Chɔm o kaa numndo niŋ maa a nɔ sinapɛŋgoo. Nyunaŋndɔ aa: ‘Baa mi waŋnda che ya pa maa mi chɔm sinapɛŋgoo, mi chɛl le yɛlɛmiaalaŋ tosaa, nduyɛ mi chɛl kɛɛsiaala acheleŋnda? Ɔɔ baa waŋnda che ya pa maa mi baŋnuŋ o yiyaŋnda nilaŋ choo, I cho ŋuasu ŋuasu ɔɔ wana bolle kalaa? Ɔɔ baa mi yaŋ pa acheleŋnda nilaŋ, nduyɛ mi chɛl kɛɛsiaala ndalaŋ?’ Mɛɛ naŋ chɔm sinapɛŋgoo fau, lende koni naŋ tual tamasi Chɛhowa nda Chiisu wo kɔɔli ni. Ŋ nɔ miŋ chɔm sinapɛŋgoo te sɔɔŋ siŋgaŋ pɛ o yoomu naa niŋ. Siŋgaŋnda laŋ la cho yɛ sɔɔŋ naŋ ve kɔl te woŋ ni. Le tamaseliiyo, o lepilɛ niŋ kpe, miŋ sɔla bahawɛi kɛndiaa kala kalaa. Lepum, mi masaleŋ le siŋga sɔɔŋ o lepilɛ niŋ kpe ɔɔ mi bahawɛi nyɛsɔlaa komal naa. Mi hei tosa mi yoomoo wa o kala a naa. (Ikili. 9:11) Hali siŋgaŋnda komal naa o Chɛhowa piɛiyo niŋndaŋ bɛɛ, mbo wa ikala le laŋ chɛlɔɔ. Ŋ tiuba miŋ sɔla batiuwaa le yɛlɛmiaalaŋ tosaa, te ŋ tol pɛ nɛila hiɔɔlu laŋ ndaŋ kɔɔli: (1) chɛl siŋgaŋ komal numndo, (2) tiindaŋ chilaŋ, (3) handu kɔllo o sɔɔŋ kɛndɔŋ choo, nduyɛ (4) tosa sɔɔŋ mala acheleŋnda woŋ. w23.07 21-22 ¶7-8

Teleŋ Daaniɛɛ wana ndoo suaa le Mɛlɛka wo wa feleŋgɔnɔ wo, mi Babiloniaŋnda bii ndu, ma faŋa ndu o lɛŋnde ndɔleŋ niŋ, okoŋ ma duau ndu o chiɛi manyumndo niŋ. Kɛ mi wanaa wa o chiɛi lemasaa niŋ nda hɛnaŋ a Daaniɛɛ tau tau. Ma cha “o kɔɔ” maa, Daaniɛɛ ndoo naŋ naŋɔɔ lahɔllo vɛlɛ ndoo nɔ taasioo o nyɛ o nyɛ niŋ, nduyɛ maa o yuŋgu lemasaa choo o fula ni. (1 Sam. 16:7) Le hei, ma pɛɛku ndu le mbo wa wallo o chiɛi lemasaa niŋ. (Daan. 1:​3, 4, 6) Chɛhowa ndoo kaala Daaniɛɛ le mɛɛ ndoo chɔm ndu lo lechoo wo yɛ. Nduyɛ pɛŋ, wana che pɛ maa, Daaniɛɛ wa wɔ o wɔsila 20 niŋ, mi Chɛhowa suaa a ndu okɔɔ latulu a Nuuwa vɛlɛ a Choobu. Puaa haa ndaa piɛi niŋ Chɛhowa le wɔsiŋ bɔɔbɔɔ. Hei chɔm maa, mi Chɛhowa cha Daaniɛɛ maa wana sakpoo o wa ni, mɛɛ Nuuwa nda Choobu wa yɛ. (Chɛn. 5:32; 6:​9, 10; Choobu 42:​16, 17; Isi. 14:14) Nduyɛ mbo hiau lachi a Daaniɛɛ kaalaa haaa a yoomu ndɔɔ mɛɛlulaŋ.—Daan. 10:​11, 19. w23.08 2 ¶1-2

Te a wa pɛ kɛɛsiaa le chiɛiyo piondɔɔ, naapum ma mɛɛndiaŋ chiɛi koŋ nyɛkɛndɛi, tuupa ma pendu ndu. Ŋ nɔ miŋ tosa nyɛ pilɛ koŋ kpe te ŋ wa pɛ diomndaŋ veeloo o Baabuiyo niŋ vɛlɛ a ndu pɛɛkoo. Te ŋ chue teleŋndo le diomndaŋ veeloo nyɛkɛndɛi le, “sɔɔŋ taseŋ nda pɛɛku waŋnda a Mɛlɛka okɔɔ woŋ” kinɛi naŋ cho sina ni. (Hibu. 5:12) Kɛ, mɛɛ waŋndo chua nuaa teleŋndo le luɛiyɔɔ o chiɛi bɛndu bɛndoo niŋ le ndu mɛɛndaŋndo yɛ, lende naa bɛɛ nɔ ni miŋ chua teleŋndo le Baabuiyo pɛɛkoo nyɛkɛndɛi, le chɔɔ sɔɔŋ yɛ yɛŋ cho leniŋndoŋ, le halikpeŋ miŋ bii ndu bila. Nɛi sɔvɛ sɔvɛ naŋ pɛɛku Baabuiyo wo cho kindiŋndo le chɔɔ mɛɛ sɔɔŋ yɛ yɛŋ cho leniŋndoŋ chɛlaŋ vellaa velle yɛ ni. Kindiŋ ko le tonyala ŋ laalaŋ ndaŋ biyɔɔ bila le, kɛ kindiŋ ma sina le sabu ŋ laalaŋ ndaŋ ndo. Le miŋ bii Diom Mɛlɛkaa bila nyɛkɛndɛi, ŋ nɔ miŋ pɛɛku tonyala yiŋgoloŋnda cho leniŋndaŋ. Mi kiilanɔɔ Pɔɔl dɛɛniaa puaapiliaa a ndepiliaa nduaa le ma pɛɛku Diom Mɛlɛkaa nyɛkɛndɛi, le halikpeŋ ma “sina pɛŋgu mɛɛ kpɛ tonyaa toŋgu yɛ, mɛɛ o bandu yɛ, mɛɛ o hel lɛ, a mɛɛ o yiŋgila yɛ.” Hei wa nda mala mi laalaŋ ndaa ndoo “luɛi puundoŋ, nduyɛ mbo chal o chiyii kala kalɛi choo.” (Ɛfi. 3:​14-19) Naa bɛɛ nɔ miŋ tosa nyɛ pilɛ koŋ kpe. w23.10 18 ¶1-3