Saamiɛɛ Diiŋ Ndɔɔ

21 O boondii Deeve ve niŋ, mi yima bɛnduaŋ+ ma del o lɛŋndeŋ niŋ le wɔsilaŋ la yaa kpulukuu. Le hei, mi Deeve nyuna Chɛhowa a ndi okɔɔ. Mi Chɛhowa dimul ndu aa: “Le mɛɛ Sɔɔ diu Kibiɔnaitiiya yɛ, kooma ndaŋ ma cho ndu a yuŋgu ndɔɔ o lebol.”+ 2 Okoŋ, mi masaa veelu Kibiɔnaitiiya+ mbo suaa o nda lo. (Kɛ o kpeekpei niŋ, Kibiɔnaitiiya ve Isɔluɛiyaa le. Amɔluaitiiyaa+ ndaa lo yoomu wa nda wa ni. Nduyɛ Isɔluɛiya bɛɛ ndaa chii niŋ mɛnaŋ maa, a cho nda nyɛ o nyɛ yɔŋ te.+ Kɛ mi Sɔɔ diu diu nda le mɛɛ ndoo nɔ dialuŋ fulaŋ tau le Isɔluɛiya a waŋnda Chuda malaa yɛ.) 3 Mi Deeve nyuna Kibiɔnaitiiya aa: “Yɛɛnɛ ya tosallɛ nya? Nduyɛ, yɛɛnɛ ya nɔ yɛ mi tosa le mi haki cho naa hoo choo wo faŋaŋ, okoŋ mi la dɔu nyɛm kɛŋ Chɛhowa woŋ sala?” 4 Mi Kibiɔnaitiiya mulul ndu aa: “Suɛi cho naa tɛɛŋ naa Sɔɔ a yuŋgu ndɔɔ ve, kaniŋ humboŋ ɔɔ kooliiyoŋ+ nɔla ndi chii le. Nduyɛ ŋ nɔ di o di le miŋ dii wana o Isɔluɛi niŋ te.” Le hei, mi Deeve dimi aa: “Nyɛ o nyɛ nya dimi pɛ le mi tosal nya, I cho tosa.” 5 Ma dimul masaa aa: “Laŋunɔ ndoo kɛɛsiaa le mi ndoo chii naa kpou o lepula o tanda Isɔluɛiyo niŋndo,+ 6 ke naa puaa nduaa a ŋɔmmɛu. Ŋ cho dialuŋ ndaŋ vilɛiyoŋ landɔɔ*+ Chɛhowa lachi o Sɔɔ lo Kibiya,+ wana Chɛhowa hɛli wo.”+ Mi masaa dimi aa: “I cho nya nda ke.”

7 Kɛ mi masaa tuiinuŋ Mɛfibosiɛɛ,+ po Chonataŋ ndo inyiɛɛ, ndu yɔŋnuŋ maa po mama Sɔɔ wo ni. Kanifuule mi Deeve nda Chonataŋ,+ po Sɔɔ wo yii kpemaa Chɛhowa o hɔl. 8 Okoŋ mi masaa bii Amonai nda Mɛfibosiɛɛ, puaa ŋiɔɔŋaa Luisipa+ nda Sɔɔ velu wa. Nduyɛ Luisipa yɛ, finya ndɔ wa Eya ni. Mbo chua vɛlɛ puaa ŋuɛɛnuaa Makal*+ chua Sɔɔ wo velu nda Adiluɛi wa. Adiluɛi yɛ,+ finya ndɔ wa Baasilai ni, wana waa Mɛhola. 9 Okoŋ mi Deeve mal nda Kibiɔnaitiiya o ba, ma landu dialuŋ ndaŋ vilɛiyoŋ o pembii bɛnduei choo Chɛhowa lachi.+ Mi nda ŋɔmmɛu kpou wu latulu. Nduyɛ, a boondii waŋnda kandu baliiyoŋ kouwɔɔ ve nda diu nda ni. 10 Okoŋ mi Luisipa,+ chua Eya wo chua nyɛla labɛkilaŋ mbo pɛŋgɛla o pouwo choo. Nduyɛ, chɔŋ a teleŋ kuauwaa haaa mi piɔɔ sia dialuŋ muŋ choo, o wa loŋ. O chɛl mi youwaa balu choo choo ipala wa sɔɔŋguu muŋ ikɛi le, ɔɔ mi visiaa yonduaa sɔɔŋguu muŋ ikɛi ichɔl te.

