Walta Kiilaa

21 Le mɛɛ naŋ wa nda mɛiyo yɛ, miŋ tambu kɔl tau. Okoŋ miŋ kɔ luɛi o dɛndɔɔ niŋ, mbo kua a naa Kɔɔsi sakpo. Diimandɔɔ, miŋ kua Lodisi. Mɛɛ naŋ chɛŋ loŋ, miŋ kua Patala. 2 Mɛɛ naŋ che dɛndɛ bɛndu wa kɔlaŋ Foniisiaa wo, miŋ luɛi leniŋ, miŋ kuaŋnuŋ. 3 Mɛɛ naŋ che lɛŋnde ibuŋgaleŋ Saipulɔɔ, miŋ mɛi leŋ o ba miallo choo, miŋ kua o lɛŋnde Siiliaa leŋ niŋ. Mi dɛndɔɔ kɔ sim Taya. Loŋ ndaa nɔ le wolɔɔlaŋ solioo o dɛndɔɔ niŋ ni. 4 Miŋ nuuviaa wanaa laalaŋnda, nduyɛ miŋ saaluŋ nda. Miŋ lo Taya loŋ le palɛi i ŋɔmmɛu. Kɛ mi nyina Mɛlɛkaa tosa ma dimul Pɔɔl maa o pila pelei Chulusalɛm te.+ 5 Mɛɛ teleŋ naa fuuluu le kɔŋndaŋ, miŋ bii nɛiyo le kɔlaŋ. Kɛ mi nda kpou, wana lanɔ ni, chuaambɔ ni, lo naa liilaa haaa miŋ fuuluu o pioo kɔŋgɔ. Miŋ baŋ wulaŋ o pioo kɔŋgɔ loŋ, miŋ piɛi. 6 Okoŋ miŋ choŋgaŋ naa ndaa. Miŋ luɛi o dɛndɔɔ niŋ, mi nda miiŋguŋ o la nda lo bɛɛ.

7 Mɛɛ naŋ chɛŋ Taya, miŋ lo kɔlaŋ haaa miŋ fuuluu Tolemeyɔɔ. Miŋ kɔ yil puaapiliaa, nduyɛ miŋ hivi paaleŋ naa ndaa. 8 Diimandɔɔ, miŋ chaŋ Tolemeyɔɔ miŋ huŋ Sisaliaa. Miŋ kɔ luɛi o chiɛi Filipi wana dimiaa yooŋgu kɛndɔɔ wo niŋ. O wa waŋndo o pilɛ o puaa ŋɔmmɛu wa tɛɛŋ.+ Nduyɛ mbo yiya naa. 9 Ndoo nɔ chuaa laanduaa ndaa chellɔ o lanɔ le wa* a hiɔɔlu. Wanaa ndaa suaa le Mɛlɛka wa nda wa ni.+ 10 Mɛɛ naŋ viou loŋ le palɛi bɔɔbɔɔ, mi wana ndoo suaa le Mɛlɛka wo diolaŋ aa Akabɔɔ+ chaŋ Chudiaa mbo huŋ. 11 Mbo huŋ o naa lo, mbo chua yaule Pɔɔl leŋ, mbo yii ndupila peloŋ a balaŋ. Mbo dimi aa: “Nyina diandaa dimi aa, ‘Nuaa Chuuwa o Chulusalɛm niŋ+ cho wana nɔ yauleŋ ndeŋ ndo yii ni, ma mal ndu wanaa cho ŋChuu le wa o ba.’”+ 12 Mɛɛ naŋ tuei hei, mi naa a wanaa wa loŋ nda kpou kandu ndu dɛɛniaa maa o kua Chulusalɛm te. 13 Kɛ mi Pɔɔl dimi aa: “Le yɛɛnɛ nya cho yɛ chaŋndo nduyɛ mi la wa ya kɔllo tɛɛmbuuwo? La kɛsiŋ o kɔl maa, o cho ko ya yiiyo le, kɛ I cho vɛlɛ o bɛɛndiaŋ le mi sɔla piɔmndo Chulusalɛm le diola Masanɔɔ Chiisu laŋ.”+ 14 Mɛɛ naŋ che maa ŋ nɔla ndu kɔllo muli le, miŋ mal ndu. Miŋ dimi aa: “Maa hɛnaŋ Chɛhowa* wo yɔŋnuŋ fɔ!”

