Koloniko Tasoo

15 Mi Deeve hiau lachi a chiɛilaŋ taŋgullo le ndupila o chiee o wa wo niŋ, koŋ cho ni, Chiee Deeve Wo. Nduyɛ mbo bɛɛndiaa fondaa, okoŋ mbo tuandu tɛndiiyo le Kɔfu Mɛlɛka tonyaa kɛsioo leniŋ.+ 2 Okoŋ kɔɔli, mi Deeve dimi aa: “O fulawɔ o Livaiya kɔɔli, wana o wana cheleŋ nɔ mbo kuɛ a Kɔfu Mɛlɛka tonyaa le. Kanifuule, nda Chɛhowa hɛli ni le ma kuɛ a Kɔfu Chɛhowa wo nduyɛ ma wa wallo le ndu le teleŋ o teleŋ.”+ 3 Okoŋ, mi Deeve chuuŋgiaa Isɔluɛiya kpou Chulusalɛm le ma kɔ huŋ a Kɔfu Chɛhowa wo, o fondaŋ o toosiaa le ndu wo.+

4 Mi Deeve chuuŋgiaa wanaa fula o pulale Elɔŋ ndeŋ choo wa+ a Livaiya.+ 5 O pulale Kohati leŋ choo, mbo hɛli Yuluɛɛ o wa masa ndaa wo, a wanaa cheleŋ 120 o yuŋgu ndɔɔ niŋ. 6 O pulale Meluali leŋ choo, mbo hɛli Aasaya+ o wa masa ndaa wo, a ŋwaŋ 220 o yuŋgu ndɔɔ niŋ. 7 O pulale Kɛɛsiɔm ndeŋ choo, mbo hɛli Chowɛɛ+ o wa masa ndaa wo, a wanaa cheleŋ 130 o yuŋgu ndɔɔ niŋ. 8 O pulale Ɛlisafaŋ ndeŋ choo,+ mbo hɛli Siɛmaya o wa masa ndaa wo, a wanaa cheleŋ 200 o yuŋgu ndɔɔ niŋ. 9 O pulale Hɛbulɔŋ ndeŋ choo, mbo hɛli Iliɛɛ o wa masa ndaa wo, a wanaa cheleŋ 80 o yuŋgu ndɔɔ niŋ. 10 O pulale Yuusiɛɛ leŋ choo,+ mbo hɛli Aminadabi o wa masa ndaa wo, a ŋwaŋ 112 o yuŋgu ndɔɔ niŋ. 11 Okoŋ kɔɔli, mi Deeve veelu wanaa soliaa lasalaa Sadɔki+ nda Abiaata,+ a Livaiya haa, Yuluɛɛ, Aasaya, Chowɛɛ, Siɛmaya, Iliɛɛ, a Aminadabi. 12 Mbo dimul nda aa: “Nya cho bolii layuŋguei o yuŋgula Livaiya niŋ ni. Lelaŋ nya ni, wanayaŋ nyaŋ ni, la dindi nyapila le mi la kɔ chua Kɔfu Chɛhowa wo, Mɛlɛka Isɔluɛiya, mi la hiŋ a ndu o fondaŋ ya bɛɛndiaa le ndu wo. 13 O cho nya le kuɛ teleŋ tasoo le Kɔfoo chuaa le.+ Lelaŋ, mi Chɛhowa Mɛlɛka naa duaunuŋ tumbe o kala kala a naa,+ kanifuule ŋ tul nɛi ndɔ chɔmaa kɔɔli le.”+ 14 Mi wanaa soliaa lasalaa a Livaiya dindi ndapila le ma kɔ huŋ a Kɔfu Chɛhowa wo, Mɛlɛka Isɔluɛiya.

15 Okoŋ, mi Livaiya chua Kɔfu Mɛlɛka tonyaa o yɔmii vilɛiye choo ma kua a ndu,+ a mɛɛ Chɛhowa dimul Muuse yɛ. 16 Mi Deeve dimul masaa wa Livaiya tɛɛŋ nda, le ma hɛli wanaa soliaa ŋchonduaa wanayaŋ ndaŋ tɛɛŋ ma wa chondoŋ solioo choo choo kpeleŋ a kɔl kɛndɛ, latulu a nyɛm chaaŋ muŋ: nyɛm chaaŋ iyooŋ, towalaŋ+ vɛlɛ a kumbula ŋchiliŋndaŋ.+

