Walta Kiilaa
24 Palɛi i ŋuɛɛnu okoŋ kɔɔli, mi wana bɛndu wanaa soliaa lasalaa diolaŋ aa Ananaaya+ huŋ Sisaliaa a laŋgbaa kalla apum, a wana suaa le nda wo diolaŋ aa Tɛtulɔɔ. Okoŋ, ma huŋ bii sei Pɔɔl lo o masa ibuŋgaa lo.+ 2 Mɛɛ masaa dimul Tɛtulɔɔ le mbo soo, mbo kandu Pɔɔl sɔɔŋ hɛɛnduuwo choo. Mbo dimi aa:
“Naa kpou ŋ cho kɔl nyuloo tueiyɔɔ yeela o masale numndeŋ bɛŋgu o lɛŋnde naaleŋ niŋ, le mɛɛ ŋ cho sɔɔŋ chaa kɔɔnaa yɛ. 3 Le teleŋ o teleŋ, ŋ cho num balikaa mello ba o ba fee Wana Bɛndoo Felisi, le sɔɔŋ kɛndɛŋ ŋ cho muŋ tosaa woŋ. 4 I yeema mi chua teleŋ numndo tau le. Lelaŋ, a yandii yaŋ naa nilaŋ miŋ tɛɛsial num chobe. 5 Ŋ saaluŋ maa wana mɛliaa lakpundɔɔ poo hoo cho ni.+ O cho keiyo waŋnda bolle kindioo+ Chuuwa tɛɛŋ ba o ba fee o lɛŋndeŋ choo le masaleŋ simullo. Ndu cho bolleŋ le kunda lepiɛi Naasaluɛiya ni.+ 6 Mbo kindiŋ vɛlɛ le chiɛi Mɛlɛkaa nɔɔliaa. Lelaŋ naŋ bii ndu ni.+ 7* —— 8 Te a nyuuniaa ndu pɛ, numpila cho tonyaa saalɔŋ a nyɛ o nyɛ naŋ dimi a ndu okɔɔ.”
9 Okoŋ, mi Chuuwa bɛɛ sɔɔŋguu le Pɔɔl sɔɔŋ hɛɛnduuwo choo. Ma dimi maa tonya sɔɔŋ muŋ cho ni. 10 Mɛɛ masa ibuŋgaa tuulial Pɔɔl le mbo soo, mi Pɔɔl dimi aa:
“I sina kpendekele maa a bii niŋ waŋnda yamaŋ kilullo o lɛŋndeŋ ndeŋ niŋ le wɔsila bɔɔbɔɔ. Lelaŋ, I cho a kɔl kɛndɛ le mi soo num o hɔl le yapila.+ 11 Numpila yaasiaa wɔ tonyaa o suɛi hei niŋ. Chɔŋ a teleŋ ya kuɛ Chulusalɛm le Mɛlɛka piɛiyo wo huŋ bii a suŋ suŋ, o hiu wɔ bɛɛ palɛi 12 te.+ 12 A chi ya sɛɛŋgiaŋ a wana o wana o chiɛi Mɛlɛkaa niŋ te. Nduyɛ, I kindi wana o wana lebol o chiɛila Chuuwa piɛi Mɛlɛka laŋ niŋ ɔɔ o chioo niŋ te. 13 A nɔla ma chɔm num maa sɔɔŋ nda hɛɛnduu ya muŋ choo woŋ cho tonya le. 14 O ya chɛl num o hɔllo cho ni maa, o nda veelu aa kunda lepiɛiyo wo, o nɛiyo hoo choo ya cho wali Mɛlɛka finyaa naa mamaa tosaa ni.+ I laalaŋ a nyɛ o nyɛ cho o poonyiaa o Sawala Mɛlɛka ke Muuse laŋ niŋ a nyɛ wanaa ndaa suaa le Mɛlɛka wa dimi wo.