Maatiu
8 Mɛɛ Chiisu tol o pembei choo, mi faŋga bɛndoo tual ndu kɔɔli. 2 Okoŋ kɔɔli, mi po wa a naa ŋlɛlɔɔ wo huŋ naa ndu chua mbo beŋ ndu wulaŋ.* Mbo dimi aa: “Masanɔɔ, te a yeema pɛ, a nɔla ma siŋgi ya.”+ 3 Okoŋ, mi Chiisu siɛndi baa mbo pilaŋ ndu. Mbo dimi aa: “I yeema! Sioŋgu.”+ O lepilɛ niŋ kpe, mbo siaŋgu a naa ŋlɛlɛ koŋ.+ 4 Mi Chiisu dimul ndu aa: “Dimul wana o wana a hei okɔɔ le.+ Kɛ, kɔ chɔɔmuŋ o wanaa soliaa lasalaa lo,+ nduyɛ ma soli salaa a mɛɛ Sawala Mɛlɛka ke Muuse laŋ la dimi yɛ,+ le ma wa lesei.”
5 Mɛɛ Chiisu luɛi Kepaaniɔm chiee, mi wana bɛndu puaa chɔuwa* o pilɛ huŋ naa ndu chua, mbo nyɔɔlu ndu le malaa.+ 6 Mbo dimi aa: “Fallo, buɛi nuu cho ihini chiɛiniŋ o bɛvɛiyo, nduyɛ o cho saŋgaa tau tau.” 7 Mi Chiisu dimul ndu aa: “I cho lakɔ loŋ mi kɔ siŋgi ndu.” 8 Mi wana bɛndu puaa chɔuwa dimi aa: “Fallo, I cho wana sɔvɛ le ma hiŋ o ya lo chiɛiniŋ te. Kɛ dimioo bɛɛ ŋ dimi ni maa o sioŋgu, o nɔla mbo seŋgu. 9 Kanifuule, ya bɛɛ ŋwaŋ cho ma wa ya bolleŋ. Nduyɛ ya bɛɛ, puaa chɔuwa cho ya o ba bɛŋgu. Te I dimul pɛ o pilɛ aa, ‘Kɔ nda!’ o kuɛ. Te I dimul pɛ o cheleŋ aa, ‘Huŋ nanuŋ!’ o hiŋ. Nduyɛ te I dimul pɛ buɛi nuu aa, ‘Tosa hei!’ o tosa.” 10 Mɛɛ Chiisu tuei hei, mi kɔndɔfillo bii ndu. Okoŋ mbo dimul wanaa wa ndu tolɔɔ kɔɔli wa aa: “A tonya mi dimul nya, I chi wɔ waŋndo o Isɔluɛi niŋ mbo nɔ laalaŋ bɛndu waa nuaa le.+ 11 Kɛ mi dimul nya, wanaa bɔɔbɔɔ cho fula ba paaleŋ le chaŋ ndo a ba le del lo, ma huŋ chal o tibiiyo* choo nda Ebilaham, Aase a Chekɔpu waa le nyɛdiaa dioo o Masale Mɛlɛkaleŋ niŋ o choo choo niŋ.+ 12 Kɛ wanaa ndaa nɔ le waa o Masale Mɛlɛkaleŋ niŋnda, ma viou nda o bɛɛ o nyumndaŋ niŋ. Loŋ nda wa niŋ koŋullo a chiŋndoŋ sɔmndo ni.”+ 13 Okoŋ, mi Chiisu dimul wana bɛndu puaa chɔuwa aa: “Miiŋgu o numndo. Mɛɛ ŋ chɔm laalaŋndo yɛ, maa i yɔŋnuŋ lende fɔ.”+ Nduyɛ, mi buɛi koŋ siaŋgu a teleŋ koŋ kpeekpei.+
14 Mɛɛ Chiisu kuɛ o chiɛi Pitɛ wo, mbo komal lefu ndɔ laandoo+ ihini kpu a dialuŋ tuuwoŋ.+ 15 Okoŋ mi Chiisu saa ndu baa,+ mbo siaŋgu. Mɛɛ o chɛŋ, mbo kandu Chiisu nyɛdiaa toosiallo. 16 A paale delaaleŋ, mi waŋnda chuu ndu wanaa nyinaa wɔɔŋnda wa kɔɔli wa tau, okoŋ mbo tuau nda nyinaa wɔɔŋnda kɔɔli a nyɛ o dimi wo. Nduyɛ, mbo siŋgi wanaa wa a naalaŋ nda kpou. 17 Hei yɔŋnuŋ le mbo peelu nyɛ Aisaya, wana ndoo suaa le Mɛlɛka wo dimi wo aa: “Mbo soli naala wa naa o ŋdial taŋ.”+
