Hibuluiya

1 O sindɔɔ niŋ, mi Mɛlɛka soliŋ wanaa ndaa suaa le ndu wa kpeku le suɛi o finyaa naa mamaa lo. Mbo tosa hei teleŋnda bɔɔbɔɔ, a o nɛila yɛ yɛlaŋ niŋ.+ 2 Kɛ o palɛi hei mɛɛlulaŋ, mbo suaa o naa lo sanaa a Po ndɔɔ.+ Ndu o yulu iso ni le mi nyɛ o nyɛ fee wa le ndu.+ Ndu o soliŋ vɛlɛ kpeku ni le chieeŋndo toosiaa.*+ 3 Ndu cho naŋɔɔ Mɛlɛkaa ni.+ Nduyɛ ndu kpeekpei cho velaŋ ndɔɔ ni.+ A kpaaya diom ndɔɔ o cho nyɔɔŋ kpou mandaa ni. Mɛɛ o chii hakila naalaŋ dindi,+ mbo hel choo choo, okoŋ mbo chal o ba kɛndɛ Mɛlɛka bɛndoo choo.+ 4 Le hei, mbo simnuŋ o bɛndu mbo hiau maalikɛiya kpou.+ Nduyɛ diola o sɔla laŋ, la hiou diola ndalaŋ poloŋ.+

5 Le tamaseliiyo, lepilɛ bɛɛ Mɛlɛka dimullɔ maalikɛinɔ kɛ kɛ aa: “Num cho po nuu ni. I simnuŋ hau finya num” te le.+ O dimi wɔ vɛlɛ a maalikɛinɔ kɛ kɛ okɔɔ aa: “I cho simnɔŋ finya ndɔ, mi ndu bɛɛ wa po ni” le.+ 6 Okoŋ kɔɔli, boondii Mɛlɛka cho vɛlɛ Po ndɔ tasoo+ yɔŋ o lɛŋndeŋ choo ve, o cho dimi aa: “Nya maalikɛiya kpou, la beŋ ndu wulaŋ.”

7 Mi Mɛlɛka dimi a maalikɛiya okɔɔ aa: “Mbo tosa mi maalikɛiyaa nduaa wa nyaa yoomaa kpaaya bɛndu o inyinaya, nduyɛ mbo tosa mi buɛiyaa+ nduaa wa maa yiŋnde wule wule.”+ 8 Kɛ mbo dimi a Po ndɔɔ okɔɔ aa: “Mɛlɛka cho kpeŋgbei* num lemasaa+ le fɛɛŋ a fɛɛŋ ni. Tinda sakpoo tinda num lemasaa cho ni. 9 A kaala sakpoyɛi, ma tul yɔŋ wɔɔŋndo leyɛ. Le saboo hoo Mɛlɛka numndo pɔya num+ a chuɛima kɔl kɛndiaŋ ni, mbo hiau chaaŋaa num aa masaa.”+ 10 Mbo dimi vɛlɛ aa: “Num Masanɔɔ, o kandɔŋndo pɔ ŋ kila chiyii chieeŋndo ni. Num toosiaa choo choo a bala numndaŋ ni. 11 Nyɔɔŋ muŋ cho tambu, kɛ num a cho wa. Ŋ cho siɔŋ mɛɛ domaa siɔŋ nuaa yɛ. 12 A cho muŋ hunɔɔ tui tui mɛɛ wana tui tui domaa nuaa yɛ. Nduyɛ a cho muŋ hunɔɔ siŋga. Kɛ num a siŋgaŋ te, nduyɛ fɛɛŋ bɛɛ yoomu numndo nɔ lamɛɛlu le.”+

13 Le pilɛ bɛɛ Mɛlɛka dimullɔ maalikɛinɔ kɛ kɛ aa: “Chal o ba ni kɛndɔɔ choo haaa mi siiŋguu yaamɔɔwaa numnda nyɛ num handaa ŋpelu” le.+ 14 Maalikɛiya kpou o inyinaya nda cho ni, nduyɛ nda tosa wali Mɛlɛkaa ni.+ Nda o viam ni le wanaa nɔ le pioŋɔɔ sɔlaa wa malaa.