Luku

8 Okoŋ kɔɔli, mi Chiisu balu o chieeŋ bɛndoŋ niŋ a o sɔndɔkɔltaŋ, waŋnda yooŋgu kɛndɔɔ dimullo a Masale Mɛlɛkaleŋ okɔɔ.+ Nduyɛ kiilaa 12 nda wa ndu kɔɔli. 2 Waŋ laanduaa apum, a o tou nyinaa wɔɔŋnda kɔɔli mbo siŋgi naala ndalaŋ nda bɛɛ wa ndu kɔɔli. Nda cho haa ni: Meele, o ndoo tou nyinaa wɔɔŋnda kɔɔli a ŋɔmmɛu wo, ma veelu ndu vɛlɛ aa Madaliŋ, 3 a Chohana+ lanɔɔ Chuusa, po wa hɔlteŋ o nyɛm Hɛlɔɔ woŋ choo wo, a Susana, vɛlɛ a waŋ laanduaa bɔɔbɔɔ cheleŋ. Nda wa nyɛm ndaŋ soliŋndo kpeku ni le Chiisu a buɛiyaa nduaa malaa.+

4 Mɛɛ waŋnda faŋga bɛndoo chuuŋgiaŋ a wanaa wa ndu balɔɔ kɔɔli o chieeŋ bɛndoŋ niŋnda, mbo suaa o nda lo o taloo niŋ aa:+ 5 “Po pilɛ chɛŋ ni mbo kua yɛiye saŋɔɔ. Mɛɛ o wa ndi saŋɔɔ, mi kulloŋ ŋpum deli o nɛi kɔllo, nduyɛ mi waŋnda kei muŋ niɔu niɔu, okoŋ mi youwa huŋ chɔuviaa muŋ.+ 6 Mi ŋpum deli o lɛŋnde bandilaleŋ choo naa puulu bɔɔ ve le wa. Mɛɛ ŋ vil, mi ŋ vesa, kanifuule mɛŋma ve loŋ te.+ 7 Mi ŋpum deli o yɔɔŋ tɛɛŋ. Mi ŋ hindu latulu a yɔɔŋ, nduyɛ mi yɔɔŋ kaya kayaŋ muŋ.+ 8 Kɛ mi ŋpum deli o lɛŋnde kɛndɛleŋ choo. Mɛɛ ŋ vil, mi ŋ chuulu. Ŋpum kulloŋ hiouwɔɔ 100.”+ Mɛɛ o chii sɔɔŋ muŋ dimi, mbo dimi choo choo aa: “Num o num nɔ pɛ nila tuɛiyaa isɔɔ, mɛɛ yaŋ nilaŋ.”+

9 Kɛ mi buɛiyaa nduaa nyuna ndu le nyɛ taloo hoo sim ndo.+ 10 Mbo dimi aa: “Nya sɔla dioo ni le mi la bii sɔɔŋ viaŋnaŋ cho a Masale Mɛlɛkaleŋ o choo choo niŋ okɔɔ woŋ bila. Kɛ le a tuaa, o talelaŋ niŋ+ ya suaa o nda lo ni, kanifuule ma tofa, kɛ a chi le. Ma yaŋ nilaŋ, kɛ a sina muŋ pɛŋgu le.+ 11 Tɛɛsiaa taloo hoo cho hoo ni: Yɛiye cho diom Mɛlɛkaa ni.+ 12 Kuluŋ deli o nɛi kɔllo woŋ sim le wanaa tuei diom Mɛlɛkaa wa, kɛ mi Setana* huŋ poonda ndu nda o lakɔl yɔŋii nda laalaŋ ma sɔla pioŋɔɔ.+ 13 Kuluŋ deli o lɛŋnde bandilaleŋ choo woŋ sim le wanaa tuei diom Mɛlɛkaa, ma chɛl ndu a kɔl kɛndɛ wa, kɛ a luei ŋpuundu le. Ma laalaŋ le teleŋ biŋgi. Kɛ mɛɛ tɔɔndaŋndo komal nda, ma mal laalaŋ ndaa.+ 14 Kuluŋ deli o yɔɔŋ tɛɛŋ ndoŋ sim le wanaa tuei diom Mɛlɛkaa wa, kɛ mi buulaŋndaŋ, yeemɛi sullo,+ a yelelaŋ chieeŋndo hoo+ hiau nda o kɔl kɔɔli, ma kaya kayaŋ. Nduyɛ pesiŋ bɛɛ a yɔŋgu kɔmnde kɛndɛ le.+ 15 Kɛ kuluŋ deli o lɛŋnde kɛndɛleŋ choo woŋ sim le wanaa tuei diom Mɛlɛkaa, ma chɛl ndu a kɔlta ndalaŋ kpou wa. Ma kɛsiŋ ndu o lakɔl,+ okoŋ ma hiau lachi a kɔmndeŋ yɔŋgoo mi che bɛɛ a cho biuwɔŋndo.+

16 “Wana o wana mɛndul lambuiyo mbo kuumbuu nyɛ lechoo ɔɔ mbo kɛsi ndu o kpeloo bɛŋgu le. O nyɛ kɛsiaa la lambuiyo choo o kɛsi ndu ni le mi wanaa cho luɛiyɔɔ chiɛiniŋ nda kpou che nyɛ teŋgaa.+ 17 Nyɛ o nyɛ cho o viaŋnaŋ, o cho hunɔɔ fula kpendekele. Nyɛ o nyɛ cho o kumbaa, o cho hunɔɔ kumbiŋ, mi waŋnda sina a ndu okɔɔ.+ 18 Lelaŋ, la yaŋ nilaŋ nyɛkɛndɛi, kanifuule wana o wana nɔ, o cho chɔɔlu sɔla tau.+ Kɛ wana o wana nɔ le, hali o pɔmbɔ o yiyaŋ maa o nɔ wo bɛɛ, a cho ndu ndu poonda o ba.”+

19 Okoŋ mi kala ndɔ a pɔmbuaa nduaa+ huŋ naa ndu chua, kɛ a nɔla ma fuuluu ndu ikɛi le, kanifuule faŋgaa wa tau.+ 20 Mi waŋnda dimul Chiisu aa: “Kala num a pɔmbuaa numnda cho isisi o bɛɛ, a yeema ma che num.” 21 Mbo dimul nda aa: “Wanaa tuei diom Mɛlɛkaa ma tosa nyɛ o dimi wo wa, nda cho kala nuu a pɔmbuaa niaa ni.”+

22 Paale pilɛ, mɛɛ Chiisu nda buɛiyaa nduaa luɛi o dɛndɔɔ niŋ, mbo dimul nda aa: “La ŋ taŋnuŋ mɛŋma ibuŋgaŋ o kɔŋgɔɔ leeloo.” Okoŋ, ma kandu taŋɔɔ o dɛndɔɔ niŋ.+ 23 Mɛɛ nda wa taŋɔɔ, mi Chiisu hiaunuŋ o luaŋ. Okoŋ, mi hueiyii bɛndu bɛnduei kandu hɔŋndo o mɛŋma ibuŋgaŋ choo. Mi mɛŋndaŋ ma kandu luɛiyɔɔ tau o dɛndɔɔ niŋ, nduyɛ o wa niŋ le mɔɔwa.+ 24 Okoŋ, ma kɔ tindi ndu ma dimul ndu aa: “Wana Pɛɛkaa, Wana Pɛɛkaa, ŋ hiŋ lo o peelo fɔ!” Mbo chaŋ mbo kpaa hueiye, a mɛŋma wa hiilɔŋndo waŋ. Mi nyɛ o nyɛ mei doŋ.+ 25 Mbo dimul nda aa: “Le yɛɛ nya kɛɛ yɛ laalaŋndo nɔɔ o Mɛlɛka niŋ?” Kɛ nda kpou wa a siooŋnde tau, nduyɛ mi kɔndɔfillo bii nda. Ma wa dimulaŋndo aa: “Wana maavɛɛ kpeekpei cho yɛ hoo? Hueiye a mɛŋndaŋ bɛɛ o kpaa pɛ, miŋ diikɔŋndo ndu.”+

26 Ma fuuluu o tanda Kɛluasiŋ ndo niŋ,+ o cho Kalili leeloo wo. 27 Mɛɛ Chiisu fula o dɛndɔɔ niŋ, mi po nyina wɔɔŋndo wa kɔɔli wo fula chiee mbo huŋ naa ndu chua. Le teleŋ vilɛi ndoo wounuŋ lanyɛ le, nduyɛ ndoo lɔl chiɛiniŋ te. O sɛilaŋ* tɛɛŋ ndoo lɔl ni.+ 28 Mɛɛ poo hoo del Chiisu hɔlteŋ, mbo deŋi, okoŋ mbo kɔ beŋ ndu wulaŋ, mbo dimi choo choo kpeleŋ aa: “Yɛɛnɛ ŋ yeema yɛ ma tosal la, num Chiisu, Po Mɛlɛka Bɛndoo? Yandii, tusi ya nyɛpalaa choo le.”+ 29 (Kanifuule, Chiisu ndoo chii niŋ nyina wɔɔŋ wa poo hoo kɔɔli wo dimul le mbo faŋaŋ ndu kɔɔli. Teleŋnda bɔɔbɔɔ, mi nyina wɔɔŋ koŋ ndoo chua ndu.+ Nduyɛ mi waŋnda ndaa baŋ ndu o kpiɔɔ, ma dɔu ndu o yɔlɔŋ, kɛ mbo kili kili muŋ. Mi nyina wɔɔŋ koŋ ndoo sɔɔndiaa ndu yondoo niŋ.) 30 Mi Chiisu nyuna ndu aa: “Vɛɛnɛ ŋ nɔ yɛ diolaŋ?” Mbo muli aa: “Diola nilaŋ aa Faŋgaa,”* kanifuule nyinaa wɔɔŋnda wa ndu kɔɔli a hɔbɛi. 31 Okoŋ, mi nyinaa wɔɔŋaa kaŋ wa ndu nyɔɔloo maa o yɔŋ nda o sooŋ yiŋgilɛi nɔ lamɛɛlu le wo niŋ te.+ 32 Peuwa kunda bɛndoo+ wa diolaŋ o pembei choo. Mi nyinaa wɔɔŋaa kaŋ nyɔɔlu Chiisu le mbo chɛl nda ma kɔ luɛi nda niŋ. Mbo chɛl nda.+ 33 Okoŋ, mi nyinaa wɔɔŋnda haa faŋaŋ poo kɔɔli, ma kɔ luɛi peuwa niŋ. Mi peuwaa kundaa kaŋ nyaanuŋ o kɔŋgɔ feke fekioo, ma kɔ deli o peelo, ma wu kpou. 34 Kɛ mɛɛ wanaa wa peuwa mandaa wa che nyɛ yɔŋnuŋ ndo, ma nyaanuŋ ma kɔ doonuŋ waŋnda kona o chiee bɛndoo niŋ a o sɔndɔkɔltaŋ.

35 Okoŋ, mi waŋnda huŋ le tofaa nyɛ yɔŋnuŋ ndo. Ma huŋ naa Chiisu chua, ma cha po nyinaa wɔɔŋnda faŋaŋ kɔɔli wo a nyɛlaŋ lekɔɔ. Ndoo miiŋgu niŋ o ndupila niŋ. O wa ichali Chiisu o labɛŋguniŋ, mi siooŋnde bii nda. 36 Mi wanaa che suɛi hei ya kɔ dimul waŋnda a mɛɛ poo hoo looku sioŋgɔɔ yɛ. 37 Okoŋ, mi waŋnda faŋga bɛndoo o tanda Kɛluasiŋ ndo niŋ dimul Chiisu le mbo faŋaŋ o tanda ndaa niŋ, kanifuule siooŋnde wa nda tau tau. Okoŋ mbo kɔ luɛi o dɛndɔɔ niŋ le kɔŋndaŋ. 38 Kɛ mi po nyinaa wɔɔŋnda wa kɔɔli wo nyɔɔlu Chiisu le mbo tol ndu kɔɔli. Kɛ o chɛl te. Mbo dimul ndu aa:+ 39 “Miiŋgu o numndo, ma hiou lachii a waŋnda dimullo nyɛ Mɛlɛka tosal numndo.” Mbo kua, okoŋ mbo kandu waŋnda dimullo o chioo niŋ kpou a nyɛ Chiisu tosal ndu wo okɔɔ.

40 Mɛɛ Chiisu miiŋgu o tanda Kalili wo niŋ, mi waŋnda naŋ kɔl tau, kanifuule a wa niŋ ndu chumndo.+ 41 Okoŋ mi laŋunɔ pilɛ diolaŋ aa Chaliɔɔ huŋ. Laŋunɔɔ hoo wa wana bɛndoo o pilɛ le chiɛi Chuuwa piɛi Mɛlɛka wo. Mbo del Chiisu o labɛŋguniŋ, mbo kandu ndu nyɔɔloo le mbo kuɛ o ndu lo bɛɛ,+ 42 kanifuule chuale ndɔle pilɛleŋ le wa tendu piɔm. Nduyɛ chuaambɔɔ hoo ndoo wa niŋ le wɔsilaŋ 12.

Mɛɛ Chiisu wa kɔlaŋ, faŋgaa wa ndu nyiinduuwo. 43 Chua pilɛ wa loŋ, le wɔsilaŋ 12 o wa a naa ŋwaŋ laandoo.+ Nduyɛ wana o wana nɔla ndu siŋgi le.+ 44 Mbo huŋ Chiisu amakɔɔ, mbo pilaŋ bɔɔle doma ndɔɔ.+ O lepilɛ niŋ kpe, mi naa ndɔɔ siaŋgu. 45 Okoŋ mi Chiisu nyuna aa: “Nɛɛnɛ pilaŋ yɛ ya?” Mɛɛ nda kpou wa viinɔŋndo, mi Pitɛ dimi aa: “Wana Pɛɛkaa, waŋnda cho num a balaa ma wa num nyiinduuwo.”+ 46 Kɛ mi Chiisu dimi aa: “Waŋndo pilaŋ ya, kanifuule I sinaŋ maa kpaayaa+ fula ya o ŋdial.” 47 Mɛɛ chuaa che maa Chiisu sina nyɛ yɔŋnuŋ ndu wo, mbo fula a nyiiyaa, mbo kɔ beŋ Chiisu wulaŋ. Okoŋ, mbo dimul waŋnda kpou le sabu o pilaŋ ndu wo, nduyɛ a mɛɛ o looku sioŋgɔɔ o lepilɛ niŋ kpe yɛ. 48 Kɛ mbo dimul ndu aa: “Chua nuu, laalaŋ numndo siŋgi num. Kɔ wa kɛndɛ.”*+

49 Chiisu lo suɛi, mi po pilɛ fula o chiɛi Chaliɔɔ wo, mbo huŋ dimul ndu aa: “Chua numndo viŋnuŋ. Saaŋgiaa lɛ Wana Pɛɛkaa le.”+ 50 Mɛɛ Chiisu tuei hei, mbo dimul Chaliɔɔ aa: “Buulaŋ te. Num nɔ laalaŋndo suee. O cho miiŋgu yoomu.”+ 51 Mɛɛ o fuuluu o chiɛi Chaliɔɔ wo, o chɛl mi wana o wana cheleŋ luɛi ndu kɔɔli le, mɛɛ Pitɛ, Chɔŋ, Chemisi, finyaa chuaambɔɔ a kala ndɔ. 52 Waŋnda wa chaŋndo ma wa mɔnɛi biyɔɔ le chuaambɔɔ. Okoŋ mi Chiisu dimul nda aa: “La mei chaŋndo,+ kanifuule o vi le, kɛ o luaŋ o cho ni.”+ 53 Le hei, ma kandu ndu mamɔɔ, kanifuule ndaa sina maa o vi. 54 Kɛ mbo saa chuaambɔɔ baa, mbo dimul ndu aa: “Chuaambɔɔ, chɔŋ!”+ 55 Mbo miiŋgu yoomu.+ Okoŋ, mbo chaŋ o lepilɛ niŋ kpe.+ Mbo dimul nda maa a ke chuaambɔɔ nyɛdiaa mbo de. 56 Mi wanaa velu chuaambɔɔ wa duaunuŋ nyaale tau tau. Kɛ mbo sila nda maa a dimul wana o wana a nyɛ yɔŋnuŋ ndo okɔɔ le.+