Isikiɛɛ

3 Okoŋ mbo dimul la aa: “Po wanachioo, dio nyɛ cho num koŋ lachi wo. Dio yau simbulaa hoo, ma kɔ soo o waŋnda Isɔluɛi lo.”+

2 Mi kumbi sondoo, nduyɛ mbo tosa mi dia yau simbulaa hoo. 3 Mbo hiau lachi a suɛi naa ya chua aa: “Po wanachioo, dio yau simbulaa ya cho num hoo kioo wo ma pim ndu cha.” Okoŋ mi kandu ndu dioo. Nduyɛ ndoo yeela naŋ chaa liaaŋ ni.+

4 Mbo dimul la aa: “Po wanachioo, kɔ o waŋnda Isɔluɛi lo, ma dimul nda nyɛ ya cho num dimullo wo. 5 O cho o wanaa dimi suɛi maŋgalɛi ŋ bii bila le wa lo le ya cho num viomɔɔ le, kɛ o waŋnda Isɔluɛi lo. 6 Wanaa ya cho num viomɔɔ o nda lo wa, te a soo pɛ ma bii nda bila. O cho o wanaa dimi suɛi maŋgalɛi ŋ bii bila le wa lo le ya cho num viomɔɔ le. Te ndoo yɔŋ pɛ aa o nda lo ya cho num viomɔɔ ni, a wa num nilaŋ yaŋɔɔ.+ 7 Kɛ waŋnda Isɔluɛi cho num lani yaŋɔɔ le. Kanifuule, a yeema ma yaŋ ya lani le.+ Waŋnda Isɔluɛi kpou, wanaa bolii kalaa nda cho ni, nduyɛ a dimuluŋ isɔɔ le.+ 8 Kɛ buulaŋ te, I cho tosa ma nɔ bolle kalaleŋ mɛɛ nda nɔ bolle kalaleŋ yɛ. Nduyɛ ma vesa hɔlla, mɛɛ nda bɛɛ vesa hɔlla yɛ.+ 9 I cho tosa mi tendii numnde kendu maa daamɔŋnde, nduyɛ maa pou kala kala.+ Yɔŋ isiooŋ le nda ɔɔ ma nyiiya le hɔlaa nda cho num wa solullo wa le.+ Kanifuule, wanaa bolii kalaa nda cho ni.”

10 Mbo hiau lachi a suɛi o ya lo aa: “Po wanachioo, yaŋ nilaŋ o nyɛ o nyɛ ya cho num dimullo, nduyɛ ma kɛsiŋ ndu o kɔl. 11 Kɔ o wanaa num aa cho o biyɔɔ niŋnda lo+ ma soo o nda lo. O yɔŋ bɛɛ ma yaŋ nilaŋ ɔɔ ma kɛɛ le nilaŋ yaŋɔɔ, dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni.’”+

12 Mi nyina Mɛlɛkaa heelu ya,+ okoŋ mi tuɛinuŋ bɔɔluu bɛndoo ya amakɔɔ aa: “Maa Chɛhowa sɔla saŋgalaa o fondaŋ o cho wo le naŋɔɔ ndɔɔ.” 13 Kumbaŋnda nyaa yoomaa la wa bɔɔluuwo, mɛɛ la wa luaanaŋndo vellaa velle.+ Nduyɛ, kandulaŋ bɛɛ la wa bɔɔluuwo nda ikɛi.+ Okoŋ, mi bɔɔluu bɛndoo tiu kpou. 14 Mi nyina Mɛlɛkaa chua ya mbo kua a ya, le hei mi tambu kɔllo tau tau. Mi kpaaya Chɛhowa wo kandu wallo a ya kpeekpei. 15 Okoŋ mi kua o wanaa wa o biyɔɔ niŋnda lo Tɛli-abibi, a wa ichali o pioo Kiba ikɛi ya.+ Le palɛi i ŋɔmmɛu, I wa o fondaŋ nda wa koŋ ndo, nduyɛ mi yoomuaŋ ma fula ya po.+