17 Okoŋ, mi Livaiya hɛli Himaŋ+ po Chowɛɛ wo. Nduyɛ o wanayaŋ ndɔŋ tɛɛŋ, ma hɛli Asafi+ po Bɛluakaya wo. O pulale Meluali leŋ choo, o wanayaŋ ndaŋ tɛɛŋ, ma hɛli Itaŋ+ po Kusiaya wo. 18 Ma hɛli vɛlɛ kunda cheleŋ wanayaŋ ndaŋ tɛɛŋ.+ Nda cho ni: Sɛkalaya, Bɛŋ, Chahesiɛɛ, Siɛmilamɔti, Chɛhayɛɛ, Yuni, Ɛliaabi, Bɛnaya, Maasɛya, Matitiya, Ɛlifɛlehu, a Mikiniya. Ma hɛli vɛlɛ Obɛdi-idɔm a Chɛyɛɛ, a ndaa manda diola kpakilaŋ nda. 19 Wanaa soliaa ŋchonduaa haa, Himaŋ,+ Asafi+ a Itaŋ, nda ndaa luaa kumbula ŋchiliŋnda nda toosiaa a chiliŋii siaŋɛi* laŋ ni.+ 20 Nduyɛ Sɛkalaya, Esiɛɛ, Siɛmilamɔti, Chɛhayɛɛ, Yuni, Ɛliaabi, Maasɛya, a Bɛnaya, nda ndaa luaa nyɛm chaaŋ iyooŋ ni a mɛɛ diomndaŋ laa nɔ le helɔɔ yɛ.*+ 21 Matitiya,+ Ɛlifɛlehu, Mikiniya, Obɛdi-idɔm, Chɛyɛɛ, a Asasaya ndaa luaa towalaŋ ni a mɛɛ diomndaŋ laa nɔ le tolɔɔ yɛ.*+ Nduyɛ nda wa wanaa ndaa sim wanaa soliaa ŋchonduaa lachi wa ni. 22 Chɛnaniya+ o wa bolleŋ le Livaiya wo wa chilaŋ ni le kɔlaŋ a Kɔfoo, kanifuule ndoo chaa bɔɔ wali koŋ. 23 Nduyɛ Bɛluakaya nda Ɛlikana ndaa manda diolaŋ ni, naa Kɔfoo wa wa. 24 Wanaa soliaa lasalaa haa, Siɛbanaya, Choosiafati, Nɛtanɛɛ, Amasai, Sɛkalaya, Bɛnaya, a Ɛliɛɛsa, nda ndaa hɔŋ bululaŋ choo choo kpeleŋ Kɔfu Mɛlɛka tonyaa lachi ni.+ Nduyɛ Obɛdi-idɔm nda Chɛhaya bɛɛ, mi ndaa manda diolaŋ naa Kɔfoo wa wa.

25 Deeve, waŋ banaa Isɔluɛi, a wanaa wa waŋnda waapilɛ bolleŋ nda wa kɔlaŋ a kpeŋjoo+ le ma kɔ chua kɔfu kpema Chɛhowa wo o chiɛi Obɛdi-idɔm ndo.+ 26 Le mɛɛ Mɛlɛka tonyaa mala Livaiya le kɔlaŋ a kɔfu kpema Chɛhowa wo yɛ, ma soli nauwaa piaanduaa fɔŋnduaa a ŋɔmmɛu salaa, a saa konduaa a ŋɔmmɛu.+ 27 Doma bala biŋgi nda toosiaa a fuŋnde kɛndɛ kɛndɛleŋ ndo wa Deeve lekɔɔ, Livaiyaa wa kɔlaŋ a Kɔfoo wa, wanaa soliaa ŋchonduaa, a Chɛnaniya, wana wa wanaa soliaa ŋchonduaa wa kɔlaŋ a Kɔfoo wa chilaŋ ndo. Mi Deeve wounuŋ vɛlɛ doma biŋgioo.*+ 28 Isɔluɛiya kpou wa kɔlaŋ a kɔfu kpema Chɛhowa wo, nduyɛ ma wa deŋioo a nyaaloo kpeekpei.+ A wa bulula yɛ yɛlaŋ hɔŋndo,+ ma luaa kumbula ŋchiliŋndaŋ, nyɛm chaaŋ iyooŋ, vɛlɛ a towalaŋ. Nduyɛ a wa laŋ lɔɔ choo choo kpeleŋ.+

29 Kɛ mɛɛ kɔfu kpema Chɛhowa wo fuuluu o Chiee Deeve Wo,+ mi Maikaa chua Sɔɔ wo+ tofa o wundɛiyo,* mbo cha Masaa Deeve huuloo, mbo mulu muluŋ a yolaŋ. Okoŋ, mbo data ndu o kɔl ndɔɔ niŋ.+