Walta Kiilaa
26 Mi Akilipa+ dimul Pɔɔl aa: “A nɔ dioo le ma soo le numpila.” Okoŋ mi Pɔɔl heelu baa mbo kandu kɔɔsaa. Mbo dimi aa:
2 “Masaa Akilipa, I cho a kɔl kɛndɛ le simndaŋ num o hɔl hau, mi kɔɔsa le yapila a sɔɔŋ Chuuwa hɛɛnduu ya choo woŋ+ kpou okɔɔ, 3 taama taama le mɛɛ ŋ sina naamula Chuuwa, a sɔɔŋ nda hiŋaŋ diomndaŋ choo woŋ nyɛkɛndɛi yɛ. Lelaŋ a yandii, biuŋ ma yaŋ ya nilaŋ.
4 “Chɔŋ o chuaambɔyɛi nii niŋ, Chuuwa kpou a sina kaa nuu chɔŋ a teleŋ ya wa o naalo wo, mbo huŋ bii a teleŋ ya wa Chulusalɛm ndo.+ 5 Waŋnda haa sina ya niŋ le teleŋ vilɛi. Ndapila nɔla ma chɔm num maa o kunda Falisiiya choo ya wa ni.+ Nduyɛ Falisiiya hiou nyɛ sawaa dimi wo tolɔɔ kɔɔli+ a Chuuwaa cheleŋ. 6 Kɛ le tiindaŋ ya nɔ o diomnde Mɛlɛka mel finyaa naa mamaa leŋ niŋndo+ nda cho ya kɔɔsaa ni. 7 Le tiindaŋ pilɔɔ hoo kpe kayii 12 nde cho Mɛlɛka piɛiyo idii a ichɔl ni. Nduyɛ le tiindaŋ pilɛ koŋ kpe Chuuwa+ cho ya kɔɔli ni Fallo Masaa.
8 “Le yɛɛnɛ mi i wa nya ikala o ba le laalaŋndo maa Mɛlɛka miŋgi wanaa vi wa yoomu? 9 Ya sim hoo wo, mi kindiŋ o nɛi o nɛi niŋ le mi simul diola Chiisu fula Naasaluɛi yo. 10 Lende kpeekpei ya tosa Chulusalɛm ni. Mi masaa wanaa soliaa lasalaa ke ya dioo+ mi duau wanaa laalaŋnda a bɔɔbɔɔ o chiɛila manyumndaŋ niŋ.+ Te ndaa dimi pɛ le nda diyɔɔ, mi yaa chɛl. 11 Teleŋnda bɔɔbɔɔ, mi yaa tusi nda nyɛpalaa choo o chiɛila Chuuwa piɛi Mɛlɛka laŋ niŋ kpou. Nduyɛ mi yaa kindila nda le ma mal laalaŋ ndaa. Mɛɛ suɛi ndɛi nɛi ya tei, mi kandu kɔlaŋ o chieeŋ cheleŋ niŋ le nda nyɛpalaa tusioo choo.
12 “Paale pilɛ, mi masaa wanaa soliaa lasalaa ke ya dioo le kɔlaŋ Damasikɔɔ mi kɔ tosa nyɛ pilɛ koŋ kpe loŋ. 13 I lo kɔlaŋ o nɛi, a teleŋ paaleŋ le sim o bolleŋ choo wo Fallo Masaa, mi paŋgele hiou paaleŋ diondɔɔ wo fula o choo choo niŋ, mbo tiu ya choo silɔ a wanaa wa kɔlaŋ a ya latulu wa kpou.+ 14 Mɛɛ naa kpou deli lɛŋ, mi tuɛi mi diomndo suaa naa ya chua o Hibuluiye niŋ aa: ‘Sɔɔ, Sɔɔ, le yɛɛnɛ ŋ cho yɛ ya nyɛpalaa tusioo choo? A cho yɔŋulɔŋ te a lɔɔ pɛ pelei o yɔm sɛɛmbiaa.’* 15 Kɛ mi nyuna aa: ‘Num nɛɛnɛ?’ Mi Masanɔɔ muli aa: ‘Ya ni, Chiisu, wana ŋ cho nyɛpalaa tusioo choo wo. 16 Chɔŋ ma sim. Le saboo hoo ya chɔɔmuŋ num ni, le mi hɛli num ma wa buɛi ni, ma dimul waŋnda sɔɔŋ ŋ che woŋ, a sɔɔŋ ya cho tosa ma che a ya okɔɔ woŋ.+ 17 I cho num piŋi waŋnda haa a wanaa cho ŋChuu le wa o ba. Nduyɛ o nda lo ya cho num viomɔɔ ni+ 18 le ma kumbi nda hɔltaŋ,+ ma fula o nyumndaŋ niŋ+ ma hiŋ o paŋgeloo,+ nduyɛ ma fula o kpaaya Setana+ wo bɛŋgu ma hiŋ naa Mɛlɛka chua, le mbo mal nda haki le hakila ndalaŋ.+ Mbo fanda nda, nduyɛ mbo dindi nda mɛɛ o tosa a wanaa laalaŋnda apiliaa yɛ.’
