Isikiɛɛ

37 Okoŋ mi kpaaya Chɛhowa wo tual la choo, nduyɛ mi nyina Chɛhowa wo chua ya mbo kɔ tusi ya o kpoloŋndaŋ tɛɛŋ.+ Paalaŋ la wa la piaa loŋ cha. 2 Mbo tosa mi balu o paala laŋ tɛɛŋ kpou. Mi cha paalaŋ la kuaŋnaŋ kɛ kɛ o kpoloŋ koŋ niŋ. La wa la vesɛi sɛɛŋ.+ 3 Mbo nyuna ya aa: “Po wanachioo, baa paalaŋ ndaŋ la nɔla pa mi la miiŋgu yoomu?” Mi mulul ndu aa: “Chɛhowa, Mɛlɛka Kpuluŋguma Bɛndoo, num sina muli nyunaa hoo ni.”+ 4 Okoŋ mbo dimul la aa: “Dimul paalaŋ ndaŋ aa, ‘Nya paala vesɛilaŋ ndaŋ, la yaŋ nilaŋ o nyɛ Chɛhowa dimi wo:

5 “‘Nyɛ Chɛhowa, Mɛlɛka Kpuluŋguma Bɛndoo dimul paalaŋ ndaŋ ndo cho hoo ni: “I cho tosa mi hueiyii yoomɛi luɛi nya niŋ, nduyɛ mi la miiŋgu yoomu.+ 6 I cho nya nyɛsuaŋ a visioŋ holi holi, mi kumbu nya a kɔloo, mi dɔu nya hueiyii yoomɛi niŋ, okoŋ mi la miiŋgu yoomu. Okoŋ kɔɔli, la cho sina maa ya cho Chɛhowa ni.”’”

7 Mi dimul paalaŋ ndaŋ yooŋgoo mɛɛ o dimul la yɛ. Dimioo nuaa mi chii yooŋgoo dimi, mi tuɛi iwɔkɔ wɔkuɛi bɛnduei paalaŋ ndaŋ tɛɛŋ. Okoŋ, mi paa kɛ kɛ kandu miiŋgoo o fonda ndɔɔ. 8 Mi cha mi nyɛsuaŋ a visioŋ holi holiŋ ndaŋ, nduyɛ mi kɔloo kumbu laŋ kpu. Kɛ laa sɔla wɔ hueiyii yoomaa le.

9 Mbo dimul la aa: “Soo o hueiye lo. Po wanachioo, soo o hueiye lo ma dimul ndi aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Num hueiye, fula o kpeŋguŋ hiɔɔloŋ ma hiŋ, ma hɔŋ wanaa ndaa diu haa wa choo, le halikpeŋ ma miiŋgu yoomu.”’”

10 Mi suaa o hueiye lo a mɛɛ o dimul la yɛ. Mi hueiyii yoomɛi miiŋgu nda niŋ, ma miiŋgu yoomu, okoŋ ma sim o peluŋ ndaŋ choo.+ A wa puaa chɔuwa faŋga bɛndu bɛndoo.

11 Okoŋ mbo dimul la aa: “Po wanachioo, paalaŋ ndaŋ la sim le waŋnda Isɔluɛi kpou ni.+ A cho dimioo aa, ‘Paala naalaŋ la vesa, nduyɛ tiindaŋ bɛɛ ŋ nɔ lɛ le.+ A chii naa tɛɛmbuu.’ 12 Lelaŋ dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Wanaa niaa, I cho sɛila nyalaŋ kuumbuu+ mi soli nya o sɛila laŋ niŋ, nduyɛ mi hiŋ a nya o lɛŋnde Isɔluɛi leŋ niŋ.+ 13 Nya wanaa niaa,+ te I kuumbuu pɛ sɛila nyalaŋ mi soli nya leniŋ, okoŋ la cho sina maa ya cho Chɛhowa ni.”’ 14 ‘I cho nya ke nyina nuu, mi la miiŋgu yoomu,+ okoŋ mi la chal o lɛŋnde nyaleŋ niŋ. La cho sina maa ya Chɛhowa pila soo ni, nduyɛ mi tosa ndi.’ Ya Chɛhowa dimi lende ni.”

