Chɔɔchiaa
13 Okoŋ, mi Isɔluɛiya tosa vɛlɛ nyɛ bɛnda Chɛhowa o hɔl te wo.+ Nduyɛ, mi Chɛhowa mal nda Filitiaŋnda+ o ba le wɔsilaŋ 40.
2 A boondii keŋ, po pilɛ wa Soluaa,+ fulaa o yuŋgu Daŋ ndo choo,+ diola ndɔlaŋ aa Manowa.+ Nduyɛ, laa ndɔ ndoo vilu le.+ 3 A teleŋ pilɛ, mi maalikɛinɔ Chɛhowa wo fula lanɔɔ Manowa o hɔl. Mbo dimul ndu aa: “Mi che bɛɛ a vilu le, kɛ a cho hunɔɔ folioo* chua, okoŋ ma velu poo.+ 4 Lelaŋ, a nɔ ma wa yekeŋ. A nɔ ma kol mamuɛi o mamuɛi* le.+ Nduyɛ, nyɛ o nyɛ cho nyɛ nɔɔlɛi, a nɔ ma de ndu le.+ 5 A cho hunɔɔ folioo chua ma velu poo. Nduyɛ, la nɔ mi la sendi ndu le,+ kanifuule chɔŋ a violɔŋ ndɔɔ, Naasiluɛinɔ Mɛlɛkaa poombɔɔ hoo cho wa ni. Nduyɛ, ndu cho lasisi Isɔluɛiya lachi ni le nda piŋioo Filitiaŋnda o ba.”+
6 Okoŋ kɔɔli, mbo kɔ dimul pɔnɔ ndɔ aa: “Mi wana Mɛlɛkaa tonyaa huŋ o ya lo. Wana aa che ndu pɛ aa maalikɛinɔ Mɛlɛka tonyaa ni. O wa bɔɔ wana kɔndɔfili bɛndu. Kɛ, I nyuna ndu le naa o chɛŋ nda le, nduyɛ ndu bɛɛ chɔm ya diola ndɔlaŋ te.+ 7 Kɛ mbo dimul la aa, ‘A cho hunɔɔ folioo chua ma velu poo. Lelaŋ, a nɔ ma kol mamuɛi o mamuɛi le. Nduyɛ, nyɛ o nyɛ cho nyɛ nɔɔlɛi, a nɔ ma de ndu le, kanifuule chɔŋ a violɔŋ ndɔɔ haaa a paale o cho wu leŋ, Naasiluɛinɔ Mɛlɛkaa poombɔɔ hoo cho wa ni.’”
8 Mi Manowa nyɔɔlu Chɛhowa aa: “Yandii Chɛhowa, tosa mi buɛi num ŋ laŋga viom ndo miiŋgu nanuŋ, mbo chɔm naa nyɛ naŋ nɔ miŋ tosa a poombɔ nɔ le violɔŋndo wo.” 9 Okoŋ, mi Mɛlɛka tonyaa yaŋ Manowa nilaŋ, nduyɛ mi maalikɛinɔɔ miiŋgu vɛlɛ o chuaa lo. O wa ichali chiee lekɔɔ, nduyɛ Manowa pɔnɔ ndɔ ve ndu ikɛi le. 10 Mi chuaa nyaanuŋ chɔ chɔ o pɔnɔ ndɔ lo, mbo dimul ndu aa: “Laŋunɔ hiŋ pɛi o ya lo wo hiŋ vɛlɛ.”+
11 Okoŋ mi Manowa chaŋ ma kua nda laa ndɔ o poo lo. Mbo nyuna ndu aa: “Baa num cho po soo pɛi o laa nuu lo wo ni?” Mbo muli aa: “Ei. Ya ni.” 12 Mi Manowa dimi aa: “Maa nyɛ ŋ dimi wo yɔŋnuŋ fɔ! Kɛ vɛɛ yoomu poombɔɔ hoo cho yɛ wa, nduyɛ wali yɛɛ o cho yɛ wa tosaa?”+ 13 Mi maalikɛinɔ Chɛhowa wo dimul Manowa aa: “Nyɛ o nyɛ ya dimul laa num maa o tosa le, o nɔ mbo tosa ndu le.+ 14 O nɔ mbo de nyɛ o nyɛ nda toosiaa a kilepiiyaŋ ndo le. O nɔ mbo kol mamuɛi o mamuɛi* le.+ Nduyɛ, nyɛ o nyɛ cho nyɛ nɔɔlɛi,+ o nɔ mbo de ndu le. Nyɛ o nyɛ ya dimul ndu maa o tosa le, o nɔ mbo tosa ndu le.”
