Kɔliŋtiaŋ Tasoo
14 La hiou lachi a kaalaa chɔmndo, mi la nuuviaa kela fula Mɛlɛka o ba laŋ, kɛ taama taama waŋnda yooŋgu Mɛlɛkaa dimullo.+ 2 Wana suaa o sɔɔŋ maŋgalaŋ yɛ yiɔɔŋ niŋ ndo, o cho o waŋnda chieeya lo le o suaa le, kɛ o Mɛlɛka lo, kanifuule wana yeŋ ndu lani le.+ Nduyɛ nyina Mɛlɛkaa mala ndu ni le sɔɔŋ viaŋnaŋndoŋ dimioo.+ 3 Kɛ wana dimul waŋnda yooŋgu Mɛlɛkaa wo, mi suɛi o dimul nda ve luei nda yoomuaŋ, mi i dɛɛniaa nda kɔltaŋ, nduyɛ mi i tosa ma simul kɔl. 4 Wana dimi sɔɔŋ maŋgalaŋ ndo, ndupila o luei yoomuaŋ ni. Kɛ wana dimul waŋnda yooŋgu Mɛlɛkaa wo, kunda wanaa laalaŋnda o luei yoomuaŋ ni. 5 I yeema mi nya kpou dimi sɔɔŋ maŋgalaŋ yɛ yiɔɔŋ,+ kɛ o ya hiou yeema le mi la tosa wo cho waŋnda yooŋgu Mɛlɛkaa dimullo ni.+ Wana dimul waŋnda yooŋgu Mɛlɛkaa wo hiou a wana dimi sɔɔŋ maŋgalaŋ yɛ yiɔɔŋ ndo. Kanifuule, mɛɛ mi wana dimi sɔɔŋ maŋgalaŋ ndo hivul waŋnda malaŋ o luei nda yoomuaŋ. 6 Puaapiliaa, te I kuɛ pɛ naa nya chua mi wa sɔɔŋ maŋgalaŋ yɛ yiɔɔŋ dimioo, koŋ mala niŋ nya pa? Te I yeema pɛ mi mala nya, mɛɛ mi dimul nya sɔɔŋ Mɛlɛka chɔm ya woŋ,+ ɔɔ sɔɔŋ ya sina pɛŋgu woŋ,+ ɔɔ yooŋgu Mɛlɛkaa, ɔɔ mi pɛɛku nya.
7 Lende koni i cho a nyɛm chaaŋ ni, mɛɛ sɛŋndeŋ a towaa cho nuaa yɛ. Te wana hɔŋ sɛŋndeŋ ndo ɔɔ wana luaa towaa wo soliŋ nyɛm chaaŋ muŋ kpeku nyɛkɛndɛi le, wana tiuba ma sina teŋgeŋndo muŋ tɛɛŋ te. 8 Te wana hɔŋ bulu chɔuwo wo chiee ndu hɔŋ te, wana o wana nɔla mbo toosiaŋ le chɔuwo le. 9 Lende koni i cho ni. Te o cho mi la soo diomnda waŋnda bii bila chɔ chɔ laŋ te, vɛɛ nda looku yɛ ma sina nyɛ dimiŋndo pɛŋgu? Bɔɔluu fondoo fuu nya wa koŋ ni. 10 Sɔɔŋ maŋgalaŋ cho tau o chieeŋndo choo, nduyɛ muŋ kpou mi waŋnda bii muŋ bila. 11 Te I bii suɛi maŋgalɛi waŋndo cho dimioo ve bila le, miallo ya wa le wana koŋ ni, nduyɛ ndu bɛɛ miallo o wa le ya ni. 12 Lende koni i cho a nya ni. Le mɛɛ nya yeema suliŋnda nyina Mɛlɛkaa yɛ, la kindiŋ mi la sɔla laŋ tau le kunda wanaa laalaŋnda yoomuaŋ lueiyo.+