11 Ma dimul Deeve nyɛ lanɔ pɔmbɔ Sɔɔ wo diolaŋ aa Luisipa, chua Eya wo tosa wo. 12 Okoŋ, mi Deeve kua Chabɛsi-kiliaadi+ mbo kɔ bii paala Sɔɔ a paala Chonataŋ po ndɔ laŋ waŋ banaa* o ba. Kanifuule, paale Filitiaŋnda dii Sɔɔ Kibuaa leŋ,+ ma chua dialuŋ ndɔŋ a dialuŋ Chonataŋ po ndɔ woŋ, ma landu muŋ o luŋndo Bɛti-saŋ. Kɛ mi waŋnda Chabɛsi-kiliaadi kɔ chiimbuu dialuŋ ndaŋ. 13 Mbo kɔ chua paala Sɔɔ laŋ a paala Chonataŋ po ndɔ laŋ loŋ. Nduyɛ paala puaa ndaa diu diu wa bɛɛ, ma dii laŋ naapilɛ.+ 14 Ma kɔ kumbu paala Sɔɔ laŋ a paala Chonataŋ po ndɔ laŋ Sɛla,+ o lɛŋnde Bɛŋjamiŋ ndeŋ niŋ, o sɛi Kisi+ finya ndɔ wo niŋ. Mɛɛ nda chii tosa nyɛ o nyɛ masaa dimul nda le tosaa, mi Mɛlɛka yaŋ nilaŋ o piɛile nda wa le lɛŋnde ndaleŋ ndo.+

15 Okoŋ kɔɔli, mi chɔuwo del vɛlɛ Filitiaŋnda tɛɛŋ nda Isɔluɛiya.+ Mi Deeve nda puaa nduaa chɔuwa kɔ sɔŋga a Filitiaŋnda, kɛ mi Deeve saŋga yɔkɔɔ. 16 Po pilɛ wa diolaŋ aa Isiba-binɔbi, fulaa o yuŋgu Luɛfem ndo choo.+ Bal ndɔɔ a chiliŋii siaŋɛi* nda toosiaa ndu ni. Nduyɛ lusul ndɔɔ wa siɛkɛlloŋ 300.*+ Muɛi faŋii sɛnɛiye wa ndu o ba, nduyɛ ndoo yeema mbo dii Deeve. 17 O lepilɛ niŋ kpe mi Abisiaa,+ po Sɛluiya wo sɔɔŋguu le Deeve malaa,+ okoŋ mbo dii Filitiaŋnɔ koŋ. A teleŋ koŋ, mi puaa Deeve wa chuel ndu buŋgɛi ma dimi aa: “A nɔ lɛ ma kuɛ a naa latulu o chɔuwo le,+ yɔŋii ŋ nyumi lambui Isɔluɛiya!”+

18 Okoŋ kɔɔli, mi chɔu cheleŋ del nda vɛlɛ tɛɛŋ nda Filitiaŋnda+ o Kɔɔbi niŋ. A teleŋ koŋ, mi Sibɛkai,+ Husiataitiinɔɔ dii Safi, fulaa o yuŋgu Luɛfem ndo choo.+

19 Mi chɔu cheleŋ del nda vɛlɛ tɛɛŋ nda Filitiaŋnda+ o Kɔɔbi niŋ. Mi Ɛlihanaŋ, po Chaaluɛ-olikim ndo, wana waa Bɛtilɛhɛm dii Koolaya, Kitaitiinɔɔ. Koolaya yɛ, piau bal ndɔɔ wa chelullo maa yɔm nda simbul kola luaa wo.+

20 Mi chɔu cheleŋ del vɛlɛ nda tɛɛŋ Kaati. Po pilɛ wa loŋ, o waŋnuŋ o bɛndu heu. Ba ndɔ kɛ kɛ ndoo nɔ sooŋ ŋɔmpum, nduyɛ pelii kɛ kɛ ndii nɔ sooŋ ŋɔmpum. Kpou kpou, ndoo nɔ sooŋ 24. Ndu bɛɛ o yuŋgu Luɛfem ndo choo ndoo fula ni.+ 21 O wa Isɔluɛiya simullo teleŋ o teleŋ.+ Kɛ mi Chonataŋ, po Simɛi yo,+ bɛndoo Deeve dii ndu.

22 Puaa hiɔɔluaa haa kpou Kaati nda wa ni, fulaa o yuŋgu Luɛfem ndo choo. Kɛ mi Deeve a puaa nduaa chɔuwa diu nda.+