Nɔmbaa

10 Okoŋ, mi Chɛhowa dimul Muuse aa: 2 “Lɔɔ kanii humbuei a haamɛiyo,* ma toosiaa bululaŋ la tiɔɔŋ+ le numpila. Nduyɛ laŋ ŋ cho wa soliŋndo kpeku ni le Isɔluɛiya chuuŋgiaa naapilɛ, a le nda faŋaa o dɔɔŋgɔɔ. 3 Te la hɔŋ pɛ bululaŋ la tiɔɔŋ, Isɔluɛiya kpou nɔ ma chuuŋgiaŋ o numndo, o tɛndii bɔŋaŋndo sondoo.+ 4 Kɛ te buloo o pilɛ kpe nya hɔŋ ni, waŋ banaa cho Isɔluɛiya o waalaŋ niŋ bolle wa kinɛi nɔ ni ma chuuŋgiaŋ o numndo.+

5 “Te la hɔŋ pɛ buloo mi diomndo wa helɔɔ a tolɔɔ, kundala cho o dɔɔŋgɔɔ ba paaleŋ le chaŋ ndo laŋ+ la nɔ mi la faŋaŋ o dɔɔŋgɔɔ. 6 Te la hɔŋ pɛ buloo hɔŋ diiŋ ndɔɔ mi diomndo wa helɔɔ a tolɔɔ, kundala cho o dɔɔŋgɔɔ ba tou wo laŋ+ la nɔ mi la faŋaŋ o dɔɔŋgɔɔ. Teleŋ o teleŋ kunda kayii yaa wo wa pɛ faŋaŋndo o dɔɔŋgɔɔ, nuaa nya nɔ ni mi la hɔŋ buloo.

7 “Te a wa pɛ waŋnda veeloo le ma chuuŋgiaŋ naapilɛ, la nɔ mi la hɔŋ bululaŋ.+ Kɛ diomndo nɔ mbo wa helɔɔ a tolɔɔ le. 8 Elɔŋ, puaa nduaa soli salalaŋ nda nɔ ni ma hɔŋ bululaŋ.+ Nɛi chɔmaa hoo nya nɔ ni mi la tol kɔɔli le bululaŋ hɔŋndo. O cho wa le nya vɛlɛ a yuŋgula nyala cho hunɔɔ o chilaŋ niŋndaŋ.

9 “Te la wa pɛ o lɛŋnde nyaleŋ niŋ mi yaamɔɔnɔɔ huŋ chiŋalaŋ nya a chɔuwo, la nɔ mi la hɔŋ bululaŋ hɔŋ chɔuwo.+ Okoŋ mi ya Chɛhowa Mɛlɛka nyaa loonuŋ a nya, nduyɛ mi piŋi nya yaamɔɔwaa nyaa o ba.

10 “O chuuŋgiaŋnda nyala kɔl kɛndɛ laŋ choo,+ koŋ cho ni, o bɔŋaŋnda nyalaŋ+ a o paŋguŋ nyaŋ kandɔŋndo, la nɔ mi la hɔŋ bululaŋ te la wa pɛ salala luamaa laŋ+ a salala kɔl nyulu laŋ solioo.+ Bulula laŋ la cho tosa mi ya Mɛlɛka nyaa loonuŋ a nya. Ya cho Chɛhowa Mɛlɛka nyaa ni.”+

11 O wɔsi diiŋ ndɔɔ niŋ, paŋgii diiŋ nduɛi malɔ 20,+ mi yumbu yumboo faŋaŋ o tɛndii+ laSawaa choo. 12 Okoŋ mi Isɔluɛiya kandu faŋaŋndo o pollo niŋ Sanai, a mɛɛ nɛi chɔmaa wa le faŋaŋndo yɛ.+ Nduyɛ mi yumbu yumboo kɔ sim o pollo niŋ Paluaŋ.+ 13 Teleŋ tasoo wa hoo ni le ma tol nɛi chɔmaa Chɛhowa yɔŋgu Muuse wo kɔɔli, le faŋaŋndo o dɔɔŋgɔɔ.+

14 Kaala yaa laŋ o kunda puaa Chuda wa a wa niŋndo, laŋ fɛlɛŋ la faŋaŋ o dɔɔŋgɔɔ a kundala ndalaŋ.* Nduyɛ Naasiɔŋ,+ po Aminadabi wo wa laŋ bolleŋ ni. 15 Nɛtanɛɛ, po Suwa wo wa kaale puaa Isaka wa bolleŋ ni.+ 16 Ɛliaabi, po Hɛlɔŋ ndo wa kaale puaa Sɛbulɔŋ nda bolleŋ ni.+

