Sɔɔŋ Chɔɔmaŋndoŋ

22 Okoŋ kɔɔli, mbo chɔm ya pee mɛŋma yɔŋgu yoomoo waŋ.+ Ma wa ma diandaa fo fo. Ma wa chɔnɔŋndo o kpeŋgbei* lemasa Mɛlɛkaa a Saa Fɔŋndɔɔ,+ 2 mi ma wa tolɔɔ o nɛi bɛndu cho o chioo hoo niŋndo tɛɛŋ. Yɔmii yɔŋgu yoomoo ve wa o pioo hoo kɔŋgɔlaŋ vellaa velle. Yɔmnde hei, bɛmbɔɔ 12 i kuam o wɔsioo niŋ ni. Ipaŋgu o ipaŋgu, lepilɛ i kuam ni. Nduyɛ pei yɔmnde hei wa le waŋnda o chieeŋndo niŋ kpou siŋgioo.+

3 Sendi ve niŋ chioo hoo choo le. Kpeŋgbei lemasa Mɛlɛkaa a Saa Fɔŋndɔɔ+ cho wa o chioo hoo niŋ. Nduyɛ buɛiyaa nduaa cho wa ndu piɛiyo loŋ. 4 A cho ndu hɔlla chɔ,+ nduyɛ diola ndɔlaŋ la cho wa la poonyiaa nda o ŋtendu.+ 5 Nyumma ve lɛ niŋ loŋ te.+ A heu lɛ niŋ ba le nyɛ teŋgaa lepala, kɛlɛŋgaa lambui le, kanifuule Chɛhowa* Mɛlɛka cho nda nyɛ teŋgaa ke.+ Nduyɛ a cho wa masaa le fɛɛŋ a fɛɛŋ.+

6 Mbo dimul la aa: “Tonya diomndaŋ ndaŋ la cho ni, nduyɛ wana nɔla ma tiindaŋ ndaŋ.+ Chɛhowa* Mɛlɛka, o ke wanaa ndaa suaa le ndu wa yooŋgoo le dimioo wo,+ ndu vem maalikɛinɔ ndɔɔ ni le mbo chɔm buɛi ndɔɔ sɔɔŋ nɔ le hunɔɔ yɔŋnɔŋndo suŋ suŋndoŋ. 7 ‘I cho hunɔɔ chɔ chɔ.+ Wana o wana tosa pɛ sɔɔŋ dimiŋ o yau simbulaa hoo niŋndoŋ, kɔl kɛndɔɔ cho le ndu.’”+

8 Ya Chɔŋ, ya wa sɔɔŋ muŋ chɔɔ a tueiyɔɔ ni. Mɛɛ ya che, mi tuɛi muŋ, mi baŋ wulaŋ le maalikɛinɔ wa ya muŋ chɔmndo wo piɛiyo. 9 Kɛ mbo dimul la aa: “Ɛ ɛ! Tosa keŋ te! Mɛlɛka ŋ nɔ ni ma piɛi! Mɛɛ num, a puaapiliaa num aa suaa le Mɛlɛka wa, a wanaa cho nyɛ dimiŋ o yau simbulaa hoo niŋndo tosaa wa cho chiaa yɛ, lende koni ya bɛɛ cho ni.”+

10 Mbo dimul la vɛlɛ aa: “Sɔɔŋ Mɛlɛka dimi muŋ, miŋ wa ŋ poonyiaa o yau simbulaa hoo niŋndoŋ, viaŋ muŋ te. Kanifuule, teleŋ sɔɔŋ muŋ nɔ le yɔŋnɔŋndo wo cho niŋ kpɛɛluŋ. 11 Wana dɛnɛ wɔɔŋndo hiou lachi a dɛnɛ wɔɔŋ ndɔɔ tosaa, mi wana cho o kaa nɔɔlɛiyo niŋndo hiou lachi a kaa ndɔ nɔɔlɛiyo tosaa. Kɛ wana cho sakpo wo, ndu hiou lachi a waa sakpo, nduyɛ mi wana cho o diandaa o kaala ndɔlaŋ niŋndo hiou lachi a waa o diandaa.

12 “‘I cho hunɔɔ chɔ chɔ, nduyɛ fandaa cho ya o ba. I cho wana o wana paawa* a mɛɛ kuɛila ndɔlaŋ la cho yɛ.+ 13 Ya cho Alifa a Omeka* ni, + wana tasoo a wana mɛɛlaa, kandɔŋndo a mɛɛlulaŋ. 14 Kɔl kɛndɔɔ cho le wanaa tɔɔ domala ndalaŋ nda,+ le halikpeŋ ma sɔla dioo le kɔlaŋ o yɔmii yɔŋgu yoomoo ve.+ Nduyɛ ma kei o diola chioo hoo le luɛiyɔɔ leniŋ.+ 15 Wanaa luei o chioo hoo niŋ te wa cho haa ni: Tuŋnda,* a wanaa luei balaŋ o walta nyinaa wɔɔŋnda niŋnda, a wanaa kaa ihini nɔɔlɛiya,* a wanaa diu diu waŋnda wa, a wanaa sooluu piɔmnda wa, a wana o wana kaala choolaŋ, mbo wa laŋ dimioo.’+

16 “‘Ya Chiisu vem maalikɛinɔ nuu naa nya chua ni, le mbo kɔ chɔm nya sɔɔŋ muŋ o kundalaŋ niŋ. Ya cho puunduleŋ a kulii Deeve ve ni.+ Ya cho luei diandɛi idiiye ni.’”+

17 Nyina diandaa a lanɔ Saa Fɔŋndɔɔ nɔ le chuaa wo+ cho dimioo aa: “Huŋ!” Wana o wana tuei pɛ, o dimi aa, “Huŋ!” Wana o wana kolɔɔ bii pɛ,+ o huŋ bii mɛŋma yɔŋgu yoomoo waŋ o paawa nyɛ o nyɛ le.+

18 “I cho wana o wana tuei sɔɔŋ Mɛlɛka dimi muŋ miŋ wa ŋ poonyiaa o yau simbulaa hoo niŋndoŋ hei dimullo: Wana chɔɔlu pɛ nyɛ o nyɛ o sɔɔŋ muŋ choo,+ Mɛlɛka cho ndu chɔɔlu kpundɛla cho o yau simbulaa hoo niŋndaŋ handɔɔ choo.+ 19 Nduyɛ wana faŋa pɛ nyɛ o nyɛ o yau simbulaa hoo niŋ, Mɛlɛka cho ndu chɛlɔɔ mbo de yɔmii yɔŋgu yoomoo ve le.+ O cho ndu vɛlɛ chɛlɔɔ mbo luɛi o chiee diandaa koŋ niŋ te,+ kɛlɛŋgaa niŋ te mbo sɔla sɔɔŋ cho muŋ ŋ poonyiaa o yau simbulaa hoo niŋndoŋ.

20 “Wana dimi maa sɔɔŋ muŋ cho tonya wo dimi aa: ‘I cho hunɔɔ chɔ chɔ.’”+

“Amiina!* Huŋ, Masanɔɔ Chiisu.”

21 Maa kɛndɛi bɛnduii Masanɔɔ Chiisu ve wa latulu a wanaa diandaa fɔ!