15 Mɛɛ palɛi hei hiou, miŋ bɛɛndiaŋ, nduyɛ miŋ bii nɛiyo le kɔlaŋ Chulusalɛm. 16 Mi wanaa laalaŋnda apum o Sisaliaa niŋ kua a naa latulu, ma liila naa o wana wa naa yiyaa wo lo diolaŋ aa Manesiŋ. Wana waa Saipulɔɔ o wa ni, nduyɛ o wa wana pilɛ o wanaa laalaŋaa tasiaa tɛɛŋ. 17 Mɛɛ naŋ fuuluu Chulusalɛm, mi puaapiliaa bii naa nyɛkɛndɛi. 18 Diimandɔɔ, miŋ kua naa Pɔɔl waa o Chemisi lo.+ Bɛnduaa kundaa kpou wa loŋ. 19 Mɛɛ o yil nda, mbo kandu nda konaa doonɔŋndo a nyɛ o nyɛ Mɛlɛka tosal wanaa cho ŋChuu le wa, o yooŋgu kɛndɛ o wa dimioo wo niŋ.

20 Mɛɛ nda tuei hei, ma kandu Mɛlɛka saŋgalaa. Ma dimul Pɔɔl aa: “Puaapilɛnɔ naa, numpila cho chɔɔ mɛɛ Chuuwa o waalaŋ niŋ simnuŋ wanaa laalaŋnda yɛ. Nduyɛ nda kpou nɔ sɛmbɔɔ le Sawaa* biyɔɔ.+ 21 Kɛ a tuei nyiimu nyiimuei a num okɔɔ maa, a cho Chuuwaa cho kaala cheleŋndaŋ tɛɛŋnda kpou pɛɛkoo maa, a bii Sawala Mɛlɛka ke Muuse laŋ te. Ma wa nda vɛlɛ dimullo maa, a hivi chuauwaa ndaa o chiɛi kɔɔli le, nduyɛ maa a tual naamula maChuu laŋ kɔɔli le.+ 22 Yɛɛnɛ naŋ cho yɛ tosa? Kanifuule, a cho tueiyɔɔ maa a cho nanuŋ. 23 Lelaŋ, tosa nyɛ naŋ cho num dimullo: Ŋ nɔ puaa a hiɔɔlu, a chua buŋgɛi o Mɛlɛka lo wa. 24 Chua puaa haa mi la kɔ dindi nyapila a mɛɛ Sawaa dimi yɛ, nduyɛ ma paawa* nyɛ nda nɔ le paawaa wo le ma sendi nda. O hei niŋ, a cho sina maa sɔɔŋ nda tuei a num okɔɔ woŋ kpou ŋ cho tonya le. Nduyɛ ma sina maa a cho kɔlaŋ o nɛi tonyaa choo, ma wa vɛlɛ Sawaa biyɔɔ.+ 25 Le wanaa cho ŋChuu le wa, a simnuŋ wanaa laalaŋnda wa, miŋ dimul nda kɛɛsiaa naa o yau naŋ yɔŋ nda wo niŋ maa, a hiou lachi a nyɛm lasooluu woŋ,+ koowaŋ,+ yifaa,*+ a kaa ihini nɔɔlɛiyo* fafaŋndo.”+

26 Mi Pɔɔl kua diimandɔɔ nda puaa hiɔɔluaa haa ma sɔla dindioo latulu a mɛɛ Sawaa dimi yɛ.+ Okoŋ kɔɔli, ma kua o chiɛi Mɛlɛkaa niŋ le chɔmndo teleŋ palɛi ŋɔmmɛu ve wa chuwɔɔ wo, le ma soli salaa le nda pilɛŋ pilɛŋnda kpou.