+ 15 Nduyɛ I nɔ tiindaŋndo o Mɛlɛka niŋ mɛɛ waŋnda haa bɛɛ nɔ tiindaŋndo yɛ, maa wanaa sandu wa a wanaa sendu le wa+ cho miiŋgu yoomu.+ 16 Le hei, I cho kindiŋndo teleŋ o teleŋ le mi nɔ kɔl iyama walaŋndo Mɛlɛka o hɔl vɛlɛ a waŋnda chieeya.+ 17 Wɔsila bɔɔbɔɔ hiouwɔɔ, mi kua Chulusalɛm le wanaa niaa kanioŋ* kioo le nda malaa,+ a salalaŋ solioo o Mɛlɛka lo. 18 Teleŋ ya wa sɔɔŋ muŋ tosaa wo, a komal la niŋ o diandaa o chiɛi Mɛlɛkaa niŋ a mɛɛ sawaa dimi yɛ.+ I kue a faŋga kɔɔli, kɛlɛŋgaa mi mal isɔɔ le. Kɛ Chuuwa apum wa loŋ a ndaa fula Eesiaa wa. 19 Ndoo bɛnda bɔɔ mi ndaa wa nanuŋ, ma chɔm num sɔɔŋ kɛ kɛ nda cho ya hɛɛnduuwo choo.+ 20 Te koŋ te, wanaa cho haa nanuŋ nda chɔm ndɔ num suɛi wɔɔŋ ya tosa ve, teleŋ ya wa isisi Laŋgbaa Kalaa Kialu Yamaŋ Nda o hɔl lo. 21 Mɛɛ dɔɔ le suɛi ya dimi hei choo choo kpeleŋ teleŋ ya wa isisi nda tɛɛŋndo. Ndi cho ni: ‘Le tiindaŋ ya nɔ maa wanaa vi wa cho miiŋgu yoomu wo nda cho ya hau kɔɔsaa nya o hɔl ni.’”+
22 Felisi ndoo sina isɔɔ a Nɛi Chiisu chɔm waŋnda le waa lechoo wo okɔɔ.+ Mbo bii suɛi ndɛi, mbo dimi aa: “Teleŋ o teleŋ Lisiaa, wana cho puaa chɔuwa bolleŋ ndo hiŋ pɛ, I cho suɛi nyɛi yamɛi kiolɔɔ.” 23 Okoŋ mbo dimul wana bɛndu puaa chɔuwa maa a kɛsi Pɔɔl o biyɔɔ niŋ, kɛ ma mal ndu tiŋ yɔndi, nduyɛ mi wanaa nduaa wa hunɔɔ naa ndu chua le ndu malaa a nyɛm o hauba woŋ.
24 Mɛɛ palɛi hiou i tiŋ, mi Felisi huŋ nda laa ndɔ, Dusila. Chuunɔɔ o wa ni. Mbo viam waŋndo le ma veelu Pɔɔl. Nduyɛ mbo yaŋ ndu nilaŋ mɛɛ o wa suɛi a laalaŋ o nɔ o Chiisu Kiliti niŋndo okɔɔ.+ 25 Kɛ mɛɛ Pɔɔl wa suɛi a nyɛ cho sakpo Mɛlɛka o hɔl lo, kɔl numndo baa tiuwo, vɛlɛ a kɔɔsɔ Mɛlɛkaa okɔɔ,+ mi siooŋnde bii Felisi. Okoŋ mbo dimi aa: “Kɔ wɔ pɔɔ. I cho num vɛlɛ miŋgi veelu te I sɔla pɛ fonda.” 26 A koŋ kpou, Felisi wa yiyaŋndo maa Pɔɔl cho ndu kanioŋ ke. Le sabu koŋ, mi ndoo veelu ndu teleŋnda bɔɔbɔɔ le baltaŋ dɔwɔɔ a ndu. 27 Kɛ mɛɛ wɔsilaŋ la hiou la tiɔɔŋ, mi Pɔsiɔɔsi Fɛsitɔɔ simnuŋ masaa o fondaŋ Felisi wo. Kɛ le mɛɛ Felisi ndoo yeema mbo nɛŋi Chuuwa kɔl lɛ,+ mbo mɛi Pɔɔl o biyɔɔ niŋ.