16 Mɛɛ palɛi ŋɔmmɛu ve fuuluu o mɛɛlulaŋ, mi Chɛhowa dimul la aa:

17 “Po wanachioo, I hɛli num le ma wa wana mɛŋgɛlaa le waŋnda Isɔluɛi.+ Nyɛ o nyɛ ŋ tuei ya pɛ o sondo, a nɔ ma dimul nda ndu le nda silaa.+ 18 Te o yɔŋ pɛ mi dimul wana dɛnɛ wɔɔŋndo aa, ‘A cho piɔmndo sɔla,’ kɛ ma sila ndu le, nduyɛ ma kɛɛ kpooŋ le ndu dimullo mbo mal dɛnɛ ndɔ wɔɔŋndo le halikpeŋ mbo wa yoomu le,+ o cho piɔmndo sɔla le mɛɛ o cho wana dɛnɛ wɔɔŋŋndo yɛ.+ Kɛ num, I cho num nyuna le kooma nduaŋ.*+ 19 Kɛ te a sila pɛ wana dɛnɛ wɔɔŋndo, nduyɛ mbo kɛɛ kpooŋ le dɛnɛ ndɔ wɔɔŋndo malɔɔ, o cho piɔmndo sɔla le haki ndɔɔ. Kɛ mi num piŋi yoomu numndo.+ 20 Kɛ te wana cho sakpo wo mal pɛ sɔɔŋ cho sakpo woŋ tosaa mbo muliŋ sɔɔŋ wɔɔŋndoŋ* tosaa, I cho tosa mbo boŋ mbo del nduyɛ mbo sɔla piɔmndo.+ Te a sila ndu le okoŋ mbo sɔla piɔmndo le haki ndɔɔ, I cho num nyuna le kooma nduaŋ.* Nduyɛ I loonuŋ lɛ niŋ a sɔɔŋ kɛndɛŋ o tosa woŋ okɔɔ le.+ 21 Kɛ te a sila pɛ wana cho sakpo wo maa o tosa hakioo le, okoŋ mbo tosa haki le, o cho wa yoomu le mɛɛ ŋ sila ndu yɛ.+ Nduyɛ num bɛɛ ma piŋi yoomu numndo.”

22 Mi kpaaya Chɛhowa wo tual la choo loŋ, mbo dimul la aa: “Chɔŋ ma kuɛ o lɛŋnde dɛŋgbɛleŋ niŋ, loŋ ya cho isɔɔ naa num chua ni.” 23 Okoŋ mi chaŋ, mi kua o lɛŋnde dɛŋgbɛleŋ. Naŋɔɔ bɛndu Chɛhowa wo wa loŋ,+ mɛɛ naŋɔɔ bɛndu ya che o pioo Kiba wo wa yɛ.+ Okoŋ mi baŋ wulaŋ mi fuuluu hɔlla lɛŋ. 24 Mi nyina Mɛlɛkaa ke ya kpaayaa, mi chaŋ mi sim.+ Nduyɛ mbo suaa o ya lo, mbo dimul la aa:

“Kɔ luɛi o numndo chiɛiniŋ ma kindaŋ dioo kɔɔli. 25 Kɛ num po wanachioo, a cho num yii a yuei a nɔla niŋ ma kuɛ waŋnda tɛɛŋ te. 26 I cho tosa mi diɔɔmuleŋ le lusul num o sondo, a tiu niŋ ba ma soo nduyɛ ma sila nda le. Kanifuule, wanaa bolii kalaa nda cho ni. 27 Kɛ te I soo pɛ o numndo, I cho num sondoo kumbi. Nduyɛ a nɔ ma dimul nda aa,+ ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni.’ Wana cho nilaŋ yaŋɔɔ wo o yaŋ nilaŋ,+ nduyɛ mi wana kɛɛ le nilaŋ yaŋɔɔ wo kɛɛ le nilaŋ yaŋɔɔ. Kanifuule, wanaa bolii kalaa nda cho ni.+