17 Mɛɛ nda puusiaa tɛndii bɔŋaŋndo,+ mi puaa Kɛɛsiɔŋ nda+ a puaa Meluali wa+ chua ndu, ma faŋaŋ o dɔɔŋgɔɔ.

18 Okoŋ kɔɔli, mi kaala yaa laŋ o kunda puaa Lubɛŋ nda wa niŋndo la faŋaŋ o dɔɔŋgɔɔ a kundala ndalaŋ.* Nduyɛ Ɛlisɔɔ,+ po Siɔdiɔɔ wo wa laŋ bolleŋ ni. 19 Siɛlumiɛɛ, po Suluisiadai yo wa kaale puaa Simiɔŋ nda bolleŋ ni.+ 20 Iliaasafi, po Duɛɛ wo wa kaale puaa Kaadi wa bolleŋ ni.+

21 Okoŋ mi Kohataitiiya chua nyɛla wa o fondaŋ diandaa laŋ,+ ma faŋaŋ o dɔɔŋgɔɔ. Nduyɛ, tɛndii bɔŋaŋndo ndoo nɔ mbo chuu simi tuupa ma fuuluu.

22 Okoŋ kɔɔli, mi kaala yaa laŋ o kunda puaa Ifiluem nda wa niŋndo la faŋaŋ o dɔɔŋgɔɔ a kundala ndalaŋ.* Nduyɛ Ɛlisiama,+ po Amihudi wo wa laŋ bolleŋ ni. 23 Kameliɛɛ, po Pɛdaasɔ wo wa kaale puaa Manaasɛ wa bolleŋ ni.+ 24 Abidaŋ, po Kidionai yo wa kaale puaa Bɛŋjamiŋ nda bolleŋ ni.+

25 Okoŋ kɔɔli, mi kaala yaa laŋ o kunda puaa Daŋ nda wa niŋndo la faŋaŋ o dɔɔŋgɔɔ a kundala ndalaŋ.* Nda wa kunda mɛɛlaa kpɔŋ le faŋaŋndo o dɔɔŋgɔɔ ni le Isɔluɛiyaa tuaa kpou mandaa. Nduyɛ Ahiɛɛsa,+ po Amisiadai yo wa nda bolleŋ ni. 26 Pakiɛɛ, po Okiluaŋ ndo wa kaale puaa Asia wa bolleŋ ni.+ 27 Ahilua, po Ɛnaŋ ndo wa kaale puaa Nafitalii wa bolleŋ ni.+ 28 Mɛɛ nuaa Isɔluɛiya wa faŋaŋndo o lepula o dɔɔŋgɔɔ ni a kundala ndalaŋ kpɛ kpɛ.+

29 Muuse ndoo nɔ lefoo diolaŋ aa Luyɛɛ,*+ nduyɛ Midianaitiinɔɔ o wa ni. Mbo dimul Hobabi po ndɔ aa: “Ŋ cho kɔlaŋ o fondaŋ Chɛhowa dimi le naa kioo wo.+ Lelaŋ, ŋ kɔŋnuŋ naa nyaa.+ Ŋ cho num biyɔɔ nyɛkɛndɛi, kanifuule Chɛhowa mɛi lediom le Isɔluɛiya nyɛm kɛndɛ kɛndɔŋ kioo.”+ 30 Kɛ mbo dimul ndu aa: “I cho lakɔ le. I cho miiŋgɔŋ o lɛŋnde nileŋ niŋ, naa wanayaŋ nuŋ cho wa.” 31 Mi Muuse dimul ndu aa: “Yandii mal naa le. Sim naa lachi ma wa naa nɛiyo chɔmndo,* kanifuule a sina fondaŋ naŋ nɔ miŋ kila dɔɔŋgɔɔ o pollo niŋndo. 32 Te a kuɛ pɛ a naa latulu,+ nyɛ o nyɛ kɛndɛ Chɛhowa ke naa pɛ, num bɛɛ cho sɔla.”

33 Okoŋ ma faŋaŋ o pembii Chɛhowa ve,+ ma kandu kɔla tiŋ palɛi yaa. Nduyɛ le palɛi i yaa, kɔfu kpema+ Chɛhowa wo lo nda kɔlaŋ lachi haaa ma saaluŋ fondaŋ nda nɔ ma pɛŋgi wo.+ 34 Te ndaa faŋaŋ pɛ o dɔɔŋgɔɔ, mi yumbu yumbu Chɛhowa wo+ ndoo wa nda choo ipala le nda nɛiyo chɔmndo.

35 Teleŋ o teleŋ ndaa chua pɛ kɔfoo, Muuse dimi aa: “Oo Chɛhowa, chɔŋ+ ma tosa mi yaamɔɔwaa numnda puusiaŋ, nduyɛ mi wanaa tul num leyɛ wa nyaanuŋ num.” 36 Te ndaa kɛsi ndu pɛ, o dimi aa: “Oo Chɛhowa, miiŋgu Isɔluɛiyaa cho haa waalaŋ o walaŋ niŋnda tɛɛŋ.”+