Daaniɛɛ

9 Wɔsi tase Daaliɔɔ+ po Ahasilɔɔ wo, o fula o pulale Midiaŋnda choo ma siiŋguu ndu masaa le masale Kaadiaŋnda wo,+ 2 wɔsi tase o wa o masaleŋ choo wo, ya Daaniɛɛ, mi saaluŋ o yaulaŋ* niŋ maa Chulusalɛm+ cho lo o tambɛi le wɔsilaŋ 70,+ a mɛɛ Chɛhowa dimul Chɛluimaya wana ndoo suaa le ndu wo yɛ. 3 Okoŋ mi muliŋ o Chɛhowa lo, Mɛlɛka tonyaa, mi wa ndu piɛileŋ, mi bii sumndo,+ mi wounuŋ nyɛla labɛkilaŋ, nduyɛ mi wounuŋ pultaŋ choo. 4 Mi piɛi o Chɛhowa Mɛlɛka nuu lo, mi chɔɔmuu yɔŋnda naala wɔɔŋnda, mi dimi aa:

“Oo Chɛhowa Mɛlɛka tonyaa, a cho o bɛndu, nduyɛ Mɛlɛka waŋnda nɔ ma nɔ siooŋii nduɛi yo ŋ cho ni. Mɛlɛka lo o kpema ndɔɔ choo wo ŋ cho ni. Nduyɛ wanaa kaala num ma wa sawala numndaŋ biyɔɔ wa,+ ma chɔm nda kaala lo lechoo wo.+ 5 Ŋ tosa hakioo, ŋ tosa yɔŋ wɔɔŋndo, ŋ tosa dɛnɛ wɔɔŋndo, nduyɛ miŋ tosal num nilakalulaŋ.+ Ŋ faŋaŋ o sawala numndaŋ choo. 6 Buɛiyaa num aa suaa le numnda,+ a ndaa suaa o diola numndaŋ niŋ o masaa naa lo, laŋgbaa naa kalla, finyaa naa mamaa, a o wana o wana wa o lɛŋnde naaleŋ niŋnda, ŋ yeŋ nda lani le. 7 Oo Chɛhowa, Mɛlɛka sakpoo ŋ cho ni. Kɛ naa waŋnda Chuda, waŋnda Chulusalɛm, a wana o wana cho o Isɔluɛi niŋ, a cho kpɛɛluŋ nda, vɛlɛ a wanaa cho levil ma saŋ nda o lɛŋii cheleŋnde niŋ le mɛɛ naŋ kɛɛ lo lechoo wo chɔmndo o numndo yɛ, siɔmbulaŋ la cho le naa ni, a mɛɛ i cho hau nuaa yɛ.+

8 “Oo Chɛhowa, naa ni, masaa naa ni, laŋgbaa naa kalla ni, finyaa naa mamaa ni, siɔmbulaŋ la cho le naa ni, le mɛɛ naŋ tosa hakioo a num yɛ. 9 Chɛhowa Mɛlɛka naa, Mɛlɛka mal haki nduyɛ mbo tuiinuŋ wana inyiɛɛyo ŋ cho ni.+ Kɛ miŋ tosal num nilakalulaŋ.+ 10 Oo Chɛhowa Mɛlɛka naa, ŋ diikuŋ num te. Nduyɛ sawala ŋ ke naa sanaa a buɛiyaa num aa suaa le numnda laŋ, ŋ tul taŋ kɔɔli le.+ 11 Isɔluɛiya kpou mulul sawala numndaŋ kɔɔ, nduyɛ a diikuŋ num te. Le hei, ma tusi naa sendila cho la poonyiaa o yau laSawa Muuse wo niŋndaŋ choo, buɛi Mɛlɛka tonyaa.+ Kanifuule, ŋ tosa hakioo a num. 12 Ma tosa nyɛ o nyɛ ŋ dimi a naa okɔɔ vɛlɛ a masaa naa,* nduyɛ mi hei chuu naa kpundɛ bɛndoo.+ Nyɛ yɔŋnuŋ a Chulusalɛm ndo yɔŋnuŋ ndɔ ba o ba o chieeŋndo choo le.+ 13 Mi kpundɛlaŋ ndaŋ la tual naa choo kpou a mɛɛ i cho i poonyiaa o Sawala Muuse laŋ niŋ yɛ.+ Kɛ a koŋ kpou, ŋ mel yɔŋnda naala wɔɔŋndaŋ, miŋ muliŋ o Chɛhowa Mɛlɛka naa lo le.+ Ŋ nyɔɔlu ndu le mbo tuiinuŋ naa inyiɛɛ ɔɔ miŋ kindiŋ le tonya ndɔɔ sinaa le.

14 “Mi Chɛhowa hiau lachi a tofaa nduyɛ mbo tusi naa nyɛpalaa choo, kanifuule Chɛhowa Mɛlɛka naa cho sakpo o nyɛ o nyɛ niŋ. Kɛ a koŋ kpou, ŋ diikuŋ ndu le.+