19 “Lelaŋ, Masaa Akilipa, nyɛ ya tuei o yilaŋnde niŋndo, I kɛɛ le ndu diikɔŋndo le. 20 Mi kandu waŋnda suɛi Mɛlɛkɛi dimullo Damasikɔɔ.+ Fulaa loŋ, mi kua Chulusalɛm+ a lɛŋnde Chudiaa leŋ kpou, a o wanaa cho ŋChuu le wa lo. I wa nda yooŋgoo dimullo le ma wookuŋ, ma muliŋ naa Mɛlɛka chua. Nduyɛ ma tosa sɔɔŋ chɔm maa a wookuŋ ndoŋ.+ 21 Le saboo hoo Chuuwa bii ya o chiɛi Mɛlɛkaa niŋ ni, ma kindiŋ le ya diyɔɔ.+ 22 Kɛ le mɛɛ ya sɔla malaa Mɛlɛka o ba yɛ, haaa paale hauleŋ ndeŋ, I cho wɔ hiouwɔɔ lachi a seileŋ timbioo o waŋnda lo, wana bɛndu ni, wana pɔmbɔ ni. Sɔɔŋ wanaa ndaa suaa le Mɛlɛka wa, a sɔɔŋ Muuse dimi maa ŋ nɔ le yɔŋnɔŋndo woŋ kinɛi ya cho nda dimullo ni.+ 23 Maa Kiliti nɔ le saŋgaa sɔlaa,+ nduyɛ mbo wa wana tasoo le fulasɛiniŋndo sɔlaa.+ Ndu ndoo nɔ le yooŋgoo dimioo ni, nduyɛ mbo hiŋ a nyɛ teŋgaa o waŋnda haa lo, a wanaa cho ŋChuu le wa.”+
24 Pɔɔl lo sɔɔŋ muŋ dimioo a ndupila okɔɔ mi Fɛsitɔɔ dimi choo choo aa: “Seemaa ŋ cho nuaa ni, Pɔɔl! Dɛnɛ sinaa bɛndoo chal le num bolleŋ hiŋ!” 25 Kɛ mi Pɔɔl dimi aa: “O cho seema le ya cho le Wana Bɛndoo Fɛsitɔɔ. Sɔɔŋ tonyaŋ a sɔɔŋ kɔl kaloŋ ya cho dimioo ni. 26 Masa ya cho sɔɔŋ muŋ dimullo a kɔllo kpou wo sina a muŋ okɔɔ nyɛkɛndɛi. I laalaŋ kɛsɛ maa sɔɔŋ muŋ i pilɛ bɛɛ cho mbo kɛɛ ndi sina le, kanifuule i kɛ kɛ tosaŋ o lesɔŋgi le.+ 27 Num yɛ, Masaa Akilipa, a laalaŋ pa nyɛ wanaa ndaa suaa le Mɛlɛka wa dimi wo? I sina maa a laalaŋ.” 28 Kɛ mi Akilipa dimul Pɔɔl aa: “O teleŋ biŋgi bɛŋgu a cho ya siiŋguu Kilisiɔŋnɔɔ.” 29 Mi Pɔɔl dimi aa: “O wa o teleŋ biŋgi bɛŋgu ɔɔ o teleŋ vilɛi bɛŋgu, I cho Mɛlɛka piɛileŋ maa num ni, a wanaa tuei ya hau suɛi nanuŋ nda kpou simnuŋ maa ya. Kɛ o wa o yɔlɔŋ maa ya le.”
30 Okoŋ mi masaa Akilipa, masa ibuŋgaa, Bɛnisi a wanaa wa loŋ nda kpou chaŋ isisi. 31 Mɛɛ nda wa kɔŋndaŋ, ma kandu dimulaŋndo aa: “Poo hoo tosa isɔɔ o isɔɔ wɔɔŋ o nɔ mbo sɔla piɔmndo ɔɔ ma dɔu ndu o chiɛi manyum niŋ te.”+ 32 Okoŋ mi Akilipa dimul Fɛsitɔɔ aa: “Te poo hoo ndoo chii niŋ dimi le suɛi nduɛi hivioo o Siisa lo le, wanaa mal ndu.”+