Ɛsodɔɔ

28 “Veelu Elɔŋ+ nda puaa nduaa+ Isɔluɛiya tɛɛŋ, nda cho ni, Nadabi nda Abaihu,+ Ɛlieesa nda Itamaa,+ le ma huŋ wa wanaa soliaa lasalaa le ya.+ 2 Toosial Elɔŋ bɛ num doma wanaa soliaa lasalaa* le mbo naŋ, nduyɛ mbo sɔla bɛɛleŋ.+ 3 Dimul wanaa chaa nyɛ a laba wa kpou, wanaa ya ke taasioo wa,+ le ma toosial Elɔŋ domaa le mbo sɔla dindioo, okoŋ mbo wa wana soliaa lasalaa le ya.

4 “Nyɛla nda nɔ ma toosiaa laŋ la cho laŋ ni: nyɛ nda handuŋ o takpa wo,+ doma biŋgioo,*+ doma bala biŋgioo,+ kola nda lɔ a buŋgaŋ ndo, mɔsillo,+ a kola ipɛŋgɔɔ.+ A nɔ ma toosiaa nyɛlaŋ ndaŋ le Elɔŋ bɛ num nda puaa nduaa, le halikpeŋ ma wa wanaa soliaa lasalaa le ya. 5 Wanaa chaa nyɛ a laba wa nɔ ma soliŋ kɛi velaŋ a kooliiye wo kpeku, kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ.

6 “A nɔ ma toosiaa doma biŋgioo a kooliiye, kɛi buliiyo, kɛi yim yimndo, kɛi siaŋa sɔɔtɔtɔɔ, a fuŋnde kɛndɛ kɛndɛleŋ. Nduyɛ, a nɔ ma hɔu domaa hoo.+ 7 Domaa hoo nɔ mbo nɔ pɛŋgɔŋ o choŋgula tiɔɔŋndaŋ la bɔŋaa vellaa velle, amaluaŋ. 8 Yaule womulaale+ o nɔ mbo yiinuŋ o chaŋ o doma biŋgioo choo le ndu saa nyɛkɛndɛi leŋ bɛɛ, le nɔ mi le wa le toosiaa a kooliiye, kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ.

9 “La nɔ mi la chua pouta ɔnisi laŋ+ la tiɔɔŋ, mi la poonyiaa diola puaa Isɔluɛi velu wa lechoo.+ 10 La poonyiaa diola puaa a ŋɔmpum o pouwo o pilɛ choo, mi la poonyiaa a ŋɔmpum aa tuaa o pouwo o pilɔɔ choo. La poonyiaa nda o lepula a mɛɛ nda velu nda yɛ. 11 Wana cho diola Isɔluɛi puaa nduaa poonyiaa o pouta tiɔɔŋndaŋ choo wo, o nɔ mbo poonyiaa laŋ mɛɛ nda poonyiaa nuaa o kelɛi choo yɛ.+ Okoŋ, mi la wou laŋ o nyɛla nda toosiaa a kooliiye laŋ niŋ. 12 A nɔ ma handu poutaŋ ndaŋ o pɛŋgɛŋ doma biŋgioo choo o choŋgulaŋ, le loonɔŋndo a Isɔluɛi puaa nduaa.+ Okoŋ, mi Elɔŋ handuŋ diola ndalaŋ o lachoŋgu Chɛhowa lachi, le loonɔŋndo a nda. 13 La nɔ mi la toosiaa nyɛlaŋ la tiɔɔŋ a kooliiye, le poutaŋ ndaŋ kɛsioo leniŋ. 14 Nduyɛ mi la toosiaa yɔlɔŋ ŋ muuŋ a kooliiye maa yoole kpeendaa,+ okoŋ mi la baa yuei keŋ o nyɛla ŋkooliila laŋ.+