18 Mɛɛ Chiisu che faŋgaa ndu o balaa silɔ, mbo dimul buɛiyaa nduaa maa a taŋ kɔŋgɔɔ leeloo.+ 19 Okoŋ, mi wana pɛɛku waŋnda sawala Mɛlɛkalaŋ ndo dimul Chiisu aa: “Wana Pɛɛkaa, ba o ba ŋ kɔ, I cho num tolɔɔ kɔɔli.”+ 20 Kɛ mi Chiisu dimul ndu aa: “Visiaa yonduaa nɔ fondaŋnda lɔlaalaŋ, mi youwa bɛɛ nɔ waaŋnde. Kɛ Po wanachioo ndu nɔ naa yambaa lebol te.”+ 21 Okoŋ, mi buɛi ndɔ cheleŋ dimul ndu aa: “Masanɔɔ, I kua wɔ fɛlɛŋ mi kɔ kumbu finya nuu.”+ 22 Mi Chiisu dimul ndu aa: “Wanaa vi wa kumbu wanaa ndaa vilɛiya, kɛ num tol la kɔɔli suee.”+
23 Mɛɛ Chiisu luɛi o dɛndɔɔ niŋ, mi buɛiyaa nduaa tual ndu kɔɔli.+ 24 Okoŋ, mi hueiyii bɛndu bɛnduei kandu hɔŋndo, dɛndɔɔ wa niŋ le mɔɔwa. Kɛ Chiisu waŋnuŋ o luaŋ.+ 25 Ma kɔ tindi ndu, ma dimul ndu aa: “Masanɔɔ, piŋi naa fɔ! Ŋ hiŋ lo o peelo.” 26 Kɛ mbo nyuna nda aa: “Le yɛɛnɛ nya cho yɛ siooŋnde? Baa la nɔ laalaŋ bɔɔ le?”+ Okoŋ, mbo chaŋ mbo kpaa hueiye a mɛŋma wa hiilɔŋndo waŋ. Mi nyɛ o nyɛ mei doŋ.+ 27 Mɛɛ hei yɔŋnuŋ, mi kɔndɔfillo bii buɛiyaa nduaa tau. Ma dimi aa: “Wana maavɛɛ cho yɛ hoo? Mi hueiye a mɛŋndaŋ bɛɛ diikuŋ ndu.”
28 Mɛɛ o fuuluu o kɔŋgɔɔ pilɔɔ o tanda Kadaluiŋ ndo niŋ, mi puaa nyinaa wɔɔŋnda wa kɔɔli wa a ŋiɔɔŋ fula o sɛilaŋ* tɛɛŋ, ma komal Chiisu.+ Puaa haa ndaa wueenuŋ bɔɔ, nduyɛ wana o wana ndoo bii kɔllo mbo keeku o nɛi koŋ te. 29 Mɛɛ nda che dɔɔ Chiisu, ma deŋi choo choo kpeleŋ aa: “Yɛɛnɛ ŋ yeema yɛ ma tosal naa, num Po Mɛlɛkaa?+ Baa le naa nyɛpalaa tusioo choo ŋ hiŋ nanuŋ ni+ tuupa mi teleŋndo fuuluu?”+ 30 Peuwa kunda bɛndoo wa nda diolaŋ ikɛi.+ 31 Mi nyinaa wɔɔŋaa kaŋ nyɔɔlu Chiisu aa: “Te a soli naa pɛ puaa haa niŋ, tosa miŋ kɔ luɛi peuwa niŋ.”+ 32 Mi Chiisu dimul nda aa: “La kɔ!” Okoŋ, ma fula ma kɔ luɛi peuwa niŋ. Mi peuwaa kaŋ kpou kua o kɔŋgɔ feke fekioo, ma deli o peelo ma wu. 33 Mi wanaa wa peuwa mandaa wa nyaanuŋ ma kua chiee. Okoŋ, ma dounuŋ waŋnda kona a nyɛ o nyɛ yɔŋnuŋ. Ma chɔm nda vɛlɛ nyɛ yɔŋnuŋ a puaa ŋiɔɔŋaa nyinaa wɔɔŋnda wa kɔɔli wa wo. 34 Mi chioo kpou kuanduŋ le hunɔɔ naa Chiisu chua. Mɛɛ nda che ndu, ma nyɔɔlu ndu le mbo faŋaŋ o tanda ndaa niŋ.+