27 Mɛɛ palɛi ŋɔmmɛu ve wa niŋ le chuwɔɔ, mi Chuuwaa fula Eesiaa wa cha Pɔɔl o chiɛi Mɛlɛkaa niŋ. Ma tosa mi faŋgaa duaunuŋ tumbe ma kɔ bii ndu. 28 Ma wa deŋioo aa: “Waŋnda Isɔluɛi, la mala naa fɔ! Laŋunɔɔ hoo cho keiyo waŋnda pɛɛkoo ba o ba fee ni le ma simul wanaa naa, Sawa naa, a fonda diandaa hoo. I hiou kpou ve, o hiŋ a Kilikiiya o chiɛi Mɛlɛkaa niŋ, nduyɛ mbo nɔɔliaa fondaŋ diandaa hoo.”+ 29 Waŋnda haa ndaa che niŋ paandu Tilofimɔɔ,+ o fula Ɛfisɔɔ wo nda Pɔɔl o chioo hoo niŋ. Nduyɛ ma yiyaŋ maa Pɔɔl kuɛ niŋ a ndu o chiɛi Mɛlɛkaa niŋ. 30 Mi chioo kpou yɔŋnuŋ wooluŋ wooluŋ. Mi waŋnda huŋ a kiltaŋ ma bii Pɔɔl ma soli ndu o chiɛi Mɛlɛkaa niŋ. O lepilɛ niŋ kpe, ma kiindiaa diolaŋ. 31 Mɛɛ nda wa kindiŋndo le ndu diyɔɔ, mi wana cho puaa chɔuwa bolleŋ ndo tuɛi maa wooluŋ wooluŋndo tiu Chulusalɛm silɔ. 32 O lepilɛ niŋ kpe, mbo chua puaa chɔuwa a wanaa ndaa bɛnduaa, ma kua a kiltaŋ naa nda wa wa. Mɛɛ waŋnda che wana cho puaa chɔuwa bolleŋ ndo a puaa chɔuwa, ma pɛŋgi Pɔɔl lɔɔ.

33 Mi wana cho puaa chɔuwa bolleŋ ndo sɔɔŋguu, mbo bii Pɔɔl. Mbo dimi maa a yii ndu a yɔlɔŋ sala tiɔɔŋ.+ Okoŋ mbo nyuna waŋnda le wana suu o cho wo, a nyɛ o tosa wo. 34 Kɛ mi waŋnda apum o faŋgaa tɛɛŋ kandu deŋioo. Haa dimi pɛ hei, haa dimi nyɛ cheleŋ. Wana cho puaa chɔuwa bolleŋ ndo bɛɛ ve nyɛ o nyɛ biyɔɔ bila le, kanifuule waŋnda wa bɔɔluuwo tau. Le hei, mbo dimi maa a kɔ a ndu o fondaŋ puaa chɔuwa. 35 Kɛ mɛɛ Pɔɔl fuuluu o fondaŋ waŋnda hel le luɛiyɔɔ chiɛiniŋ ndo, mi puaa chɔuwa chua ndu ma kua a ndu, kanifuule waŋnda ndaa yeema ma yɔŋul ndu. 36 Waŋnda wa nda kɔlaŋ kɔɔli a deŋioo aa: “La dii ndu!”

37 Mɛɛ nda hiŋ le luɛiyɔɔ o fondaŋ puaa chɔuwa, mi Pɔɔl dimul wana cho puaa chɔuwa bolleŋ ndo aa: “Yandii, I yeema mi soo o numndo chobe.” Mbo nyuna ndu aa: “Yee ma dimi Kilikiiye? 38 O cho num te cho laŋunɔ Ichipiaŋnɔ kindi waŋnda bolle teleŋ pilɛ ma simul masaleŋ, nduyɛ mbo sim puaa 4,000 lachi a nyɛm chɔuwoŋ o laba ma kua o pollo niŋndo le?” 39 Mi Pɔɔl muli aa: “Chuunɔɔ+ ya cho ni. Nduyɛ Taasɔɔ ya fula ni,+ chiee lebɛɛ bɛndoo o lɛŋnde Siliisiaa leŋ niŋ. Lelaŋ a yandii, chɛl la mi soo o waŋnda haa lo.” 40 Mɛɛ o chɛl le mbo soo o nda lo, mi Pɔɔl sim naa helaa kaŋ, mbo kpaa waŋnda a ba. Mɛɛ nyɔɔ mɛi doŋ, mbo suaa o nda lo o Hibuluiye niŋ.+ Mbo dimi aa: