Lutu
3 Mi Nawomi kalalɛi ndɔ dimul ndu aa: “Chua nuu, I nɔ mi nuuvial num pɔnɔɔ*+ le ma wa a kɔl kɛndɛ. 2 Wanayɛi nɛi Bowaa cho ni.+ O ndu lo ŋ wa pɛi wallo ni nya buɛiyaa nduaa laanduaa. Chuɛllɛŋ, o cho wa baliiyoŋ hɛiyo o yasaba. 3 Lelaŋ, kɔ puluŋ ma suiinuŋ chuɛima chuŋ kɛndiaŋ. Okoŋ, ma doviŋ nyɛkɛndɛi,* ma kuɛ o yasaba loŋ. Kɛ te a kuɛ pɛ, tosa mbo keleŋa num chɔ le. Chum ndu fɛŋ mbo chii nyɛdiaa dio a kolɔɔ. 4 Te o kuɛ luaŋ pɛ, wa tofaa le fondaŋ o cho lakɔ ihini wo. Okoŋ ma kuɛ, ma kɔ faŋa ndu kolaa o peloŋ ma hini. O cho num dimul nyɛ ŋ nɔ ma tosa wo.”
5 Mi Lutu muli aa: “Nyɛ o nyɛ ŋ dimul la, I cho tosa.” 6 Okoŋ mbo kua naa nda wa baliiyoŋ lɔɔ wa, mbo kɔ tosa nyɛ o nyɛ kalalɛi ndɔ dimul ndu. 7 Mi Bowaa dia nyɛdiaa mbo kol, nduyɛ mbo sinaŋ nyɛkɛndɛi. Okoŋ, mbo chaŋ mbo kɔ hini o baliŋ nda dii yoŋ ikɛi. Mɛɛ o hini, mi Lutu kua sɔɔsɔɔ mbo kɔ faŋa ndu kolaa o ŋpelu mbo hini. 8 Mɛɛ o yiŋga a ditɛɛŋndo, mbo kandu nyiiyaa. Nduyɛ mɛɛ o muliŋ, mbo cha wana lanɔɔ ndu ihini o peloŋ bɛŋgu. 9 Mbo nyuna aa: “Nɛɛ cho yɛ hoo?” Mi Lutu muli aa: “Lutu ni, buɛi numndo. Yandii kuumbuu ya doma numndo,* kanifuule num nɔ ni ma baŋa ya.”+ 10 Okoŋ mi Bowaa dimi aa: “Maa Chɛhowa dɔu num sala chua nuu. A chɔm kaala lo lechoo wo o i mɛɛlɛi ŋ tosa hei ye niŋ, mbo hiau bɛɛ o tasela ndɔ.+ Kanifuule, a tul puaa feleŋguaa kɔɔli le, o wa wana bala fondo ɔɔ wana sulaa. 11 Lelaŋ, siooŋii wa num te chua nuu. Nyɛ o nyɛ ŋ dimul la le tosaa, I cho tosa.+ Wana o wana cho o chioo hoo niŋ sina maa wana lanɔ sɔviɔɔ ŋ cho ni. 12 I cho tonya maa I nɔ dioo le mi baŋa num,+ kɛ la nɔ wanayɛi kpɛɛluŋnde mbo hiau ya. Nduyɛ, ndu kpeekpei nɔ ni mbo tosa keŋ.+ 13 Lɔl niko naŋ mi paaleŋ le sɛ. Te o chɛl pɛ siɔdii le num baŋaa, o cho suɛi wɔɔŋ te. O baŋa num.+ Kɛ te o kɛɛ pɛ, I mɛnaŋ po o Chɛhowa, Mɛlɛka cho yoomu wo lo maa, I cho num baŋa. Lelaŋ, hini naŋ haaa mi paaleŋ le sɛ.”
14 Mi Lutu hini ndu niko o peloŋ bɛŋgu haaa mi paaleŋ le sia. Mɛɛ paaleŋ le sɛ, mbo pena chɔnɔŋ puŋ yɔŋii wana chɔ ndu. Mi Bowaa dimul ndu aa: “Tosa mi wana sina maa mi wana lanɔɔ huŋ naŋ chɔchɔl te.” 15 Mbo dimi vɛlɛ aa: “Huŋ a doma bɛndu cho num koŋ lekɔɔ wo, ma pɛŋgɛla.” Mbo kua a ndu, mbo kɔ pɛŋgɛla. Mi Bowaa tuu baliiyoŋ le kiloo 25* mbo siiluu ndu. Okoŋ, mi Bowaa kuaŋnuŋ chiee.
16 Mɛɛ Lutu bɛɛ miiŋgu chiee, mi kalalɛi ndɔ kɔ nyuna ndu aa: “Vɛɛ sɔɔŋ wa yɛ a num chua nuu?” Mbo chɔm ndu nyɛ o nyɛ Bowaa tosal ndu. 17 Mbo dimi vɛlɛ aa: “Mbo ke ya baliiyoŋ muŋ le kiloo 25.* Nduyɛ mbo dimi aa, ‘Miiŋgu bala fondo o kalalɛi numndo le.’” 18 Mi Nawomi dimi aa: “Chal nanuŋ chua nuu, ma che mɛɛ suɛi hei cho mɛɛlu yɛ. Po koŋ cho ichali le haaa mi suɛi hei dendu hau.”