15 Mi Manowa dimul maalikɛinɔ Chɛhowa wo aa: “Yandii kua wɔ le. Chum ndɔ miŋ bɛɛndial num chuiŋ fɔŋndɔɔ ma de.”+ 16 Kɛ mi maalikɛinɔ Chɛhowa wo dimul Manowa aa: “O yɔŋ bɛɛ mi chum, I cho nyɛdiaa numndo dio le. Kɛ te a yeema pɛ, a soli ndu sala luamaa o Chɛhowa lo.” Manowa ndoo sina maa maalikɛinɔ Chɛhowa wo le wa koŋ te. 17 Okoŋ, mi Manowa dimul maalikɛinɔ Chɛhowa wo aa: “Chɔm naa diola numndaŋ,+ le miŋ ke num bɛɛleŋ te nyɛ ŋ dimi wo yɔŋnuŋ pɛ.” 18 Kɛ, mi maalikɛinɔ Chɛhowa wo nyuna ndu aa: “Le yɛɛnɛ ŋ yeema yɛ ma sina diola nilaŋ? Numpila cho chɔɔ maa diola kɔndɔfiltaŋ la cho ni.”
19 Okoŋ, mi Manowa chua chuiŋ fɔŋndɔ koŋ a sala ŋkullo, mbo soli salaa o pouwo choo le Chɛhowa. Nduyɛ, Mɛlɛka wa suɛi kɔndɔfille tosaa, mi Manowa nda laa ndɔ wa tofaa. 20 Mɛɛ yiŋndeŋ le wa chɔnɔŋndo o bandu luamaa lasalaa mi le wa helɔɔ, Manowa nda laa ndɔ wa tofaa, mi maalikɛinɔ Chɛhowa wo luɛi o yiŋnde leŋ niŋ, mbo helnuŋ choo choo. O lepilɛ niŋ kpe, ma hini lɛŋ a hɔlla a kuumbaa kpu. 21 Maalikɛinɔ Chɛhowa wo fula lɛ Manowa nda laa ndɔ o hɔl te. Okoŋ, mi Manowa sina niko kɛsɛ maa maalikɛinɔ Chɛhowa wo wa koŋ ni.+ 22 Mi Manowa dimul laa ndɔ aa: “Mbɔ naŋ hiŋ wu fɔ, kanifuule ŋ che Mɛlɛka.”+ 23 Kɛ mi laa ndɔ dimul ndu aa: “Te Chɛhowa ndoo yeema naa pɛ diyɔɔ, o ve chɛlɔɔ sala naa luamaa+ a sala ŋkullo le. Sɔɔŋ o chɔm naa muŋ ndoŋ kpou, o ve naa muŋ chɔm te, nduyɛ o ve naa muŋ dimul te.”
24 Okoŋ kɔɔli, mi lanɔɔ Manowa vialu poo, ma ke ndu diolaŋ aa Samsiŋ.+ Mɛɛ poombɔɔ wa hindɔɔ fau, lende koni Chɛhowa wa ndu salaa dɔwɔɔ ni. 25 Mɛɛ teleŋ tiŋ hiou, mi nyina Chɛhowa wo kandu wallo a ndu+ o Mahanɛ-daŋ niŋ,+ Soluaa nda Ɛsitawɔɔ tɛɛŋ.+