13 Lelaŋ, wana dimi hoo suɛi maŋgalɛi cheleŋndo piɛi Mɛlɛka le mbo nɔla waŋnda ndi hivul.+ 14 Te o yɔŋ pɛ mi wa piɛileŋ o suɛi maŋgalɛi cheleŋ niŋ, o cho ya le wa suɛi le, kɛ nyina Mɛlɛkaa wa ya koŋ malaa ni. Lelaŋ, I ve o yapila niŋ te. 15 Yɛɛnɛ ya cho yɛ niko tosa? I cho piɛi a ke ya sɔla nyina Mɛlɛkaa o ba wo, mi piɛi vɛlɛ o suɛi maŋgalɛi ya bii bila ve niŋ. I cho chondei soli a ke ya sɔla nyina Mɛlɛkaa o ba wo, mi soli vɛlɛ chondei o suɛi maŋgalɛi ya bii bila ve niŋ. 16 Te a piɛi pɛ a ke ŋ sɔla nyina Mɛlɛkaa o ba wo, mi wana nɔ sinapɛŋgu koŋ te wo bii nyɛ ŋ cho dimioo wo bila le, vɛɛ o nɔla yɛ mbo dimi aa “Amiina”?* 17 O yɔŋ bɛɛ ma piɛi nyɛkɛndɛi, piɛile leŋ le luei wana koŋ yoomuaŋ te. 18 I mel Mɛlɛka balikaa le mɛɛ ya dimi sɔɔŋ maŋgalaŋ tau mi hiau nya kpou yɛ. 19 Te I wa pɛ wanaa laalaŋnda tɛɛŋ o kundaa niŋ, o bɛnda mi soo o yɔŋ bɛɛ diomndaŋ la ŋuɛɛnu o suɛi maŋgalɛi waŋnda bii bila ve niŋ, nduyɛ mi pɛɛku nda, mbo hiau diomndaŋ waalaŋ tɔ soliŋndo kpeku o suɛi maŋgalɛi cheleŋ niŋ.+
20 Puaapiliaa, la simnuŋ chuaambuaa pɔmbuaa o sinapɛŋgu nyaa niŋ te.+ Kɛ la wa chuaambuaa pɔmbuaa le dɛnɛ wɔɔŋndo,+ nduyɛ mi la simnuŋ kaasoŋnda o sinapɛŋgu nyaa niŋ.+ 21 I cho i poonyiaa o Sawaa* niŋ aa: “Chɛhowa* dimi aa, ‘I cho wanaa dimi sɔɔŋ maŋgalaŋ yɛ yiɔɔŋ nda a mialla soliŋ kpeku le suɛi o waŋnda haa lo. A koŋ kpou, a cho kɛɛ le ya nilaŋ yaŋɔɔ.’”+ 22 Lelaŋ, o cho le wanaa laalaŋnda le sɔɔŋ maŋgalaŋ cho le, kɛ le wanaa cho wanaa laalaŋ te wa.+ Nduyɛ, waŋnda yooŋgu Mɛlɛkaa dimullo cho le wanaa cho wanaa laalaŋ te wa le, kɛ le wanaa laalaŋnda. 23 Te o wa yɛ mi la chuuŋgiaŋ o fondaŋndo opum, okoŋ mi la kandu sɔɔŋ maŋgalaŋ yɛ yiɔɔŋ dimioo, kɛ mi wanaa nɔ sinapɛŋgu koŋ te wa ɔɔ wanaa cho wanaa laalaŋ te wa luɛi nya tɛɛŋ, a dimi nuaa maa seemaa le nya seema le? 24 Kɛ te nya kpou wa pɛ yooŋgu Mɛlɛkaa dimioo, okoŋ mi wana cho wana laalaŋ te wo ɔɔ wana nɔ sinapɛŋgu koŋ te wo luɛi nya tɛɛŋ, sɔɔŋ o cho tueiyɔɔ woŋ cho ndu miŋgi o nɛi, nduyɛ mbo yaasiaŋ ndupila nyɛkɛndɛi. 25 Sɔɔŋ veŋnuŋ ndu o kɔllo niŋndoŋ cho fula kpendekele, mbo del lɛŋ a hɔlla a kuumbaa kpu. Okoŋ mbo saŋgala Mɛlɛka, mbo dimi aa: “Lekɛndɛi, Mɛlɛka cho nya tɛɛŋ.”+