15 “Lelaŋ Oo Chɛhowa Mɛlɛka naa, num soli wanaa numnda o lɛŋnde Ichipi leŋ niŋ a ba num kpaaya bɛndoo ni,+ ma tosa mi diola numndaŋ la fula tɔɔ haaa a paale hauleŋ ndeŋ.+ Ŋ tosa hakioo a num, nduyɛ miŋ tosa sɔɔŋ dɛnɛ wɔɔŋndoŋ. 16 Oo Chɛhowa, o sakpoyɛi choo ŋ tosa walta numndaŋ kpou ni.+ Lelaŋ yandii, tosa mi tumbe ŋ dɔɔnuŋ o kala kala a Chulusalɛm ndo, naa pembii num ii diandɛi bɛnduei cho wa o pɔlul. Kanifuule, Chulusalɛm a wanaa numnda simnuŋ wanaa wɔɔŋ wanaa balu naa wa tɛɛŋ kpou le hakila naalaŋ a hakila finyaa naa mamaa.+ 17 Lelaŋ Mɛlɛka naa, tuei piɛile buɛi numndo, vɛlɛ a nyɔɔlu o cho numndo. Yandii Chɛhowa, tosa sɔɔŋ kɛndɔŋ le fondaŋ num diandaa+ cho o tambɛiyo wo,+ le mi diola numndaŋ la fula tɔɔ. 18 Oo Mɛlɛka naa, yaŋ nilaŋ ma tuei! Tofa ma che saŋga bɛndu naŋ cho niŋndo, vɛlɛ a mɛɛ chiee diandaa diola numndaŋ la cho hoo choo wo tambu yɛ. Ŋ cho num nyɔɔloo, o cho le mɛɛ naŋ cho sakpo yɛ le, kɛ le mɛɛ ŋ cho Mɛlɛka chɔm nyiɛɛyii bɛnduei yo yɛ.+ 19 Oo Chɛhowa, tuei naa diom. Oo Chɛhowa, mal naa haki.+ Oo Chɛhowa, mulul naa hɔlla ma tosa isɔɔ. Oo Mɛlɛka nuu, le sabu numndo, duaunuŋ tamala le. Kanifuule, diola numndaŋ la cho chiee numndo choo a wanaa numnda.”+

20 I lo suɛi lende a piɛileŋ, I wa yɔŋ ni wɔɔŋndo chɔɔmuuwo a yɔŋnda wɔɔŋnda wanaa niaa Isɔluɛi, mi wa Chɛhowa Mɛlɛka nuu nyunaa le mbo tuiinuŋ naa inyiɛɛ le pembii nduɛi diandɛi,+ 21 a tonya, I lo suɛi lende o piɛileŋ niŋ, mi Keebilɛɛ,+ wana ya che o yilaŋii tasei niŋndo+ huŋ naa ya chua boondii ya wa o yɔkpɛi tau tau ve, a teleŋ nda soli sala ichɔllo wo. 22 Mbo mala ya mi bii sɔɔŋ bila. Mbo dimi aa:

“Oo Daaniɛɛ, I hiŋ niko le mi ke num sinapɛŋgoo, nduyɛ ma bii sɔɔŋ bila. 23 Mɛɛ ŋ kandu piɛileŋ, mi sɔla yooŋgoo fulaa Mɛlɛka o ba, nduyɛ I hiŋ le mi dimul num ndu. Kanifuule, wana sɔvɛ sɔviɔɔ ŋ cho ni.+ Lelaŋ yaŋ nilaŋ yekeŋ le ma bii yilaŋnde hei bila.

24 “Lɔɔlaŋ 70* la kɛɛsiaŋ ni le wanaa numnda a chiee num diandaa,+ le halikpeŋ mi yɔŋ wɔɔŋndo mɛɛlu, mi hakioo chuu,+ mi sala malɔɔ lahakioo soliŋ,+ mi sakpoyɛi fɛɛŋ a fɛɛŋnde hiŋ,+ mi huuluei* a yilaŋnde hei kindaŋ mi tamasioo handuŋ lechoo,+ nduyɛ mi Wana Diandaa Hiou Wanaa Diandaa Wo* sɔla pɔyaŋndo. 25 A nɔ ma sina nduyɛ ma bii bila maa chɔŋ a teleŋ nda cho diomndeŋ yɔŋ le Chulusalɛm miŋgioo taŋgullo wo+ haaa kɔ bii a teleŋ Mɛsayanɔɔ,*+ o cho Simlachinɔɔ wo+ cho hunɔɔ wo, lɔɔlaŋ la cho hiouwɔɔ la 7, vɛlɛ a lɔɔlaŋ 62.+ Chulusalɛm cho miiŋgu taŋgulɔŋ, mbo nɔ luŋndo fɛkɛi le wana o wana, vɛlɛ a sooŋndo ndu o balaa silɔ. Kɛ a teleŋ nyɛkindilaa hei cho yɔŋnɔŋ ni.

26 “Te lɔɔla 62 ndaŋ la chuu pɛ, a cho Mɛsayanɔɔ diyɔɔ,+ o mɛi niŋ nyɛ o nyɛ le.+

“Simlachinɔ cho hunɔɔ wo, wanaa nduaa cho chioo hoo tɛɛmbuu vɛlɛ a fondaŋ diandaa.+ Nduyɛ, mɛɛlula ndɔlaŋ la wa niŋ naŋ chaa mɛŋma koŋgi bɛnduaŋ ni. Haaa mi mɛɛlula ndɔlaŋ la fuuluu, chɔuwo cho wa. Nyɛ kɛɛsiaŋ le ndu wo cho tambei ni.+

27 “O cho lo o kpema yiinuŋ le wanaa bɔɔbɔɔ wo choo le lɔɔ o pilɛ. Nduyɛ te lɔɔ koŋ piɔunuŋ pɛ tɛɛŋ, o cho tosa mi salalaŋ a salala cheleŋnda nda yɔŋgu laŋ la mɛɛlu.+

“Wana tɛɛmbuu nyɔɔŋ ndo cho wa o kumbaŋ nyɛm nɔɔlɛiyoŋ choo.+ Nduyɛ haaa mi teleŋ kɛɛsiaŋ le ndu wo fuuluu, nyɛ kɛɛsiaŋ le fondaŋ cho o tambɛiyo wo cho wa ndu choo.”