15 “Dimul wana chaa kolaa hɔwɔɔ wo, mbo bɛɛndiaa yifɔɔ o nyɛ nda handuŋ o takpa wo choo, le yamaŋ Mɛlɛkaŋ sinaa.+ A nɔ ma toosiaa ndu a kooliiye, kɛi buliiyo, kɛi yim yimndo, kɛi siaŋa sɔɔtɔtɔɔ, vɛlɛ a fuŋnde kɛndɛ kɛndɛleŋ+ maa doma biŋgi. 16 Te a tuu ndu pɛ tɛɛŋ, kpeŋguŋ hiɔɔloŋ nɔ miŋ wa kpeŋkpeŋ. Bandii nduɛi a toŋgii nduɛi nɔ mi i wa toŋgu baa le yaa.* 17 La nɔ mi la holi pouta baa kalalaŋ lechoo pulaŋ ma hiɔɔlu. Poutaŋ ndaŋ nya nɔ ni mi la holi o pulale taseleŋ choo: lɔbi, topaasi, a ɛmɔluadi. 18 O pulale diiŋ ndɔ leŋ choo: tɔkuɛɛsi, safaluɛɛ, a chasipaa. 19 O pulale yaa ndɔ leŋ choo: pou lɛsiɛm ndo,* aketi, a amɛtisi. 20 O pulale hiɔɔluleŋ choo: kilisoluɛi, ɔnisi a chadi. La nɔ mi la wou laŋ o nyɛla nda toosiaa a kooliiye laŋ niŋ. 21 Poutaŋ ndaŋ la sim le diola puaa 12 Isɔluɛi velu wa. Diolaŋ ndaŋ la nɔ mi la wa la poonyiaa o poutaŋ ndaŋ choo, mɛɛ nda poonyiaa nuaa o kelɛi choo yɛ. Diola kɛ kɛ sim le kaaleŋ le pilɛ o kaala 12 ndaŋ tɛɛŋ.

22 “La nɔ mi la toosiaa yuei a koolii kɛndɛ kɛndɛi maa yuei kpeendaa,+ le baa o nyɛ wana soliaa lasalaa handuŋ o takpa wo. 23 La nɔ mi la toosiaa kelaŋ ŋ muuŋ a kooliiye, mi la bayiaa muŋ o nyɛ wana soliaa lasalaa handuŋ o takpa wo amaluaŋ o kpeŋguŋ muuŋ ndoŋ. 24 Okoŋ, mi la wou yuei ŋiiŋ nya toosiaa a kooliiye ve o kelaŋ muuŋ cho o kpeŋgoŋ ndoŋ. 25 La nɔ mi la chua sondola tiɔɔŋnda yuei ŋiiŋnde hei, mi la baa ndi o nyɛla ŋkooliila cho o choŋgula doma biŋgioo choo laŋ lachi. 26 La toosiaa kelaŋ ŋ muuŋ a kooliiye, mi la wou muŋ o nyɛ wana soliaa lasalaa handuŋ o takpa wo, o kpeŋguŋ muuŋ ndoŋ lebɛŋgu o doma biŋgioo choo.+ 27 La nɔ vɛlɛ mi la toosiaa kelaŋ ŋ muuŋ a kooliiye o doma biŋgioo choo, naa pɛŋgɛŋ muuŋ ndoŋ o choŋgulaŋ ŋ bɔŋa wa ikɛi, o yaule doma biŋgioo amaluaŋ.+ 28 Yoole bulii leŋ le nɔ ni mi le saa nyɛ wana soliaa lasalaa handuŋ o takpa wo. Nduyɛ, kelaŋ ndɔŋ nɔ miŋ bɔŋa a kelaŋ doma biŋgioo. Yuei hei cho tosa ni, mi nyɛ wana soliaa lasalaa handuŋ o takpa o yaule womulaaleŋ amaluaŋ ndo hini o doma biŋgioo choo.

29 “Teleŋ o teleŋ Elɔŋ wa pɛ luɛiyɔɔ o Fondaŋ Diandaa Chɛhowa lachi, o nɔ mbo chua nyɛ nda poonyiaa diola puaa Isɔluɛi velu wa lechoo wo, mbo handuŋ o takpa le loonɔŋndo. A nyɔɔ hoo o cho wa yamaŋ Mɛlɛkaŋ sinaa ni. 30 La nɔ mi la wou Yuluim a Tumim*+ o nyɛ wana soliaa lasalaa handuŋ o takpa wo niŋ, le yamaŋ Mɛlɛkaŋ sinaa. Nduyɛ te Elɔŋ wa pɛ luɛiyɔɔ Chɛhowa lachi, o nɔ mbo wa ndu o handaa o takpaa. Teleŋ o teleŋ Elɔŋ wa pɛ luɛiyɔɔ Chɛhowa lachi, o nɔ mbo handuŋ nyɛlaŋ ndaŋ o takpa, le yamaŋ Mɛlɛkaŋ sinaa a Isɔluɛiya okɔɔ.

31 “Doma bala biŋgi cho wa o doma biŋgioo bɛŋgu wo, a kɛi buliiyo nya nɔ ni mi la toosiaa ndu kpou.+ 32 Domaa hoo nɔ mbo wa o kumbiaa amaluaŋ le bolleŋ lueiyo, maa doma chɔu. Nduyɛ, wana womulaa nɔ mbo balu domaa hoo sɔndɔɔ chɛ chɛ o bololaŋ, yɔŋii o sɛɛsa. 33 La nɔ mi la toosiaa pɔmɛkilanetiiyaŋ a kɛi buliiyo, kɛi yim yimndo, vɛlɛ a kɛi siaŋa sɔɔtɔtɔɔ o misala domaa hoo balɔɔ chɛ chɛ. Okoŋ kɔɔli, mi la toosiaa bambaŋ a kooliiye mi la bayiaa muŋ o maŋ tɛɛŋ. 34 Te la baa pɛ bambɛi kooliiye i pilɛ, la baa pɔmɛkilanetiileŋ le pilɛ. La lo tosaa lende haaa mi la balu muŋ bayiaa o misala domaa hoo chɛ chɛ. 35 Te Elɔŋ wa pɛ luɛiyɔɔ le wallo tosaa o tɛndiiyo Chɛhowa lachi ɔɔ mbo wa fulaa, domaa hoo nɔ mbo wa ndu lekɔɔ mi bambaŋ wa suɛi, yɔŋii o sɔla piɔmndo.+

36 “La nɔ mi chua koolii kɛndɛ kɛndɛi, mi la toosiaa kpaŋkpaŋndo mbo wa ŋɛlɛŋgi ŋɛlɛŋgi, okoŋ mi la poonyiaa lechoo mɛɛ nda poonyiaa nuaa o kelɛi choo yɛ aa: ‘Le Chɛhowa diondɔɔ cho ni.’+ 37 La nɔ mi la yii ndu a kɛi buliiyo o mɔsillo,+ nduyɛ mbo wa o yiyaa loŋ. 38 O nɔ mbo wa o handaa Elɔŋ o itendu. Nduyɛ te waŋndo benduŋ pɛ a nyɛm diandaa Isɔluɛiya yɔŋgu maa ke woŋ, Elɔŋ tɔɔyaŋ koŋ cho wa choo ni.+ O nɔ mbo wa ndu o itendu le teleŋ o teleŋ, le halikpeŋ mi Chɛhowa hini kɔl a nda.

39 “La nɔ mi la chua fuŋnde kɛndɛ kɛndɛleŋ, mi la lɔ kolaa a buŋgaŋ, okoŋ mi la toosiaa doma vilɛiyo. La lɔɔ mɔsillo a fuŋnde kɛndɛ kɛndɛleŋ, nduyɛ mi la toosiaa kola ipɛŋgɔɔ.+

40 “La toosiaa vɛlɛ domala vilɛilaŋ, kolala ŋpɛŋgɛlaŋ, a mɔsiltaŋ le puaa Elɔŋ nda,+ le ma naŋ nduyɛ ma sɔla bɛɛleŋ.+ 41 Nyɛlaŋ ndaŋ ŋ nɔ ni ma wou Elɔŋ bɛ num nda puaa nduaa latulu. Nduyɛ a nɔ ma pɔya nda,+ ma yulu nda iso,+ ma dindi nda, le ma wa wanaa soliaa lasalaa le ya. 42 La chua vɛlɛ fuŋnde kɛndɛ kɛndɛleŋ mi la toosiaa lɛmbɛla biŋgi laŋ, le ma kumbu dialuŋ ndaŋ lasiɔmboŋ.+ Nduyɛ, lɛmbɛlaŋ ndaŋ la nɔ mi la wa bandei chɔŋ o chaŋnda huŋ o wulaŋ. 43 Te Elɔŋ nda puaa nduaa wa pɛ luɛiyɔɔ o tɛndii bɔŋaŋndo niŋ, ɔɔ ma wa sɔɔŋgoo o bandu luamaa lasalaa ikɛi le wallo tosaa o fondaŋ diandaa, a nɔ ma wounuŋ nyɛlaŋ ndaŋ, yɔŋii nda tosa hakioo, okoŋ ma sɔla piɔmndo. Sawaa hoo cho wa le ndu, a le chuauwaa nduaa mamaa* o ndu kɔɔli le fɛɛŋ a fɛɛŋ.