Chɔɔchiaa

6 Mi Isɔluɛiya tosa vɛlɛ nyɛ bɛnda Chɛhowa o hɔl te wo.+ Le hei, mi Chɛhowa mal nda waŋnda Midiaŋ o ba le wɔsilaŋ la ŋɔmmɛu.+ 2 Mi waŋnda Midiaŋ kandu Isɔluɛiya nyɛkindilaa handɔɔ choo.+ Okoŋ, mi Isɔluɛiya toosiaa fondaŋnda viaŋnaŋ ndaŋ o pembuŋ bɛndoŋ, o buululaŋ niŋ, a o fondaŋnda i wa ikala le fuuluuwo laŋ, le waŋnda Midiaŋ vioŋnɔŋndo.+ 3 Te Isɔluɛiya ndaa tosa pɛ chiɔɔŋ, waŋnda Midiaŋ, Amalɛki,+ a waŋnda ba paaleŋ le chaŋ ndo+ huŋ del nda choo. 4 Mi ndaa kila dɔɔŋgɔlaŋ le Isɔluɛiya chiŋalaŋndo a sɔŋgɔɔ. Nduyɛ, ma lo tɔlɔɔla ndalaŋ tɛɛmbuuwo haaa Kaasa. Nyɛ o nyɛ ndaa mel Isɔluɛiya le dioo le. Saa ni, nau ni, sofɛlɛ ni, ndaa mɛi le.+ 5 Te ndaa wa pɛ hunɔɔ, a hiŋ a chɔluaa ndaa vɛlɛ a tɛndiilaŋ la hɔbɛi, mɛɛ soonuaa wa nuaa kunda bɛndoo yɛ.+ Ndapila a nyɔɔmiaa ndaa, ndaa chuu chɔm te.+ Nduyɛ, mi ndaa hiŋ o lɛŋndeŋ niŋ le leŋ tɛɛmbuuwo. 6 Mi waŋnda Midiaŋ tosa mi Isɔluɛiya luɛi o kuɛi* niŋ. Le hei, mi Isɔluɛiya muliŋ o Chɛhowa lo le malaa.+

7 Mɛɛ nda muliŋ o Chɛhowa lo le malaa le nyɛ waŋnda Midiaŋ wa nda tosallo wo,+ 8 mi Chɛhowa yɔŋ Isɔluɛiya wana ndoo suaa le ndu wo, mbo dimul nda aa: “Nyɛ Chɛhowa Mɛlɛka Isɔluɛiya dimi wo cho hoo ni, ‘Ya soli nya o lɛŋnde Ichipi leŋ niŋ ni, naa nya wa o chɛleŋ niŋnda.+ 9 Mi piŋi nya waŋnda Ichipi o ba a wanaa wa nya nyɛkindilaa handɔɔ choo wa kpou. Mi tuau nda nya lachi, nduyɛ mi ke nya lɛŋnde ndaleŋ.+ 10 Okoŋ mi dimul nya aa: “Ya cho Chɛhowa Mɛlɛka nyaa ni.+ La nɔ mi la sooluu* mɛlɛkaa Amɔluaitiiya, a nya cho o lɛŋnde ndaleŋ niŋnda le.”+ Kɛ la tui ya diom te.’”+

11 Okoŋ kɔɔli, mi maalikɛinɔ Chɛhowa wo huŋ+ chal o yɔm bɛndu wa Ofiluaa wo bɛŋgu. Nduyɛ Chowaasi, Abi-isaitiinɔɔ+ ndoo nɔ yɔmndo hoo ni. Kidiɔŋ+ po ndɔ wa witiiyoŋ lɔɔ o doola mamuɛiyo niŋ, le waŋnda Midiaŋ vioŋnɔŋndo. 12 Okoŋ, mi maalikɛinɔ Chɛhowa wo fula ndu o hɔl, mbo dimul ndu aa: “Chɛhowa cho a num latulu,+ num kuubanɔ chɔu kpaaya bɛndoo hoo.” 13 Mi Kidiɔŋ nyuna ndu aa: “Chum ndɔ, masanɔ nuu. Te o yɔŋ pɛ maa Chɛhowa cho a naa latulu, mɛɛ le yɛɛnɛ mi muŋ kpou wa naa yɔŋnɔŋndo?+ Ɔɔ niko walta ndɔla kɔndɔfilta finyaa naa dimul naa a laŋ okɔɔ laŋ? Ma dimul naa aa,+ ‘Chɛhowa soli naa Ichipi ni.’+ Kɛ nuawɔ, Chɛhowa kɛɛ naa,+ nduyɛ o mal naa waŋnda Midiaŋ o ba.” 14 Mi Chɛhowa muliŋ o ndu lo mbo dimul ndu aa: “Kɔ a kpaaya ŋ nɔ wo. Nduyɛ, a cho Isɔluɛiya piŋi waŋnda Midiaŋ o ba.+ Ya vem num ni.” 15 Mi Kidiɔŋ mulul ndu aa: “Oo Chɛhowa, vɛɛ kpeekpei ya nɔla yɛ mi piŋi waŋnda Isɔluɛi? O pulale Manaasɛ leŋ choo kinɛi, yuŋgu nuu cho o sɔvɛ le. Nduyɛ o chiɛi finya nuu niŋ bɛɛ, I cho bɛɛ wana sɔvɛ pɛŋ te.” 16 Kɛ mi Chɛhowa dimul ndu aa: “Le mɛɛ ya cho wa a num latulu yɛ,+ a cho waŋnda Midiaŋ yomɔɔ naŋ chaa waŋndo o pilɛ ni.”

17 Okoŋ mi Kidiɔŋ dimul ndu aa: “Te o yɔŋ pɛ maa a hini kɔl a ya, mɛɛ chɔm ya tamaseliiyo le sinaa maa num kpeekpei cho suɛi o ya lo ni. 18 A yandii, kua wɔ le. Chum ya nanuŋ haaa mi kɔ toosial num nyɛdiaa mi chuu num.”+ Mbo dimul ndu aa: “I cho num chum haaa ma hiŋ.” 19 Mi Kidiɔŋ kua mbo dii chuiŋ fɔŋndɔɔ, mbo toosiaa. Okoŋ, mbo chua kpeyaŋndo ɛfaa 11* mbo toosiaa beedii nɔ yiisii* leniŋ te wo.+ Mbo wou visioŋ o kambɛiyo niŋ, a mbooyaa o kpɛɛnɛi yauwɛi niŋ. Mbo chua nyɔɔŋ muŋ, mbo yoo ndu o yɔm bɛndoo bɛŋgu.

20 Okoŋ mi maalikɛinɔ Mɛlɛka tonyaa dimul ndu aa: “Chua visiŋ muŋ a beediiyo, ma kɛsi o pou bɛndu koŋ choo, ma tala mbooyaa lechoo.” Mbo tosa mɛɛ o dimul ndu yɛ. 21 Mi maalikɛinɔ Chɛhowa wo siɛndi tinda wa ndu o ba wo, mbo pilaŋ visioŋ a beediiyo. Okoŋ, mi yiŋndeŋ le bii wum o pouwo choo, mi le luam visiŋ muŋ a beedii koŋ.+ O lepilɛ niŋ kpe, mi maalikɛinɔ Chɛhowa wo lo ndu o hɔl pɛ. 22 Mi Kidiɔŋ sina niko kɛsɛ maa maalikɛinɔ Chɛhowa wo wa koŋ ni.+

O lepilɛ niŋ kpe, mi Kidiɔŋ dimi aa: “Kpokoo ya Chɛhowa Mɛlɛka Kpuluŋguma Bɛndoo, I che maalikɛinɔ numndo a lehɔl fɔ, Chɛhowa!”+ 23 Kɛ mi Chɛhowa dimul ndu aa: “Wa a kɔl nyulu. Yɔŋ isiooŋ te.+ A cho wu le.” 24 Okoŋ mi Kidiɔŋ taŋgul bandu luamaa lasalaa loŋ le Chɛhowa. Mbo ke ndu diolaŋ aa, Chɛhowa-sialɔm.*+ Haaa a paale hauleŋ ndeŋ, lende nda veelu bandu koŋ ni. O cho wɔ bɛɛ Ofiluaa, o tanda Abi-isaitiiya niŋ.

25 Ichɔl koŋ, mi Chɛhowa dimul ndu aa: “Chua nau fɔŋndɔ finya numndo, nau fɔŋndɔ diiŋ ndɔɔ o chii niŋ wɔsilaŋ la ŋɔmmɛu wo, okoŋ ma puusiaa bandu finya num taŋgul le Baal lo, nduyɛ ma tɛɛmbuu suŋgbule iyɔm* cho bandu koŋ ikɛi leŋ.+ 26 Okoŋ ma chua poutaŋ ma hɛɛnduu laŋ o lepula, ma taŋgul bandu luamaa lasalaa le Chɛhowa Mɛlɛka numndo o bembe koŋ choo. Nduyɛ te a tɛɛmbuu pɛ suŋgbuleŋ,* yɔmii ŋ cho sooluu loŋ nde, chua nau fɔŋndɔ diiŋ ndɔɔ ma soli sala luamaa lechoo.” 27 Mi Kidiɔŋ chua puaa tɔ o buɛiyaa nduaa tɛɛŋ, mbo tosa mɛɛ Chɛhowa dimul ndu yɛ. Kɛ siooŋnde wa ndu tau le yuŋgu finya ndɔ wo, a le waŋnda o chioo niŋ. Le hei, o tosa ndi ipala le, kɛ mbo tosa ndi ichɔl.

28 Mɛɛ waŋnda o chioo niŋ chɛŋ idiiyo puŋ, ma cha bandu luamaa lasala Baal lo o puusiaa, a suŋgbule iyɔm* wa ndu ikɛi leŋ le tambɛi. Nduyɛ, ma cha maa waŋndo soli salaa a nau fɔŋndɔ diiŋ ndɔɔ o bandu sɛnɛi o taŋgul lo choo. 29 Ma nyuuniaŋ aa: “O nɛɛnɛ tosa yɛ hei?” Mɛɛ nda yaasiaa, ma dimi aa: “Kidiɔŋ, po Chowaasi wo tosa hei ni.” 30 Okoŋ mi waŋnda o chioo niŋ dimul Chowaasi aa: “Soli po numndo naŋ miŋ dii ndu, kanifuule o puusiaa bandu Baal lo, nduyɛ mbo tɛɛmbuu suŋgbule iyɔm* wa ndu ikɛi leŋ.” 31 Okoŋ, mi Chowaasi+ dimul wanaa chiŋalaŋ ndu wa kpou aa: “Baa nya nɔ ni mi la suŋgu le Baal? Baa nya nɔ ni mi la piŋi ndu? Wana o wana suŋgu pɛ le Baal, o nɔ mbo sɔla piɔmndo diilɛŋ.+ Te mɛlɛka o cho ni, mɛɛ o suŋgu le ndupila,+ le mɛɛ waŋndo puusiaa bandu ndɔɔ yɛ.” 32 O paale leŋ choo, mbo ke Kidiɔŋ diolaŋ aa Chɛlubaal.* Mbo dimi aa: “Baal suŋgu le ndupila le mɛɛ waŋndo puusiaa bandu ndɔɔ yɛ.”

33 Mi waŋnda Midiaŋ,+ a Amalɛki,+ a haa ba paaleŋ le chaŋ ndo chuuŋgiaŋ naapilɛ le sɔŋgɔɔ.+ Ma taŋ,* ma kua o Kpoloŋndo* Chɛsiluɛɛ, nduyɛ ma kila dɔɔŋgɔɔ loŋ. 34 Okoŋ mi nyina Chɛhowa wo tual Kidiɔŋ choo,+ mbo hɔŋ buloo.+ Nduyɛ, mi Abi-isaitiiya+ sɔɔŋguu ndu ikɛi le ndu tooloo. 35 Mbo yooŋgu le waŋnda o yuŋgu Manaasɛ wo niŋ kpou, nduyɛ mi nda bɛɛ sɔɔŋguu le ndu malaa. Mbo yooŋgu vɛlɛ le waŋnda o yuŋgu Asia, Sɛbulɔŋ, a Nafitalii yo niŋ kpou, nduyɛ mi nda bɛɛ huŋ.

36 Okoŋ mi Kidiɔŋ dimul Mɛlɛka tonyaa aa: “Te ya ŋ cho soliŋ kpeku ni le Isɔluɛiya baŋaa a mɛɛ ŋ chua buŋgɛi yɛ,+ 37 mɛɛ I kɛsi wɔ kola yufɛlɛ yufɛliɔɔ* o yasaba luaa ŋwitiiyo. Te mɔmndo liiviaa ndu pɛ, kɛ mi lɛŋnde balu ndu leŋ le wa le vesɛi, mɛɛ I sina dɔɔ maa ya ŋ cho soliŋ kpeku ni le Isɔluɛiya baŋaa, a mɛɛ ŋ chua buŋgɛi yɛ.” 38 Nduyɛ lende kinɛi i yɔŋnuŋ ni. Diimandɔɔ, mɛɛ Kidiɔŋ chɛŋ idiiyo puŋ, mbo chua kola yufɛlɛ yufɛliɔɔ, mbo vaa. Mi mɛŋma fula leniŋ ndaŋ ma pia hɛŋgɛi bɛndoo cha. 39 Mi Kidiɔŋ dimul vɛlɛ Mɛlɛka tonyaa aa: “A yandii, duaunuŋ tumbe a ya le. Kɛ I yeema num ma tosal la vɛlɛ nyɛ cheleŋ. A yandii, I soliŋ ndɔɔ vɛlɛ kolaa hoo kpeku le pilɛ niŋ kpe, le sinaa te a wa niŋ pɛ a ya latulu. A yandii, tosa mi kolaa wa o vesɛi, kɛ mi mɔmndo liiviaa lɛŋnde balu ndu leŋ kpou.” 40 Nduyɛ keŋ Mɛlɛka tosa ichɔl koŋ ni. Kola yufɛlɛ yufɛlɛ koŋ kinɛi wa o vesɛi ni, kɛ mi mɔmndo liiviaa lɛŋnde balu ndu leŋ kpou.