Ditɔnɔmii

24 “Te poo chua pɛ chuaa o nɔɔ niŋ, kɛ mbo hɛnaŋ ndɛ a ndu le kanifuule o saaluŋ kaa wɔɔŋ pum ndu o ŋdial, o nɔ mbo poonyiaa yau kɛyaŋndo mbo ke ndu,+ nduyɛ mbo soli ndu o ndu lo chiɛiniŋ.+ 2 Te chua koŋ kuɛŋ pɛ, o nɔla mbo chal wana cheleŋ o ba o nɔɔ niŋ.+ 3 Te po o chal koŋ vɛlɛ o ba o nɔɔ niŋndo tul ndu pɛ leyɛ,* mbo poonyiaa yau kɛyaŋndo mbo ke ndu, okoŋ mbo soli ndu o ndu lo chiɛiniŋ, ɔɔ mi po o chal koŋ o ba o nɔɔ niŋndo vi, 4 pɔnɔ ndɔ tase kɛɛ ndu koŋ ndo nɔ lɛ mbo miŋgi ndu chua o nɔɔ niŋ te. Kanifuule, wana nɔɔlɛiyo o cho niŋ ndu o hɔl ni. Nduyɛ, Chɛhowa tul ndu leyɛ. La nɔ mi la nɔɔliaa lɛŋnde Chɛhowa Mɛlɛka nyaa cho nya kioo le mi le wa nyɛm kɛŋ nya leŋ a hakioo le.

5 “Te poo chua pɛ lanɔɔ sɛnɛi, o nɔ mbo kuɛ o chɔuwo ɔɔ ma ke ndu walta cheleŋ le tosaa le. O nɔ mbo wa o ndu lo le wɔsioo o pilɛ, nduyɛ mbo tosa mi laa ndɔ wa a kɔl kɛndɛ.+

6 “Wana o wana nɔ mbo bii waŋndo pouta nda chuii nyɔɔŋ ndaŋ o ba o landei niŋ+ le kuee o wuu ndu wo le. Kanifuule, keŋ sim maa yoomu wana koŋ ŋ bii o landei niŋ ni.

7 “Te Isɔluɛinɔɔ luɛi pɛ biyɔɔlaŋ nduyɛ mbo bii chaaŋ ndɔ Isɔluɛinɔɔ, okoŋ mbo bii ndu biyɔɔ wɔɔŋndo mbo pisi ndu,+ wana biyaa koŋ nɔ mbo sɔla piɔmndo.+ La nɔ mi la faŋa wana dɛnɛ wɔɔŋndo nya tɛɛŋ.+

8 “Te naa ŋlɛlɔɔ* del pɛ, la nɔ mi la wa yekeŋ nduyɛ mi la tosa nyɛ o nyɛ wanaa soliaa lasalaa fula o pulale Livai leŋ choo wa cho nya dimullo.+ La wa yekeŋ le mi la tosa mɛɛ ya dimul nda yɛ. 9 La loonuŋ a nyɛ Chɛhowa Mɛlɛka nyaa tosal Meeliam ndo, teleŋ nya wa fulaa Ichipi wo.+

10 “Te a wuu pɛ wana nya chiɛɛliaŋ ndo kuoo,+ a nɔ ma luɛi o ndu lo chiɛiniŋ le nyɛ o cho num ke o landei niŋndo chuaa le. 11 A nɔ ma sim o bɛɛ le mi wana ŋ wuu kuoo wo chuu num nyɛ o cho num ke o landei niŋndo. 12 Kɛ te wana bala fondoo wana koŋ cho ni, mɛɛ nyɛ o ke num o landei niŋndo nɔ mbo lɔl num o ba le.+ 13 Te domaa o ke num o landei niŋ ni, mɛɛ a nɔ ma kindiŋ o nɛi o nɛi niŋ ma miŋgi ndu o ba te paaleŋ le del dɔɔ pɛ. Koŋ cho tosa mbo lɔl a doma ndɔɔ lekɔɔ,+ nduyɛ mbo dɔu num sala. Okoŋ, ma simnuŋ wana sandaa Chɛhowa Mɛlɛka numndo o hɔl.

14 “Tosal wana bala fondo ŋ chua le wallo wo kafalaŋ te, o wa puaapilɛnɔ numndo ɔɔ mialaa cho nya tɛɛŋ o lɛŋnde nyaleŋ niŋ o chieeŋ nyaŋ bɛndoŋ* niŋnda.+ 15 A nɔ ma paawa* ndu paale leŋ+ tuupa mi paaleŋ le del. Kanifuule, wana bala fondoo o cho ni, nduyɛ paawa koŋ o tiindaŋ ni. Te o cho koŋ te, o cho ŋɔɔchiaŋ o Chɛhowa lo a num okɔɔ, nduyɛ hakioo keŋ wa le num ni.+

16 “Finyaa nɔ ma sɔla piɔmndo le nyɛ chuauwaa ndaa tosa wo le, nduyɛ chuauwa bɛɛ nɔ ma sɔla piɔmndo le nyɛ finyaa ndaa tosa wo le.+ Wana o wana nɔ mbo sɔla piɔmndo le haki ndɔɔ.+

17 “La kilul mialaa cho nya tɛɛŋ nda ɔɔ chuaambuaa nɔ ŋfinya le wa*+ yamɛi lakafɛi le. La bii wana vii pɔnɔɔ wo domaa o ba o landei niŋ le kuee o bii yo le.+ 18 La loonuŋ maa chiaa nya bɛɛ wa o lɛŋnde Ichipi leŋ niŋ ni, mi Chɛhowa Mɛlɛka nyaa soli nya loŋ.+ Le sabu koŋ ya cho nya dimullo ni le mi la tosa hei.

19 “Te la kou pɛ chiɔɔŋ nyaŋ nduyɛ mi la puɛɛŋ balaŋ o chiɔɔŋ nyaŋ niŋ, la miiŋgu lɛ kɔɔli le laŋ chɔuviaa le. La nɔ mi la mɛi laŋ ndoŋ le mialaa cho nya tɛɛŋ nda, chuaambuaa nɔ ŋfinya le wa, a wanaa vii piaanduaa wa,+ le halikpeŋ mi Chɛhowa Mɛlɛka nyaa dɔu nya sala o nyɛ o nyɛ niŋ nya tosa.+

20 “Te a kendi pɛ ɔlifiima numndaŋ, a nɔ lɛ ma miiŋgu le ma ŋ mɛi kɔɔli waŋ kendioo le. Mialaa cho nya tɛɛŋ nda, chuaambuaa nɔ ŋfinya le wa, a wanaa vii piaanduaa wa nɔ ma lo kɔɔli waŋ ni.+

21 “Te la wa pɛ kilepiiyaŋ kendioo o kpelela nyalaŋ niŋ, la nɔ mi la miiŋgu le ma nya mɛi kɔɔli waŋ kendioo le. Mialaa cho nya tɛɛŋ nda, chuaambuaa nɔ ŋfinya le wa, a wanaa vii piaanduaa wa nɔ ma lo kɔɔli waŋ ni. 22 La loonuŋ maa chiaa nya bɛɛ wa o lɛŋnde Ichipi leŋ niŋ ni. Le sabu koŋ ya cho nya dimullo ni le mi la tosa hei.