15 Mi Chɛhowa suaa vɛlɛ naa ya chua aa: 16 “Num po wanachioo, chua yɔmndo ma poonyiaa lechoo aa, ‘Le Chuda a le waŋnda Isɔluɛi a cho a ndu latulu wa.’*+ Okoŋ ma chua vɛlɛ yɔm cheleŋ ma poonyiaa lechoo aa, ‘Le Choosɛ, yɔm Ifiluem ndo, a le waŋnda Isɔluɛi kpou a cho a ndu latulu wa.’*+ 17 Mɔɔsa ndi naapilɛ, le mi i simnuŋ yɔmndo o pilɛ num o ba.+ 18 Te wanaa numnda* dimul num pɛ aa, ‘Tɛɛsial naa nyɛ sɔɔŋ muŋ sim ndo,’ 19 dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho yɔm Choosɛ wo chua, o cho Ifiluem o ba wo, vɛlɛ a kaalaŋ Isɔluɛi la cho a ndu latulu laŋ, mi mɔɔsa laŋ a yɔm Chuda wo. Okoŋ, mi tosa ma simnuŋ yɔmndo o pilɛ+ ya o ba.”’ 20 Yɔmii ŋ cho keŋ poonyiaa lechoo ve nɔ mi i wa num o ba le ma che ndi.

21 “Dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho Isɔluɛiya soli ba o ba fee o lɛŋii nda kuɛ ve niŋ, mi chuuŋgiaa nda naapilɛ, okoŋ mi hiŋ a nda o lɛŋnde ndaleŋ niŋ.+ 22 I cho tosa ma simnuŋ kaaleŋ le pilɛ o lɛŋndeŋ niŋ,+ o pembuŋ bɛndoŋ choo Isɔluɛi, mi masaa o pilɛ wa nda kpou choo.+ Nduyɛ fɛɛŋ bɛɛ a ve niŋ kaalaŋ la tiɔɔŋ te, kɛlɛŋgaa niŋ te ma piɔuwaŋ ma wa masɛi i ŋiiŋ.+ 23 Fɛɛŋ bɛɛ a nɔɔliaa lɛ niŋ ndapila a piɔmaa ndaa nɔɔlɛiya,* kaala ndala nɔɔlɛilaŋ, vɛlɛ a hakila ndalaŋ kpou le. I cho tosa ma soli balaŋ o sɔɔŋ wɔɔŋ nda tosa woŋ niŋ kpou,+ nduyɛ mi dindi nda. A cho simnɔŋ wanaa niaa, nduyɛ mi ya bɛɛ simnuŋ Mɛlɛka ndaa.+

24 “‘“Deeve buɛi ni cho wa masa ndaa ni,+ nduyɛ nda kpou wana mandaa lasaa o pilɛ nda cho nɔ ni.+ A cho wa nyɛ ya dimul nda wo tolɔɔ kɔɔli, nduyɛ ma diikuŋ sawala nilaŋ nyɛkɛndɛi.+ 25 A cho ichali o lɛŋnde ya ke Chekɔpu buɛi nuu leŋ niŋ, naa finyaa ndaa mamaa wa wa,+ nduyɛ mi nda, chuauwaa* ndaa, a chuauwaa ndaa mamaa+ wa lechoo le fɛɛŋ a fɛɛŋ.+ Deeve buɛi nuu cho wa nda bolleŋ ni le fɛɛŋ a fɛɛŋ.+

26 “‘“I cho kpema kɔl nyuloo yii a nda,+ nduyɛ kpema fafɛɛŋndo o cho wa ni. I cho nda ke lɛŋnde ndaleŋ, mi tosa ma kui tau tau.+ Chiɛi ni diandaa cho nda wa tɛɛŋ le fɛɛŋ a fɛɛŋ. 27 Tɛndii* nuu cho wa a nda latulu, ma wa wanaa niaa, okoŋ mi wa Mɛlɛka ndaa.+ 28 Te I simi pɛ chiɛi ni diandaa Isɔluɛiya tɛɛŋ le fɛɛŋ a fɛɛŋ, waŋnda o lɛŋnde niŋ kpou cho sina maa ya cho Chɛhowa ni, nduyɛ maa ya cho Isɔluɛi dindioo ni.”’”+