Luku

5 Paale pilɛ, mɛɛ Chiisu wa waŋnda diom Mɛlɛkaa pɛɛkoo o mɛŋma ibuŋgaŋ ikɛi Kɛnɛsaluɛi,* ma wa nyiindaŋndo kpeekpei le ndu nilaŋ yaŋɔɔ.+ 2 Okoŋ mbo cha dɛndɛlaŋ la tiɔɔŋ o mɛŋma ibuŋgaŋ ikɛi, kɛ wanaa yɔɔyaa ndaa fulaŋ niŋ leniŋ ma wa yalala ndalaŋ tɔɔ.+ 3 Mbo luɛi o dɛndɔɔ o pilɛ niŋ, dɛndɛ Saimɔŋ ndo. Mbo dimul ndu le mbo kuɛ a ndu tiŋ o mɛŋndaŋ choo. Mbo chal, okoŋ mbo kandu waŋnda pɛɛkoo. 4 Mɛɛ o pɛŋgi suɛi, mbo dimul Saimɔŋ aa: “La kɔ a dɛndɔɔ o fondaŋ yiŋgilɛiyo, okoŋ mi la wuu yalala nyalaŋ o peelo le suuwa biyɔɔ.” 5 Kɛ mi Saimɔŋ dimi aa: “Wana Pɛɛkaa, chɔchɔl piipii ŋ lɔl fafalaa ŋ bii nyɛ o nyɛ le.+ Kɛ le mɛɛ ŋ dimi yɛ, I cho yalalaŋ wuu o peelo.” 6 Mɛɛ nda wuu yalalaŋ, ma bii* suuwa tau tau. Mi yalala ndalaŋ la kandu pɛŋ sɛɛsiaa.+ 7 Okoŋ ma veelu chaaŋaa ndaa o dɛndɔɔ o pilɔɔ niŋ a laba le ma huŋ mala nda. Ma huŋ, nduyɛ ma pei dɛndɛla tiɔɔŋndaŋ cha cha a suuwa. Mi dɛndɛlaŋ la kandu pɛŋ mɔɔwaa. 8 Mɛɛ Saimɔŋ Pitɛ che hei, mbo beŋ Chiisu wulaŋ. Mbo dimi aa: “Masanɔɔ, I suliŋ le mi sɔɔŋguu num ikɛi le, kanifuule wana hakioo ya cho ni.” 9 Siooŋnde wa Pitɛ nda wanaa wa loŋ nda kpou le suwaa nda bii kaŋ nda. 10 Nduyɛ puaa Sɛbidiya, Chemisi nda Chɔŋ,+ a wa wali yɔɔyaa nda Saimɔŋ waa latulu wa bɛɛ, mi siooŋnde bii nda. Kɛ mi Chiisu dimul Saimɔŋ aa: “Yɔŋ isiooŋ te. Chɔŋ a hau, wana yɔɔyaa ŋwaŋnda chiee wo ŋ cho wa ni.”+ 11 Okoŋ ma soli dɛndɛlaŋ o kɔŋgɔ. Ma mal nyɛ o nyɛ ma tual ndu kɔɔli.+

12 Boondii Chiisu wa o chiee pilɛ niŋnde, po pilɛ wa a lɛlɔŋ ndu ŋ tiuwaa lekɔɔ silɔ. Mɛɛ o che Chiisu, mbo beŋ ndu wulaŋ. Mbo nyɔɔlu ndu aa: “Masanɔɔ, te a yeema pɛ, a nɔla ma siŋgi ya.”+ 13 Okoŋ, mi Chiisu siɛndi baa mbo pilaŋ ndu. Mbo dimi aa: “I yeema! Sioŋgu.” O lepilɛ niŋ kpe, mi lɛlɔŋ faŋaŋ ndu lekɔɔ.+ 14 Mi Chiisu dimul ndu maa o dimul wana o wana le. Mbo dimul ndu vɛlɛ aa: “Kɛ, kɔ chɔɔmuŋ o wanaa soliaa lasalaa lo, nduyɛ ma soli salaa a mɛɛ Sawala Mɛlɛka ke Muuse laŋ la dimi yɛ,+ le nda chɔmndo maa a cho niŋ o diandaa Mɛlɛka o hɔl.”+ 15 Kɛ mi tɔɔ ndɔɔ hiau lachi a pɛŋgɛlaŋndo. Nduyɛ faŋga bɛndoo wa chuuŋgiaŋndo le ndu nilaŋ yaŋɔɔ, a le nda siŋgioo a naala ndalaŋ.+ 16 Teleŋnda bɔɔbɔɔ mi Chiisu ndoo kuɛ o fondaŋnda yololɛlaŋ le piɛileŋ.