26 Puaapiliaa, yɛɛnɛ nya nɔ yɛ niko mi la tosa? Te la chuuŋgiaŋ pɛ naapilɛ, waŋndo soli chondoŋ, hoo pɛɛku, hoo dimi sɔɔŋ Mɛlɛka chɔm ndu woŋ, hoo dimi suɛi maŋgalɛi cheleŋnde, nduyɛ mi hoo hivul waŋnda.+ La tosa sɔɔŋ muŋ kpou le yoomuaŋ lueinaŋndo. 27 Te waŋnda wa pɛ suɛi maŋgalɛi cheleŋ dimioo, a hiau a ŋiɔɔŋ ɔɔ a yaa choo le. A soo a pilɛŋ pilɛŋnda, nduyɛ mi waŋndo wa le hivioo.+ 28 Te wana hiviaa ve le, mɛɛ o meinuŋ o bɔŋaŋ koŋ, mbo soo o Mɛlɛka lo o kɔl niŋ. 29 Wanaa suaa le Mɛlɛka wa a ŋiɔɔŋ ɔɔ a yaa soo,+ mi a tuaa kelu yamɛi. 30 Te waŋndo o pilɔɔ lo pɛ ichali mbo sɔla yooŋgu Mɛlɛkaa, wana kandu suɛiyo mei, mi ndu soo. 31 Nya kpou dimi yooŋgu Mɛlɛkaa a pilɛŋ pilɛŋnda, le mi waŋnda kpou pɛɛku, nduyɛ ma sɔla kɔl dɛɛniaa.+ 32 Te wanaa suaa le Mɛlɛka wa a wa pɛ ke nyina Mɛlɛkaa soliŋndo kpeku, a nɔ ma chaa ndu soliŋ kpeku. 33 Mɛlɛka tosa sɔɔŋ laasi laasi le, kɛ Mɛlɛka kɔl nyuloo o cho ni.+
Mɛɛ sɔɔŋ cho kɔlaŋ o kundala wanaa laalaŋnda* niŋ kpou yɛ, 34 waŋ laanduaa nɔ ma mei o kundaa niŋ, kanifuule a nɔ di le ma soo le.+ Kɛ a mɛɛ Sawaa dimi yɛ, a nɔ ma tusiŋ waŋ piaanduaa o ba bɛŋgu.+ 35 Te a bii suɛi pum bila le, a nyuna piaandaa ndaa te a miiŋgu pɛ chiɛiniŋ, kanifuule i wa suɛi lasiɔmbu le mi wana lanɔɔ soo o kundaa niŋ.
36 Baa o nya lo suɛi Mɛlɛkɛi kanduŋ ni? Baa nya kinɛi sɔla ndi ni?
37 Wana o wana yiyaŋ pɛ maa wana suaa le Mɛlɛka wo o cho ni ɔɔ o nɔ ke nyina Mɛlɛkaa, mɛɛ o nɔ mbo chɛl maa Masanɔɔ dimul la sɔɔŋ ya cho nya muŋ poonyiallo woŋ ni. 38 Kɛ wana o wana kɛɛ sɔɔŋ muŋ pɛ, Mɛlɛka cho ndu kɛɛ. 39 Lelaŋ puaapiliaa niaa, la hiou lachi a kindiŋndo a waŋnda yooŋgu Mɛlɛkaa dimullo,+ nduyɛ la kuuna wana o wana suɛi o sɔɔŋ maŋgalaŋ cheleŋ niŋ te. + 40 Kɛ la tosa nyɛ o nyɛ o nɛi bɛnda wo choo, nduyɛ mbo wa kpɛ kpɛ.+