Tɛsaloniaŋ Diiŋ Ndɔɔ
3 Puaapiliaa, I yeema mi mɛɛlu nya dimul maa, la hiou lachi a piɛileŋ le naa,+ le mi diom Chɛhowa* wo hiou lachi a pɛŋgɛlaŋndo chɔ chɔ,+ nduyɛ mi waŋnda chɛl ndu a lebɛɛ mɛɛ i cho tosaŋndo nya tɛɛŋ yɛ. 2 La piɛi vɛlɛ le mi Mɛlɛka manda naa wanaa yɔŋ wɔɔŋaa kɔl vesɛiya o ba.+ Kanifuule, o cho waŋnda kpou le cho wanaa laalaŋnda le.+ 3 Masanɔɔ feŋaŋ o lediom te. O cho nya yoomuaŋ luei, nduyɛ mbo manda nya wana dɛnɛ wɔɔŋndo o ba. 4 Naŋ cho buɛiyaa Masanɔɔ wa, ŋ nɔ tiindaŋndo o nya niŋ. Ŋ sina maa la cho nyɛ naŋ dimul nya wo tosaa, nduyɛ ŋ laalaŋ maa la cho hiouwɔɔ lachi a ndu tosaa. 5 Maa Masanɔɔ hiou lachi a kɔlta nyalaŋ mandaa nyɛkɛndɛi le mi la kaala Mɛlɛka,+ nduyɛ mi la biunuŋ+ le Kiliti.
6 Puaapiliaa, ŋ cho nya silaa o diola Masanɔ naa Chiisu Kiliti laŋ niŋ maa, la holnuŋ wanaa tosa sɔɔŋ laasi laasi,+ nduyɛ ma kɛɛ sɔɔŋ naŋ pɛɛku nya woŋ tosaa wa le.+ 7 Nyapila sina maa la nɔ mi la tol tamasi naa kɔɔli,+ kanifuule boondii naŋ wa nya tɛɛŋnde, ŋ ve sɔɔŋ tosa laasi laasi, 8 ɔɔ miŋ de nyɛdiaa wana fondo fuu le.+ Kɛ idii a ichɔl ŋ wa wallo o kala kala, le halikpeŋ ŋ siiluu wana o wana kalaŋ naa le.+ 9 Ŋ nɔ dioo le miŋ nyuna nya le malaa,+ kɛ naŋ yeema miŋ kɛsul nya tamasi kɛndɔɔ le mi la tol ndu kɔɔli.+ 10 Boondii naŋ wa nya tɛɛŋnde, mi naŋ sila nya aa: “Wana o wana kɛɛ le wallo tosaa pɛ, la ke ndu nyɛdiaa le.”+ 11 Kanifuule, ŋ tuei maa wanaa pum cho nya tɛɛŋ, a cho sɔɔŋ tosaa laasi laasi,+ nduyɛ a chɛl le wali kposoŋ te. Mɛɛ keiyo sondolaŋ wouwo o sɔɔŋ pilaŋ niŋ.+ 12 Ŋ cho nda silaa, nduyɛ miŋ wa nda nyɔɔloo o diola Masanɔɔ Chiisu Kiliti laŋ niŋ maa, a pɛŋgi sondolaŋ wouwo o sɔɔŋ pilaŋ niŋ, okoŋ ma tosa wallo le nyɛ nda diaa.+
13 Nya puaapiliaa tuaa, la wu ŋdial a sɔɔŋ kɛndɔŋ tosaa le. 14 Kɛ wana o wana kɛɛ pɛ nyɛ naŋ dimi o yauwo hoo niŋndo tosaa, la mandaŋ a ndu,* nduyɛ mi la pɛŋgi holiaŋndo a ndu,+ le halikpeŋ mi siɔmbulaŋ la bii ndu. 15 A koŋ kpou, la chua ndu maa yaamɔɔnɔ nya le, kɛ la hiou lachi a ndu silaa+ maa puaapilɛnɔ.
16 Maa Masanɔ kɔl nyuloo ke nya kɔl nyuloo teleŋ o teleŋ o nyɛ o nyɛ niŋ fɔ!+ Maa nya kpou Masanɔɔ wa a nya latulu fɔ!
17 Ya Pɔɔl cho nya yilɔɔ ni. I yil nya lapi.+ Nuaa ya poonyiaa o yaula nilaŋ niŋ kpou ni, le mi la sina maa ya poonyiaa ni.
18 Maa kɛndɛi bɛnduii Masanɔ naa Chiisu Kiliti ve wa latulu a nya kpou.