17 Paale pilɛ mɛɛ o wa waŋnda pɛɛkoo, Falisiiya a wanaa pɛɛku waŋnda Sawala Mɛlɛkalaŋ nda, a ndaa fula o sɔndɔkɔltaŋ Kalili, Chudiaa a o Chulusalɛm niŋnda kpou wa ichali loŋ. Nduyɛ kpaaya Chɛhowa* wo wa Chiisu choo le waŋnda siŋgioo.+ 18 Puaa wa hunɔɔ a po bɛvɛiyo o mboomaa niŋ, ma wa kindiŋndo le ma luei ndu chiɛiniŋ, okoŋ ma kɔ yambu ndu Chiisu o hɔl.+ 19 Kɛ le mɛɛ faŋgaa wa yɛ, ma bumba le ndu lueiyo. Le hei, ma hel o chiɛiyo choo ma buli yindɔɔ, okoŋ ma tusi ndu o mboomaa niŋ Chiisu o hɔl kpeekpei. 20 Mɛɛ o che mɛɛ kpɛ ndaa laalaŋ yɛ, mbo dimul po bɛvɛiyo aa: “Poo, a sɔla malɔɔ hakioo le hakila numndaŋ.”+ 21 Mi wanaa pɛɛku waŋnda sawala Mɛlɛkalaŋ nda, a Falisiiya kandu dimulaŋndo aa: “Wana maavɛɛ poo hoo cho yɛ mbo wa diola Mɛlɛkalaŋ tɛɛmbuuwo? Nɛɛnɛ nɔla yɛ mbo mal wana haki le hakila ndɔlaŋ? O cho Mɛlɛka ndupilɛ kpe le?”+ 22 Kɛ mɛɛ Chiisu sina yiyaŋnda ndalaŋ, mbo nyuna nda aa: “Vɛ mi la nɔ yiyaŋnda waa lende o lakɔl? 23 Dimioo aa, ‘A sɔla malɔɔ hakioo le hakila numndaŋ,’ a dimioo aa ‘Chɔŋ ma kuɛ,’ i kuɛɛ hiou yɛ wa tɛtɛlɛ? 24 Kɛ le mi la sina maa Po wanachioo nɔ kpaayaa o lɛŋndeŋ choo le waŋnda malɔɔ haki—” mbo dimul po bɛvɛiyo aa: “Mi dimul num, chɔŋ ma chua mbooma numndo ma kuɛŋnuŋ o numndo.”+ 25 Okoŋ, mbo chaŋ mbo sim nda o hɔl, mbo chua mbooma o wa niŋndo, mbo kuaŋnuŋ o ndu lo a Mɛlɛka saŋgalaa. 26 Mi kɔndɔfillo bii waŋnda kpou, okoŋ ma kandu Mɛlɛka saŋgalaa. Le siooŋii wa nda ve, ma dimi aa: “Ŋ che sɔɔŋ kɔndɔfilloŋ hau!”

27 Mɛɛ Chiisu faŋaŋ loŋ, mbo cha wana biyaa paawaa* diolaŋ aa Livai. O wa ichali o chiɛi biyaa paawaa. Mbo dimul ndu aa: “Huŋ ma tol la kɔɔli.”+ 28 Mbo mal nyɛ o nyɛ, mbo tual ndu kɔɔli. 29 Okoŋ mi Livai toosiaa nyɛdiaa tau o ndu lo chiɛiniŋ le Chiisu. Nduyɛ wanaa biyaa paawaa, a wanaa cheleŋnda faŋga bɛndoo wa nyɛdiaa dioo o tibiiyo* choo nda ndaa.+ 30 Le hei, mi Falisiiya a wanaa pɛɛku waŋnda sawala Mɛlɛkalaŋ nda kandu ŋɔɔchiaŋndo buɛiyaa Chiisu wa o lani aa: “Le yɛɛnɛ nya cho yɛ nyɛdiaa dioo nya wanaa biyaa paawaa a wanaa lahakiaa?”+ 31 Mi Chiisu mulul nda aa: “Wanaa cho kɛndiaa wa heu ba a wana chiɔuwaa le. Kɛ wanaa cho a naalaŋ nda, nda hau ba a ndu.+ 32 O cho le wanaa cho sakpo wa le ya hiŋ te, kɛ le mi wanaa lahakiaa wookuŋ.”+

33 Ma dimul ndu aa: “Mi buɛiyaa Chɔŋ nda bii sumndo teleŋnda bɔɔbɔɔ, nduyɛ ma nyɔɔlu Mɛlɛka tau o piɛileŋ niŋ. Buɛiyaa Falisiiya bɛɛ lende koni nda tosa ni. Kɛ mi buɛiyaa numnda wa dioo a kolɔɔ.”+ 34 Mi Chiisu dimul nda aa: “Te wana cho lanɔɔ chuaa wo wa wɔ pɛ latulu nda chaaŋaa nduaa, a nɔ ma bii sum te, lende le? 35 Kɛ teleŋ cho fuuluu ma faŋa wana cho lanɔɔ chuaa wo+ nda tɛɛŋ, okoŋ ma bii sumndo a teleŋ koŋ.”+

36 Mbo dimul nda vɛlɛ taloo aa: “Wana o wana kilu pɛŋgɛi doma sɛnɛiyo mbo beŋul tɛɛŋgei o doma paandoo le. Te o tosa lende pɛ, pɛŋgɛi doma sɛnɛiyo cho doma paandoo sɛɛsa, okoŋ pɛŋgɛi doma sɛnɛiyo bɛnda lɛ o doma paandoo le.+ 37 Nduyɛ, wana o wana dou muɛima sɛnɛiyaŋ o bɔlɔ mamuɛi* paandoo niŋ te. Te o dɔu pɛ, muɛima sɛnɛiyaŋ ma cho bɔlɔɔ piɔlɔɔ, mi ma choŋ. Okoŋ mi bɔlɔɔ tambu. 38 Kɛ o bɔlɔ mamuɛi sɛnɛiyo niŋ wana duau muɛima sɛnɛiyaŋ ni. 39 Te waŋndo kol niŋ muɛima paanduaŋ pɛ, o yeema lɛ ma sɛnɛiyaŋ te, kanifuule mbo dimi aa, ‘Muɛima paanduaŋ ma hiou naŋɔɔ.’”