Taitɔɔ
3 Wa chaaŋaa num aa laalaŋnda yiyalaŋndo maa a tusiŋ masaa lelɛŋnda, a simlachiaa o ba bɛŋgu.+ Nduyɛ maa a wa a bɛɛndiaŋ le wali o wali kɛndɛ tosaa. 2 Dimul nda maa a dimul wana o wana diom wɔɔŋ te. A wa wanaa lasɛɛŋgiaŋ te.+ A wa wanaa baŋ isɔɔ le. Nduyɛ a nɔ bɛɛleŋ le wana o wana.+ 3 Kanifuule, naa bɛɛ diɔmnda naŋ wa paandu ni. Naŋ tui Mɛlɛka diom te. Ma faŋa naa o nɛi tonyaa choo. Ŋ wa chiaa le yeemaŋ a yelelaŋnda suu o suu. Ŋ wa sɔɔŋ wɔɔŋndoŋ tosaa. Ŋ wa paŋaliaŋndaŋ. Wanaa wɔɔŋ wɔɔŋnda naŋ wa ni. Nduyɛ ŋ wa yɛleŋ tulnaŋndo.
4 Kɛ mi Mɛlɛka+ Piŋi naa wo chɔm kɛndɛi nduɛi a kaala ndɔɔ le waŋnda chieeya. 5 Le mɛɛ o nɔ nyiɛɛye yɛ+ o piŋi naa ni, kɛ o cho le wali kɛndɛ naŋ tosa wo le.+ O tosa hei a pulɔɔ o pulu naa miŋ miiŋgu yoomu wo.+ Nduyɛ, nyina ndɔ diandaa o soliŋ kpeku ni le naa yoomu sɛnɛiyo kioo.+ 6 Mɛlɛka ke naa nyina ndɔ diandaa hoo o hɔbɛi. O tosa hei sanaa o wana naa Piŋiaa niŋ, Chiisu Kiliti.+ 7 O tosa hei, le miŋ nɔ tiindaŋndo le hunɔɔ yoomu kpeekpei+ o mɛi lediom le naa kioo wo sɔlaa.+ Kɛndɛi nduɛi bɛnduei cho tosa ni miŋ sɔla ndu.+ Ndi tosa ni miŋ simnuŋ wanaa sakpuaa ndu o hɔl.
8 Sɔɔŋ dimiŋ muŋ ndoŋ cho tonya. I yeema num ma chɔɔlu muŋ kindila. Hei tosa mi wanaa dɔu tiindaŋndo o Mɛlɛka niŋnda landuŋ kɔl le sɔɔŋ kɛndɔŋ tosaa. Sɔɔŋ muŋ bɛnda, nduyɛ ŋ nɔ tɔnɔɔ le wana o wana.
9 Diomndaŋ hiŋaŋndo o sɔɔŋ fondoŋ choo, diola wanaa masindiaa chɔmndo o lepula, a sɛɛŋgiaŋndo o Sawaa* choo, wou sondoo leniŋ te. Sɔɔŋ muŋ nɔ tɔnɔ o tɔnɔ le.+ 10 Wana o wana hiŋ pɛ a pɛɛku cheleŋ,+ mi la sila ndu le diiŋ,+ kɛ mbo tui le, la fafaŋ ndu.+ 11 Sina maa wana waa lende o mal nɛi tonyaa mbo wou baa o yɔŋ wɔɔŋndo niŋ. Ndupila chii yaalaŋ.
12 Te I vem pɛ Atamaasi ɔɔ Tichikɔɔ+ naa num chua, kindiŋ kpoke ma komal la Nikapolii. Kanifuule, loŋ ya kɛɛsiaa le sialteŋ hivioo ni. 13 Te Sinaasi, o sina tau a Sawaa okɔɔ wo wa pɛ kɔlaŋ nda Apɔlɔɔ, kindiŋ le ma sɔla nyɛ o nyɛ nda hau ba.+ 14 Chaaŋaa naa laalaŋnda bɛɛ nɔ ma wa sɔɔŋ kɛndɔŋ tosaa le malaa te bahawɛi choŋ choŋndo+ wa pɛ. Hei mala a puɛɛnuŋ a sɔɔŋ kɛndɔŋ tosaa le.+
15 Wanaa cho ya ikɛi naŋ nda kpou a yil num. Yil naa puaapiliaa naa kaalaa loŋ kpou.
Maa kɛndɛi bɛnduii Mɛlɛkɛi wa latulu a nya kpou.