Kɔliŋtiaŋ Tasoo
5 I cho tueiyɔɔ maa kaa ihini nɔɔlɛiyo*+ cho tosaŋndo nya tɛɛŋ. Wanaa cho bɛɛ Mɛlɛka piɛi le wa, a tosa kaa ihini nɔɔlɛi* waa lende le. I tuei maa poo pum cho nda lanɔɔ finya ndɔ.+ 2 Baa mi la kelu yoŋgaa a ndi? O cho mɔnɛi le nya nɔ mi la bii,+ okoŋ mi la soli po tosa kaa hoo wo nya tɛɛŋ te?+ 3 Mi che bɛɛ I cho a nya latulu o dialloŋ niŋ te, kɛ I cho a nya latulu o kɔllo* niŋ. Nduyɛ, I chii niŋ pɛŋ po tosa kaa hoo wo yamɛi kilul, mɛɛ wana yɔŋ aa I cho a nya latulu. 4 Te la chuuŋgiaŋ pɛ o diola Chiisu laŋ niŋ, nduyɛ mi la sina maa kɔl nuu a kpaaya Masanɔ naa Chiisu cho a nya latulu, 5 la mal po koŋ Setana o ba+ le mi dialloŋ sɔla tambei. Kɛ mi kaa kɛndɛ cho o kundaa niŋndo sɔla chindaa o paale Masanɔɔ leŋ choo.+
6 Yoŋga nya cho kiolɔɔ wo niŋ te. La sina nuaa maa yiisiiyo* nyɛɛmbɔ bɛɛ tosa mi kpeyaŋ nda linda le beediiyo* wo hindu pɔfuu le?+ 7 La soli kpeyaŋ paandu nda linda a yiisiiyo wo, mi la simnuŋ kpeyaŋ lindaa sɛnɛiyo, yɔŋii nya hel pɔfuu. Kanifuule a chii Kiliti, o cho saa fɔŋndɔɔ le Bɔŋaŋ Hiouwɔɔ Choo Wo wo+ soli salaa.+ 8 Lelaŋ, ŋ biinuŋ bɔŋaŋndo hoo,+ o wa a kpeyaŋ paandu nda linda a yiisiiyo wo, ɔɔ a yiisii dɛnɛ wɔɔŋndo wo le. Kɛ a kpeyaŋ lindaa nɔ yiisii leniŋ te wo. Koŋ sim ni, kaa sakpoo a kaa tonyaa.
9 O yau ya poonyial nya wo niŋ, mi sila nya maa la pɛŋgi holiaŋndo a wanaa tosa kaa ihini nɔɔlɛiyo* wa. 10 O cho wanaa tosa kaa ihini nɔɔlɛiyo* o chieeŋndo niŋ,+ ɔɔ wanaa nɔ hɔlte bɛnduleŋ nda, ɔɔ wanaa chua nyɛm pilaŋ a lediɔɔmu wa, ɔɔ wanaa sooluu piɔmnda wa le ya yiyaŋ te. Te lende ni, mɛɛ la wa faŋaŋ o chieeŋ kalaa niŋ.+ 11 Kɛ suŋ suŋ niŋ, I cho nya poonyiallo le mi la pɛŋgi holiaŋndo+ a wana o wana cho puaapilɛnɔɔ mbo wa o kaa ihini nɔɔlɛiyo* niŋ, ɔɔ mbo nɔ hɔlte bɛnduleŋ,+ ɔɔ mbo sooluu piɔmnda, ɔɔ mbo yiou waŋnda, ɔɔ mbo wa wana kolaa,+ ɔɔ mbo wa wana chua nyɛm pilaŋ a lediɔɔmu wo.+ La dia pɛŋ nyɛdiaa nya ndaa le. 12 Baa ya nɔ ni mi kilul wanaa cho o kundaa niŋ te wa yamɛi? O cho nya le nɔ mi la kilul wanaa cho o kundaa niŋnda yamɛi, 13 mi Mɛlɛka ndu kilul wanaa cho o kundaa niŋ te wa yamɛi le?+ “La soli wana dɛnɛ wɔɔŋ cho nya tɛɛŋndo.”+