sho pikchɔ dɛn we de sho we di Itiopian bigman de insay chariɔt we big pas di wan dɛn we dɛn bin de yuz fɔ fɛt wɔ ɔ rɔn res.