Koloosiaŋnda

4 Nya nɔ chiaa wa, la bii nda nyɛkɛndɛi, nduyɛ mi la tosal nda nyɛ cho sakpo wo. La sina pɛŋgu maa nya bɛɛ nɔ Masanɔɔ o choo choo niŋ.+

2 La lambaŋ piɛileŋ.+ La wa lahɔl, nduyɛ mi la wa Mɛlɛka balikaa mello o piɛileŋ niŋ.+ 3 La wa vɛlɛ piɛileŋ le naa,+ le halikpeŋ mi Mɛlɛka kumbul naa dioo le miŋ dimi yooŋgu ndɔɔ, okoŋ miŋ soo a sɔɔŋ viaŋnaŋ cho a Kiliti okɔɔ woŋ. Nduyɛ, le sɔɔŋ muŋ ya cho o biyɔɔ niŋ ni.+ 4 Hei tosa vɛlɛ mi dimi yooŋgu kɛndɔɔ nyɛkɛndɛi, mɛɛ ya nɔ le ndu dimioo yɛ.

5 La kela wanaa cho wanaa laalaŋ te wa tɛɛŋ a taasi, nduyɛ mi la soliŋ teleŋ nyaa kpeku nyɛkɛndɛi.+ 6 Diomnda nyalaŋ la nɔ mi la yeela lɔɔlɔɔ mɛɛ hɛlle tosa nuaa mi nyɛdiaa yeela yɛ.+ Keŋ tosa mi la sina mɛɛ nya muli wana o wana diom yɛ.+

7 Tichikɔɔ+ cho nya lakɔ kona dounɔŋ kpou a ya okɔɔ. Puaapilɛnɔ ni kaalaa o cho ni, nduyɛ o cho wana wali kɛndɛ. Naa ndaa cho wali Masanɔɔ tosaa latulu ni. 8 I cho ndu viomɔɔ naa nya chua le halikpeŋ mi la sina la waa naŋ a naa okɔɔ, nduyɛ mbo dɛɛniaa nya kɔltaŋ. 9 Nda Onisimɔɔ+ cho lakɔ ni, wana waa loŋ. Ndu bɛɛ cho wana wali kɛndɛ, nduyɛ puaapilɛnɔ ni kaalaa o cho ni. A cho nya lakɔ kona doonɔŋ a nyɛ o nyɛ cho yɔŋnɔŋndo nanuŋ okɔɔ.

10 Aluitakɔɔ,+ chaaŋ ni naŋ cho o biyɔɔ niŋndo yil nya tau. Maki,+ wanayɛi Banabaa ve bɛɛ yil nya (a ndu okɔɔ naŋ poonyial nya ni maa te o kuɛ pɛ o nya lo, la bii ndu nyɛkɛndɛi).+ 11 Chiisu, o nda veelu aa Chɔsitɔɔ wo bɛɛ yil nya. O wanaa sɔla hivi chiɛi kɔɔlioo wa choo o fula ni. Haa kinɛi cho wallo a ya latulu ni le Masale Mɛlɛkaleŋ. Nduyɛ a luei ya niŋ yoomuaŋ tau. 12 Ɛpafulɔɔ,+ wana waa loŋ yil nya. Buɛi Chiisu Kiliti wo o cho ni. Teleŋ o teleŋ o cho piɛileŋ kpeekpei le nya, le halikpeŋ mi la sim yi, kiisaŋ o kiisaŋ ve nya a nyɛ Mɛlɛka cho tosa wo okɔɔ le. 13 I cho lesei maa o cho saŋgaa kpeekpei le nya, a waŋnda Lawodiisiaa, a haa Hayaluapɔlisi.

14 Luku+ chaaŋ naa, o cho wana chiɔuwaa wo yil nya. Dimaasi bɛɛ yil nya.+ 15 La yil la puaapiliaa Lawodiisiaa. Mi la yil la vɛlɛ yema Nimfa, a kunda chuuŋgiaŋ o ndu lo chiɛiniŋ ndo.+ 16 Te la veelu pɛ diomndaŋ o yauwo hoo niŋ, la tosa vɛlɛ mi kundaa Lawodiisiaa bɛɛ veelu diomndaŋ leniŋ.+ Nduyɛ mi nya bɛɛ veelu diomndaŋ o yau ya poonyial nda wo niŋ. 17 La dimul vɛlɛ Akipɔɔ+ maa o handu kɔllo o wali Masanɔɔ ke ndu le tosaa wo choo, le mbo tosa ndu nyɛkɛndɛi.

18 Ya Pɔɔl poonyiaa yauwo hoo ni le nya yilɔɔ.+ La loonuŋ maa I cho o biyɔɔ niŋ.+ Maa kɛndɛi bɛnduii Mɛlɛkɛi wa nya choo fɔ!